Saturday, June 7, 2014

စတော့အိတ်ချိန်း မတည်ထောင်နိုင်လျှင် အများပိုင်ကုမ္ပဏီများ ငွေလိမ်လည်နိုင်သည်ဟု ဒု-၀န်ကြီးဆို ...........

မောင်သင်တုန်း

မြန်မာနိုင်ငံတွင် စတော့အိတ်ချိန်းဈေးကွက် တည်ထောင်နိုင်ခြင်းမရှိလျှင် မသိနားမလည်သည့် အများပြည်သူများ၏ ရင်နှီးငွေများကို အများပိုင်ကုမ္ပဏီများက အကြောင်းပြပြီး လိမ်လည်သွားနိုင်သည်ဟု ဘဏ္ဍာရေးဝန်ကြီးဌာန ဒုတိယ၀န်ကြီး ဒေါက်တာမောင်မောင်သိမ်းက အမျိုးသားလွှတ်တော် ဒသမ ပုံမှန်အစည်းအဝေး ဇွန် ၄ ရက်တွင် ပြောကြားလိုက်သည်။

“ မတည်ထောင်နိုင်ရင် အများပြည် သူတွေကို မသမာသူတွေက အများပိုင်ကုမ္ပဏီဗန်းပြပြီး ငွေတွေ လိမ်သွားမယ့် အဖြစ်မျိုးဖြစ်လာနိုင်တယ်။ ကျွန်တော်တို့ဆီမှာ အရင်အစိုးရလက်ထက်က ငွေစုငွေချေး အသင်းနာမည်နဲ့ လုပ်သွားဖူးတော့ခါးစည်း ခံခဲ့ရတဲ့ သာဓကတွေရှိပါတယ် ” ဟု ၎င်းက ပြောသည်။

လက်ရှိအချိန်တွင် မြန်မာနိုင်ငံ၌ စတော့အိတ်ချိန်းဈေးကွက်ကို စိတ်ချယုံကြည်ရသော အများပိုင်ကုမ္ပဏီ ခြောက်ခု ၀န်းကျင်ဖြင့် ၂၀၁၅ အောက်တိုဘာတွင် ဆောင်ရွက်သွားမည်ဟု ဆိုသည်။ အခုအခါ မြန်မာ နိုင်ငံတွင် အများပိုင်ကုမ္ပဏီစုစုပေါင်း နှစ်ရာကျော်အထိ တည်ထောင်ဆောင်ရွက်လျက်ရှိသည်။

“ အများပိုင်ကုမ္ပဏီ အားလုံးရဲ့ရှယ်ယာတွေကို ရောင်းချပေးမှာမဟုက်ပါဘူး။ အများပိုင်ကုမ္ပဏီတွေထဲက ယုံကြည်စိတ် ချရတဲ့ကုမ်္ပဏီတွေကိုသာ ရောင်းချပေးသွား မှာဖြစ်တယ်။ ကုမ္ပဏီငါးခု၊ ခြောက်ခုလောက်နဲ့ စသွားနိုင်မှာပါ ” ဟု ဒုတိယ၀န် ကြီး ဒေါက်တာ မောင်မောင်သိမ်းက ပြောသည်။

စတော့အိတ်ချိန်း ဈေးကွက်အတွက် လက်ရှိအချိန်တွင် သတ်မှတ်ထားသော စံချိန်စံညွှန်းပြည့်မီသည့် ရှယ် ယာရောင်း မည့်အများပိုင်ကုမ်္ပဏီများထဲမှ နှစ်ခုနှင့် MOU ထိုးထားပြီးဖြစ်သည်။ ခိုင်မာမှုရှိသော ကုမ္ပဏီ များကိုစတော့အိတ်ချိန်းတွင် ရှယ်ယာထုတ်ရောင်းနိုင်သည့်အရည်အသွေးများရှိစေရန် ပြင်ဆင်မှုများကို ဆောင်ရွက်ပေးလျက်ရှိသည်။

မြန်မာနိုင်ငံ၏ စတော့အိတ်ချိန်းဈေး ကွက်ကို ဂျပန်နိုင်ငံဘဏ္ဍာရေးဝန်ကြီးဌာန၊ ဂျပန်ဒိုင်ဝါကုမ္ပဏီနှင့် မြန်မာ့စီးပွားရေး ဘဏ် သုံးဦးပိုင်ဆောင်ရွက်သွားမည်ဖြစ်သည်။ မြန်မာနိုင်ငံက ၅၁ ရာခိုင်နှုန်း ပိုင်ဆိုင်ပြီး ဂျပန်ကုမ်္ပဏီနှစ်ခုက ၄၉ ရာခိုင် နှုန်းပိုင်ဆိုင်မည်ဖြစ်ကာ ရင်းနှီးမြှုပ်နှံမှု ပမာဏ ကျပ် ၃၂ ဘီလီယံ ဖြစ် သည်။

ဧရာဝတီတိုင်းအမျိုးသားလွှတ်တော်ကိုယ်စားလှယ် ဦးဉဏ်လင်းက “ ပြည်သူတွေက စတော့အိတ်ချိန်း အရင်းအနှီးဈေး ကွက်များနဲ့ အကျွမ်းတ၀င်မရှိပါဘူး။စတော့ဈေးကွက်ရဲ့ သဘောသဘာဝရည် ရွယ်ချက် မအောင်မြင်ရင် ဖြစ်လာမယ့် အကျိုးကျေးဇူးနဲ့ ဆိုးကျိုးတွေကို ပြည်သူတွေသိဖို့လိုအပ်တယ် ” ဟု အမျိုးသား လွှတ်တော် ဒသမပုံမှန်အစည်းအဝေးတွင် မေမြန်းခဲ့သည်။

အကျိုးကျေးဇူးအဖြစ် ငွေပိုငွေလျှံရှိ သောပြည်သူများအတွက် ရင်းနှီးမြှုပ်နှံနိုင်ရန် နေရာတစ်ခုရရှိလာ သကဲ့ သို့ ကုမ္ပဏီများအနေဖြင့် လုပ်ငန်းတိုးချဲ့ရန် ငွေလိုသည့် အချိန်မှာ ဘဏ်များမှ အတိုးနှုန်းများဖြင့် ချေးငွေယူ စရာမလိုဘဲ ရှယ်ယာများထုတ် ရောင်းပြီး ငွေရင်းရမည်ဖြစ်သည်။ ကုမ္ပဏီ များလုပ်ငန်းတိုးချဲ့လာနိုင်လျှင် အလုပ် အကိုင်အခွင့်အလမ်း ရနိုင်သကဲ့သို့အမြတ် ရရှိပါက ခွဲဝေပေးနိုင်မည်ဖြစ်သည်။

စတော့အိတ်ချိန်း ဈေးကွက်ကို အကောင်အထည်ဖော်နိုင်ရန် အပိုင်းသုံးပိုင်းဖြင့် တစ်ပြိုင်နက်တည်းဆောင် ရွက်လျက် ရှိသည်။ စတော့အိတ်ချိန်း ဈေးကွက်အုပ် ချုပ်မည့်အဖွဲ့အစည်း ထူထောင်ခြင်း၊ စတော့ဈေးကွက် ထူထောင်ခြင်းနှင့် စတော့ရှယ်ယာဝေစုရောင်းမည့် ကုမ္ပဏီများကို ပြင်ဆင်ပေးခြင်းလုပ်ငန်းများကို ဆောင် ရွက်မည်ဖြစ်သည်။

Reactions:

0 ကွန်မန့်ရေးရန်:

Post a Comment