အကြွေး

‘အကြွေး’ဆိုတဲ့အသံကို ကြားရရုံမျှနဲ့ နားကြောစိမ့်လောက် အောင် ကြောက်လန့်စိုးရွံ့တတ် ကြပါတယ်။ ကျွန်တော်တို့ လူမှု အသိုင်းအဝိုင်းတစ်ခုတည်း မဟုတ် ဘဲ ဘယ်အသိုင်းအဝိုင်းမှာမဆို’အကြွေး’နဲ့ ပတ်သက်လာရင် ထိတ်လန့်တကြားနဲ့ လုံးဝလက်မခံလိုကြတာဟာ ဖြစ်ရိုးဖြစ်စဉ် အလေ့အထတစ်ခု ဖြစ်ပါတယ်။ ငွေရေးကြေးရေးနဲ့ ပတ်သက်လို့ပဲ ဖြစ်ဖြစ်၊ လူမှုရေးအရ ပြန်လည် တုံ့ပြန် ကျေးဇူးပြုရမယ့် အနေအထားကြောင့်ပဲဖြစ်ဖြစ်၊ တင်ရှိလာတဲ့ ဘယ်လို’အကြွေး’မျိုးကိုမဆို သံသရာဘေး မျှော်တွေးပြီး ရှောင်ပြေး ချင်ကြတဲ့နေရာမှာ ကျွန်တော်တို့ မြန်မာလူမျိုးတွေက ထိပ်ဆုံးကပါ။

ဒါပေမဲ့ ”အကြွေးရရင် ဆင်တောင်သက်စေ့ဝယ်စီးမယ်”၊ ”အကြွေးတင်ရှင် ဘုရင်ဆပ်လိမ့်မယ်” စတဲ့ စတဲ့စကားတွေကိုတော့ ပြောဆိုတတ်ကြပြီး ”ကြွေးတင် ကျွန် ဖြစ်”ဆိုတဲ့ စကားနဲ့အဆုံးသတ် ကြတာကိုပဲ တွေ့ရတာများပါတယ်။ ၂ဝ၁၃ ခုနှစ်ဇန်နဝါရီလ ၂၇ ရက် နေ့က ဧရာဝတီတိုင်း ဓနုဖြူမြို့မှာ ပြုလုပ်တဲ့ လယ်ယာစိုက်ပျိုးရေးနဲ့ ဆည်မြောင်းဝန်ကြီးဌာနနဲ့ မြို့နယ် တောင်သူလယ်သမားတွေရဲ့တွေ့ ဆုံပွဲမှာ စိုက်ပျိုးစရိတ် ချေးငွေတွေ တွက် ”အကြွေး ကျေအောင်၊ လယ်သမားတွေအနေနဲ့ ထမင်းတစ်နပ်သာစားပြီး ဆပ်ကြဖို့၊ သံ သရာကြွေးဆိုတာတင်ဖို့မကောင်း ရုံသာမက အကြွေးမကျေရင် နောင်ဘဝမှာ ကျွန်ဖြစ်လိမ့်မယ်”လို့ လူကြီးတစ်ယောက်က ပြောကြားခဲ့ကြောင်း သိရှိရပါတယ်။

ဒီတော့ ကျွန်တော်တို့ မြန်မာတစ်နိုင်ငံလုံးဟာဘယ်ခေတ်၊ဘယ်ကာလက ဘယ်လိုအကြွေးတွေကိုများ ပြေကျေအောင် မဆပ်နိုင်ခဲ့ကြတဲ့အတွက် အင်္ဂလိပ်နယ်ချဲ့တို့ရဲ့ကျွန်ဖြစ်ခဲ့ရတာပါလိမ့်လို့ စဉ်းစား မိပြီး ကျွန်ဘဝမှာလည်း နယ်ချဲ့ အစေအပါး၊ ချစ်တီးကုလားတွေရဲ့ အကြွေးကို မဆပ်နိုင်ကြတဲ့ တောင်သူလယ်သမားတွေဟာ လယ်ယာ မြေတွေ၊ လယ်လုပ်ကိရိယာ ထွန်ထယ်နဲ့နွားတွေကို မတရားအသိမ်းဆည်းခံကြရပြီး အမျိုးသမီးငယ်လေးများပါ သိမ်းပိုက်ခံခဲ့ရတဲ့အဖြစ်တွေကိုဆက် လက်တွေးတောမိ ပါတယ်။ အဲဒီအချိန်က လယ်သမားတွေဟာ ချစ်တီးကုလားတွေထံက ငွေချေးပြီး ပြန်မဆပ်နိုင်လို့၊ လယ်သိမ်း၊ ယာသိမ်း၊ လူသိမ်းခံခဲ့ရတာဖြစ်ပေမယ့် ဒီနေ့ဒီအချိန်မှာတော့ ခရိုနီနဲ့အပေါင်း အပါတွေထံကငွေလည်း မချေးရဘဲ ဟိုအကြောင်းပြ၊ဒီအကြောင်းပြပြီး လယ်တွေအသိမ်းခံရတာ။ ကိုယ့်လယ်ကွက်ထဲမှာ သူရင်းငှားပြန်လုပ်ရတာ စတဲ့အဖြစ်တွေကိုပါ ဆက်လက်တွေးတောမိရာက အခြားကျောချမ်းစရာ အကြွေးမြီကိစ္စတွေကိုလည်း ထပ်မံစဉ်းစားမိပြန်ပါတယ်။ပွင့်လင်းလူ့အဖွဲ့အစည်းဆိုတဲ့ အသံနဲ့အတူ အရှုပ်ထုပ်တွေကို တဖြည်းဖြည်း ဖြည်ပြလာတော့ ဘယ်သူတွေကဘယ်အချိန်တုန်းက ဘာတွေလုပ်ကိုင်ဖို့ ချေးယူခဲ့ကြတယ်ဆိုတာမသိရပေမယ့်ကျွန်တော်တို့ နိုင်ငံက ပြန်လည်ပေးဆပ်ရမယ့်   ‘အကြွေး’တွေက တနင့်တပိုး ရှိနေတယ်ဆိုတာ သိလာရပါတော့တယ်။ အကြွေးရှင်တွေကတော့ ကမ္ဘာ့ဘဏ်၊ အာရှဖွံ့ဖြိုးရေးဘဏ်၊ ပဲရစ်ကလပ်ဝင် ၁၁ နိုင်ငံစတာတွေလို့ ဆိုပါတယ်။ ဂျပန်နိုင်ငံရဲ့ ဂျပန်နိုင်ငံတကာကော်ပိုရေးရှင်းဘဏ် JBIC ရဲ့ပေါင်းကူးချေးငွေဆိုတဲ့ အကူအညီနဲ့ ကမ္ဘာ့ဘဏ်၊ အာရှဖွံ့ ဖြိုးရေးဘဏ်တို့ရဲ့ ကြွေးဟောင်းတွေကိုဆပ်ပြီး ကြွေးသစ်တွေ ထပ်ယူခဲ့ပါသတဲ့။ JBIC ထံက အမေရိကန် ဒေါ်လာသန်း ၄၃ဝ ချေးယူပြီး ကမ္ဘာ့ဘဏ်ကို ဆပ်တယ်။ ကမ္ဘာ့ဘဏ်ထံမှ အမေရိကန်ဒေါ်လာ သန်း ၄၄ဝ အသစ်ထပ်ချေးပြီး JBIC ကို အကြွေးပြန်ဆပ်ပါသတဲ့။

အာရှဖွံ့ဖြိုးရေးဘဏ်နဲ့လည်း အလားတူပုံစံအတိုင်းဖြေရှင်းပြီး အာရှဖွံ့ဖြိုးရေးဘဏ်က အမေရိ ကန်ဒေါ်လာ ၅၁၂ သန်း အသစ်ချေးခဲ့ပါသတဲ့။ ဒီတော့ အကြွေး တွေကတင်ဆဲ၊ ရှိမြဲပဲပေါ့။ ပဲရစ်ကလပ်ဝင် နိုင်ငံတွေကလည်း မြန်မာနိုင်ငံအပေါ်တင်ရှိနေတဲ့ ကြွေးမြီတွေထဲက အမေရိကန် ဒေါ်လာ ၆ ဒသမ ၁၉၂ ဘီလျံ ခန့်လျှော့ချပေးခဲ့တယ်လို့ သိရှိရပြီး ကျန်တဲ့အကြွေး အမေရိကန်ဒေါ် လာ ၄ ဒသမ ၁၃၈ ဘီလျံကို ဆိုင်းငံ့ကာလ ၇ နှစ်အပါအဝင် ၁၅ နှစ် အတွင်းပြန်လည်ပေးဆပ်ကြဖို့ လိုက်လျော ခွင့်ပြုတယ်လို့သိရပါတယ်။ ၂ဝ၁၃ ခုနှစ် ဖေဖော်ဝါရီလ ၃ ရက်နေ့က နေပြည်တော် စက်မှုဝန်ကြီးဌာနမှာ ပြုလုပ်တဲ့ ပြည်ထောင်စုဝန်ကြီး၊ ဒုဝန်ကြီးတွေနဲ့ မီဒီယာတွေ့ဆုံပွဲမှာ ဘဏ္ဍာရေးဝန်ကြီးက မြန်မာတစ်နိုင်ငံလုံးရဲ့ ပြန်လည်ပေးဆပ်ဖို့ ကျန်ရှိနေတဲ့ အကြွေးတွေက လက်ရှိအချိန်မှာ အမေရိကန်ဒေါ်လာ ၉ ဘီလျံကျော် ကျန်သေးတယ်လို့ ဆိုပါတယ်။

ဒီတော့ အထက်က ဟောပြော ချက်အတိုင်းပြောရရင် ဒီကြွေးတွေ ကို ပြန်မဆပ်နိုင်လို့ကတော့ သံသရာကြွေးအဖြစ် အဲဒီ နိုင်ငံတွေရဲ့ကျွန်ဘဝကနေပြီး လွတ်လမ်းကို မမြင်နိုင်တော့ပါဘူး။ ဒါကြောင့် လယ်သမားတွေသာမကတော့ဘဲတစ်နိုင်ငံလုံး ဥပုသ်စောင့်ကြတာ ပေါ့ဗျာ။ ဒါပေမဲ့ တစ်ခုတော့ ရှိသေးတယ်ဗျ။ လယ်သမားတွေကို ထမင်းအငတ်ခံပြီး အကြွေးဆပ်ပါလို့ ပြောနေတဲ့အချိန်မှာပဲ အခြား တစ်ဖက်မှာတော့ ထမင်းချက်က ဘယ်နှယောက်၊ မာလီကဘယ်နှယောက်၊ အိမ်ဖော်က ဘယ်နှယောက်၊ အိမ်၊ ကားစတဲ့အဆောင် အယောင်တွေက ဘယ်လိုဆိုပြီး တောင်းဆိုနေကြတာတွေ ကြားသိ လာရပြန်တော့ ကြည့်လည်းလုပ်ကြ ပါဦးလို့ အော်ဟစ်ရမလိုဖြစ်နေပါ ပြီ။

ကျွန်တော်တို့နိုင်ငံရဲ့ ကြွေးရှင် နိုင်ငံတွေကတော့ အကြွေးပြန်ဆပ်နိုင်ဖို့အတွက် ကျွန်တော်တို့နိုင်ငံ ဖွံ့ဖြိုးတိုးတက်မှသာ အဆင်ပြေမယ် ဆိုတာကိုသိရှိနားလည်ကြပါတယ်။ ဒါကြောင့်လည်း ချေးငွေတွေသာမက အာရှဖွံ့ဖြိုးရေးဘဏ်အနေနဲ့ နည်းပညာ ထောက်ပံ့မှုအစီအစဉ်မှ တစ်နှစ်ကို အမေရိကန်ဒေါ်လာ ၃ သန်း ထောက်ပံ့သွားမယ့်အကြောင်း သိရပါတယ်။ မြန်မာနိုင်ငံရဲ့လမ်းပန်း ဆက်သွယ်မှုကောင်းမွန်ရေး၊ စွမ်းအင်ကဏ္ဍ၊ ဆည်မြောင်းတာတမံများကဏ္ဍ၊ ပညာရေးစီမံကိန်းတွေနဲ့ အခြားကဏ္ဍတွေမှာ ရင်းနှီးမြှုပ်နှံမှုတွေ ရရှိအောင်ရည်ရွယ်ချေးငှားကြမယ်လို့သိရှိရပါတယ်။ ဒီလိုပါပဲ National Community Driven Development Project  အတွက် မြန်မာနိုင်ငံရဲ့ ကျေးရွာပေါင်း ၆၄ဝ မှာ ကျောင်းတွေ၊ ကျန်းမာရေးဆေး ပေးခန်းတွေ၊ လမ်းတွေ၊ စိုက်ပျိုး ရေးလုပ်ငန်းတွေအတွက် ၆ နှစ် ကာလအတွင်း အမေရိကန်ဒေါ်လာ သန်း ၈ဝ ကို ကမ္ဘာ့ဘဏ်ကထောက်ပံ့ကူညီမယ်လို့ သိရပါသေးတယ်။ သြစတြေးလျနဲ့ ဗြိတိန်နိုင်ငံတို့ ကလည်း ကလေးသူငယ်နှစ်သန်း ကျော်အတွက် အရည်အသွေး ကောင်းမွန်တဲ့ မူလတန်း ပညာသင် ကြားခွင့်ရရေး၊ လယ်သမားတွေ ဝင်ငွေတိုးရေး၊ အမျိုးသမီးကျန်းမာ ရေးဝန်ဆောင်မှု ပိုမိုတိုးတက်ရေး၊ လူမျိုးစုတိုင်းရင်းသား ဒေသတွေမှာ ငြိမ်းချမ်းရေးနဲ့ ဖွံ့ဖြိုးတိုးတက်ရေး အတွက်လက်တွေ့ကျတဲ့ စီးပွားရေး ထောက်ပံ့မှု၊ ရင်းနှီးမြှုပ်နှံမှုမြှင့်တင်နိုင်ဖို့တွေကို ရည်ရွယ်ပြီး ဗြိတိန်နိုင်ငံ အပြည်ပြည်ဆိုင်ရာဖွံ့ဖြိုးတိုး တက်ရေးဌာန DFID နဲ့ သြစတြေး လျနိုင်ငံ အပြည်ပြည်ဆိုင်ရာ ဖွံ့ဖြိုး တိုးတက်ရေးအေဂျင်စီ AUSAID တို့မှတစ်ဆင့် ၂ဝ၁၅ ခုနှစ်အထိ အမေရိကန်ဒေါ်လာသန်း ၅ဝဝ ပံ့ ပိုးသွားမယ်လို့ သိရပါတယ်။ ကမ္ဘာ့ဘဏ်ကလည်း မြန်မာနိုင်ငံရဲ့ စိုက် ပျိုးရေးအပါအဝင် အခြားဘဏ္ဍာ ငွေထောက်ပံ့ရမယ့်ဦးစားပေးနယ်ပယ်တွေအတွက် နှစ်ရှည်အတိုးမဲ့ ချေးငွေအမေရိကန်ဒေါ်လာ ၁၆၅ သန်း ထပ်မံချေးပေမယ်လို့သိရတဲ့ အပြင် မြန်မာနိုင်ငံသား နှစ်သိန်း ကျော်ကို ၂ဝ၂ဝပြည့်နှစ်မှာ အသေး စားချေးငွေတွေ ထုတ်ချေးပေးနိုင်ဖို့ အသေးစားဘဏ္ဍာငွေ ထောက်ပံ့ ရေးအဖွဲ့အစည်း တည်ထောင်ပြီး ACLEDA  ဘဏ်မှာ ကမ္ဘာ့ဘဏ်က အမေရိကန်ဒေါ်လာနှစ်သန်း မတည် ထားကြောင်းကို သိရှိရပါတယ်။ အဲဒီလိုပါပဲ။ အာရှဖွံ့ဖြိုးရေးဘဏ်ကလည်း ပညာရေးဖွံ့ဖြိုးတိုးတက်ရေး၊ ဒေသတွင်း ပူးပေါင်းဆောင်ရွက်ရေး၊ ခရီးသွားလုပ်ငန်းတွေ၊ အရပ်ဘက် လူ့အဖွဲ့အစည်းတွေ၊ အညာကျေးလက်ဒေသဖွံ့ဖြိုးရေး အပါအဝင် စီးပွားရေးကဏ္ဍအသီး သီးမှာ အထောက်အပံ့ဖြစ်စေဖို့ အမေရိကန် ဒေါ်လာသန်း ၅ဝ ထပ်မံထုတ်ချေး ပေးဦးမယ်လို့ သိရပါတယ်။

ပဲရစ်ကလပ်ကတော့ တစ်နှစ်တာအတွင်း နိုင်ငံတော်အသုံးစရိတ်လိုငွေ (Budget-Deficit) ပြသနေမှု ကို ၅ ရာခိုင်နှုန်းအောက် လျော့ကျအောင် ဆောင်ရွက်နိုင်ရင် သူတို့ ကလပ်ရဲ့ ကြွေးမြီ ၇၅ ရာခိုင်နှုန်းအ ထိ လျှော့ချပေးမယ်လို့ ဆိုပါတယ်။ဒီလို အကြွေးရှင်နိုင်ငံတွေနဲ့ ကမ္ဘာ့ဘဏ်၊ အာရှဖွံ့ဖြိုးရေးဘဏ်တွေက ငွေထုတ်ချေးပေးရုံသာမက အကြွေးတွေ ပြန်လည်ပေးဆပ်နိုင်အောင် တိုင်းပြည်ဖွံ့ဖြိုးတိုးတက်ရေး အတွက်လည်း အကူအညီအထောက် အပံ့တွေပေးကြပါသေးတယ်။ ကျွန်တော်တို့ကသာ ကြိုးစားရင်အကြွေးတွေကို ထပ်လျှော့ပေးဦးမယ်ဆိုပြီး ဝိုင်းဝန်းကူညီနေတာကို တွေ့ရတော့ ကျွန်တော်တို့ကလည်း ကျွန်တော် တို့ရဲ့ အမျိုးသားဂုဏ် အင်္ဂါတစ်ရပ် ဖြစ်တဲ့ ရိုးသားကြိုးစားမှုကိုပြသဖို့ လိုအပ်လာပြီလို့ ထင်ပါတယ်။

ဟုတ်ပါတယ်။ ကျွန်တော်တို့ရဲ့ သမ္မတကြီးက မိဘပြည်သူတွေကို ဒုတိယအကြိမ် ပြောကြားခဲ့တဲ့ ရေဒီယိုမိန့်ခွန်းထဲမှာ အစိုးရအနေနဲ့ နိုင်ငံတကာချေးငွေ အကူအညီ တွေကို ပြည်သူ့အကျိုးစီးပွားအ တွက် ပွင့်လင်းမြင်သာမှုရှိရှိ အသုံး ပြုသွားပါမယ်လို့ ကတိပြုခဲ့တာကို ပထမဆုံးတွေ့ရမှာဖြစ်ပါတယ်။ဒုတိယအနေနဲ့ကတော့ နိုင်ငံ တစ်ဝန်းမှာရှိတဲ့ တောင်သူလယ် သမားတွေအနေနဲ့ ဧပြီလ ၁ ရက် နေ့ကစပြီး လယ်ယာမြေတွေကို တရားဝင်ပေါင်နှံခွင့်ရတော့မှာ ဖြစ် လို့ နိုင်ငံတကာကြွေးမြီကိစ္စတွေမှာ JBIC က ဝင်ပြီးဖြေရှင်း ပေးသလို လယ်ယာမြေတွေကို ပေါင်နှံလို့ရတဲ့ ငွေနဲ့စိုက်ပျိုး စရိတ်ချေးငွေတွေ ပြန်ဆပ်နိုင်မှာလို့ဆိုပါတယ်။ ဒါပေမဲ့ ဒီနည်းလမ်းဟာ လုံးဝဥဿုံအား ကိုးလောက်တဲ့ နည်းလမ်းမဟုတ်ဘူးလို့ ထင်မြင်ယူဆပါတယ်။ ဘာကြောင့်လဲဆိုတော့ အပေါင်ထားရတဲ့လယ်ယာမြေတွေဟာ ပြန်လည်ပြီး မရွေးနိုင်ရင် ဆုံးရှုံးရမှာပဲမဟုတ်ပါလား။ ဒါကြောင့်တစ်နပ်စား ကိုယ်တော်ပြောကြားသလို ထမင်း တစ်နပ်အငတ်ခံပြီး အကြွေးဆပ် ခိုင်းတဲ့ နည်းလမ်းထက် ….စိုက်ပျိုးရာသီတိုင်းမှာ ကြုံတွေ့တတ်တဲ့ ရာသီဥတုဖောက်ပြန်မှုတွေ၊ ရေလွှမ်းမိုးမှုတွေ၊ ဆားငန်ရေဝင်မှုတွေ၊ ဆည်မြောင်းတာ တမံစိတ်မချရမှုတွေ၊ စပါးအထွက် နှုန်းလျော့ကျမှုတွေ၊ အရည်အ သွေးကောင်းမွန်တဲ့ မျိုးစပါးတွေ ဖြန့်ဖြူးနိုင်ဖို့၊ စိုက်ပျိုးရေး နည်း ပညာသစ်တွေ ဖြန့်ဖြူးထောက်ပံ့ ပေးနိုင်ဖို့ အာမခံချက်ရှိတဲ့ ပိုးသတ် ဆေးတွေ ပံ့ပိုးနိုင်ဖို့၊ လယ်ယာလုပ် ငန်းခွင်ကိုပစ်မထားဘဲ အမြဲ စောင့် ကြည့်စစ်ဆေးကူညီနိုင်ဖို့ စတဲ့ စတဲ့ အချက်တွေအတွက် ကျွမ်း ကျင်သူတွေ အကြံပြုကြတဲ့အတိုင်း Micro Plan, Master Plan တွေ ချမှတ်လုပ်ဆောင်ကြဖို့ သီးနှံလျော် ကြေးပေးနိုင်ရေးအတွက် သီးနှံအာမခံထားနိုင်ရေးဆိုင် ရာသီးနှံ မူဝါဒများ ချမှတ်နိုင်ဖို့နဲ့ အခြားအ ကြံပြုချက်တွေကို အချိန်မဆွဲဘဲ လျင်လျင်မြန်မြန် ကြိုးပမ်းအား ထုတ်ပြီး လယ်သမားတွေကို ကူညီသင့်ပြီ လို့ထင်မြင်မိကြောင်း ပါခင်ဗျား။

ဆီကိုရေချိုး၊ ဆေးရိုးမီးလှုံ၊ စပါးတောင်လိုပုံပြီး တောင်သူလယ်သမားတွေလည်း ကြွေးကင်းပါစေ၊ နိုင်ငံတော်ကြီးလည်း ကြွေးရှင်းပါစေ။

ခင်မောင်အေး(ချောက်)
Popular Myanmar News Journal

Posted in: ဆောင်းပါး