ကျောင်းကုန်းမြို့နယ် ဒေါင့်ကြီးကျေးရွာသည် စည်ကားသောရွာကြီးတရွာ ဖြစ်ပါသည်။
တိုက်နယ်ဆေးရုံ၊ အ-ထ-က ကျောင်း၊ စည်ကားစွာ ရောင်းဝယ်ဖောက်ကားနေသော ကုန်စုံဆိုင်၊ အထည်ဆိုင်၊ တိုက်တာ
ပေါများပြီး
အိမ်ကြီးအိမ်ကောင်းများနှင့် စည်ကားစွာ ရှိပါသည်။ ဒေါင့်ကြီးရွာတွင် မောင်ကံညိမ်းသည် ဇနီးနှင့် သားသမီးသုံးယောက်နှင့်နေထိုင်သည်။
သူ၏အမ ဒေါ်သိန်းသည် လွန်ခဲ့သော ၆-နှစ်ခန့်လောက်က ကွယ်လွန်ခဲ့ပါသည်။
တနေ့ ညဘက် မောင်ကံညိမ်း အိပ်ပျော်နေစဉ် ထူးဆန်းသော အိပ်မက်ကို မက်သည်။
အိပ်မက်ထဲတွင် အမေဖြစ်သူ ဒေါ်သိန်း မောကြီးပန်းကြီး ရောက်လာပါသည်။ သူ့မျက်နှာမှာ ပင်ပန်းနေပုံရသည်။
ခေါင်းပေါင်း ပေါင်းထားပြီး မြေသယ်ခြင်းတခုလည်း ကိုင်ထားပါသည်။
သူမခေါင်းပေါင်းပေါင်းထားသော တဘက်က သူမ သေဆုံးစဉ်က မျက်နှာအုပ်ထည့်ထားသော တဘက်ဖြစ်ပါသည်။
သား ထပါဦး၊ သားကို ပြောစရာရှိတယ်။
အမေလေ အမေသေတဲ့အချိန်ကစပြီး အခုအချိန်အထိ မြေတွေရွက်သယ်နေတာ တခါမှ မနားရပါဘူးသားရယ်။ ပင်ပန်းလှပါပြီ။
အမေလေ သားတို့ ငယ်ငယ်ကတည်းက အမေတို့ခြေရင်းဘက်က ဆရာဦးမောင်မြတို့ မြေကို အမေ့မြေဆိုပြီး ငြင်းယူခဲ့ပါတယ်။
မြေအကျယ် တတောင်လောက်ရှိပါတယ်။
ဆရာက ပထမတော့ သူ့မြေကြီး၊ ဒီမအူပင်လေးနဲ့ အမှတ်အသားလုပ်ထားတယ်လို့ ပြောသေးတယ်။
နောက်တော့လည်း မသိန်း စိတ်ချမ်းသာမယ်ဆို ယူပါလို့ပြောခဲ့တယ်။
အမေ မြေယူထားတာ အခု အနှစ် ၃၅-နှစ်လောက်ရှိပြီ။
အဲဒါကြောင့် သားက ဆရာတို့မြေကို ဆရာတို့ ပြန်ယူပါလို့ပြောပြီး အမေ့ကို အလှူတခုလုပ်ပြီး အမျှအတန်းပေးဝေပါ သားရယ်။
အိပ်မက်ကိုလည်း မယုံမကြည်မရှိပါနဲ့။ အမေ မှာတဲ့အတိုင်း ဆက်ဆက်လုပ်ပေးပါ။ အမေ တောင်းပန်ပါတယ်။
အမေလေ သားကို အိပ်မက်ပေးချင်လို့ အိမ်တွင်းနတ်တွေတောင်းပန်ပြီး အိပ်မက် ပေးရတာပါ။
အမေ သွားတော့မယ်နော် သား-ဟုပြောပြီး ထွက်သွားပါသည်။
ထွက်သွားသောအမေ့ကို ငေးကြည့်ရင်း လန့်နိုးသွားသည်။
မောင်ကံညိမ်းလည်း အိပ်မက်အရ အမေပြောသော ဆရာတို့လင်မယားထံသွားပြီး ဆရာရယ်-မအူပင်ဘေးက မြေက ဆရာတို့မြေဆို။
ကျွန်တော်တို့ဘက် တတောက်လောက်ပါတယ် မဟုတ်လား။ ဆရာတို့ပြန်ယူပါ-ဟု ပြောပါသည်။
ဆရာက-ဆရာ မယူပါဘူး သားရယ်။
မဟုတ်တာ ဆရာရယ်၊ ပြန်ယူပါ။ ဆရာ မယူလည်း ကျွန်တော် ပြန်ပေးရမှာပဲ-ဟုပြောပြီး
ဆရာ့ခြံစည်းရိုးကိုဖျက်၍ သူတို့ဘက်ပါသည့် မအူပင်မှစ၍ မောင်ကံညိမ်းကိုယ်တိုင် အတင်းကာပေး လိုက်ပါသည်။
ထို့နောက် အိမ်တွင် ဘုန်းကြီးသုံးပါးပင့် သင်္ကန်းကပ်၊ ဆွမ်းဆက်ကပ်၍ အမေအား အမျှအတန်း ပေးဝေလိုက်ပါသည်။
ထိုနေ့ည၌ မောင်ကံညိမ်း အိပ်မက်တွင် အမေနှင့်တွေ့ရသည်။
အမေသည် ပထမအိပ်မက်ထဲတွင် တွေ့ရသည့် မြေသယ်ခြင်းတောင်းနှင့် မဟုတ်တော့။
မောမောပန်းပန်းလည်း မဟုတ်တော့။ ၀တ်ကောင်းစားလှနှင့် ရွှင်ပျသောမျက်နှာနှင့် ဖြစ်သည်။
သူ့သားဖြစ်သူ၏ လက်ကလေးကိုကိုင်ကာ ကျေးဇူးတင်လိုက်တာ သားရယ်၊ အခု အမေ မြေမသယ်ရတော့ဘူး။
လွတ်လွတ်လပ်လပ် သွားလို့လာလို့ရနေပြီ သား။
ဒါကြောင့် အမေ သွားတော့မယ်နော်-ဟု ပြောဆိုကာ နှုတ်ဆက်၍ ထွက်ခွါသွားပါတော့သတည်း။
(ကာယကံရှင်၏ ခွင့်ပြုချက်ဖြင့် တင်ပြပါသည်)
ကြည်ရွှင်အေး (ကျောင်းကုန်း)
(မြတ်မင်္ဂလာ ၂၀၁၀-ခု ဇူလိုင်လ)
forver friend မှာ
0 ကွန်မန့်ရေးရန်:
Post a Comment