မိုးမခက စုစည်းသည်May 2 (မေလ ၂ ရက်နေ့ သတင်းများ)

မေ ၂ သတင်းများ 

ကျမ်းသစ္စာ ကျိန်ဆိုပြီးသော်

ကာတွန်း - ကူမိုးကြိုး မိုးမခ

ကာတွန်းမောင်ရစ် - ရန်သူကို မိတ်ဆွေဖွဲ့ကြစို့ ဆိုတော့ မိတ်ဆွေကိုကော ဘယ်လိုလဲ …

မေ ၂၊ ၂၀၁၂ မိုးမခ

လွှတ်တော်ပြင်ပနိုင်ငံရေးလည်း ဆက်လုပ်မည်ဟု ဒေါ်အောင်ဆန်းစုကြည် ပြော

By featured, အောင်သက်ဝိုင်း on May 2, ဧရာဝတီ

ဖွဲ့စည်းပုံ ပြင်ရန် ပြည်သူများ မတောင်းဆိုဟု ဦးဌေးဦး ပြော

By featured, အောင်သက်ဝိုင်း on May 2, ဧရာဝတီ

နာဂစ်ဒေသ ပြန်လည်ထူထောင်ရေး တဝက်တပျက်ဖြစ်နေ

By featured, ကျော်ခ on May 2, ဧရာဝတီ

ဆုငွေထုတ်မှု နယ်စပ်တည်ငြိမ်ရေး ထိခိုက်နိုင်ဟု ဗိုလ်နှုတ်ခမ်းမွေး ပြော

By featured, သန်းထိုက်ဦး on May 2,ဧရာဝတီ

NLD လွှတ်တော်တက်ခြင်းကို ပြည်တွင်း ပြည်ပ ကြိုဆို

By featured, လင်းသန့် on May 2,ဧရာဝတီ

ကြေးနီစီမံကိန်း ဒေသ လယ်ဧက ၇၈၀၀ ကျော် အဓမ္မသိမ်း

By featured, ခင်ဦးသာ on May 2, ဧရာဝတီ

စိုပြေလန်းဆန်းလာတဲ့ လွှတ်တော်

Wednesday, May 02, 2012 ဧရာဝတီ ဘလော့ အောင်သက်ဝိုင်း

ကချင်ဒုက္ခသည်များအတွက် ဆန်ဂိုဒေါင်များ အရေးတကြီးလိုအပ်

နေမျိုး | ဗုဒ္ဓဟူးနေ့၊ မေလ ၀၂ မဇ္ဈိမ

ဒီမိုကရေစီ လိုလားသူများနဲ့ လွှတ်တော်အမတ်သစ်များ အမေရိကန် ချီးကျူး

By VOA (မြန်မာပိုင်း)

ပြည်သူ့လွှတ်တော်အမတ် ဒေါ်အောင်ဆန်းစုကြည် ကျမ်းသစ္စာ ကျိန်ဆို

By ကိုကျော်ကျော်သိန်းVOA

ကြံ့ခိုင်ရေးပါတီ ဒေါ်အောင်ဆန်းစုကြည်ကို ကြိုဆို

By ကိုကျော်ကျော်သိန်းVOA

နာဂစ်လေးနှစ်ပြည့်ပေမယ့် လူထုအခြေအနေ ပုံမှန်မဖြစ်သေး

By ကိုဇော်ဝင်းလှိုင်VOA

တရုတ်လူ့အခွင့်အရေးသမား အမေရိကန်သံရုံးမှ ထွက်ခွာ

By ဗွီအိုအေ (မြန်မာဌာန)VOA

သတင်းသမား အခြေခံ အခွင့်အရေး ကာကွယ်ရန် MJN ဆွေးနွေး

ဖနိဒါ | ဗုဒ္ဓဟူးနေ့၊ မေလ ၀၂ မဇ္ဈိမ)

======================

 

လွှတ်တော်ပြင်ပနိုင်ငံရေးလည်း ဆက်လုပ်မည်ဟု ဒေါ်အောင်ဆန်းစုကြည် ပြော

By featured, အောင်သက်ဝိုင်း on May 2, ဧရာဝတီ

အမျိုးသားဒီမိုကရေစီ အဖွဲ့ချုပ် (NLD) ဥက္ကဋ္ဌ ဒေါ်အောင်ဆန်းစုကြည်က လွှတ်တော် တက်ရခြင်းအပေါ် စိတ်လှုပ်ရှားမှုမရှိဘဲ ပြည်သူများ၏ ရည်မှန်းချက်များကို အကောင်အထည် ဖော်သွားမည်ဖြစ်ပြီး လွှတ်တော်ပြင်ပ နိုင်ငံရေးကိုလည်း ဆက်လုပ်မည်ဟု ပြောဆိုလိုက်သည်။

ပြည်သူ့လွှတ်တော်တွင် ကျမ်းကျိန်နေသည့် ဒေါ်အောင်ဆန်းစုကြည်နှင့် အမျိုးသားဒီမိုကရေစီ အဖွဲ့ချုပ် အမတ်များ (ဓာတ်ပုံ - ဧရာဝတီ)

ယနေ့ ကျမ်းကျိန်အပြီး လွှတ်တော်ကိုယ်စားလှယ်အဖြစ် တက်ရောက်သော ပြည်သူ့လွှတ်တော် အစည်းအဝေးပြီးနောက် သတင်းထောက်များနှင့်တွေ့ဆုံစဉ် ကော့မှူးမြို့နယ် ပြည်သူ့လွှတ်တော်ကိုယ်စားလှယ် ဒေါ်အောင်ဆန်းစုကြည်က အထက်ပါအတိုင်း ပြောဆိုခြင်းဖြစ်သည်။

သတင်းထောက်တဦးက လွှတ်တော်တက်ရောက်မှုအပေါ် စိတ်လှုပ်ရှားမှုရှိမရှိ ဒေါ်အောင်ဆန်းစုကြည်ကို မေးမြန်းရာ “ကျမက စိတ်လှုပ်ရှားတဲ့သူမျိုး မဟုတ်ပါဘူး။ NLD ရဲ့ နိုင်ငံရေးရည်မှန်းချက်အတွက် လွှတ်တော် လာတက်တာ မဟုတ်ဘူး။ ပြည်သူတွေရဲ့ရည်မှန်းချက်အတွက် လွှတ်တော်ကို လာတက်တာ။ အဲဒီတော့ အဓိက ပြည်သူတွေရဲ့ ရည်မှန်းချက်တွေ ၁၀၀ ရာခိုင်နှုန်း အောင်မြင်နိုင်အောင်တော့ ကြိုးစားရမှာပေါ့။ ပြည်သူတွေ အကျိုးအတွက် ပိုပြီးထမ်းဆောင်နိုင်မယ်လို့ မျှော်လင့်ပါတယ်” ဟု ဖြေကြားသည်။

ဒေါ်အောင်ဆန်းစုကြည်က “ကျမတို့ဖြစ်စေချင်တာ အဓိက မဟုတ်ပါဘူး။ ပြည်သူတွေအတွက် သင့်တော်တဲ့ကိစ္စလုပ်ဖို့က အဓိကပါ။ လွှတ်တော်ထဲကနေ လုပ်လုပ်ရမယ်။ ၂၃ နှစ်တာ ရပ်တည်ခဲ့သလို လွှတ်တော်ပြင်ပကနေလည်း အလုပ်လုပ်သွားမယ်” ဟု ဆက်လက်ပြောသည်။

ယနေ့ အစည်းအဝေးတွင် ဒေါ်အောင်ဆန်းစုကြည် အပါအ၀င် NLD မှ လွှတ်တော်ကိုယ်စားလှယ် ၃၄ ဦးသည် ဖွဲ့စည်းပုံအခြေခံဥပဒေကို ထိန်းသိမ်းကာကွယ် စောင့်ရှောက်ပါမည်ဆိုသော စာသားဖြင့် ကျမ်းသစ္စာကျိန်ဆိုခဲ့ကြသည်။ အနိုင်ရ NLD အမတ် ၃ ဦးဖြစ်သော ဦးဖြိုးမင်းသိန်း၊ ဒေါ်စန္ဒာမင်း၊ ဦးဖြိုးဇေယျာသော်တို့သည် သြစတြေးလျနိုင်ငံသို့ လေ့လာရေးခရီး သွားရောက်နေသည့်အပြင် NLD လွှတ်တော်အမတ်တချို့လည်း ခရီးလွန်နေ၍ ယနေ့ကျမ်းကျိန်ပွဲသို့ မတက်ရောက်နိုင်သေးကြောင်း သိရသည်။

လွှတ်တော်အစည်းအဝေး တက်ရောက်လာသည့် ဒေါ်အောင်ဆန်းစုကြည်ကို ပြည်သူ့လွှတ်တော် ဥက္ကဋ္ဌ သူရဦးရွှေမန်း၊ ကြံ့ခိုင်ရေးပါတီမှ အထွေထွေ အတွင်းရေးမှူး ဦးဌေးဦးနှင့် ကိုယ်စားလှယ်တချို့ လာရောက်နှုတ်ဆက်ခဲ့ကြသည်။

ဗိုလ်မှူးချုပ်အဆင့်ရှိ တပ်မတော်သား လွှတ်တော်ကိုယ်စားလှယ်တဦးကို ဒေါ်အောင်ဆန်းစုကြည် လွှတ်တော်တက်ရောက်လာခြင်းနှင့် ပတ်သက်၍ မည်သို့ ထင်မြင်ပါသနည်းဟု ဧရာဝတီက မေးမြန်းသော်လည်း ဖြေဆိုခြင်း မရှိပေ။

လွှတ်တော်တက်ရောက်ရခြင်းအပေါ် NLD မရမ်းကုန်းမြို့နယ် ပြည်သူ့လွှတ်တော်ကိုယ်စားလှယ် ဒေါက်တာ မေ၀င်းမြင့်က “ပြည်သူတွေအတွက် စပြီးတော့ တာဝန်ထမ်းဆောင်ဖို့ လွှတ်တော်ကို ရောက်လာတာပါ” ဟု ပြောသည်။

NLD ပြည်သူ့လွှတ်တော်ကိုယ်စားလှယ် ဦးအုန်းကြိုင်က “ကျနော်တို့ မျှော်လင့်ထားတဲ့ ဆောင်ရွက်ချင်တာတွေရဲ့ လမ်းစတခုတော့ရောက်ပြီ။ အဲဒီရောက်တဲ့အတွက်ကြောင့် တာဝန်တွေလည်း ပိုကြီးလာပြီလို့ ခံစားမိပါတယ်။ ပထမဆုံး ပြောချင်တာကတော့ ၀မ်းသာတာပေါ့ဗျာ။ နိုင်ငံရေးသမားအနေနဲ့ ပြည်သူလူထုအကျိုးကို ဆောင်ရွက်ဖို့ အခုလို ဆောင်ရွက်နိုင်တဲ့ အခွင့်အလမ်းတခုရတာ၊ ပြည်သူက တာဝန်ပေးတာအတွက်တော့ ၀မ်းသာပါတယ်” ဟု ပြောသည်။

ယနေ့ ကျမ်းကျိန်ပွဲသို့ မြန်မာနိုင်ငံဆိုင်ရာ အမေရိကန်သံရုံးမှ အရာရှိများ အပါအ၀င် သံတမန်များ၊ ပြည်တွင်းပြည်ပ သတင်းမီဒီယာများ အားလုံးကို ၀င်ရောက်ခွင့်ပြုခဲ့သည်။

ဖွဲ့စည်းပုံ ပြင်ရန် ပြည်သူများ မတောင်းဆိုဟု ဦးဌေးဦး ပြော

By featured, အောင်သက်ဝိုင်း on May 2, ဧရာဝတီ

ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီ (ကြံ့ခိုင်ရေးပါတီ) အထွေထွေအတွင်းရေးမှူး ဦးဌေးဦးက ဖွဲ့စည်းပုံအခြေခံဥပေဒသည် သက်တမ်းနုနယ်သေးသည့်အတွက် ပြုပြင်စရာမလိုသေးဘဲ ပြည်သူများကလည်း ဖွဲ့စည်းပုံအခြေခံဥပဒေ ပြုပြင်ရေးကို စိတ်မ၀င်စားသောကြောင့် ပြင်ရန်လည်း မလိုကြောင်း ပြောဆိုလိုက်သည်။

ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီ အထွေထွေအတွင်းရေးမှူး ဦးဌေးဦး (ဓာတ်ပုံ - ဧရာဝတီ)

“ဖွဲ့စည်းပုံ အခြေခံဥပဒေသစ်ကို ကျင့်သုံးတာ တစ်နှစ်ကျော်ပဲရှိသေးတယ်။ သက်တမ်း သိပ်ငယ်သေးတယ်။ ဖွဲ့စည်းပုံအခြေခံဥပဒေ ပြင်ဆင်ရေးနဲ့ ပတ်သက်လို့ ပြည်သူတွေအများစု မမေးကြဘူး။ ပြည်သူတွေက အဲဒီဥစ္စာကို စိတ်မ၀င်စားဘူး။ ပြည်သူတွေနဲ့ ကျနော်တို့ ထိတွေ့နေတာပဲ။ ပြည်သူတွေက စားဝတ်နေရေး ဘယ်လိုအဆင်ပြေမလဲ၊ စီးပွားရေးတွေ အဆင်ပြေမလဲ။ ဒါပဲစိတ်ဝင်စားကြပါတယ်” ဟု ဦးဌေးဦးက ပြောသည်။

ဒေါ်အောင်ဆန်းစုကြည် အပါအ၀င် NLD လွှတ်တော်ကိုယ်စားလှယ် ၃၁ ဦး ယနေ့ ကျမ်းကျိန်ပြီး ပြည်သူ့လွှတ်တော် အစည်းအဝေးသို့ ပထမဆုံး တက်ရောက်ကြသည်။

တပ်မတော်သား ကိုယ်စားလှယ်များ လွှတ်တော်တွင်ပါဝင်ခြင်းသည် မည်သူ့ကိုမျှ အနှောင့်အယှက် မပြုသည့်အတွက် ယင်းအချက်ကိုလည်း ပြင်ဆင်ရန် မလိုအပ်ကြောင်း ဦးဌေးဦးက ဆိုသည်။

“တပ်ကိုယ်စားလှယ်၂၅ ရာခိုင်နှုန်းသည် လွှတ်တော်ထဲမှာ မရှိသင့်တဲ့အနေအထား ရှိနေသလားလို့ ခင်ဗျားတို့ပဲ ကျနော်ပြန်မေးရမှာပဲ။ မဟုတ်ဘူးလား။ ဘာများ အနှောင့်အယှက်တွေ ဖြစ်နေလဲ။ သူတို့လည်း လုပ်သင့်လုပ်ထိုက်တာ လုပ်နေကြတယ်လို့ မြင်တယ်။ လတ်တလောအားဖြင့် ဒီအတိုင်းက ဘာမှမဖြစ်တဲ့အတွက် ဘာမှ အကျိုးသက်ရောက်မှုနဲ့ ပတ်သက်လို့ ဆိုးကျိုးတစုံတရာ မရှိတဲ့အတွက် ကျနော်ဒီအတိုင်းပဲ ဆက်သဘောကျတယ်” ဟု ဦးဌေးဦးက ပြောသည်။

မြန်မာနိုင်ငံတွင် ရေးဆွဲခဲ့သော ဖွဲ့စည်းပုံ အခြေခံဥပဒေများတွင် ၁၉၄၇ ဖွဲ့စည်းပုံ အခြေခံဥပဒေ ပေါ်ပေါက်ခဲ့ပြီး ၁၉၇၄ ခုနှစ် ဖွဲ့စည်းပုံအခြေခံဥပဒေသစ် ပေါ်ပေါက်လာခဲ့ကြောင်း၊ ၁၉၇၄ ခုနှစ် ဖွဲ့စည်းပုံအခြေခံဥပဒေ ပျက်ပြယ်ပြီးနောက် ၂၀၀၈ ခုနှစ်ရောက်မှသာ ဖွဲ့စည်းပုံအခြေခံဥပဒေသစ် ထပ်မံပေါ်ပေါက်ခြင်းဖြစ်ပြီး လွယ်လွယ်နှင့် ပြုပြင်ရန် မဖြစ်နိုင်ကြောင်း ဦးဌေးဦးက ဆိုသည်။

“၄၇ နဲ့ ၇၄ ဆိုရင်လည်း တော်တော်ကွာတယ်။ ၇၄ နဲ့ ၂၀၀၈ ဆိုလည်း တော်တော်ကွာတယ်။ ဒါကြောင့် လက်တွေ့ကျင့်သုံးပြီးတဲ့အချိန်မှာ မသင့်တော်ရင် လုပ်ရမယ်။ ဖြစ်လာတဲ့အပေါ် မူတည်ပြီးတော့ လက်ရှိ အနေအထားပေါ်မူတည်ပြီး ကျနော်တို့ ဖွဲ့စည်းပုံ အခြေခံဥပဒေအတိုင်း ဆက်ပြီးတော့ အကောင်အထည် ဖော်နေတယ်” ဟု ဦးဌေးဦးက ပြောသည်။

NLD ပြည်သူ့လွှတ်တော် ကိုယ်စားလှယ် ဦးအုန်းကြိုင်ကမူ NLD လွှတ်တော် ကိုယ်စားလှယ်များသည် ပြည်သူကို ကတိပေးထားသည့်အတိုင်း လွှတ်တော်အစည်းအဝေးများ ပြန်လည်စတင်ပါက ဖွဲ့စည်းပုံအခြေခံဥပဒေ ပြင်ဆင်ရေး အကောင်အထည် ဖော်မည်ဖြစ်ကြောင်း ဧရာဝတီသို့ ပြောသည်။

“ရွေးကောက်ပွဲ မတိုင်မီကတည်းက ပြည်သူတွေကို ပြောထားတဲ့ကတိတွေ အကောင်အထည်ဖော်မှာပါ” ဟု ဦးအုန်းကြိုင်က ဆိုသည်။

ကြားဖြတ်ရွေးကောက်ပွဲတွင် မဲအပြတ်အသတ်ဖြင့် အနိုင်ရရှိထားသော NLD က ဖွဲ့စည်းပုံအခြေခံဥပဒေ ပြင်ဆင်ရေး၊ တရားဥပဒေစိုးမိုးရေးနှင့် ပြည်တွင်းငြိမ်းချမ်းရေးအတွက် ဆောင်ရွက်သွားမည်ဖြစ်ကြောင်း တရားဝင် ထုတ်ပြန်ကြေညာထားပြီးဖြစ်သည်။

နာဂစ်ဒေသ ပြန်လည်ထူထောင်ရေး တဝက်တပျက်ဖြစ်နေ

By featured, ကျော်ခ on May 2, ဧရာဝတီ

မြန်မာနိုင်ငံ မြစ်ဝကျွန်းပေါ်ဒေသကို နာဂစ်ဆိုင်ကလုန်းမုန်တိုင်း တိုက်ခတ်ဖျက်ဆီးခဲ့သည်မှာ လေးနှစ်မြောက်ခဲ့ပြီ ဖြစ်သော်လည်း ပြန်လည်ထူထောင်ရေး လုပ်ငန်းများ မပြီးပြတ်သေးကြောင်း ဒေသတွင်း ကွင်းဆင်းလုပ်ဆောင်နေသည့် NGO အဖွဲ့များနှင့် ဒေသခံများက ပြောသည်။

လပွတ္တာမြို့နယ်အတွင်းရှိ နာဂစ် ပြန်လည်ထူထောင်ရေး စခန်းမှ ဒုက္ခသည်တဦး သောက်ရေခပ်ပြီး ပြန်လာစဉ် (ဓာတ်ပုံ - Getty Images)

ပညာရေး၊ ကျန်းမာရေး၊ စီးပွားရေးနှင့် နေအိမ်အဆောက်အဦးများ၊ သဘာဝဘေးဒဏ်ခံ အဆောက်အဦးများ တည်ဆောက်ရေး၊ ဒေသခံတို့၏ အသက်မွေးဝမ်းကျောင်းလုပ်ငန်းများ စသည့် ကဏ္ဍအသီသီးတွင် ထူထောင်ရေးလုပ်ငန်းများ လုပ်ဆောင်ပေးနေသော်လည်း ပုံမှန် အခြေအနေသို့ ပြန်ရောက်ရန် နောက်ထပ် ထက်ဝက်ခန့် လုပ်ဆောင်ရန် လိုနေသေးကြောင်း ထူထောင်ရေး လုပ်ငန်းများလုပ်ကိုင်နေသူ မင်္ဂလာမြန်မာ ကုမ္ပဏီမှ ဒါရိုတ်တာ ဒေါက်တာ ဖုန်းဝင်းက ပြောသည်။

“ဘယ်ကဏ္ဍမှ ပြီးပြတ်တာ တခုမှမရှိသေးဘူး။ အကုန်လုံး တို့လို့တန်းလန်းတွေချည်းပဲ။ ဒီဟာတွေကို အစိုးရကပဲ ဦးဆောင်ပြီးတော့ ဆက်လုပ်မလား၊ အတိုက်ခံပါတီတွေကပဲ ပြောပေးမှာလား။ ဒါမှမဟုတ်လို့ရှိရင် အခုလာပြီးတော့ လူတွင်ကျယ်လုပ်နေတဲ့ ကုလသမဂ္ဂတို့ ဘာတို့ကများ လုပ်ပေးမှာလားဆိုတာကတော့ အခုထက်ထိ ဘယ်သူမှ လုပ်ပေးထားတာတော့ မတွေ့သေးဘူး” ဟု ဒေါက်တာ ဖုန်းဝင်းက ဧရာဝတီသို့ ပြောသည်။

ဆိုင်ကလုန်းမုန်တိုင်းကြောင့် ပျက်စီးမှုများကို ကုလသမဂ္ဂ အကူညီပေးရေး အေဂျင်စီများ၊ မြန်မာအစိုးရနှင့် ပြည်တွင်း၊ ပြည်ပ NGO အဖွဲ့များ စုပေါင်းရေးဆွဲရာတွင် စုစုပေါင်း အမေရိကန်ဒေါ်လာ ၄.၁ ဘီလီယံ ကုန်ကြမည်ဟု ရေးဆွဲသတ်မှတ်ခဲ့ကြသည်။ ယင်းဒေသတွင် အစိုးရနှင့် စီးပွားရေးလုပ်ငန်းရှင်များ၏ ဆုံးရှုံးပျက်စီးမှုများသည် ၃ ဘီလီယံဒေါ်လာ၊ ဒေသခံ တဦးချင်း၏ ဆုံးရှုံးမှုစုစုပေါင်းမှာ ဒေါ်လာ ၁.၁ ဘီလီယံဟု သတ်မှတ်ထားကြောင်း သိရသည်။

ဆုံးရှုံးမှုများကို ပြန်လည်ထူထောင်ရန် မြန်မာအစိုးရက ၁၁ ဘီလီယံ တောင်းဆိုခဲ့သော်လည်း ကမ္ဘာ့ဘဏ်နှင့် နိုင်ငံတကာ အဖွဲ့များက ၄.၁ ဘီလီယံသာ သတ်မှတ်ခဲ့ကြသည်။ အစိုးရနှင့် စီးပွားရေး လုပ်ငန်းရှင်များက ၎င်းတို့ ဆုံးရှုံးခဲ့မှုများကို နိုင်ငံတကာ အကူညီများဖြင့် ပြန်လည်ထူထောင်မှုများ ပြုလုပ်ပေးစေလိုသော်လည်း ဒေသခံလူထုကိုသာ ဦးစာပေး လုပ်ဆောင်ပေးခဲ့ကြသည်။

သို့သော် နိုင်ငံတကာအလှူငွေများမှာ ထိုတဦးချင်းစီ၏ ဆုံးရှုံးမှုဖြစ်သော ဒေါ်လာ ၁.၁ ဘီလီယံ၏ ထက်ဝက်ပင် မရရှိသေးကြောင်း ဒေါက်တာ ဖုန်းဝင်းက ပြောဆိုသည်။

ရရှိခဲ့သော ဒဿမ ၅ ဘီလီယံကိုလည်း ဒေသခံများထံ ရောက်ရှိမှုနည်းပြီး ကြားခံ အရာရှိများနှင့် အဖွဲ့ခေါင်းဆောင်တချို့က ၎င်းတို့ကိုယ်ကျိုး အသုံးပြုမှုများရှိကြောင်း သတင်းများ ထွက်ပေါ်ခဲ့သေးသည်။

“မူရင်းအနေအထားကို ပြန်ရောက်ဖို့ ဒီအခြေအနေနဲ့ မလွယ်ဘူး။ အရင်တုန်းက ကျွဲ၊ နွား ၄ စုံ ပိုင်ခဲ့တဲ့လူက အခု တစုံမှ မရှိသေးဘူး။ အဓိကနောက်တခုက အလုပ်အကိုင် ရရှိမှုပြဿနာရှိနေတယ်။ အသက်မွေးဝမ်းကျောင်းကလည်း ၃ နှစ်လုပ်ရမယ်လို့သာပြောတယ်။ အခု ၁ နှစ် ၂ နှစ်နဲ့ ရပ်ထားတယ်ဆိုတော့။ ဒီဒေသတွေက ဘယ်ဟာမှ ပုံမှန်အနေအထားဖြစ်ဖို့ မလွယ်သေးပါဘူး” ဟု ဒေါက်တာ ဖုန်းဝင်းက ပြောသည်။

နာဂစ်မုန်တိုင်း တိုက်ခတ်ပြီးနောက် နိုင်ငံတကာအကူညီများကို လက်ခံရန် မြန်မာအစိုးရက ငြင်းဆန်နေချိန် ရက်ပိုင်းအတွင်း မြန်မာနိုင်ငံသို့ ဝင်ရောက်၍ အကူညီများလက်ခံရန် ပြောဆိုခဲ့သော ကုလသမဂ္ဂ အထွေထွေအတွင်းရေးမှူးချုပ် မစ္စတာ ဘန်ကီမွန်း ယခုနှစ် ဧပြီလကုန်ပိုင်းက ရောက်ရှိလာပြီး သမ္မတ ဦးသိန်းစိန်၊ ဒေါ်အောင်ဆန်းစုကြည်နှင့် အဖွဲ့တချို့ကို တွေ့ဆုံခဲ့သော်လည်း နာဂစ်အခြေအနေကို ဆွေးနွေးပြောဆိုမှု မရှိခဲ့ပေ။

မြန်မာနိုင်ငံ၏ ဆန်အိုးကြီးဟု တင်စားခေါ်ဝေါ်ခဲ့ကြသည့် ဧရာဝတီတိုင်းထဲတွင် စပါးစိုက်ပျိုးမှု အများဆုံးထဲ၌ လပွတ္တာမြို့လည်း ပါဝင်ပြီး နာဂစ်မုန်တိုင်းတိုက်ခတ်ပြီးနောက် အောက်ခံမြေဆီလွှာများ ပျက်စီးကာ စပါးနှင့် ပဲစိုက်ခင်းများ နှစ်စဉ် ပိုးဖျက်ခံရမှုနှင့် ရင်ဆိုင်နေရကြောင်း လပွတ္တာမြို့နယ်အတွင်းရှိ ပြင်စလူရွာမှ ရွာခံတဦးက ပြောသည်။

“ထွန်ယက်ဖို့ ကျွဲနွားကလည်း အခက်ခဲရှိတယ်။ အဆိုးဆုံးကတော့ မုန်တိုင်းတိုက်ပြီးကတည်းက လယ်တွေပြန်လုပ်တဲ့ အခါ မြေကြီးတွေထဲက ပိုးတွေထွက်တယ်။ ထွက်တဲ့ပိုးတွေက အပင်တွေကို ကိုက်တော့ မိုးစပါးရော၊ ပဲစိုက်ထားတဲ့ အရင်းနှီးတွေရော အကုန်ဆုံးရှုံးသွားတဲ့အခါကျတော့ လာမယ့် မိုးရာသီမှာ ပြန်စိုက်ဖို့ ကျနော်တို့မှာ တော်တော် အခက်ခဲရှိတယ်” ဟု ပြင်စလူကျေးရွာမှ လယ်သမား ဦးထွန်းဝင်းက ဧရာဝတီသို့ ပြောသည်။

တောင်သူများ ယင်းသို့ စိုက်ပျိုးရေးပျက်သုဉ်းမှု အခက်ကြုံနေရမှု၏ နောက်ဆက်တွဲအဖြစ် ယခင်နှစ်က အစိုးရမှ စိုက်ဘဏ် ချေးငွေများအဖြစ်ချပေးထားသော ငွေများကိုလည်း ပြန်ဆပ်နိုင်ရန် အခက်ကြုံနေရကြောင်း တောင်သူကြီးများက ပြောသည်။ အလားတူ တံငါသည်လုပ်ငန်းများလည်း ယခင်ကကဲ့သို့ တွင်ကျယ်မှုမရှိဟု သိရသည်။

လပွတ္တာမြို့နယ်တွင် မုန်တိုင်းဒဏ်ခံခဲ့ရသော ပြင်စလူ၊ ရွေးနှင့် သင်္ဃန်းကြီး ကျေးရွာများ၌ လတ်တလောတွင် သောက်သုံးရေ ရှားပါးမှု ပြဿနာနှင့် ရင်ဆိုင်နေရပြီး ပုဂ္ဂလိကအလှူရှင်တချို့က ရေလှူဒါန်းပေးနေသည်ဟု ဆိုသည်။

၂၀၀၈ ခုနှစ် မေလ ၂ ရက်နေ့နှင့် ၃ ရက်နေ့က မြန်မာနိုင်ငံတွင် တိုက်ခတ်သည့် နာဂစ်ဆိုင်ကလုန်းမုန်တိုင်းသည် ဧရာဝတီတိုင်းရှိ ပုသိမ်၊ မြောင်းမြ၊ လပွတ္တာ၊ မော်လမြိုင်ကျွန်း၊ ကျုံမငေး၊ ဘိုကလေး၊ ချောင်းသာ၊ ငွေဆောင် မြို့များကို ဝင်ရောက် တိုက်ခတ်ခဲ့ရာ လူဦးရေ ၂ ဒဿမ ၄ သန်း ကျော် အိုးမဲ့အိမ်မဲ့ ဖြစ်ခဲ့ရသည်။

အဆိုပါ မုန်တိုင်းကြောင့် လူဦးရေ ၈ သောင်းကျော် အသက်ဆုံးရှုံးကာ လူ ၅ သောင်းကျော် ပျောက်ဆုံးနေသည်ဟု စစ်အစိုးရ စာရင်းများအရသိရသည်။ ကုလသမဂ္ဂကမူ သေဆုံးသူ ၁၄၀,၀၀၀ ဦးခန့်ရှိသည်ဟု ခန့်မှန်းပြီး မုန်တိုင်းဒဏ်ကို လူ ၂.၄ သန်း ဆိုးဆိုးရွားရွား ခံခဲ့ရကြောင်း ထုတ်ပြန်ခဲ့သည်။

သေဆုံးသွားသူများကို ရည်စူးကာ ယမန်နေ့က လပွတ္တာမြို့ပေါ်ရှိ ဆုတောင်းပြည့်ဘုရားကြီးတွင် တရာနာကြားကြပြီး ယနေ့တွင် တမြို့နယ်လုံးရှိ သံဃာများကို ပင့်ဖိတ်ကာ မနက် ၇ နာရီမှ ၁၂ နာရီအထိ ဆုတောင်းမေတ္တာ ပို့ခြင်းများပြုလုပ်ခဲ့ကြောင်း မြို့ခံများထံမှ စုံစမ်းသိရှိရသည်။

ဆုငွေထုတ်မှု နယ်စပ်တည်ငြိမ်ရေး ထိခိုက်နိုင်ဟု ဗိုလ်နှုတ်ခမ်းမွေး ပြော

By featured, သန်းထိုက်ဦး on May 2,ဧရာဝတီ

မူးယစ်ဆေးဝါးနှင့် ပတ်သက်၍ ဆုငွေထုတ်ထားသည့်ကိစ္စအား ထိုင်းအာဏာပိုင်များ ဖြေရှင်းခြင်း မပြုလုပ်ပါက နှစ်နိုင်ငံနယ်စပ် တည်ငြိမ်အေးချမ်းမှုကို ထိခိုက်လိမ့်မည်ဟု တိုးတက်သော ဗုဒ္ဓဘာသာကရင်အမျိုးသား တပ်မတော် (DKBA) တပ်ဖွဲ့မှ ဗိုလ်နှုတ်ခမ်းမွေး (ခေါ်) ဗိုလ်မှူးချုပ် စောလားပွယ်က ပြောဆိုလိုက်သည်။

၂၀၁၂ မေလ ၁ ရက်နေ့က မြဝတီခရိုင်အတွင်း DKBA ဌာနချုပ်တွင် ပြုလုပ်သော ဗိုလ်မှူးချုပ် စောလားပွယ်၏ သတင်းစာရှင်းလင်းပွဲ (ဓာတ်ပုံ - ဧရာဝတီ)

ဧပြီလ ၂၀ ရက်နေ့က ထိုင်းနိုင်ငံရှိ မူးယစ်ဆေး ထိန်းချုပ်ရေး ဘုတ်အဖွဲ့ရုံး (ONCB) က ဗိုလ်မှူးချုပ် စောလားပွယ်ကို မူးယစ်ဆေးဝါးနှင့် ပတ်သက်၍ ဖမ်းဆီးရန် ဆုငွေ ထိုင်းဘတ် ၁ သန်း (ဒေါ်လာ ၃,၂၀၀၀ ခန့်) ထုတ်ပြန်ခဲ့သည်။

အဆိုပါ စွပ်စွဲခံရမှုအကြောင်းကို ထိုင်း-မြန်မာနယ်စပ် ကရင်ပြည်နယ် မြ၀တီခရိုင်အတွင်းရှိ DKBA ဌာနချုပ်တွင် ယမန်နေ့က သတင်းစာရှင်းလင်းပွဲ ပြုလုပ်၍ ဗိုလ်မှူးချုပ် စောလားပွယ်က တုံ့ပြန်လိုက်ခြင်း ဖြစ်သည်။ ယင်း သတင်းစာ ရှင်းလင်းပွဲသို့ မြန်မာနှင့် ထိုင်း သတင်းထောက်တချို့ တက်ရောက်ခဲ့ကြောင်း သိရသည်။

“ဒီလို အခြေအမြစ် မရှိတဲ့ကိစ္စကို ထိုင်းဒုဝန်ကြီးချုပ်က တာဝန်ယူ ဖြေရှင်းတာ မလုပ်ဘူးဆိုရင် နှစ်နိုင်ငံနယ်စပ် တည်ငြိမ်အေးချမ်းမှုကို ထိခိုက်နိုင်တယ်” ဟု ဗိုလ်မှူးချုပ် စောလားပွယ်က ပြောသည်။

ထိုင်း ဒု ၀န်ကြီးချုပ် ချလုံ ယူဘမ်ပရုန်းသည် ONCB ၏ အကြီးအကဲဖြစ်သည်။

အခြေအနေ အမှန်ကို သိရှိနိုင်ရန် ထိုင်းအစိုးရဘက်မှ ကိုယ်စားလှယ်အဖွဲ့များ စေလွှတ်၍ လာရောက် စစ်ဆေးနိုင်ကြောင်း၊ စွပ်စွဲသည့်အတိုင်း ဟုတ်မှန်ပါက နိုင်ငံတကာ ခုံရုံးအထိ တက်မည်ဟု ဗိုလ်မှူးချုပ် စောလားပွယ်က ပြောသည်။

ထိုင်း ဒု ၀န်ကြီးချုပ် ချလုံ ယူဘမ်ပရုန်းက စောလားပွယ် အနေနှင့် ထိုင်းနိုင်ငံအတွင်း လာရောက်အဖမ်းခံခြင်းမှလွဲ၍ တခြား နည်းလမ်းမရှိဟု ပြောကြောင်း ထိုင်းသတင်းဌာနများ၏ ဖော်ပြထားချက်အရ သိရှိရသည်။

ဤအတောအတွင်း ထိုင်း-မြန်မာနယ်စပ် ဖုတ်ဖရဒေသတွင် ထိုင်း လုံခြုံရေတပ်များအား တင်ကျပ်စွာချထားပြီး စစ်ကားများနှင့် ကင်းလှည့်နေကြောင်း သိရသည်။

လတ်တလော DKBA ထိန်းချုပ် ဒေသအတွင်းရှိ နယ်စပ်ဂိတ်များကို ဖွင့်ပေးထားသော်လည်း မကြာမီ ရက်ပိုင်းအတွင်း ပိတ်ရန်စီစဉ်ထားကြောင်း DKBA တပ်ဖွဲ့မှ ဗိုလ်မှူး စန်းအောင်က ဧရာဝတီသို့ ပြောသည်။

“ဟိုဘက် ဒီဘက် ကုန်သည်တွေကို ပိတ်ထားတယ်။ ကုန်သည်တွေသွားတဲ့ လမ်းမကြီးကိုတော့ လာမယ့် တရက် နှစ်ရက် အဖြေပေါ်မယ်။ ပိတ်ဖို့ အစိုးရကို တရားဝင် ပြောခိုင်းထားပြီး အစိုးရ မပိတ်ခိုင်းရင် ကျနော်တို့ ကိုယ်တိုင် ပိတ်ခိုင်းမယ်” ဟု ၎င်းက ဆိုသည်။

မဲဆောက်-မြ၀တီ ချစ်ကြည်ရေး တံတားကိုလည်း ပိတ်ရန်အတွက် ခရိုင်မှတဆင့် ပြည်နယ်နှင့် တိုင်းဝန်ကြီးထံ စာတင်ထားကြောင်း ဗိုလ်မှူး စန်းအောင်က ဆက်ပြောသည်။

မူးယစ်းဆေးဝါးနှင့် ပတ်သက်၍ ဆုငွေထုတ်ထားသည့် ၂၅ ဦးထဲတွင် ထိုင်းနိုင်ငံသားများနှင့် မြန်မာနိုင်ငံမှ ၃ ဦး ပါဝင်ပြီး ဓာတ်ပုံများနှင့် အတူ ONCB ၏ အင်တာနက် ၀က်ဘ်ဆိုက်နှင့် Facebook တို့တွင် ကြေညာထားသည်။

မြန်မာနိုင်ငံမှ မူးယစ်ရာဇာ နော်ခမ်းကို ဘတ်ငွေ ၂ သန်း၊ ယင်ဆေးနှင့် ဗိုလ်နှုတ်ခမ်းမွေးတို့ကို ဘတ် ၁ သန်းစီ ဆုငွေ ထုတ်ပြန်ထားသည်။

နော်ခမ်းကို ဧပြီလ ၂၆ ရက်နေ့က လာအိုစစ်တပ်က ပစ်ခတ်ဖမ်းဆီးလိုက်ကြောင်း ထိုင်းသတင်းဌာနများက ကြေညာသော်လည်း ဆက်လက်အရေးယူရေးနှင့် ပတ်သက်၍ မည်သို့ဆောင်ရွက်မည်ကို အသေးစိတ် မသိရသေးပေ။ နော်ခမ်းကို တရုတ်၊ ထိုင်း၊ လာအိုနှင့် မြန်မာတို့က ဖမ်းဆီးရန် ဆုငွေထုတ်ထားခြင်း ဖြစ်သည်။

NLD လွှတ်တော်တက်ခြင်းကို ပြည်တွင်း ပြည်ပ ကြိုဆို

By featured, လင်းသန့် on May 2,ဧရာဝတီ

အမျိုးသား ဒီမိုကရေစီအဖွဲ့ချုပ်(NLD) ပါတီ ဥက္ကဌ ဒေါ်အောင်ဆန်းစုကြည်နှင့် လွှတ်တော် ကိုယ်စားလှယ်များ ယနေ့ နံနက်က နေပြည်တော်တွင်ကျင်းပနေသည့် လွှတ်တော်အစည်းအဝေးသို့ တက်ရောက် ကျမ်းသစ္စာကျိန်ဆိုမှုကို ပြည် တွင်း ပြည်ပမှ ကြိုဆိုကြသည်။

ယနေ့ လွှတ်တော်တွင်း ရောက်ရှိလာသည့် ဒေါ်အောင်ဆန်းစုကြည်ကို သတင်းသမားများကြား၌ တွေ့ရစဉ်(ဓာတ်ပုံ - အောင်သက်ဝိုင်း / ဧရာဝတီ)

ဒေါ်အောင်ဆန်းစုကြည်အပါအ၀င် NLD လွှတ်တော်ကိုယ်စားလှယ် ၃၄ ဦးသည် ယနေ့နံနက် ၁၀ နာရီက လွှတ်တော် ဥက္ကဌ ရှေ့မှောက်တွင် ကျမ်းသစ္စာ ကျိန်ဆိုကြသည်။

NLD က ကြားဖြတ်ရွေးကောက်ပွဲအနိုင်ရ လွှတ်တော်ကိုယ်စားလှယ် ၄၃ ဦးဖြစ်သော်လည်း လွှတ်တော်ကိုယ်စားလှယ် များဖြစ်ကြသော ကိုဖြိုးမင်းသိန်း၊ မစန္ဒာမင်း၊ ကိုဖြိုးဇေယျာသော် တို့ ၃ ဦးမှာ သြစတြေးလျ နိုင်ငံသို့ လေ့လာရေး ခရီး သွားနေပြီး တချို့ NLD အမတ်များ ခရီးလွန်ကြောင်း သိရသည်။

အစောပိုင်းတွင် လွှတ်တော်ကိုယ်စားလှယ် ကျမ်းကျိန်လွှာ စာသား၌“ဖွဲ့စည်းပုံ အခြေခံဥပဒေကို ကာကွယ် စောင့်ရှောက် ပါမည်”ဆိုသည့် စကားရပ်အစား “လေးစားလိုက်နာပါမည်”ဟူသည့် စကားရပ်ဖြင့် ပြင်ဆင်ပေးရန် တောင်းဆိုမှု လုပ်ခဲ့ပြီး မတက်ရောက်နိုင်ဘဲ ရှိခဲ့ရာ ပါတီ ဥက္ကဌ ဒေါ်အောင်ဆန်းစုကြည်နှင့် NLD က မဟာမိတ်များ၏ ဆန္ဒနှင့် ပြည်သူ့ဆန္ဒအတွက် စာသား မပြင်သေးသော်လည်း လွှတ်တော် တက်ရောက်ရန် တနင်္လာနေ့က ဆုံးဖြတ်ခဲ့ခြင်း ဖြစ်သည်။

အမျိုးသား လွှတ်တော်ကိုယ်စားလှယ် ရခိုင်တိုင်းရင်းသားများ တိုးတက်ရေးပါတီ(RNDP) ဥက္ကဌ ဒေါက်တာ အေးမောင် က ဒေါ်အောင်ဆန်းစုကြည်နှင့် NLD ကိုယ်စားလှယ်များ လွှတ်တော်တက်ရောက် ကျမ်းသစ္စာကျိန်ဆိုမှုကို ၀မ်းမြောက်စွာ ကြိုဆိုကြောင်း၊ ပြည်ထောင်စုကို အတိတ်ဆိုးမွေများ မခံယူဘဲ စည်းလုံးမှုများဖြင့် တည်ဆောက်သွားနိုင်မည်ဟု မျှော်လင့် ယုံကြည်ကြောင်း ဧရာဝတီကို ပြောသည်။

“တိုင်းရင်းသားပါတီငယ်လေးတွေ အားလုံး လာမယ့် ၂၀၁၅ ကို မျှော်မှန်းပါတယ်။ အဲဒီကာလမျိုးမှာ တိုင်းရင်းသား ဒေ သ တွေမှာ လွန်ခဲ့တဲ့ ၁၉၉၀ က အမှားမျိုးတွေလို၊ ဖဆပလ ခေတ်က အမှားမျိုးတွေလို မဖြစ်စေရအောင် တိုင်းရင်းသားပါတီတွေကို အခွင့်အရေးပေးဖို့ မဟာဗျူဟာ ရည်မှန်းချက်များ ကြိုတင်ညှိနှိုင်းချထားခဲ့မယ်ဆိုရင်၂၀၁၅ ရဲ့ မြင်ကွင်းဟာ အင်မတန်လှပ လာမှာဖြစ်ပါတယ်”ဟု သူက ဆိုသည်။

ဒေါ်အောင်ဆန်းစုကြည်နှင့် NLD ကိုယ်စားလှယ်များ လွှတ်တော်တက်ရောက်လာသည်ကို ပြည်ထောင်စု ကြံ့ခိုင်ရေးနှင့် ဖွံ့ဖြိုး ရေးပါတီ(ကြံ့ခိုင်ရေး ပါတီ)မှ ကိုယ်စားလှယ်တဦးဖြစ်သူ ဦးဝင်းဦး ကလည်း ကြိုဆိုကြောင်းပြောဆိုပြီး တိုင်းပြည် အကျိုး အတွက် အတူပူးပေါင်း လက်တွဲလုပ်ဆောင်သွားမည်ဖြစ်ကြောင်း ပြည်ပ သတင်းဌာနများနှင့် ပြောဆိုထားသည်။

ယခုကဲ့သို့ ဒေါ်အောင်ဆန်းစုကြည် ဆုံးဖြတ်လိုက်ခြင်းကို ၈၈ မျိုးဆက်ကျောင်းသားများကလည်း ကြိုဆိုကြောင်း၊ လုပ်ထုံး လုပ်နည်းအရ ပြင်ရန် လိုအပ်ချက်ကို NLD က တောင်းဆိုခြင်းဖြစ်ကြောင်း၊ ပြည်သူ အားလုံး စိုးရိမ်မှုဖြင့် စောင့်မျှော်ခဲ့ရကြောင်း ကိုမင်းကိုနိုင်က ဧရာဝတီကို ပြောသည်။

“နောက်ဆုံးတော့ ဒေါ်အောင်ဆန်းစုကြည်ဟာ စေ့စပ်မရတဲ့ သဘောထား တင်းမာသူလို့ ပုံဖျက် ခံထားရတာဟာ မဟုတ်ဘူး ဆိုတာ ပေါ်သွားတာပေါ့ဗျာ။ ဒေါ်အောင်ဆန်းစုကြည်ဟာ ညှိနှိုင်းလို့ရတယ်၊ အလျှော့အတင်းလုပ်တဲ့ အစဉ် အလာကို လေး စား တယ် ဆိုတာ အားလုံး သိအောင်ဖော်ပြလိုက်တာပါပဲ။ အားလုံးဟာ ညှိနှိုင်းအဖြေရှာတဲ့ ယဉ်ကျေးမှု ကို မလွတ်တမ်း ဆုပ်ကိုင်ထားပြီး ဒီအတိုင်းဆက်သွားနေဖို့ အားလုံးဆက်ကြိုးစားနေရမယ်”ဟု ၈၈ မျိုးဆက်ကျောင်းသား ခေါင်းဆောင် ကိုမင်းကိုနိုင်က ဆိုသည်။

ဒေါ်အောင်ဆန်းစုကြည်၏ ဆုံးဖြတ်ချက်ကို ကရင်အမျိုးသားအစည်းအရုံး(KNU)ကလည်း ကြိုဆိုကြောင်း၊ လွှတ်တော်တွင်း ဦးမော့ လာမည့် စီးပွားရေး၊ နိုင်ငံရေး၊ လူမှုရေး၊ တိုင်းရင်းသားအရေး၊ ပြည်တွင်း ငြိမ်းချမ်းရေး စသဖြင့် လုပ်ဆောင်စရာများကို ဖော်ဆောင်နိုင်မည်ဟု မျှော်လင့်ကြောင်း ဗဟိုအလုပ် အမှုဆောင် ကော်မတီဝင် စောဒေးဗစ်ထော က ဧရာဝတီကိုပြော သည်။

“ဒေါ်အောင်ဆန်းစုကြည် လွှတ်တော်ထဲကို သွားတယ်ဆိုတာကို ကျနော်တို့ ကြိုဆိုတယ်။ ဘာပဲဖြစ်ဖြစ်လွှတ်တော်ထဲ မှာပဲ တချို့ကိစ္စတွေက ဖြေရှင်းနိုင်မယ်လို့ ယုံကြည်တယ်လေ”ဟု သူက ဆိုသည်။

အမေရိကန် နိုင်ငံကလည်း ဒေါ်အောင်ဆန်းစုကြည်အပါအ၀င် NLD လွှတ်တော် ကိုယ်စားလှယ်များနှင့် အစိုးရတို့သည် အပြုသဘော ဆောင်ရွက်ကြစေလိုကြောင်း နိုင်ငံခြားရေး ၀န်ကြီးဌာန ပြောခွင့်ရ မစ္စတာ မာ့ခ်တုန်နာက နေ့စဉ် သတင်းစာရှင်း လင်း ပွဲတွင် သတင်းထောက်များကို ပြောကြားလိုက်သည်။

“ကျနော်တို့ အမြင်က အခု အသစ်ရွေးချယ်ခံလိုက်ရတဲ့ လွှတ်တော်ကိုယ်စားလှယ်တွေ လွှတ်တော်မှာရှိတာ၊ အစိုးရ နဲ့ သူတို့ အပြုသဘောဆောင်ပြီး လုပ်ကြတာတွေကို မြင်တွေ့ချင်ပါတယ်။ ဆက်လက်တိုးတက်မှုတွေကိုလည်း ကျနော်တို့ မြင်တွေ့ချင် ပါတယ်”ဟု သူက ဆိုသည်။

အမေရိကန် နိုင်ငံခြားရေး ၀န်ကြီး မစ္စ ဟီလာရီ ကလင်တန် အပါအ၀င် အမေရိကန်နိုင်ငံ အနေဖြင့် မြန်မာ့ ပြုပြင်ပြောင်းလဲမှုဆိုင်ရာ တိုးတက်မှုများကို အနီးကပ်စောင့်ကြည့်နေမည်ဖြစ်ပြီး တိုးတက်မှုများကိုအသိအမှတ်ပြုကာ အဆုံးသတ်ခြေလှမ်းများ ကို ဆက်လက်ဖော်ဆောင်သွားမည်ဖြစ်ကြောင်းလည်း သူက ဆက်ပြောသည်။

မြန်မာနိုင်ငံသို့ ဥရောပသမဂ္ဂ ရုံးခွဲဖွင့်ရန်အတွက် မကြာမီကသွားရောက်ခဲ့သည့် ဥရာပသမဂ္ဂ နိုင်ငံခြားရေးရာ ကော်မရှင် အကြီး အကဲ မစ္စ ကက်သရင်း အက်ရှတန်ကလည်း ဒေါ်အောင်ဆန်းစုကြည်နှင့် NLD လွှတ်တော် ကိုယ်စားလှယ်များ လွှတ်တော် တက်ရောက်ခြင်းကို ချီးမွမ်းပြောဆိုပြီး မြန်မာ့ပြုပြင်ပြောင်းလဲမှုများကို နောက်ကြောင်းပြန်လှည့်မည်ကို စိုးရိမ်နေဆဲဖြစ် ကြောင်း ယမန်နေ့က ထိုင်းနိုင်ငံ ဘန်ကောက်မြို့ သတင်းစာရှင်းလင်းပွဲတွင် ပြောဆိုသွားသည်။

နံနက် ၁၀ နာရီ ၁၀ မိနစ်တွင် ကျင်းပနေသည့် အမျိုးသားလွှတ်တော်နှင့် ပြည်သူ့လွှတ်တော်ကို ရပ်နားလိုက်ပြီး လာမည့် ဇူလိုင်လအတွင်း ပြန်လည်ကျင်းပရန် ကြေညာကြောင်း သိရသည်။

ဒေါ်အောင်ဆန်းစုကြည် အပါအ၀င် အဖွဲ့ဝင် ၄ ဦးတို့သည် ယနေ့နံနက်ပိုင်းက နေပြည်တော်သို့ လေကြောင်းခရီးဖြင့်သွားခဲ့ကြ ပြီး လွှတ်တော်ကိုယ်စားလှယ်အဖြစ် ကျမ်းသစ္စာကျိန်ဆိုပြီးပါက ရန်ကုန်မြို့သုိ့ ညနေပိုင်းတွင် ပြန်လည် ရောက်ရှိမည်ဖြစ် ကြောင်း အနီးကပ်လုံခြုံရေး တာဝန်ယူသူတဦးဖြစ်သည့် ကိုကျော်စိုးနိုင်က ပြောပြသည်။

ကြေးနီစီမံကိန်း ဒေသ လယ်ဧက ၇၈၀၀ ကျော် အဓမ္မသိမ်း

By featured, ခင်ဦးသာ on May 2, ဧရာဝတီ

စစ်ကိုင်းတိုင်း မုံရွာခရိုင် ဆားလင်းကြီးမြို့နယ်အတွင်းရှိ ကြေးနီစီမံကိန်း ဧရိယာ၌ ပါဝင်သည့် လယ်မြေဧက ၇၈၀၀ ကျော်ကို အာဏာ ပိုင်များက အဓမ္မသိမ်းယူထားပြီး လယ်ပိုင်ရှင်များ နေထိုင်သော ကျေးရွာများကိုလည်း ပြောင်းရွှေ့ခိုင်းနေကြောင်း သိရ သည်။

မုံရွာကြေးနီ စီမံကိန်းကို တွေ့မြင်ရစဉ် (ဓာတ်ပုံ - Canadian Friends of Burma)

အသိမ်းခံလယ်မြေများသည် ဆည်တဲ၊ ဇီးတော၊ ၀က်မှေး၊ ကန်တော စသည့်ကျေးရွာများမှ ဒေသခံများကပိုင်ဆိုင်ပြီး ထိုရွာများ ကိုလည်း ရွာလုံးကျွတ် ပြောင်းရွှေ့ပေးရန် အာဏာပိုင်များက ယခုနှစ်ဆန်းပိုင်းက စတင် ညွှန်ကြားထားကြောင်း၊ အများစုက ပြောင်းရွှေ့ရန် ဆန္ဒမရှိသော်လည်း တချို့ကပြောင်းရွှေ့သွားပြီဖြစ်ကြောင်း ဒေသခံများက ဧရာဝတီကို ပြောပြကြသည်။

ထိုသို့သိမ်းယူထားသော လယ်မြေဧက ၇၈၀၀ ကျော်ကို နိုင်ငံပိုင်မြေဖြစ်၍ သမ္မတ အမိန့်ဖြင့် လုပ်ဆောင်နေခြင်းဖြစ်သည် ဟု ကုမ္ပဏီ တာဝန်ခံများနှင့် ဒေသအာဏာပိုင်များက ပြောဆိုပြီး လျော်ကြေး အနည်းငယ်သာ ပေးကြောင်းလည်း ဒေသခံများက ပြောဆိုကြသည်။

“ထွက်တဲ့ ကြေးနီကို တတန်ကို ဘယ်လောက်လို့ တန်ဖိုးဖြတ်လို့ရပေမယ့် ကျနော်တို့ လယ်တွေက တန်ဖိုးဖြတ်မရပါဘူး၊ လယ်မြေ ဆိုတာ ကမ္ဘာတည်သရွေ့တည်ရှိနေမှာဖြစ်လို့ လျော်ကြေး ဘယ်လောက်ပေးပေး မလိုချင်ဘူး”ဟု ရွာသာရွာမှ ဦးခင်မောင်ဝင်း က ပြောသည်။

ဒေသခံများက ၎င်းတို့၏ လယ်မြေများ ပြန်လည်ရရှိရေးအတွက် သမ္မတ ဦးသိန်းစိန်၊ စစ်ကိုင်းတိုင်း ၀န်ကြီးချုပ်နှင့် သက် ဆိုင်ရာ အာဏာပိုင်များထံ အသနားခံစာ တင်ပြခဲ့သော်လည်း ထိရောက်သောအရေးယူမှု မရှိကြောင်း ပြောဆိုသည်။

ဆားလင်းကြီး မြို့နယ်အတွင်းရှိ ကြေးစင်တောင်နှင့် လက်ပန်းတောင်းတောင် ဒေသများရှိ ကြေးနီစီမံကိန်းများအား စီးပွားရေး ဦးပိုင် ကုမ္ပဏီနှင့် တရုတ်ကုမ္ပဏီများ ဖြစ်သည့် ၀မ်ပေါင်၊ မြန်မာ ယမ်စီ ကုမ္ပဏီ များက၂၀၁၁ ခုနှစ် နှောင်းပိုင်းမှစတင်၍ ကြေး နီ တူးဖော်မှု လုပ်ဆောင်နေခြင်း ဖြစ်သည်ဟုလည်း သိရသည်။

မုံရွာတွင်လည်း ကြေးနီ စီမံကိန်း တခု လုပ်ဆောင်နေပြီး ယင်း စီမံကိန်း၌ တရုတ် ကုမ္ပဏီ ပါဝင်လုပ်ကိုင်လျက် ရှိသည်ဟု ဆို သည်။

မုံရွာကြေးနီ စီမံကိန်းသည် မြန်မာနိုင်ငံတွင် အကြီးဆုံး ကြေးနီ စီမံကိန်းတခုဖြစ်ပြီး ယခင် မြန်မာအစိုးရ အမှတ်(၁) သတ္ထုတွင်း ၀န်ကြီးဌာနနှင့် ကနေဒါအခြေစိုက် အိုင်ဗင်ဟိုးကုမ္ပဏီ(Ivanhoe Mines)တို့ ပူးပေါင်းဖွဲ့စည်းထားသော မြန်မာအိုင်ဗင်ဟိုး ကြေး နီ ကုမ္ပဏီလီမိတက်(Myanmar Ivanhoe Copper Company Limited – MICCL) က လုပ်ကိုင် ခဲ့ခြင်းဖြစ်သည်။

MICCL အား ၂၀၀၉ ခုနှစ်၌ အမေရိကန်ဘဏ္ဍာရေး ၀န်ကြီးဌာနက တားမြစ်ထားသည့် ကုမ္ပဏီများစာရင်းတွင် ထည့်သွင်းခဲ့ သည်။

ယနေ့ နံနက်တွင်လည်း ပြောင်းရွှေ့ခံရသည့် ဆည်တဲရွာမှ လူငယ်တဦးကို ညောင်ပင်ကြီး ရဲ စခန်းမှ အကြောင်းပြချက် မပေး ဘဲ ဖမ်းဆီးထားမှု ဖြစ်ပွားခဲ့ကြောင်း၊ ရွာသား ၇၀ ခန့်က မေးမြန်း စုံစမ်းရန် ရဲ စခန်းသို့ ရောက်လာရာ ရဲစခန်းက ၀င်ခွင့် မပေး ခဲ့ကြောင်း ဒေသခံ ဦးဇော်ဦး က ပြောဆိုသည်။

စိုပြေလန်းဆန်းလာတဲ့ လွှတ်တော်

Wednesday, May 02, 2012 ဧရာဝတီ ဘလော့

အောင်သက်ဝိုင်း

(ဓာတ်ပုံများ-ဧရာဝတီ)

ရွှေအိုရောင် ကျွန်းသားထိုင်ခုံတွေ စားပွဲတွေ ချထားတဲ့ ခန်းမကြီး တခုထဲမှာ လူရာပေါင်းများစွာ ထိုင်နေကြပေမယ့် အပ်ကျသံမျှ မကြားရလောက်အောင် တိတ်ဆိတ်လွန်းလှတယ်။ အမျိုးသား၊ အမျိုးသမီးတွေ ရာပေါင်းများစွာ ရှိနေပြီး အမျိုးသားတွေက ခေါင်းပေါင်း၊ တိုက်ပုံ၊ ပုဆိုး မြန်မာဆန်ဆန် ၀တ်ဆင်ထားကြသလို အမျိုးသမီးတွေကလည်း မြန်မာဆန်ဆန် ရင်ဖုံးနဲ့ ထဘီတွေ ၀တ်ဆင်ထားကြတယ်။

အစိမ်းရောင် ယူနီဖောင်းဝတ် အမျိုးသား မြောက်မြားစွာကလည်း ခန်းမကျယ်ကြီးထဲမှာ ငြိမ်သက်စွာ ရှိနေကြတယ်။ ခန်းမကျယ်ကြီး အလယ်ခေါင်မှာ ခရမ်းရောင် ရင်ဖုံးအကျီနဲ့ ချည်ထည် ထဘီ၊ အဖြူနဲ့ ခရမ်း ရောယှက်ထားတဲ့ ဒေါင်းမြီးပုဝါ လွှမ်းခြုံဝင်ထားတဲ့ အမျိုးသမီးကြီးတစ်ဦး ရှိနေပြီး အမျိုးသမီးကြီးရဲ့ ခေါင်းမှာပန်ထားတဲ့ အဖြူရောင်နှင်းဆီပန်းတွေက ဝေဆာလွန်းလှတယ်။ အမျိုးသမီးကြီးကို လူတွေမြောက်မြားစွာ မကြာခဏ ဆိုသလို လာရောက် နှုတ်ဆက်ကြတယ်။

ခန်းမကျယ်ကြီး ၀င်တဲ့ ၀င်ပေါက်ရှေ့မှာတော့ လူစုလူဝေးကြီးတခု ရှိနေပြီး လူတွေက အချင်းချင်း တိုးဝှေ့နေကြတယ်။ သူတို့အားလုံးရဲ့ လက်ထဲက ကင်မရာတွေဟာ ခရမ်းရောင်ဝတ် အမျိုးသမီးဘက်ကို ချိန်ရွယ် ရိုက်ကူးနေကြတယ်။

အဲဒီအမျိုးသမီးက ကမ္ဘာ့ပြည်သူတွေသာမက၊ မြန်မာပြည်သူတွေ မြောက်မြားစွာ လေးစား တန်ဖိုးထားချစ်ခင် ကြတဲ့ ဒီမိုကရေစီ ခေါင်းဆောင် ဒေါ်အောင်ဆန်းစုကြည်ပါပဲ။

ခန်းမအပြင်မှာ ရှိနေတဲ့ လူစုလူဝေးကတော့ ကော့မှူးမြို့နယ် ပြည်သူ့ကိုယ်စားလှယ်အဖြစ် ရွေးကောက်ခံထားရတဲ့ ဒေါ်အောင်ဆန်းစုကြည်က ပြည်သူ့ လွှတ်တော်မှာ ကျမ်းသစ္စာ ကျိန်ဆိုပြီး ပြည်သူ့ ကိုယ်စားလှယ်အဖြစ် အစည်းအဝေး တက်တာဖြစ်လို့ နေပြည်တော် ပြည်သူ့လွှတ်တော် အစည်းအဝေး ခန်းမကျယ်ကြီး အထိ လာရောက် သတင်းရယူနေကြတဲ့ ပြည်တွင်းပြည်ပ သတင်းထောက်တွေဖြစ်ပါတယ်။

ပြည်သူ့လွှတ်တော် ခန်းမကျယ်ကြီးထဲမှာ စစ်တပ် လွှတ်တော်ကိုယ်စားလှယ်တွေ၊ နိုင်ငံရေးပါတီအစုံက ရွေးကောက် တင်မြှောက်ခံထားရတဲ့ လွှတ်တော် ကိုယ်စားလှယ်တွေ အမတ်တွေ ရာပေါင်းများစွာ ရှိနေကြပါတယ်။

မနက် ၁၀ နာရီတိတိမှာတော့ ရွှေအိုရောင်နဲ့ အမည်းရောင် ရောယှက်ထားတဲ့ ၀တ်စုံပွပွကြီးကို ၀တ်ဆင်ထားတဲ့ အမျိုးသားကြီးတစ်ဦး ခန်းမကျယ်ထဲကို ၀င်ရောက်လာတယ် ဆိုရင်ပဲ ထိုင်နေတဲ့ လွှတ်တော်ကိုယ်စားလှယ် အားလုံးက ညီညီညာညာ မတ်တပ်ရပ်လိုက်တယ်။ သူကတော့ ပြည်သူ့လွှတ်တော်ဥက္ကဋ္ဌ သူရဦးရွှေမန်းဖြစ်ပြီး သူ့မျက်နှာမှာ အပြုံးရိပ်တချို့သမ်းနေတယ်။

လွှတ်တော်အစည်းအဝေးတွေ ပုံမှန်တက်ရောက် သတင်းယူနေတဲ့ ပြည်တွင်းသတင်းထောက်တဦးကလည်း “ဒီနေ့တော့ ဦးရွှေမန်းကြည့်ရတာ ကျေနပ်နေတဲ့ပုံပဲ။ ခပ်ပြုံးပြုံးလေးပဲ။ ပုံမှန်ဆိုရင် သူက ခပ်တည်တည်မျက်နှာပေးရှိတယ်” လို့ မှတ်ချက်ပြုတယ်။

ဒါပေမဲ့ လွှတ်တော်ထဲမှာ လူတိုင်းပြုံးနေကြတာ မဟုတ်ပါဘူး။ ပြည်ထောင်စုကြံ့ခိုင်ရေးနဲ့ဖွံ့ဖြိုးရေးပါတီက လွှတ်တော် ကိုယ်စားလှယ်တွေ၊ ယူနီဖောင်းဝတ် စစ်သား ကိုယ်စားလှယ်တွေ အများစုရဲ့ မျက်နှာက မပြုံး မရယ် ခပ်တည်တည် မျက်နှာထားတွေနဲ့ ရှိနေကြတယ်။ တချို့ လွှတ်တော်ကိုယ်စားလှယ်တွေရဲ့ မျက်နှာတွေကတော့ ညှိုးငယ်နေပါတယ်။

မနက် ၁၀ နာရီ ငါးမိနစ်ဝန်းကျင်မှာ ပြည်သူ့လွှတ်တော်ဥက္ကဋ္ဌက ဒေါ်အောင်ဆန်းစုကြည် အပါအ၀င် NLD လွှတ်တော်ကိုယ်စားလှယ်များ ကျမ်းကျိန်ကြဖို့ ဆင့်ခေါ်ပါတယ်။

စစ်သားကိုယ်စားလှယ်တွေနဲ့ အနီးဆုံးမှာရှိနေတဲ့ ဒေါ်အောင်ဆန်းစုကြည်က တပ်ကိုယ်စားလှယ်တွေကြားကနေပြီး အရောင် တောက်နေတဲ့ မျက်ဝန်းတွေ၊ အားမာန် အပြည့်ရှိတဲ့ ခြေလှမ်းတွေ တလှမ်းချင်း ခန်းမရှေ့ကို ထွက်လာတယ်။ စစ်သားကိုယ်စားလှယ်တွေအများစုက ဒေါ်အောင်ဆန်းစုကြည်ကို အထူးအဆန်းတခုအလား စူးစမ်း ကြည့်နေကြတယ်။

အဲဒီနောက်မှာတော့ သူရဦးရွှေမန်း ရွတ်ဆိုပြတဲ့ အတိုင်း ဒေါ်အောင်ဆန်းစုကြည် အပါအ၀င် NLD လွတ်တော်ကိုယ်စားလှယ် ၃၁ ဦး နောက်က ရွတ်ဆို ကျမ်းသစ္စာ ကျိန်ဆိုပါတယ်။

“ကျွန်ုပ်သည် ပြည်သူ့ကိုယ်စားလှယ်အဖြစ် ရွေးချယ်ခံရပြီးဖြစ်သဖြင့် နိုင်ငံတော် ဖွဲ့စည်းပုံ အခြေခံဥပဒေကို ထိန်းသိမ်း ကာကွယ် စောင့်ရှောက်ပြီး နိုင်ငံတော်၏ ဥပဒေများကိုလည်း လိုက်နာပါမည်။ ပြည်ထောင်စုသမ္မတ မြန်မာနိုင်ငံတော်နှင့် နိုင်ငံသားများအပေါ် သစ္စာ စောင့်သိ ရိုသေပါမည်။ ပြည်ထောင်စု မပြိုကွဲရေး၊ တိုင်းရင်းသား စည်းလုံးညီညွတ်မှု မပြိုကွဲရေး၊ အချုပ်အခြာအာဏာ တည်တံ့ခိုင်မြဲရေးတို့ကို ထာဝရစဉ် ဦးထိပ်ပန်ဆင် ဆောင်ရွက်ပါမည်။ ထို့ပြင် ယခု ကျွန်ုပ်ထမ်းဆောင်မည်ဖြစ်သော တာဝန်၊ ၀တ္တရားများကို ဖြောင့်မတ်မှန်ကန်စွာ ဆောင်ရွက်မည်ဟု လေးနက် တည်ကြည်စွာ ကတိသစ္စာပြုပါသည်” ဆိုတဲ့ စုပေါင်း ညီညာတဲ့အသံက လွှတ်တော် ခန်းမကျယ်ကြီးထဲမှာ ဟိန်းထွက်နေတယ်။

ကျမ်းသစ္စာ ကျိန်ဆိုနေချိန်မှာ ဒေါ်အောင်ဆန်းစုကြည်ရဲ့ မျက်ဝန်းတွေက စူးလှလွန်းပြီး သူရဲ့မျက်နှာက သာမန်အချိန်အထက် ခက်ထန်နေသလိုပါပဲ။

ဒေါ်အောင်ဆန်းစုကြည်ရဲ့ သွင်ပြင်က ဖွဲ့စည်းပုံ အခြေခံဥပဒေကို ထိန်းသိမ်းကာကွယ် စောင့်ရှောက်ပါမည် ဆိုတဲ့ စကားရပ်ကို ပြင်ဆင်ဖို့ ကြိုးစားရင်းက အဆင်မပြေလို့ အလျှော့ ပေးလိုက်ရပေမယ့် အဲဒီစာသားကို ပြင်နိုင်ရမယ်လို့ ယုံကြည်ချက် ရှိနေပုံပါပဲ။

ကျမ်းသစ္စာကျိန်ဆိုအပြီးမှာ တောက်ပတဲ့ မျက်ဝန်းတွေနဲ့ သူရဦးရွှေမန်းကို ဒေါ်အောင်ဆန်းစုကြည် လှမ်းကြည့်လိုက်တယ်။ ဒါပေမဲ့ သူရဦးရွှေမန်းကတော့ သူရဲ့စားပွဲပေါ်က စာရွက်ကိုသာ ငုံ့ကြည့်ရင်း ဒေါ်အောင်ဆန်းစုကြည်ကို ပြန်မကြည့်ဖြစ်ပါဘူး။

အဲဒီနောက် သူရဦးရွှေမန်းက ခွင့်တိုင် ပျက်ကွက်တဲ့ လွှတ်တော်ကိုယ်စားလှယ် စာရင်းတွေနဲ့ အတည်ပြုဖို့ ကျန်တဲ့ ဥပဒေအချို့ကို ဖတ်ပြပြီး လွှတ်တော် ကိုယ်စားလှယ်တွေရဲ့ သဘောတူညီချက် ရယူပါတယ်။ ဒေါ်အောင်ဆန်းစုကြည်က လွှတ်တော်အစည်းအဝေးတက်ရင်း လွှတ်တော်ရဲ့ ပတ်ဝန်းကျင်ကို စူးစမ်းနေပါတယ်။

ဒေါ်အောင်ဆန်းစုကြည်ရဲ့ နောက်တန်းမှာ ထိုင်နေတဲ့ စစ်သားကိုယ်စားလှယ်တွေကတော့ မျက်နှာတွေ အောက်ငုံ့လို့ စားပွဲပေါ်က စာရွက်တွေ ဖတ်ရှုရင်း တကယ် အလုပ်ရှုပ်နေတာလား၊ အလုပ်ရှုပ်ချင်ယောင် ဆောင်နေတာလား ဆိုတာ ကွဲကွဲပြားပြား မသိဘူးလို့ သတင်းထောက်အချို့က ဆိုပါတယ်။

မနက် ၁၀ နာရီ ၃၅ မိနစ်မှာ လွှတ်တော်အစည်းအဝေးပြီးဆုံးကြောင်း ကြေညာလိုက်ချိန်မှာတော့ သတင်းထောက်တွေ မြောက်မြားစွာ လွှတ်တော်ထဲကို ပြေးဝင်သွားကြတယ်။ တချို့အမတ်တွေကို သတင်းထောက်တွေက ၀င်တိုက်မိကြတယ်။

ဗိုလ်မှူးချုပ်နဲ့ ဗိုလ်မှူးကြီးအဆင့်ရှိတဲ့ စစ်သား ကိုယ်စားလှယ်အရာရှိကြီးတွေက တော့ သတင်းထောက်တွေကို လက်ကာပြပြီး တစုံတရာ မှတ်ချက်မပေးဘဲ ရှောင်ပြေးနေကြတယ်။

ဒေါ်အောင်ဆန်းစုကြည်က လွှတ်တော်ကို သူလာတက်တာက ပြည်သူတွေအတွက်ဖြစ်ကြောင်း၊ ပြည်သူတွေအတွက် အလုပ်လုပ်ရင်း ကြိုးစားမှာဖြစ်တဲ့အကြောင်း၊ လွှတ်တော်ပြင်ပ နိုင်ငံရေးကိုလည်း ဆက်လုပ်မှာဖြစ်တဲ့အကြောင်း ပြောဆိုပါတယ်။

ဒေါ်အောင်ဆန်းစုကြည် လွှတ်တော်ခန်းမကနေ ပြင်ပကို ထွက်ရာ လမ်းတလျှောက် ပြည်တွင်းပြည်ပ သတင်းထောက်တွေ ကြိတ်ကြိတ်တိုး တိုးဝှေ့နေကြတယ်။ ဒေါ်အောင်ဆန်းစုကြည်က လှမ်းတဲ့ ခြေလှမ်းတိုင်း၊ ပြောတဲ့ စကားလုံးတိုင်းမှာ အနာဂတ်အတွက် ယုံကြည်ချက်တွေ အပြည့် ရှိနေပုံပါပဲ။

လွှတ်တော်ဝန်ထမ်းတဦးကတော့ ဒေါ်အောင်ဆန်းစုကြည် ရောက်လာတဲ့ ဒီနေ့ဟာ ခြောက်ကပ်နေတဲ့ လွှတ်တော်အတွက် အစည်ကားဆုံးနေ့တနေ့လို့ ဆိုတယ်။ သူတို့အားလုံးကလည်း ဒေါ်အောင်ဆန်းစုကြည်ကို အဝေးက လှမ်းမျှော်ကြည့်နေကြတယ်။ နှုတ်ဆက်ပြောဆိုခွင့် တားဆီးခံထားရပုံပါပဲ။

ကြံ့ခိုင်ရေးလွှတ်တော်အမတ်တွေ အများစုက ဒေါ်အောင်ဆန်းစုကြည်နဲ့ ၀ိုင်းအုံနေတဲ့ သတင်းထောက်တွေကို ကြည့်ပြီး ငေးမောနေကြတယ်။

ဒေါ်အောင်ဆန်းစုကြည်က သတင်းထောက်တွေမေးသမျှကို အပြုံးလေးနဲ့ ပြန်လည် ဖြေကြားနေတယ်။

ဒေါ်အောင်ဆန်းစုကြည် လွှတ်တော်ကနေ ကားနဲ့ ပြန်လည် ထွက်ခွာသွားတာကို ကြံ့ခိုင်ရေး အမတ်တချို့ မျက်စိတဆုံး ငြိမ်ငြိမ်သက်သက် လှမ်းမျှော်ကြည့်နေကြပါတယ်။

ဒေါ်အောင်ဆန်းစုကြည်ရဲ့ ပထမဆုံး လွှတ်တော်တက်တဲ့ နေ့ကတော့ အားမာန်အပြည့် တက်ကြွ ယုံကြည်မှုတွေနဲ့ ပြည့်နှက်နေတဲ့ နေ့တနေ့လို့ ဆိုရပါမယ်။

ကချင်ဒုက္ခသည်များအတွက် ဆန်ဂိုဒေါင်များ အရေးတကြီးလိုအပ်

နေမျိုး | ဗုဒ္ဓဟူးနေ့၊ မေလ ၀၂ မဇ္ဈိမ

နယူးဒေလီ (မဇ္ဈိမ) ။ ။ တရုတ်-မြန်မာ နယ်စပ်ရှိ စစ်ပြေးဒုက္ခသည် စခန်းများတွင် သောက်သုံးရေ၊ ဆေးဝါးနှင့် ဆန်ဂိုဒေါင်များ အရေးပေါ် လိုအပ်နေကြောင်း သိရသည်။

ကချင်ဒုက္ခသည် စခန်းများအား ဒုတိယအကြိမ်အဖြစ် သွားရောက်ကူညီ လှူဒါန်းပေးနေသည့် အဖြူရောင် တွဲလက်များ အဖွဲ့ တာဝန်ရှိသူ ကိုဘိုဘို ခေါ် ကိုမိုးကျော်သူ က မံစီမြို့နယ်၊ မန့်ဝိုင်းကြီးစခန်းတွင် ရောက်ရှိနေစဉ် ပြောကြားလိုက်ခြင်း ဖြစ်သည်။

“အရေးတကြီး လိုအပ်နေတာက ဆန်ဂိုဒေါင်တွေ ဆောက်ဖို့ဗျ။ အခု စိုးရိမ်နေကြတာက မိုးရွာနေတော့ အခြား အလှူရှင်တွေက ပေးတဲ့ ဆန်တွေကို သိုလှောင် သိမ်းဆည်းနိုင်ဖို့ပဲဗျ” ဟု မဇ္ဈိမကို ပြောသည်။

ရန်ကုန်မြို့မှာ ဧပြီလ ၂၉ ရက်နေ့က စတင်ထွက်ခွါလာခဲ့ပြီး မန့်ဝိုင်းကြီးစခန်းအပြင် နန်ထောင်၊ အခြေနှင့် ငါနောင်ပါ စခန်းများသို့ ရောက်ရှိပြီး ဖြစ်သည်ဟု ဆိုသည်။

အဆိုပါဒေသသည် ငှက်ဖျားရောဂါ ထူပြောသည့် ဒေသတခုဖြစ်ပြီး ယခုအခါ အဖျားအနာနှင့် ဝမ်းရောဂါများ ဖြစ်ပွားနေ ကာ သေဆုံးမှုများ ရှိနေကြောင်း သူက ဆက်ပြောသည်။

“ကျနော် ဒုက္ခသည်စခန်း လေးခု ရောက်ပြီးပါပြီ။ မန့်ဝိုင်းကြီးစခန်းမှာဆို အားလုံးလူ ၉၀၀ ကျော် ရှိတယ်။ ဆေးဆရာမ လေးဦးပဲ ရှိတယ်။ ဆေးဝါးကုန်ကျ စားရိတ်က လူတဦးကို တလတလ တသိန်းကျော် ကုန်တယ်။ ဆေးဝါး မလောက်မင နဲ့သွားနေတာ။ ကလေး နှစ်ယောက်၊ လူကြီး တယောက် သေတယ်။ ဝမ်းရောဂါကြောင့်။ အထက်လန် အောက်လျှော

ဖြစ်တယ်။ ဖျားတာနာတာတွေ ဖြစ်နေတယ်” ဟု ကိုမိုးကျော်သူ က ဆိုသည်။

ဒုက္ခသည် စခန်းလေးခုတွင် ဒုက္ခသည် ၃,၀၀၀ ကျော်ခန့်ရှိပြီး ကလေးငယ်များမှာ အာဟာရ ချို့တဲ့မှုများ ဖြစ်ပေါ်နေ၍ အာဟာရမှုန့်များ စားသုံးနေရကြောင်း သိရသည်။

စခန်းတွင်းရှိ ကလေးများ ပညာရေးနှင့် ပါတ်သက်ပြီး မိဘများက စိုးရိမ်ပူပန်နေကြကြောင်း “ထွက်ပြေးလာရတဲ့ အခါမှာ ကျောင်းတွေ အခက်အခဲ ဖြစ်လာတယ်။ မူလရွာက ကျောင်းတွေ မီးရှို့ခံရတယ်၊ အဖျက်ခံရတယ်။ ကလေးပညာရေး ဘယ်လို သွားရမလဲဆိုတာ ခက်လာတယ်။ ကချင်ပြည်နယ်မှာ လုံခြုံရေး အခြေအနေ စိတ်ချရတဲ့ နယ်မြေတွေက ပိုကျဉ်းလာနေပြီ” ဟု ကိုမိုးကျော်သူ က ဆိုသည်။

အဖြူရောင်တွဲလက်များက ဒုက္ခသည် စခန်းများ၏ လိုအပ်ချက်များအတွက် အလှူငွေသိန်း ၂ဝ နှင့် အနွေးထည် ၁၅,ဝဝ ကူညီသွားမည်ဖြစ်ပြီး ဒုက္ခသည် စခန်း ကော်မတီနှင့် ညှိနှိုင်းလှူဒါန်းမည်ဟု သိရသည်။

အနယ်နယ်အရပ်ရပ်မှ မိဘပြည်သူများကလည်း ကလေးများအတွက် ကစားစရာအရုပ်၊ ကလေးဝတ် အင်္ကျီများနှင့် ဆေးဝါးအချို့အား ၎င်းတို့အဖွဲ့နှင့် ပေးပို့လှူဒါန်းကြသည်။

တရုတ်နိုင်ငံဘက်ခြမ်းရှိ ဒုက္ခသည်စခန်းအချို့မှာ ဆန်အခက်အခဲ မရှိသော်လည်း သောက်သုံးရေ အခက်အခဲရှိကြောင်း သိရသည်။

ယခုအကြိမ် သွားရောက်ကူညီရာတွင် မျက်လှည့် ဆရာများ၊ ပန်းချီဆရာများ၊ သီချင်းဆိုသူများ ပါဝင်ပြီး အခွင့်ရပါက ဒုက္ခသည်များနှင့်အတူ ပြဇာတ်များ တင်ဆက်ကပြ ဖျော်ဖြေကြမည် ဖြစ်ကြောင်း သိရသည်။

အဖြူရောင်တွဲလက်များအဖွဲ့ကို စစ်ဘေးဒဏ်ခံရသည့် တိုင်းရင်းသား ညီအကိုမောင်နှမများအား စာနာထောက်ထားကြောင်း ပြသရန် ဖွဲ့စည်းထားခြင်း ဖြစ်သည်ဟု ဆိုသည်။

မြန်မာအစိုးရနှင့် ကချင်လွတ်လပ်ရေး တပ်မတော်တို့အကြား ၂ဝ၁၁ ခုနှစ် ဇွန်လမှစ၍ နှစ်ဖက် ပစ်ခတ်မှုများ ပြန်လည်ဖြစ်ပွားလာရာမှ ဒေသခံများမှာ တရုတ်-မြန်မာ နယ်စပ်တလျှောက်နှင့် မြို့ပေါ်များသို့ စစ်ပြေးဒုက္ခသည်များ အဖြစ်နေရပ်စွန့်ခွါ ထွက်ပြေးခဲ့ကြရသည်။

လက်ရှိအခြေအနေတွင် စစ်ပြေးဒုက္ခသည်ပေါင်း ၇ သောင်းကျော်ရှိလာကာ ကုလသမဂ္ဂ အဖွဲ့အစည်းများက မိုးမောက် မြို့နယ် အင်ခေါင်းပါနှင့် ဒွန်ဘွမ်ဒုက္ခသည်စခန်းရှိ စစ်ပြေးဒုက္ခသည် ၁,၅၀၀ ဦးအား အစားအသောက်များ ကူညီခဲ့သည် သိရသည်။

ဗုဒ္ဓဟူး, 02 မေ 2012

ဒီမိုကရေစီ လိုလားသူများနဲ့ လွှတ်တော်အမတ်သစ်များ အမေရိကန် ချီးကျူး

By VOA (မြန်မာပိုင်း)

နိုဘဲလ်ငြိမ်းချမ်းရေးဆုရှင် ဒေါ်အောင်ဆန်းစုကြည်ဟာ လွန်ခဲ့တဲ့ ၁၈ လကမှ နေအိမ်အကျယ်ချုပ်က လွတ်မြောက်လာပြီး ဒီကနေ့မှာတော့ သူမနဲ့ အတူ အမျိုးသားဒီမိုကရေစီ အဖွဲ့ချုပ်က တခြား အဖွဲ့ဝင် အများအပြား တို့ဟာ မြန်မာနိုင်ငံ လွှတ်တော်ထဲမှာ သူတို့ရဲ့ နေရာသစ်တွေကို ရယူလိုက်ကြပြီ ဖြစ်ပါတယ်။ ဒါဟာ မြန်မာနိုင်ငံသမိုင်းမှာ ပထမဦးဆုံးအကြိမ်အဖြစ် ဒ်ါအောင်ဆန်းစုကြည်နဲ့ သူမရဲ့ ပါတီဝင်တွေ တိုင်းပြည်အုပ်ချုပ်ရာမှာ တခန်းတကဏ္ဍက ပါဝင်လာနိုင်တာ ဖြစ်ပါတယ်။

ကျွန်မ အနေနဲ့ ဒီမိုကရေစီ လိုလားတဲ့ ခေါင်းဆောင်တွေ လွှတ်တော်ကို တက်ရောက်လာတဲ့ အမတ် အသစ်တွေ၊ သိန်းနဲ့ ချီတဲ့ မဲဆန္ဒရှင်တွေကို သူတို့ရဲ့ ရဲစွမ်း သတ္တိနဲ့ လူထုကိုယ်စားလှယ် အစိုးရ ပေါ်ထွန်းရေးအတွက် တာဝန်ယူ ထမ်းဆောင်ခဲ့ကြတဲ့ အတွက် ချီးကြူး ဂုဏ်ပြုလိုက်ပါတယ်။

ဒီအချိန်ဟာ မြန်မာနိုင်ငံ အနာဂါတ်အတွက် အရေးကြီးတဲ့ အခိုက်အတန့်ဖြစ်ပါတယ်။ ပိုမိုတိုးတက်ဖွံ့ဖြိုးတဲ့ လူ့အဖွဲ့အစည်း ဖြစ်ထွန်းလာအောင် အထောက်အပံ့ ဖြစ်စေမယ့် ၂၀၁၅ ခုနှစ် အထွေထွေ ရွေးကောက်ပွဲကို ဦးတည်တဲ့ စစ်မှန်သော ပါတီစုံဒီမိုကရေစီ အသွင်ကူးပြောင်းရေး ကာလလည်း ဖြစ်ပါတယ်။ နိုင်ငံရေး ပါတီအားလုံး အရပ်သားအဖွဲ့အစည်း အားလုံးနဲ့၊ တိုင်းရင်းသားလူ မျိုးစုခေါင်းဆောင်တွေ အနေနဲ့ စိန်ခေါ်မှုတွေကို အတူတကွ ရင်ဆိုင်ဖြေရှင်းပြီး ဒီမိုကရေစီပိုကျသော၊ လွတ်လပ်သော၊ ငြိမ်းချမ်းသော တိုးတက်ဖွံ့ဖြိုးသော အနာဂါတ် ပေါ်ထွန်းရေးအတွက် အခွင့်ရေးသစ်တွေကို ဆုပ်ကိုင် အသုံးပြုကြဖို့ အားပေးနှိုးဆော် လိုက်ပါတယ်။

ဟီလာရီ ကလင်တန် အမေရိကန်နိုင်ငံခြားရေးဝန်ကြီး ၂၀၁၂ မေလ ၂ရက်

ဗုဒ္ဓဟူး, 02 မေ 2012

ပြည်သူ့လွှတ်တော်အမတ် ဒေါ်အောင်ဆန်းစုကြည် ကျမ်းသစ္စာ ကျိန်ဆို

By ကိုကျော်ကျော်သိန်းVOA

မြန်မာနိုင်ငံကလွှတ်တော်ကို စစ်မှန်တဲ့ဒီမိုကရေစီ စံချိန်စံညွှန်းတွေနဲ့ ကိုက်ညီတဲ့ လွှတ်တော် ဖြစ်စေချင် ပါတယ်လို့ အမျိုးသားဒီမိုကရေစီအဖွဲ့ချုပ် ဥက္ကဋ္ဌ ဒေါ်အောင် ဆန်းစုကြည် က ပြောလိုက်ပါတယ်။ ပြည်သူ့ လွှတ်တော်ကိုယ်စားလှယ်အဖြစ် ကျန်းသစ္စာ ကျိန်ဆိုပြီး လွှတ်တော်ကို ဒီကနေ့ စတက်တဲ့ ဒေါ်အောင်ဆန်းစုကြည်က နိုင်ငံခြား သတင်းထောက် တယောက်ရဲ့ အမေးကို အခုလို ဖြေသွားတာဖြစ်ပါတယ်။ ပြည်သူတွေရဲ့ အကျိုးကို ရှေ့ရှုပြီးတော့ လွှတ်တော်တက်မယ်လို့ NLD ပါတီ ဆုံးဖြတ်ပြီးတဲ့နောက်မှာ ရွေးကောက်ခံ NLD လွှတ်တော်ကိုယ်စားလှယ်တွေ အားလုံး လည်း ဒီကနေ့ ဆိုင်ရာ လွှတ်တော်တွေမှာ ကျန်းသစ္စာကျိန်ဆိုပြီးတော့ လွှတ်တော်စတက်ခဲ့ကြတာပါ။ အပြည့်အစုံကိုတော့ ဘန်ကောက်ကနေ ကိုကျော်ကျော်သိန်းက တင်ပြပေးထားပါတယ်။

ဒီကနေ့ဟာဖြင့် မြန်မာ့နိုင်ငံရေးမှာ နောက်ထပ် သမိုင်းစာမျက်နှာသစ်တခု ဖွင့်လှစ်လိုက်နိုင်တဲ့နေ့ လို့ ဆိုရမှာပါ။ NLD အနေနဲ့ နိုင်ငံရေးပါတီအဖြစ် ပြန်ပြီး မှတ်ပုံတင်ခဲ့၊ ဧပြီ ၁ ရက် ကြားဖြတ်ရွေးကောက်ပွဲ ၀င်ခဲ့ပြီးတဲ့နောက် အခုအခါမှာတော့ ဒေါ်အောင်ဆန်းစုကြည်ဦးဆောင်တဲ့ NLD ပါတီက လွှတ်တော် ကိုယ်စားလှယ်တွေဟာ ကျမ်းသစ္စာကျိန်ဆိုလိုက်ကြပြီး တရားဝင် လွှတ်တော် ကိုယ်စားလှယ်တွေ ဖြစ် သွားကြပါပြီ။

လွှတ်တော်ကိုယ်စားလှယ်တွေ ကျမ်းသစ္စာကျိန်ဆိုရာမှာ အခြေခံဥပဒေကို “ထိန်းသိမ်း ကာကွယ် စောင့်ရှောက် ပါမည်” ဆိုတဲ့ စကားရပ်အစား “လေးစားလိုက်နာပါမည်” ဆိုတဲ့စကားရပ်နဲ့ အစားထိုးပေးဖို့ NLD ပါတီဘက်က ကြိုးပမ်းချက်တွေကို စွန့်လွှတ် လိုက်ပြီး နဂိုမူရင်းစာသားအတိုင်းပဲ ကျမ်းသစ္စာကျိန်ဆိုခဲ့ကြတာပါ။

လွှတ်တော်ကိုယ်စားလှယ်ဖြစ်သွားပြီဖြစ်တဲ့ ဒေါ်အောင်ဆန်းစုကြည်ဟာ နောင်လာမယ့် လွှတ်တော် အစည်းအဝေးတွေမှာ စစ်တပ်က တိုက်ရိုက်ခန့်ထားတဲ့ ၂၅% သော လွှတ်တော် ကိုယ်စားလှယ်တွေ၊ လူများစုဖြစ်တဲ့ ပြည်ထောင်စုကြံ့ခိုင်ရေးနဲ့ ဖွံ့ဖြိုးရေး ပါတီက ကိုယ်စားလှယ်တွေနဲ့ နိုင်ငံ့ရေးရာ ကိစ္စ ရပ်တွေကို ဆွေးနွေး ညှိနှိုင်း အဖြေရှာကြရတော့မှာဖြစ်ပါတယ်။ ဒေါ်အောင်ဆန်းစုကြည် အနေနဲ့ ကတော့ စစ်တပ်ကိုယ်စားလှယ်တွေနဲ့ လက်တွဲလုပ်ဆောင်သွားဖို့ အဆင်သင့်ရှိနေတဲ့သဘော ပြောဆိုခဲ့ပါတယ်။

“ကျမအနေနဲ့ စစ်တပ်အပေါ်မှာ အင်မတန့်ကို ကောင်းမွန်တဲ့သဘောထား ရှိထားပြီးသားပါ။ ဒါကြောင့်လည်း လွှတ်တော်ထဲမှာ သူတို့နဲ့အတူယှဉ်တွဲထိုင်ရတာကို စိတ်အနှောက် အယှက်မဖြစ်သလို အဲဒီလို ထိုင်ရတာ ကိုပဲ ကျေနပ်မိပါတယ်။” လို့ လွှတ်တော်တွင်းမှာ ကျမ်းကျိန်ပြီးတဲ့နောက် သတင်းထောက်တွေ ကို ဒေါ်အောင်ဆန်းစုကြည်က ပြောခဲ့ပါတယ်။

ဒီလိုဆိုပေမဲ့လည်း ရွေးကောက်ပွဲမ၀င်ခင်ကတည်းကိုက NLD ပါတီရဲ့ရည်ရွယ်ချက်တွေထဲမှာ ၂၀၀၈ ခုနှစ် အခြေခံဥပဒေထဲက ဒီမိုကရေစီနည်းလမ်းမကျတဲ့အချက်တွေကို ပြင်ဆင်မယ်လို့ NLD က တရား ၀င် ကြေညာ ထားတာပါ။ အဲဒီအချက်တွေထဲမှာ အဓိကအကျဆုံးလို့ ဆိုရမှာ ကတော့ မဲဆန္ဒရှင်ပြည်သူ လူထုက ရွေးကောက်တင်မြှောက်တာမဟုတ်ဘဲ စစ်တပ်အကြီးအကဲက တိုက်ရိုက်ခန့်ထားတဲ့ လွှတ်တော် ကိုယ်စားလှယ်တွေ လွှတ်တော်အသီးသီးမှာ ၂၅% စီ ပါဝင်နေတဲ့ ကိစ္စပါပဲ။ ဒီအချက်ကို NLD က ပြင် ဖို့ကြိုးစားတာဟာ တနည်းအားဖြင့်တော့ စစ်တပ် ကိုယ်စားလှယ်တွေ လွှတ်တော်တွင်းမှာ ဆက် မရှိတော့အောင် လုပ်မယ့် သဘောလို့ ယူဆရမှာပါ။ ဒါနဲ့ပတ်သက်ပြီး ဒေါ်အောင်ဆန်းစုကြည်က -

“ကျမတို့ရဲ့လွှတ်တော်ကို စစ်မှန်တဲ့ ဒီမိုကရေစီ စံနှုန်းစံထားတွေနဲ့ အညီ ဖြစ်စေချင်ပါတယ်။ လွှတ်တော်ထဲကနေ တစုံတယောက်ကို ကျမတို့ ဖယ်ရှုားပစ်ချင်တာကြောင့်မဟုတ်ဘဲ ကျမတို့ရဲ့ လွှတ်တော်တွေ တကယ့်ကို ဒီမိုကရေစီနည်းကျဖြစ်လာစေမယ့် တိုးတက်မှုမျိုးရအောင် ကျမတို့ လုပ်ချင်တာပါပဲ။” လို့ ဒေါ်အောင်ဆန်းစုကြည်က ပြောခဲ့ပါတယ်။

ကျမ်းသစ္စာကျိန်ဆိုတဲ့စာသားကို ပြင်ဆင်ဖို့ ကြိုးပမ်းချက်တွေကို စွန့်လွှတ်လိုက်ပြီဆိုတာကို ဧပြီလ ၃၀ ရက်နေ့မှာ ဒေါ်အောင်ဆန်းစုကြည်က ကြေညာခဲ့တာဖြစ်ပါတယ်။ NLD ဘက်က အဲဒီလို ဆုံးဖြတ်ဖြစ် လာအောင် ၀ိုင်းဝန်း ကြိုးစား တိုက်တွန်းခဲ့ကြတဲ့ထဲမှာ အဓိက ကတော့ လွှတ်တော်တွင်း ရောက်နေပြီးသား လူမျိုးစုတိုင်းရင်းသားပါတီတွေက လွှတ်တော် ကိုယ်စားလှယ်တွေပဲဖြစ်ပါတယ်။ ဒီကနေ့ သမိုင်းဝင် အဖြစ်အပျက်တခု ဖြစ်လာရအောင် ကြိုးပမ်းပေးခဲ့ကြတဲ့ အဲဒီပါတီတွေကို ဒေါ်အောင်ဆန်းစုကြည်က အသိအမှတ်ပြုစကား ပြောခဲ့ပါသေးတယ်။

“လမ်းကြောင်း ဖြောင့်ဖြူးသွားအောင် ကြိုးစားခဲ့ကြတာ လူမျိုးစု တိုင်းရင်းသားပါတီတွေပဲဖြစ်ပါတယ်။ ကြိုးစားရုံတင်မကပါဘူး၊ ကျမတို့ ဆုံးဖြတ်ချက်ချဖြစ်လာအောင် လမ်းခင်းပေးတဲ့ အထိ အောင်အောင်မြင်မြင် လုပ်ဆောင်ခဲ့ကြပါတယ်။” လို့ NLD ပါတီဥက္ကဋ္ဌ၊ ရန်ကုန်တိုင်း၊ ကော့မှူး မြို့နယ်၊ ပြည်သူ့လွှတ်တော် ကိုယ်စားလှယ် ဒေါ်အောင်ဆန်းစုကြည်က ပြောသွားပါတယ်။

ဒေါ်အောင်ဆန်းစုကြည်နဲ့ NLD လွှတ်တော်ကိုယ်စားလှယ်တွေ လွှတ်တော်အသီးသီးမှာ ကျမ်းသစ္စာကျိန်ဆိုတဲ့ အခမ်းအနား ပြီးတဲ့နောက် ပထမအကြိမ် ပြည်သူ့လွှတ်တော် တတိယပုံမှန် အစည်းအဝေးနှင့် ပထမအကြိမ် အမျိုးသားလွှတ်တော် တတိယ ပုံမှန်အစည်းအဝေးတွေလည်း အဆုံးသတ်သွားပြီဖြစ်ပါတယ်။

ဇူလိုင်လကျရင် ပြန်ခေါ်ဖို့ရှိတဲ့ လွှတ်တော်အစည်းအဝေးတွေမှာတော့ ဒေါ်အောင်ဆန်းစုကြည်ဟာ လွှတ်တော်ကိုယ်စားလှယ် အဖြစ် ပါဝင်တော့မှာဖြစ်ပါတယ်ခင်ဗျား။

ဗုဒ္ဓဟူး, 02 မေ 2012

ကြံ့ခိုင်ရေးပါတီ ဒေါ်အောင်ဆန်းစုကြည်ကို ကြိုဆို

By ကိုကျော်ကျော်သိန်းVOA

ဒေါ်အောင်ဆန်းစုကြည်အပါအဝင် အမျိုးသားဒီမိုကရေစီအဖွဲ့ချုပ် ကိုယ်စားလှယ်တွေ ကျမ်း ကျိန်ပြီးတော့ လွှတ်တော်စတက်ခဲ့ကြတဲ့အပေါ်မှာ လက်ရှိအာဏာရ ပြည်ထောင်စုကြံ့ခိုင်ရေး နဲ့ ဖွံ့ဖြိုးရေးပါတီကလည်း ကြိုဆိုလိုက်ပါတယ်။ ကျမ်းကျိန်ရာမှာ ပြောရတဲ့အသုံးအနှုန်းနဲ့ ပတ်သက်လို့ NLD ရဲ့ သဘောထားအပေါ် လွှတ်တော်ကိုယ်စားလှယ်တချို့က ဘဝင်မကျတဲ့ အမြင်ရှိပေမယ့်လည်း ရှေ့ဆက်လက်တွဲ လုပ်ဆောင် သွားဖို့ အခက်အခဲ မရှိပါဘူး လို့ ပြည်ခိုင်ဖြိုးပါတီ အထွေထွေအတွင်းရေးမှူး ဦးဌေးဦးက ဗွီအိုအေကို ပြော ပါတယ်။ NLD ပါတီ လွှတ်တော်ထဲကို ရောက်လာတဲ့အပေါ် လက်ရှိအာဏာရပါတီအပြင် တိုင်းရင်းသား ပါတီတွေရဲ့ သဘောထားတွေကိုလည်း ဆက်သွယ်မေးမြန်းထားတဲ့ ကိုကျော်ကျော်သိန်းက တင်ပြ ထားပါတယ်။

ကြားဖြတ်ရွေးကောက်ပွဲမှာ အနိုင်ရထားတဲ့ ဒေါ်အောင်ဆန်းစုကြည်နဲ့ NLD လွှတ်တော် ကိုယ်စားလှယ်တွေ လွှတ်တော်ထဲ ဘယ်တော့သွားမှာလဲဆိုတဲ့ မေးခွန်းဟာ ဒီကနေ့တော့ဖြင့် အဖြေထွက်သွားပြီဖြစ်ပါတယ်။ ကြားဖြတ်ရွေးကောက်ပွဲမှာ အမတ် နေရာ ၄၃ နေရာ အနိုင်ရ ထားတဲ့ထဲ နိုင်ငံခြားခရီး ထွက်နေတဲ့ လွှတ်တော်ကိုယ်စားလှယ်သုံးဦး၊ တိုင်းဒေသကြီး လွှတ်တော် ကိုယ်စားလှယ်နှစ်ဦးကလွဲလို့ အမျိုးသားနဲ့ပြည်သူ့လွှတ်တော်က ဒေါ်အောင် ဆန်းစုကြည်နဲ့အတူ လွှတ်တော်ကိုယ်စားလှယ် ၃၈ ဦးလုံး ကျမ်းသစ္စာကျိန်ဆိုခဲ့ကြတာပါ။

ကျမ်းသစ္စာကျိန်ဆိုတာမှာပါဝင်တဲ့ စာသားကိုပြင်ဆင်ဖို့ NLD ပါတီဘက်က ကြိုးပမ်းချက်တွေကို အဆုံး သတ်ပြီး အခုလို ကျမ်းသစ္စာ ကျိန်ဆိုဖြစ်လာအောင် ကြိုးပမ်းတိုက်တွန်းခဲ့သူတွေထဲ မှာ အဓိကပုဂ္ဂိုလ် ကတော့ ရခိုင်တိုင်းရင်းသားများ ဖွံ့ဖြိုးတိုးတက်ရေးပါတီ RNDP ခေါင်းဆောင်၊ အမျိုးသားလွှတ်တော် ကိုယ်စားလှယ် ဒေါက်တာ အေးမောင်ပဲဖြစ်ပါတယ်။

“ကျနော်တို့ အင်မတန်ဝမ်းမြောက်ပါတယ်။ လွှတ်တော်အတွင်းမှာ ပြည်သူတွေရဲ့ကိုယ်စား ၂၀၀၈ ဖွဲ့စည်းပုံ က ပေးထားတဲ့အတိုင်းအတာလေး တစ်ခုရှိမှာပေါ့-နော်၊ ကျနော်တို့ က နောင်ပြုပြင်ပြောင်းလဲရေးတွေလည်း အများကြီး ရှိလာမှာပါ။ ဒီ လာမယ့် လေးနှစ်တာလေးအတွက် အခု စပြီးကာမှ အမျိုးသားပြန်လည် ရင်ကြားစေ့ရေးကို အစလှမ်းနိုင်ခဲ့ပြီ၊ မတူညီတဲ့ အတွေးအခေါ်လေးတွေတော့ ရှိကောင်းရှိကြပေမယ့် လွှတ်တော်ကြီးရဲ့ရင်ပြင်မှာ စုံစုံညီညီထိုင်ပြီး မတူညီတဲ့ပြဿနာတွေကို စုပေါင်းဖြေရှင်းခြင်း အားဖြင့် ပြည်ထောင်စုရဲ့ကောင်းရာကောင်းကျိုး၊ ပြည်ထောင်စုရဲ့ ငြိမ်းချမ်းမှု၊ ဖွံ့ဖြိုးမှု အကုန်လုံးရအောင် ကျနော်တို့ မှန်းထားတဲ့အတိုင်း ခြေလှမ်းစလှမ်းနိုင်တော့မယ်လို့ ဝမ်းမြောက်ဝမ်းသာလည်း ဖြစ်မိပါတယ်။ တိုင်းရင်းသားပါတီ အားလုံးကလည်း ဝမ်းသာအားရဖြစ်ပါတယ်။”

အခြေခံဥပဒေကို ထိန်းသိမ်းကာကွယ်စောင့်ရှောက်ပါမည်ဆိုတဲ့ စကားအစား လေးစားလိုက်နာပါမည် ဆိုတဲ့ စကားနဲ့အစားထိုးဖို့ NLD ပါတီဘက်က ကြိုးစားခဲ့တာမှာ လွှတ်တော်တွင်း လူများစုပါတီဖြစ်တဲ့ ပြည်ထောင် စု ကြံ့ခိုင်ရေးနဲ့ ဖွံ့ဖြိုးရေးပါတီနဲ့ စစ်တပ်က ခန့်ထားတဲ့ကိုယ်စားလှယ်တွေရဲ့ ထောက်ခံချက် အပြည့်အ၀ မရခဲ့ပါဘူး။ အဲဒါကြောင့်လည်းပဲ နောက်ဆုံးမှာ NLD ပါတီဘက်က လိုက်လျောခဲ့တာဖြစ်ပါတယ်။

အခုလို ကျမ်းသစ္စာကျိန်ဆိုလိုက်တာကိုတော့ ပြည်ခိုင်ဖြိုးပါတီရဲ့ အထွေထွေအတွင်းရေးမှူး ဦးဌေးဦးက ကြိုဆိုတယ်လို့ ပြောပါတယ်။

“ရွေးကောက်ပွဲလမ်းစဉ်က ကျနော်တို့ယုံတဲ့ လမ်းစဉ်ပါပဲ။ လွှတ်တော်ကလည်း ကျနော်တို့ ယုံတဲ့ လမ်းစဉ် ထဲမှာပါတဲ့တစ်ခုပါပဲ။ အဲဒီတော့ ပြည်သူတွေကရွေးတဲ့၊ ပြည်သူ့ကိုယ်စားလှယ်ဖြစ်တဲ့ ဒေါ်အောင်ဆန်းစုကြည် နဲ့ NLD ကိုယ်စားလှယ်တွေအားလုံး ကျန်းသစ္စာကျိန်ဆိုတာနဲ့ ပတ်သက်လို့ ကျနော်တို့ ကြိုဆိုပါတယ်။ သူ့ကိုလည်းပဲ ကျနော်ကိုယ်တိုင် နှုတ်ဆက်ပြီးတော့မှ ကြိုဆိုတယ်ဆိုတဲ့အကြောင်းလေးလည်း ကျနော် ပြောလိုက်ပါတယ်။”

ကျမ်းကျိန်ရေးကိစ္စ အခြေအတင်ဖြစ်နေခဲ့တဲ့အချိန်တုန်းက ပြည်ခိုင်ဖြိုးပါတီ အမတ်တချို့နဲ့ ကျန်အမတ် တချို့ဆီကနေ မကျေနပ် ဘ၀င်မကျတဲ့ အသံတွေ ကြားခဲ့ရဖူးပါတယ်။ NLD ဘက်က အရင်ကတည်းကသာ လိုက်လျောပြီး စောစောစီးစီးလုပ်ခဲ့မယ်ဆိုရင် ဒီ့ထက်ပိုကောင်းမယ်ဆိုတဲ့ အမြင်မျိုးလည်း ကြားရပါတယ်။ ဒီအခြေအနေအောက်မှာ ဒေါ်အောင်ဆန်းစုကြည် ဦးဆောင်တဲ့ လွှတ်တော်ကိုယ်စားလှယ်တွေနဲ့ ကျန် လွှတ်တော် ကိုယ်စားလှယ်တွေအကြား အနာဂတ် ပူးပေါင်းဆောင်ရွက်ရေး အလားအလာ အပေါ် မေးခွန်း ထုတ်စရာရှိနေပါတယ်။ ဦးဌေးဦးကတော့ အဲဒီအပေါ် အကောင်းမြင် ယုံကြည်ထားပါတယ်။

“လွှတ်တော်ကိုယ်စားလှယ်တွေဆိုတဲ့အထဲမှာလည်း ခုနတုန်းက ဒီလိုပုံစံမျိုးရှိတဲ့ ကိုယ်စားလှယ်တွေလည်း ရှိမှာပါ။ သို့သော်လည်းပဲ ကိုယ်စားလှယ်အားလုံးကတော့ ကျနော်တို့ ဒီစကားလုံးနဲ့ပဲ ကျေကျေနပ်နပ်နဲ့ပဲ ကျမ်းကျိန်ခဲ့ကြတဲ့သူတွေ ဖြစ်တဲ့အတွက် ဒီအတွက်ကိုလည်းပဲ ကျနော်တို့ ဘာမှ ပြဿနာမရှိပါဘူး။ သူတို့ကိုယ်တိုင်လည်းပဲ လိုလိုလားလားနဲ့လာပြီး ကျမ်းကျိန်တာဖြစ်တဲ့အတွက် ရှေ့ဆက်လျှောက်မယ့် ခရီးစဉ်မှာလည်းပဲ ဘာမှ ပြဿနာမရှိနိုင်ဘူးလို့ပဲ ကျနော်ယုံပါတယ်။”

ဒါပေမဲ့လည်း လွှတ်တော်တွေအဆုံးသတ်ဖို့ရက် သတ်မှတ်ထားပြီးကာမှ NLD ကိုယ်စားလှယ်တွေ ကျမ်း သစ္စာ ကျိန်ဆိုဖို့ သက်သက် ရက်ထပ် တိုးလိုက်တဲ့အတွက် လွှတ်တော်ဥက္ကဋ္ဌတွေက သိပ်အလိုလိုက်လွန်း တယ်လို့ မြင်ကြတဲ့ ပြည်ခိုင်ဖြိုးပါတီ အမတ်တွေရှိတယ်လို့ သင်္ဃန်းကျွန်းမြို့နယ်က ပြည်သူ့ လွှတ်တော် ကိုယ်စားလှယ် ဦးသိန်းညွန့်ကပြောပါတယ်။ ပြန်ဖို့ကိစ္စတွေ စီစဉ်ထားပြီးသား ပြန်ကုန်ကြလို့ဆိုပြီး လွှတ်တော် ကိုယ်စားလှယ် အများအပြား ဒီကနေ့ကျမ်းကျိန်ပွဲကို မတက်ရောက်ခဲ့ကြပါဘူး။ အဲဒါကြောင့်လည်း ပူးပေါင်းဆောင်ရွက်ရေး ပြဿနာမရှိပါဘူးဆိုတဲ့အပေါ် ဦးသိန်းညွန့်က အနည်းငယ် သတိထား တုံ့ပြန်ပုံ ရပါတယ်။

“ကျနော့်တဦးချင်း၊ ကျနော့်ပါတီအနေနဲ့ ပြောရလို့ရှိရင်တော့ ကျနော်ကတော့ ဒီအပေါ်မှာ ပြီးတာက ပြီးသွားပြီ၊ ရှေ့ဆက်အလုပ်လုပ်ဖို့ပဲ သဘောထားတာပေါ့။ သို့သော် အနိုင်ရပါတီအတွင်းမှာကတော့ လူအမျိုးမျိုး၊ အနွယ်အမျိုးမျိုး၊ ပညာအရည်အချင်းအမျိုးမျိုးရှိတာကိုး- အဲဒီတော့ သူတို့ဘက်ကတော့ မတူကွဲပြားတဲ့အသံတွေကတော့ ကြားရတာပေါ့။”

ကျမ်းကျိန်ရေးကိစ္စ ချောမွေ့အောင် တိုက်တွန်း ကြိုးပမ်းခဲ့ကြတဲ့ လူမျိုးစုတိုင်းရင်းသားပါတီတွေက လွှတ်တော်ကိုယ်စားလှယ်တွေ၊ NLD လွှတ်တော် ကိုယ်စားလှယ်တွေနဲ့အတူ ဒေါ်အောင်ဆန်းစုကြည် ဟာ နေပြည်တော်ကနေ ပြန်မထွက်ခင် နေ့လည်စာ အတူ စားခဲ့ကြပါတယ်။ အဲဒီမှာ ဒေါ်အောင်ဆန်းစု ကြည်က တိုင်းရင်းသားတွေ နွေးနွေးထွေးထွေး ကြိုဆိုတာကို ၀မ်းမြောက်တဲ့ အကြောင်း၊ တိုင်းရင်းသားတွေ ပါဝင်တဲ့ ပြည်ထောင်စုကြီးမှာ တိုင်းရင်းသားတွေနဲ့ လက်တွဲခိုင်ခိုင်တွဲမှပဲ ပြည်ထောင်စုကြီးကို တည်ဆောက်နိုင်မယ့်အကြောင်း၊ ဒီမိုကရေစီလမ်းကြောင်းမှာ တပ်မတော်သားတွေရဲ့ ပူးပေါင်းပါဝင်မှုဟာ အင်မတန်အရေးကြီး ကြောင်းပြောကြားခဲ့တယ်လို့ ရခိုင်တိုင်းရင်းသား အမျိုးသား လွှတ်တော် ကိုယ်စားလှယ် ဒေါက်တာအေးမောင်က ပြောပါတယ်ခင်ဗျား။

ဗုဒ္ဓဟူး, 02 မေ 2012

နာဂစ်လေးနှစ်ပြည့်ပေမယ့် လူထုအခြေအနေ ပုံမှန်မဖြစ်သေး

By ကိုဇော်ဝင်းလှိုင်VOA

မြန်မာနိုင်ငံမှာ သိန်းနဲ့ချီ သေဆုံးခဲ့တဲ့ နာဂစ်မုန်တိုင်း တိုက်ခိုက်ခံခဲ့ရတာ ဒီကနေ့ ၄ နှစ် ပြည့်ခဲ့ပါပြီ။ နာဂစ်မုန်တိုင်းဒဏ်ကို အဆိုးဆုံးခံခဲ့ရတဲ့ ဧရာဝတီ မြစ်ဝကျွန်းပေါ်ဒေသက ပြည်သူတွေ ၄ နှစ်အကြာမှာ ဘယ်လောက် ဘ၀တွေကို ပြန်လည် ထူထောင်နိုင်ကြပါသလဲ၊ ကူညီထောက်ပံ့မှုတွေကိုရော ဘယ်လောက် လုံလုံလောက်လောက် ရရှိခဲ့ကြပါသလဲ။ မြစ်ဝကျွန်းပေါ်ဒေသက တချို့ပြည်သူတွေကတော့ ဖွံ့ဖြိုးတိုးတက် မှုတွေ ဘက်စုံမှာ သိသိသာသာ ရှိမလာသေးဘူးလို့ ပြောနေကြပါတယ်။ အပြည့်အစုံကိုတော့ စုံးစမ်းထားတဲ့ ကိုဇော်ဝင်းလှိုင်က တင်ပြပေးထားပါတယ်။

မြန်မာ့သမိုင်းမှာ အဆိုးရွားဆုံးနဲ့ လူအသေအပျောက် အများဆုံးလို့ သတ်မှတ်ရမယ့် ဒီ နာဂစ်မုန်တိုင်းဒဏ် ခံခဲ့ရတာ ၄ နှစ်ကြာခဲ့ပေမယ့်လည်း အခုချိန်ထိ ဖွံ့ဖြိုးမှုလုပ်ငန်းတွေ သိသိသာသာ တိုးတက်မလာသေးတဲ့ အပေါ် ဒေသခံတွေက အားမလို အားမရ ဖြစ်နေကြတာပါ။

စီးပွားရေးနဲ့ လယ်ယာကဏ္ဍကို ကြည့်မယ်ဆိုရင် မြန်မာနိုင်ငံရဲ့ စပါးကျည်လို့ သတ်မှတ်ထားတဲ့ ဒီ မြစ်ဝ ကျွန်းပေါ်ဒေသက လယ်သမားတွေဟာ အရင် နာဂစ် မဖြစ်ခင်တုန်းက အနေအထားထက် စိုက်ပျိုးမှုနှုန်းဟာ အဆပေါင်းများစွာ လျော့ကျသွားတယ်လို့ လပွတ္တာမြို့နယ် NLD ဒုတိယဥက္ကဋ္ဌ ဒေါက်တာအေးကြူက အခုလို ပြောပြပါတယ်ဗျ။

"လယ်သမားတွေက လယ်တွေ အပြည့်မစိုက်နိုင်ကြဘူး။ ဟိုးတုန်းကဆို လယ်တွေက အဲဒီ အောက်ဘက် တကြောမှာ လယ်တွေက နင်းကန်ရတာပေါ့။ အခု လယ်စရိတ်တွေ မခံနိုင်လို့ မြေအပြည့်မစိုက်နိုင်ဘူး။ ဆယ်ပုံတပုံလောက်ပဲ စိုက်နိုင်တယ်။ နာဂစ်ဖြစ်ပီး နောက်နှစ်တွေ၊ နောက်နှစ်တွေကျတော့ ထွက်မြေ ကျတော့ စပါးတွေက မရဘူး။ ၃-၄ နှစ်လောက် စပါးတွေက ရှုံးတယ်။ ဒီနှစ်တော့ စပါးတော့ ရမ လား အောက်မေ့တယ်။ ဒီနှစ်မှာ စပါးဈေးတွေကကျတော့ လယ်သမားတွေ တော်တော်ဒုက္ခရောက်တယ်။ လယ်သမားတွေ အခြေအနေဆိုးနေတယ်။ စီးပွားရေးက နာဂစ်ဖြစ်ပြီး တော်တော်ကျတယ်။ နာဂစ်မဖြစ်ခင် တော်တော်ချမ်းသာနေတဲ့ ပင်လယ်ပိုင်းက နာဂစ်ဖြစ်ပြီးတဲ့အခါကျတော့ စီးပွားရေးပိုဆိုးလာတယ်။

ရင်းနှီးမြှုပ်နှံမှုအပိုင်းမှာ ဆားဆိုလည်း ဆားဈေးကဂျွမ်းပြန်ကျနေတာ။ ဆားသမားတွေလည်း နာဂစ်ဖြစ်ပြီးကတည်းက ဒုက္ခရောက်နေတာ"

ပညာရေးကဏ္ဍနဲ့ ပတ်သက်လို့လည်း လပွတ္တာမြို့နယ်မှာ လူမှုရေးလုပ်ငန်းတွေ လုပ်ကိုင်နေတဲ့ ကိုမောင်ကြင်က အခုလို ရှင်းပြပါတယ်။

"ပညာရေးကဏ္ဍမှာတော့ အပြည့်စုံကြီးတော့လည်း မဟုတ်လှဘူး။ တချို့နယ်မြေတွေမှာတော့ အဆောက်အဦးကလည်း အခိုင်အမာတော့ မဟုတ်ဘူးပေါ့လေ။ ပြန်ဆောက်ထားတာလေးတွေလည်း ရှိတယ်။ ကျောင်းလည်းကျောင်း shelter လည်း shelter ဆိုပြီးတော့ - သဘောက မုန်တိုင်းကျလာခဲ့လို့ ရှိရင် ရှောင်လို့ရအောင်ဆိုပြီးတော့ အဆောက်အဦးလေးတွေ ဆောက်ပေးထားတာ ရှိတယ်။ အဲဒီ အဆောက်အဦးမှာ တချို့က ပညာသင်တယ်။ တချို့ကျတော့လည်း အဲဒါကို ပိတ်ထားပြီးတော့ မုန်တိုင်းသင့်တဲ့အခါမှာ အသုံးချဖို့လောက်ပဲ သုံးပြီးတော့ ကျောင်းအဖြစ်နဲ့ မသုံးတဲ့ဟာတွေလည်း ရှိတယ်။ ကျောင်းအဖြစ် သီးသန့်ကြီးရယ်လို့ လာပြီးဆောက်ပေးတဲ့လူကတော့ နည်းပါတယ်။"

နာဂစ်ဖြစ်ပြီးခါစက ပြည်တွင်း၊ ပြည်ပမှာရှိတဲ့ NGO တွေနဲ့ အဖွဲ့အစည်းအတော်များများက ကျန်းမာရေး၊ ပညာရေးနဲ့ လယ်ယာကဏ္ဍတွေမှာ အကူအညီတွေ အလုံးအရင်းနဲ့ ပေးခဲ့ပေမယ့် အခုချိန်မှာ အဲဒီ အကူအညီတွေ မရှိကြတော့တဲ့အတွက် ဒေသခံတွေအနေနဲ့ အခက်အခဲ အမျိုးမျိုးနဲ့ ရင်ဆိုင်နေကြရတယ်လို့ ဆိုပါတယ်။

လပွတ္တာမြို့က နာဂစ်မုန်တိုင်းဒဏ် ခံခဲ့ရသူတွေ လက်ရှိ ရင်ဆိုင်နေရတဲ့အခြေအနေကိုတော့ မြို့ခံ ကိုဇော်လေးက ပွင့်ပွင့်လင်းလင်းပဲ ဗွီအိုအေကို အခုလို ပြောပြပါတယ်။

"နာဂစ်ကတော့ ဘာမှမထူးဘူး။ လူတွေငတ်နေတာပဲ ထူးတယ် အကိုရေ့။ အစိုးရကလည်း လက်ပိုက် ကြည့်နေတယ်။ NGO အကူအညီတွေက လုံးဝရပ်သလောက်ဖြစ်နေပြီဆိုတော့ လုပ်နေကျ လုပ်ငန်းရှင်တွေ က အလုပ်တွေ မလုပ်နိုင်ကြတော့ဘူး။ မိရိုးဖလာလုပ်နေကြတဲ့ တောင်သူတွေ၊ ဆားဖိုသူကြီးတွေက လုပ်ဖို့ အရင်းအနှီးလည်းမရှိဘူး၊ လူအင်အားလည်းမရှိဘူး ဖြစ်သွားပြီ။ အဲဒါကို အဓိက ပံ့ပိုးကူညီနိုင်တဲ့လူနဲ့ အဖွဲ့အစည်းတွေလည်းမရှိဘူး။ အစိုးရကလည်း လက်ပိုက်ကြည့်နေတယ်။ ဒီလိုနွေမျိုးဆို ရေအတွက်ပါ ဒုက္ခရောက်နေတာပေါ့။ နယ်တွေမှာ"

ဒေသခံတွေ အခုချိန်မှာ အဓိက လိုအပ်နေတာကတော့ စီးပွားရေးလုပ်ကိုင်နိုင်ဖို့ မတည်ငွေဖြစ်တယ် လို့ လည်း ကိုဇော်လေးက ရှင်းပြပါတယ်။

"လိုအပ်တဲ့ဥစ္စာ အဓိကကတော့ ငွေရေးကြေးရေး ပံ့ပိုးမှုပေါ့။ ငွေရေးကြေးရေးကိုလည်း နှစ်ရှည် စီမံကိန်း မျိုးတွေနဲ့ ငွေထောက်ပံ့တဲ့သူကလည်း မဆုံးရှုံးရအောင် ဘယ်နေ့ဆို ဘယ်ပုံစံ၊ ဘယ်နေ့ဆို ဘယ်ပုံစံ လုပ်တဲ့သူတွေလည်း limit နဲ့ ဒီအပေါ်မှာ ကွင်းဆင်းပြီးတော့ ဒီငွေရေးကြေးရေးတွေ မဆုံးရှုံးရအောင် - လုပ်ငန်းရှင်တွေကလည်း လုပ်ငန်းခွင်မှာ ငွေသုံးစွဲတာ ထိရောက်မှုရှိလား၊ မရှိလား ဒါတွေကို သေချာ ကွင်းဆင်းပြီး လေ့လာပြီးတော့ တဆင့်ချင်းလုပ်သွားမှ ရမှာ။"

ဒါကတော့ နာဂစ်မုန်တိုင်း တိုက်ခတ်ပြီး ၄ နှစ်ကြာလာပြီးတဲ့နောက် မုန်တိုင်းဒဏ်ခံခဲ့ရတဲ့ ဒေသခံတွေ ရဲ့ ပြောပြချက်တွေပဲ ဖြစ်ပါတယ်။

မြန်မာနိုင်ငံ မြစ်ဝကျွန်းပေါ်ဒေသတွေနဲ့ ရန်ကုန်မြို့တို့မှာ ၀င်ရောက်တိုက်ခတ်ခဲ့တဲ့ အဲဒီ နာဂစ် မုန်တိုင်းကြောင့် လူပေါင်း သိန်းနဲ့ချီ သေဆုံးခဲ့တယ်လို့ ခန့်မှန်းထားကြတာပါ။ တချို့ဒေသတွေမှာ မုန်တိုင်းကြောင့် ရွာလုံးကျွတ် ပျက်ဆီးသွားတာတွေ ရှိခဲ့တာကြောင့် မုန်တိုင်းဒဏ်ခံခဲ့ရတဲ့ ဒေသတွေမှာ စီးပွားရေးနဲ့ မိရိုးဖလာ စိုက်ပျိုးရေးလုပ်ငန်းတွေ ပျက်ဆီး ဆုံးရှုံးခဲ့ရတာပါ။

မုန်တိုင်း ဖြစ်ဖြစ်ချင်း နိုင်ငံတကာက အကူအညီပေးဖို့ အဲဒီအချိန်က စစ်အစိုးရကို ကမ်းလှမ်းခဲ့ပေမယ့် အာဏာပိုင်တွေက ငြင်းဆန်ခဲ့တဲ့အတွက် မဆုံးရှုံးသင့်တာတွေ ပိုပြီး ဆုံးရှုံးကြရတယ် လို့ ဝေဖန် ပြောဆိုမှုတွေ ရှိခဲ့ပါတယ်။

ဗုဒ္ဓဟူး, 02 မေ 2012

တရုတ်လူ့အခွင့်အရေးသမား အမေရိကန်သံရုံးမှ ထွက်ခွာ

By ဗွီအိုအေ (မြန်မာဌာန)VOA

တရုတ်မျက်မမြင် တက်ကြွလှုပ်ရှားသူဟာ ဆေးကုသမှု ခံယူဖို့ အတွက် ဘေဂျင်းမြို့က သူတိမ်းရှောင် ခိုလှုံနေတဲ့ အမေရိကန် သံရုံးကနေ ထွက်လာပြီး မိသားစုထံပြန်ရောက်သွားပြီလို့ အမေရိကန် တာဝန်ရှိ သူတွေက ပြောပါတယ်။

တက်ကြွလှုပ်ရှားသူ Chen Guangcheng ကို တရုတ်နိုင်ငံ က ဘေးကင်းလုံခြုံရာ တနေရာကို ပို့ဆောင်ဖို့နဲ့ တက္ကသိုလ် တခုကို တက်ရောက်ဖို့ တရုတ်အစိုးရက သဘောတူခဲ့ကြောင်း အမေရိကန်နိုင်ငံခြားရေးဌာန တာဝန်ရှိသူတယောက်က ဗုဒ္ဓဟူးနေ့မှာ သတင်းထောက်တွေကို ပြောခဲ့တာပါ။

လူ့အခွင့်အရေး လှုပ်ရှားသူ Chen ဟာ အမေရိကန် ပြည်ထောင်စုမှာ ခိုလှုံခွင့်တောင်းခံတာမျိုး မရှိခဲ့ဘူး လို့လည်း အမေရိကန် အရာရှိက ပြောပါတယ်။ သူ့ကို သံရုံးမှာ နေထိုင်ခွင့်ပေးပြီး နောက်ပိုင်း သူ့ဆန္ဒနဲ့သူ အမေရိကန်ရဲ့စံတန်ဘိုးတွေကို မထိခိုက်စေဘဲ ပြန်လည် ထွက်ခွာနိုင်အောင် တာဝန်ရှိသူတွေက စီစဉ်ပေးခဲ့တဲ့ အပေါ်မှာ ကျေနပ်မှုရှိကြောင်းလည်း တရုတ်နိုင်ငံကို ရောက်နေ တဲ့ နိုင်ငံခြားရေးဝန်ကြီး ဟီလာရီ ကလင်တန် ကပြောဆိုခဲ့တာပါ။

မနက်ဖြန် ကြာသပတေးနေ့မှာ စတင်မယ့် လုံခြုံရေးနဲ့ စီးပွားရေးဆိုင်ရာ နှစ်စဉ် ညီလာခံကို တက်ရောက်ဖို့ ၂ ရက်ကြာ ခရီးစဉ်အဖြစ် နိုင်ငံခြားရေးဝန်ကြီး ကလင်တန် တရုတ်နိုင်ငံကို ရောက်နေတာပါ။ တရုတ်နိုင်ငံခြားရေး ၀န်ကြီးဌာနကတော့ Chen ကို အမေရိကန် သံရုံးက လက်ခံခဲ့တာဟာ ပြည်တွင်းရေးကို ၀င်ရောက်စွက်ဖက်တဲ့ လုပ်ရပ်အဖြစ် လက်မခံနိုင်ကြောင်း ပြောဆိုပြီး အမေရိကန်က တောင်းပန်ဖို့ တောင်းဆိုထားပါတယ်။

လက်ခံခဲ့တဲ့ တာဝန်ရှိသူတွေကို အရေးယူဖို့နဲ့ နောက်နောင် ဒီလို အတိုက်အခံတွေကို လက်ခံခွင့် မပြုအောင် စီစဉ်ဖို့လည်း ပြောဆိုခဲ့တာပါ။ အာဏာရ တရုတ်ကွန်မြူနစ် ပါတီနဲ့ ဆက်နွယ်မှုရှိတဲ့ Global Times သတင်းစာရဲ့ အယ်ဒီတာ့ အာဘော်မှာတော့ ဒီအဖြစ်အပျက်ကြောင့် တရုတ်-အမေရိကန် ဆက်ဆံရေးအပေါ် ထိခိုက်စရာ မရှိနိုင်ဘူးလို့ ဖော်ပြထားပါတယ်။

နောက်ဆုံး

သတင်းသမား အခြေခံ အခွင့်အရေး ကာကွယ်ရန် MJN ဆွေးနွေး

ဖနိဒါ | ဗုဒ္ဓဟူးနေ့၊ မေလ ၀၂ မဇ္ဈိမ)

ချင်းမိုင်(မဇ္ဈိမ) ။ ။ ရန်ကုန်ရှိ လူငယ်သတင်းစာဆရာ အများစုဖြင့် ဖွဲ့စည်းထားသည့် Myanmar Journalists’ Network (Yangon) က သတင်းသမားများ၏ အခြေခံ အခွင့်အရေးများအား ကာကွယ်ရန် နည်းလမ်းများနှင့် ပတ်သက်၍ ဗုဒ္ဓဟူးနေ့တွင် ဆွေးနွေးခဲ့ကြကြောင်း 7 day ဂျာနယ်မှ သတင်းထောက် ကိုအောင်သူရ က ပြောသည်။

ဗဟန်းမြို့နယ်၊ ယုဇနဟိုတယ်တွင် ပြုလုပ်သည့် အဆိုပါ MJN ဆွေးနွေးပွဲအတွင်း အဖွဲ့၏ ဖွဲ့စည်းပုံပါ အခြေခံ အခွင့်အရေး ကာကွယ်ရန်ကိစ္စအား ပြင်ဆင်ရေးဆွဲရန် ဆုံးဖြတ်လိုက်ကြခြင်း ဖြစ်သည်။

“အခန်း ၁ မှာ သတင်းသမားများ၏ အခြေခံ အခွင့်အရေးကို ကာကွယ်ပါမည်ဆိုတဲ့ လုပ်ဆောင်ချက် အချက် လေးချက် ရှိတယ်။ အဲဒီ လေးချက်ထဲက ပထမဆုံးအချက်က သတင်းသမားများ၏ အခြေခံ အခွင့်အရေးကို ဘယ်လို ကာကွယ် မလဲဆိုတာ ဆွေးနွေးတယ်။ အဲဒီအချက်ကို သေချာပြန်ပြင်မှာ။ ပြင်ဖို့ သဘောတူလိုက်တယ်” ဟု အဖွဲ့၏ ဖွံဖြိုးရေး လုပ်ဆောင်ပေးနေသူ ကိုအောင်သူရ က မဇ္ဈိမကို ပြောသည်။

၂ဝ၁၂ ခုနှစ်အတွက် လုပ်ငန်းကော်မတီကို အဖွဲ့ဝင် သတင်းစာသမား ၁ဝ၅ ဦးအနက် မဲပေးရွေးချယ်ခံရသည့် ၁၇ ဦးကို တွေ့ရစဉ် (ဓါတ်ပုံ ပိုင်စိုးဦး)

ဆွေးနွေးပွဲမှ ၂ဝ၁၂ ခုနှစ်အတွက် လုပ်ငန်းကော်မတီကို အဖွဲ့ဝင် သတင်းစာသမား ၁ဝ၅ ဦးအနက် ၁၇ ဦးအား မဲပေး ရွေးချယ်ခဲ့သည်။

MJN ကို သတင်းစာဆရာ ၃၅ ဦးဖြင့် လူမှုရေးနှင့် သတင်းသမားများ ဖွံ့ဖြိုးတိုးတက်လာစေရေးအတွက် ရည်ရွယ်၍ စတင်ဖွဲ့စည်းခဲ့သည်။ ဖွဲ့စည်းပြီး ရှစ်လကြာ ကာလအတွင်း သတင်းသမားများကျင့်ဝတ်နှင့် သတင်းစာရှင်းလင်းပွဲ သွားရာတွင် မည်သို့ ပြင်ဆင်ထားသည့် ပညာရပ်များဆိုင်ရာ ရက်တိုသင်တန်းများ ပို့ချပေးနိုင်ခဲ့သည်။

ထို့ပြင် သတင်းစာဆရာကြီး မောင်ဝံသနှင့် ပြည်ပမှ ပြန်လာကြသည့် ဒေါက်တာ ဇော်ဦး၊ ဒေါက်တာတင်မောင်သန်း၊ ဦးဘိုဘိုကျော်ငြိမ်းတို့နှင့် ဟောပြောပွဲများလည်း ကျင်းပပေးခဲ့သည်ဟု ကိုအောင်သူရက ပြောသည်။

ရန်ကုန်၊ မန္တလေး၊ အခြားမြို့များနှင့် ရခိုင်ပြည်နယ်တွင်းတွင် ကွန်ယက်များ စတင်ဖွဲ့စည်းထားပြီး ဖြစ်ကြောင်း သိရသည်။

MJN သည် အစိုးရသစ် တက်လာပြီးနောက် မြန်မာနိုင်ငံတွင် ပထမဆုံးဖွဲ့သည့် သတင်းစာဆရာအသင်းဖြစ်ပြီး မြန်မာနိုင်ငံ သတင်းစာဆရာများအသင်းနှင့်အတူ လက်တွဲဆောင်ရွက်သွားမည်ဟု ပြည်သူ့ခေတ်ဂျာနယ် အတိုင်ပင်ခံ အယ်ဒီတာ မောင်ဝံသ က ဆွေးနွေးပွဲတွင် ပြောကြားသွားသည်။

မြန်မာနိုင်ငံ သတင်းစာဆရာများအသင်း ဖြစ်မြောက်ရေးကော်မတီကို ဧပြီလ ၅ ရက်နေ့က ပြည်တွင်းပြည်ပမှ သတင်းစာဆရာ ၈ဝ ဖြင့် ဖွဲ့စည်းထားသည်။

အသင်းကို စာနယ်ဇင်း လွတ်လပ်ခွင့် ထွန်းကားရေးရှေးရှု၍ လူ့အဖွဲ့အစည်းအတွက်လည်းကောင်း၊ သိက္ခာရှိသော စတုတ္ထ မဏ္ဍိုင် ဖြစ်တည်ရေးအတွက်လည်းကောင်း ဆောင်ရွက်သွားနိုင်ရန်အတွက် သီးခြားလွတ်လပ်သည့် မြန်မာနိုင်ငံ သတင်းစာဆရာများအသင်း ဖြစ်မြောက်ရေးအတွက် လုပ်ဆောင်သွားမည်ဟု သိရသည်။

အစိုးရ ပြန်ကြားရေးဝန်ကြီးဌာနနှင့် International Media Support အဖွဲ့တို့မှ ကြီးမှူး၍ အသံလွှင့်မီဒီယာ နည်းဥပဒေ ဆွေးနွေးပွဲတခုကို နေပြည်တော်တွင် ဧပြီလ ၂၃ ရက်နေ့က လည်းကောင်း၊ ပုံနှိပ်မီဒီယာ နည်းဥပဒေ ဆွေးနွေးပွဲ (Print Media Regulation Workshop) ကို ဧပြီလ ၂၅ ရက်နေ့ နံနက်ပိုင်းက ရန်ကုန်မြို့ ကန်တော်ကြီးပတ်လမ်းရှိ Chatrium Hotel တွင်လည်းကောင်း ကျင်းပခဲ့ပြီး ပြည်တွင်း မီဒီယာသမားများ တက်ရောက်ခဲ့ကြသည်။

မိုးမခ

Posted in: