လက်ပံတောင်းတောင် ကြေးနီးစီမံကိန်းအား ကန့်ကွက်နေသော
သပိတ်စခန်းများ ဖျက်သိမ်းပေး
ရန် ပြည်ထဲရေးဝန်ကြီးဌာနမှ
ကြေညာထားသော်လည်း
တိကျသေချာသည့် အဖြေတခု မရမချင်း ဆက်လက် ဆန္ဒပြ သွားမည်ဖြစ်ကြောင်း ပင်မ သပိတ်စခန်းတွင် ဆန္ဒပြနေသော မန္တလေး မစိုးရိမ်ကျောင်းတိုက်မှ ဦးတေဇ က မိန့်ကြားသည်။
“ဦးဇင်းတို့ ပြန်သွားရင် နောက်က ချိနဲ့သွားမယ့် အင်အားကို မကြည့်ရက်ဘူးလေ။ ပြောင်းပြန် အရွေ့တခုတော့ လိုချင်တယ်” ဟု မိန့်ဆိုသည်။
ဆန္ဒပြ သပိတ်စခန်းများတွင် မန္တလေး၊ ပခုက္ကူနှင့် မုံရွာမှ သံဃာအပါး ၄ဝဝ ခန့်နှင့် လူအင်အား ၁ဝဝ ခန့် ရှိနေသည်။ အင်္ဂါနေ့က ပြည်ထဲရေးဌာနမှ သတိပေးချက် ထွက်ပေါ်လာပြီးနောက် သံဃာ အပါး ၁ဝဝ ခန့် တိုးမြှင့်အားဖြည့်လာ
ခြင်းလည်း ဖြစ်သည်။
လုံခြုံရေး ရဲအင်အားကလည်း ၁ဝဝဝ ခန့်ထိ တိုးမြှင့်ချထားကြောင်း သိရသည်။
သပိတ်ခေါင်းဆောင်တဦးဖြစ်သည့် မအေးနက် ကလည်း “ကျမတို့ လုံးဝ နောက်မဆုတ်ပါဘူး။ တကယ်လို့ ဒီ မှောက်နေတဲ့ သပိတ်ကို လှန်ရမယ်ဆိုရင် ဒီလက်ပန်းတောင်းတောင် စီမံကိန်း ဖျက်သိမ်းမယ်ဆိုတဲ့ စကားပဲ ကြားချင်ပါတယ်” ဟု မဇ္ဈိမကို ပြောသည်။
ပုဒ်မ ၁၄၄ ထုတ်ပြန်ထားသော ကန့်သတ်နယ်မြေဖြစ်၍ ၎င်းစီမံကိန်းသို့ သတင်း မီဒီယာသမားများ ဝင်ရောက်ခြင်း မပြုရန် ဝမ်ပေါင်ရုံးအတွင်းရှိ လုံခြုံရေး ရဲအရာရှိက နံနက် ၁ဝ နာရီခန့်တွင် အသံချဲ့စက်ဖြင့် သုံးကြိမ်တိုင် သတိပေး ခဲ့သည်။
ဒေသခံများနှင့် သံဃာတော်များမှာ နိုဝင်ဘာလ ၁၉ ရက်နေ့မှ စတင် သပိတ်မှောက်ကြပြီး ယခု သပိတ်စခန်းပေါင်း ၆ ခု ရှိနေသည်။ အဆိုပါ သံဃာတော်များ၏ ဆွမ်းအတွက် မုံရွာမြို့ခံ အလှူရှင်များနှင့် ဒေသခံများက တာဝန်ယူပေး လျက် ရှိသည်။
“စံပယ်တောင်ကို ဖြိုခဲ့တဲ့အတွက် အခု ကံကုန်း(ရွာ)မှာ ရေသောက်လို့ မရတော့ဘူး။ ဒီ လက်ပံတောင်း တောင်တွေ ကို ဖြိုလိုက်မယ်ဆိုရင် မိုးရွာလို့ စီးဆင်းသွားတဲ့ရေတွေဟာ ချင်းတွင်းမြစ်ထဲ ရောက်မယ်။ ပြီးတော့ ဧရာဝတီမြစ်ကို စီးမယ်။ အဲဒီတော့ ဒီရေ သောက်သုံးတဲ့လူတွေ ရောဂါတွေ အမျိုးမျိုးရမယ်” ဟု ဦးဆောင်လှုပ်ရှားသူ မအေးနက် က ပြောသည်။
သတင်းပေးပို့ချိန်အထိ လုံခြုံရေးများနှင့် သပိတ်အင်အားစုအကြား အကြမ်းဖက်မှု တစုံတရာ မရှိသေးပေ။ ထိုသပိတ် စခန်းများအား အကယ်၍ အကြမ်းဖက်ဖြိုခွင်းပါက “ပိုမိုဆိုးရွားသော ရလဒ်များသာ ရလာမည်” ဟု ဗကသများ အဖွဲ့ချုပ်နှင့် မုံရွာခရိုင် ကျောင်းသားများသမဂ္ဂက ကြေညာထားသည်။
ထိုကြေးနီစီမံကိန်းကို မြန်မာ့စီးပွားရေး ဦးပိုင်လီမိတက်နှင့် တရုတ်ဝမ်ပေါင်
ကုမ္ပဏီတို့က ပူးပေါင်းဆောင်ရွက်နေပြီးတောင်ပတ်ဝန်းကျင်ရှိ ကျေးရွာပေါင်း
၂၇ ရွာမှ လယ်မြေ ဧကပေါင်း ၇,၈ဝဝ ကို သိမ်းဆည်းထားသည်။
(မဇ္ဈိမ)
0 ကွန်မန့်ရေးရန်:
Post a Comment