Saturday, June 28, 2014

ကမ္ဘာဖလားဘောလုံး၊ အုပ်စုပွဲများ အောင်မြင်စွာပြီးဆုံး....................






ကမ္ဘာဖလားဘောလုံး၊ အုပ်စုပွဲများ အောင်မြင်စွာပြီးဆုံး
မိုးမခအားကစား၊ ဇွန် ၂၈၊ ၂၀၁၄
 
 








ခေါ်က်ဆွဲမစားတဲ့ ဘောလုံးပွဲ
 
မျှော်လင့်ထားတဲ့အသင်းအများစု ရှုံးထွက်ပွဲကို ၁၆သင်းတက်သွားကြပါပြီ။ မြန်မာနိုင်ငံသား တစ်ဦးအနေနဲ့၊ အကြိုက်ဆုံးပွဲကတော့ အုပ်စုဂျီ Group G ဂျာမဏီနဲ့အမေရိကန် အုပ်စုနောက်ဆုံးပွဲဖြစ်ပါတယ်။ မြန်မာ့ဒီမိုကရေစီ ပြုပြင်ပြောင်းလဲမှုမှာ ကမ္ဘာ့ဆင်းရဲနိုင်ငံတိုင်း မလွဲမသွေကြုံရတဲ့၊ လာဘ်စားမှု၊ အခွန်ရှောင်မှု၊ ဘတ်ဂျတ်အလွဲသုံးမှု စသဖြင့် ရတဲ့အခွင့်အရေးကိုသုံးပြီး၊ မိမိကြီးပွားချမ်းသာရေးလုပ်ဆောင်နေချိန်၊ လာလ်စားမှုမရှိသလောက်နည်းပါးပြီး၊ ကမ္ဘာ့အကောင်းဆုံးအစိုးရလဲဖြစ်၊ ကမ္ဘာ့အချမ်းသာဆုံး၊ အတိုးတက်ဆုံး နိုင်ငံရေး၊ စီးပွားရေး၊ လူမှုရေး၊ အတတ်ပညာ အရာရာမှာ စံနမူနာ ထိပ်တန်းရောက်နေတဲ့ အမေရိကန်နဲ့ဂျာမဏီ နှစ်နိုင်ငံ၊ အုပ်စုနောက်ဆုံးပွဲက တကမ္ဘာလုံး ဘောလုံးဝါသနာရှင်များ စိတ်ဝင်စားစရာဖြစ်လာပါတယ်။

တသင်းသင်း ဂိုးပြတ်ရှုံးသွားရင် ရှုံးတဲ့အသင်း အုပ်စုကထွက်သွားနိုင်ပါတယ်။ သရေကျရင်တော့ ၂သင်းစလုံး နောက်တဆင့်ကိုတက်သွားနိုင်မှာမို့ ၊ ထုံးစံအတိုင်း သရေလုပ်ပွဲကစားသွားမယ် ခန့်မှန်းကြပါတယ်။ အသင်း၂သင်းစလုံး ချစ်ကြည်ရင်းနှီးတဲ့အခြေနေမှာရှိပြီး၊ အထူးသဖြင့် အမေရိကန်အသင်းနည်းပြက ဂျာမန်လူမျိုး ကရင်စမန် ဖြစ်နေပါတယ်။ ဂျာမန်လူမျိုး ဘောသမားများလည်း အမေရိကန်အသင်းမှာ ပါဝင်နေပါတယ်။ ဒါကြောင့် သရေပဲကန်မယ် သေချာပေါက်ပြောကြပေမဲ့၊ တကယ်တန်းကန်တော့ ခြေစွမ်းထက်မြတ်တဲ့ ဂျာမဏီအသင်းက ၁းဝ နဲ့ အနိုင်ရရှိသွားပါတယ်။ ခြားစားမှု၊ လာဘ်စားမှု မရှိတဲ့ ကမ္ဘာ့ဖလားအုပ်စုပွဲ နောက်ဆုံးအရေးကြီးပွဲကို ဝမ်းမြောက်စွာကြည့်ရှုရလို့ ပျော်စရာကောင်းပါတယ်။

အမေရိကန်အသင်း ဂိုးပြတ်မရှုံးပေမဲ့ အုပ်စုနောက်ဆုံးပွဲမှာ ပေါ်တူဂီက အာဖရိကအသင်း ဂါနာကို ၂း၁ ဂိုးမပြတ်ပဲနိုင်ခဲ့လို့၊ အမေရိကန်-ပေါ်တူဂီ အမှတ်တူပေမဲ့ အမေရိကန်အသင်း ဂိုးကွာခြားမှုနဲ့ နောက်တဆင့်တက်သွားပါတယ်။

ဂိုးသွင်းမှကြည့်ရတာပျော်တယ်

လူတွေမျှော်လင့်၊ အားထားရတဲ့အတိုင်း ဝမ်းမြောက်ပျော်ရွှင်၊ စိတ်လှုပ်ရှားပြီး ကြည့်ရတဲ့ အုပ်စုတွေကတော့ ဘရားဇီးအုပ်စု၊ နယ်သာလန်အုပ်စု နဲ့ အာဂျင်တီးနားအုပ်စု တွေပဲဖြစ်ပါတယ်။ အဲဒီအသင်းကြီး၃သင်း ခြေစွမ်းတွေပြနိုင်ပြီး၊ ဂိုးတွေလည်း တော်တော်သွင်းနိုင်ကြပါတယ်။ ပရိတ်သတ်ကို ကောင်းကောင်း ဖြေဖျော်မှုပေးနိုင်ပါတယ်။ နာမည်ကျော် ဘရားဇီး-နေမာ၊ နယ်သာလန်-ပါစီနဲ့ရိုဘင်၂ဦး၊ အာဂျင်တီးနား-မက်ဆီ၊ ဂျာမဏီ-မူလာ၊ ပြင်သစ်-ဘင်ဇီမာ၊ ကိုလံဘီယာ-ရိုဒရီဂရုစ်၊ ဆွဒ်ဇာလန်-ရှာကွီရီ စတဲ့ ဂိုးသွင်းတိုက်စစ်မှုးများ နာမည်ကျော်လာပါတယ်။ ဂိုးသွင်းမှာ လူကြိုက်များခြင်း ဖြစ်ပေမဲ့ ကျင်းပရေးကော်မတီက ဆုအမျိုးမျိုးပေးပါတယ်။ အကောင်းဆုံးနောက်ခံလူ၊ အလယ်တန်းလူ၊ အကောင်းဆုံးဂိုးသမား၊ အကောင်းဆုံးမန်နေဂျာ အပြင်၊ အကောင်းဆုံးအားပေးပရိတ်သတ်အဖြစ်လည်း ကိုယ့်အမှိုက်ကိုယ်ရှင်းသွားတဲ့၊ ဂျပန်အားပေးပရိတ်သတ်များကို အထူးအလေးပေးဖေါ်ပြကြပါတယ်။

ဂိုးအများဆုံးသွင်းမဲ့လူအဖြစ် ဘရာဇီး-နေမာ၊ အာဂျင်တီးနား-မက်ဆီ တို့ကို မျော်လင့်၊ ခန့်မှန်းထားသူများစွာရှိပါတယ်။ ဒုတိယအုပ်စု ဇယားအရ ပွဲတိုင်းနိုင်မယ်ဆိုရင် ဘရားဇီးနဲ့အာဂျင်တီးနား ဗိုလ်လုပွဲတက်လာနိုင်လို့ နေမာ၊ မက်ဆီ ၂ယောက်ကို အသားပေးကြတာပါ။ လက်ရှိလဲ သူတို့၂ယောက် နဲ့ ဂျာမဏီက မူလာတို့ တစ်ဦးကို ၄ဂိုးစီသွင်းပြီး ထိပ်ဆုံးမှာရှိနေကြပါတယ်။ ဂိုးသွင်းဖို့ တည်ပေးနိုင်သူများကိုလည်း နာမည်မထွက်ပဲ ပံ့ပိုးပေးနိုင်သူအဖြစ် သတ်မှတ်ပါတယ်။ ကိုလံဗီယာ ဂျိမ်းစ်ရိုဒရီဂုစ်ဟာ ၃ဂိုးသွင်းပြီး၊ ၂ဂိုး တည်ဘောပေးခဲ့သူဖြစ်ပါတယ်။ ပြင်သစ်-ဘင်ဇီမာ ၃ဂိုးသွင်းပြီး၊ ၂ဂိုး မတည်ဘောပေးခဲ့သူဖြစ်ပါတယ်။ ဆွဒ်ဇာလန်က ရီကာဒိုရိုဒရီဂုစ် ၂ကြိမ် မတည်ဘောပေးခဲ့ပါတယ်။ အုပ်စုပွဲပြီးချိန် အများဆုံး မတည်ဘောဖန်တီးပေးသူများမှာ ၃ဂိုး မတည်ပေးသူ၂ဦးရှိပါတယ်။ နယ်သာလန် နောက်ခံဘယ်ဝန်းကစားသမား ဘလိုင်း နဲ့၊ ကိုလံဘီယာ နောက်ခံ၊အလယ်တန်းလူ ဂါဒရာဒိုဖြစ်ပါတယ်။ ဂါဒရာဒိုဟာ ပယ်နယ်တီတစ်ဂိုး ဂျပန်ကို ၄း၁ အနိုင်ယူတဲ့ပွဲမှာ သွင်းနိုင်ခဲ့ပါတယ်။

အုပ်စုပွဲအားလုံး ၂၄ပွဲ ကစားပြီးချိန်မှာ ဂိုးပေါင်းများစွာ၊ စိတ်လှုပ်ရှား၊ ဆွဲဆောင်မှုများနဲ့ သွင်းနိုင်ခဲ့ပါတယ်။ အရင်၎နှစ်က တစ်ပွဲ  ပျှမ်းမျှ ၂.၃ ဂိုးသာ သွင်းနိုင်ပေမဲ့၊ အခုပွဲမှာ ၂.၈ ဂိုး သွင်းနိုင်ပါတယ်။ ၀းဝ သရေကျတဲ့ ၄ပွဲပဲ ရှိပါတယ်။ ၇ဂိုးသွင်းတဲ့ ပြင်သစ်-ဆွဒ်ဇာလန် ၅း၂ ၊  နယ်သာလန်-စပိန် ၅း၁၊  အယ်ဂျီးယား-ကိုးရီးယာ ၄း၂၊ ဘရာဇီး-ကင်မရွန်း ၄း၁၊ နယ်သာလန်-သြစတြေးလျား ၃း၂၊ ခရိုရှား-ဂျပန် ၄း၁၊ အာဂျင်တီးနား-နိုင်ဂျီးယား ၃း၂ စတဲ့ အပြန်အလှန်ဂိုးသွင်းပွဲများစွာ ကြည့်ရတဲ့အတွက် ခြေရည်သိပ်မကွာတာကို မြင်ရပါတယ်။




အုပ်စု နောက်ဆုံးပွဲ(တတိယပွဲ)များ

အုပ်စုတိုင်းက ပထမ၊ ဒုတိယ ၂သင်း၊ စုစုပေါင်း ၁၆သင်း ရှုံးထွက်ပွဲကို တက်ရမှာဖြစ်ပါတယ်။ ၂ပွဲစီ ကစားပြီးတဲ့အချိန်မှာ အများစုက နောက်တဆင့်တက်ဖို့သေချာပေမဲ့၊ ဂရိ၊ ဥရုဂွေး၊ ဆွဒ်ဇာလန်၊ နိုင်ဂျီးယား၊ အယ်ဂျီးယာ ၅သင်းကတော့ နောက်ဆုံးပွဲတွေပြီးမှာ အုပ်စုဒုတိယရပြီး၊ အိုကေသွားပါတယ်။ 

 ခန့်မှန်းထားတဲ့ အကြပ်ဆုံးအုပ်စု၃ခု (ဘီ၊ ဒီ၊ အက်ဖ်) Group B, D, F  ဖြစ်ပါတယ်။ အဆိုးဆုံးတွေကတော့ အုပ်စုဘီက လက်ရှိကမ္ဘာ့ချန်ပီယံ နဲ့ ဥရောပချန်ပီယံ၂ခါဆက်တိုက်ရတဲ့ စပိန်အသင်း ပွဲဦးထွက်၂ပွဲစလုံးရှုံးပြီး၊ နောက်ဆုံးတပွဲကျန်ချိန် အုပ်စုကထွက်ခွာရပါတယ်။ ပွဲဦးထွက်မှာ နယ်သာလန်ကို ၁း၅ နဲ့ အပြက်သတ်ရှုံးရခြင်းဟာ ရှက်စရာဖြစ်ပါတယ်။ ဖြစ်ခဲလှပေမဲ့ ဖြစ်သွားတာကို မျက်ဝါးထင်ထင်တွေ့ပါတယ်။ နောက်ဆုံးပွဲကိုတော့ အာရှအသင်း သြစတြေလျားကို ၃းဝ နိုင်ပြီး အဖတ်ဆယ်သွားခဲ့ပါတယ်။

အုပ်စုဘီ Group B အကြောင်း အထက်မှာရေးခဲ့ပါတယ်။ ကမ္ဘာ့အဆင့်၁ စပိန်အသင်း မရှုမလှ အုပ်စုကထွက်ရပါတယ်။ သြစတြေးလျားကတော့ ထင်တဲ့အတိုင်း ပွဲတိုင်းရှုံးပေမဲ့၊ ရှုံးချက်မနာပါဘူး။ အသင်းကြီးများကို အကြိတ်အနယ်ကစား၊ ဂိုးသွင်းနိုင်ခဲ့ပါတယ်။ အုပ်စုကထွက်ရဖို့များတဲ့ ချီလီအသင်းက ပထမ၂ပွဲ ဆက်တိုက်နိုင်ပြီး လူကြိုက်များတဲ့အသင်း ဖြစ်လာပါတယ်။ အသင်းလိုက်၊ တစ်ဦးချင်း ကစားပုံများ လှပတဲ့ တောင်အမေရိကအသင်း ခြေစွမ်းပြခဲ့ပါတယ်။

နောက်တသင်းကတော့ အုပ်စုဒီ Group D ကမ္ဘာ့ဖလား ၄ကြိမ်ဗိုလ်စွဲဖူးတဲ့ အီတလီအသင်း၊ ၁ကြိမ်ဗိုလ်စွဲဖူးတဲ့ အင်္ဂလန်အသင်း ထွက်ခွာရခြင်းဖြစ်ပါတယ်။ ကော့စတာရီကာအသင်း ခြေစွမ်းပြပြီး အုပ်စုပထမ ရရှိသွားပါတယ်။ ပထမ၂ပွဲစလုံး ရှုံးသွားတဲ့ အင်္ဂလန်အသင်း နောက်ဆုံးပွဲမကစားခင်ကတည်းက ထွက်ရပါပြီ၊ အင်္ဂလန်ကို သံယောဇဉ်ရှိတဲ့ မြန်မာပရိသတ်များ စိတ်ပျက်စရာဖြစ်သွားပါတယ်။ နောက်ဆုံးပွဲတော့ ကော့စတာရီကာကို သရေကစားပြီး၊ သိက္ခာဆယ်နိုင်ခဲ့ပါတယ်။ အီတလီအသင်းကတော့ နောက်ဆုံးပွဲမှာ ဥရုဂွေးကို ၁းဝ နောက်ဆုံးမိနစ်၉၀မှာ ရှုံးသွားလို့ ဆင်ပြောင်ကြီးအမြှီးတစ် ဖြစ်သွားရှာပါတယ်။ သရေကျရင်တောင် အုပ်စုဒုတိယနဲ့ နောက်တဆင့်တက်ရမှာ ပွဲပြီးခါနီးမှ ဂိုးသွင်းခံလိုက်ရလို့ ကံကြမ္မာကိုပဲ ပုံချဖို့ရှိပါတော့တယ်။ ဒီအုပ်စုဒီ အလွန်ကျပ်တဲ့အုပ်စုဖြစ်ပြီး၊ ကမ္ဘာ့ချန်ပီယံဟောင်း ၃သင်းနဲ့ အစဉ်လာမရှိပေမဲ့၊ ခြေစွမ်းထက်တဲ့ ကိုစတာရီကာတို့ ပြိုင်ကြတာ၊ စိတ်လှုပ်ရှားစရာ တော်တော်ကောင်းပါတယ်။ အီတလီမန်နေဂျာကတော့ အုပ်စုကထွက်ရပြီးတဲ့နောက် သူ့မှာတာဝန်ရှိတယ်ပြောပြီး အလုပ်ကထွက်စာတင်လိုက်ပါတော့တယ်။ အင်္ဂလန်မန်နေဂျာကြီးကတော့ ခပ်တည်တည်ပဲ၊ အလုပ်ကမထွက်ဖူးလို့ ကြေညာပါတယ်။ ထုံးစံအတိုင်းဆိုရင် ကမ္ဘာ့ဖလားရှုံးသွားတဲ့အသင်းမန်နေဂျာများ တာဝန်ယူတဲ့အနေနဲ့ ထွက်စာတင်လေ့ရှိပါတယ်။ လစာလည်း အလွန်ကောင်းတော့ ငွေကြေး၊ ဆုကြေးတွေအပြင်၊ ငါ့ကြောင့်မဟုတ်ဘူးဆိုပြီး အင်္ဂလန်မန်နေဂျာက မထွက်ပါဘူး။ အင်္ဂလန်ဘောလုံးအဖွဲ့ချုပ်နဲ့လည်း အဆင်ပြေတာ အဓိကဖြစ်မယ် မျှော်လင့်ပါတယ်။ အမှန်တော့ အင်္ဂလန်မန်နေဂျာကြီး တာဝန်ယူပြီးထွက်စာ တင်သင့်ပါတယ်။

အုပ်စု အက်ဖ် Group F ကတော့ အုပ်စုပထမ၊ ဒုတိယ ရပြီးနောက်တဆင့်တက်ဖို့ ရေပန်းစားနေတဲ့ နာမည်ကြီး အင်္ဂလန်၊ အီတလီအသင်း၂သင်း အုပ်စုက ထွက်သွားရပါတယ်။ ကိုစတာရီကာနဲ့ ဥရုဂွေးတို့ နောက်တဆင့် တက်သွားပါတယ်။ အီတလီကို နောက်ဆုံးပွဲ၊ နောက်ဆုံးမိနစ်မှာ ၁းဝ နိုင်သွားတဲ့ ဥရုဂွေးက နာမည်ကျော်တိုက်စစ်မှုး ဆာရက် (လစ်ဗာပူအသင်း) အီတလီကစားသမားပုခုံးကို သွားနဲ့ပေါက်အောင် ကိုက်လိုက်တဲ့ ပြသနာကြီးတစ်ခု ဒိုင်လူကြီးမမြင်လိုက်ပါဘူး။ အဲဒါဖြစ်ပြီးမှ ဥရုဂွေး တစ်ဂိုးသွင်းပြီး အီတလီကို အနိုင်ယူ၊ အုပ်စုဒုတိယရသွားပါတယ်။ အီတလီအသင်းတော့ သရေကျရင်တောင် အုပ်စုက တက်နိုင်မဲ့အရေး၊ တိရိစ္ဆာန်လို ကိုက်တတ်တဲ့ ဥရုဂွေးတိုက်စစ်မှုးကို ဒိုင်လူကြီးမမြင်လို့ ပြစ်ဒဏ်မပေး၊ တော်တော်အရုပ်ဆိုးသွားပါတယ်။

 နောက်တစ်နေ့မှာ စည်းကမ်းထိန်းသိမ်းရေးကော်မတီက ဒါမျိုးအကျင့်ပျက်၊ အားကစားသမားမပီသတဲ့ တိုက်စစ်မှုး ရှာရက်ကို ကမ္ဘာ့ဖလားပွဲက ထုတ်ပယ်လိုက်ပါတယ်။ ၄လ ကွင်းထဲလာခွင့်မပြု၊ ပွဲ၁၂ပွဲ ကစားခွင့်ပိတ်လိုက်ပါတယ်။ အလွန်ပြင်းထန်လို့ ဥရုဂွေးတစ်နိုင်ငံလို့က အသင်းငယ်လေးကို ပြစ်ဒဏ်ကြီးပေးတယ်ဆိုပြီး ကန့်ကွက်ကြပါတယ်။ ၁၉၅၀ ကမ္ဘာ့ဖလားပွဲတုန်းက ဘရားဇီးကို အနိုင်ဂိုးသွင်းသွားသူ ဥရုဂွေးတိုက်စစ်မှုကြီးကတော့ ဒီပြစ်ဒဏ် တရာမျှတတယ်လို့ မှတ်ချက်ချပါတယ်။

မျှော်လင့်ချက်နည်းတဲ့အသင်းများ

ဂရိအသင်းက ထွက်ရပြီအောက်မေ့ပေမဲ့၊ နောက်ဆုံးပွဲမှာ အာဖရိက အလွန်ကောင်းတဲ့ အိုင်ဗရီကိုစ်အသင်းကို ၂း၁ အနိုင်ကစားလိုက်လို့ အုပ်စုဒုတိယရပြီး၊ ဒုတိယအဆင့် တက်လှမ်းသွားပါတယ်။ အာဖရိကအသင်းတိုင်း ခြေစွမ်းပြနိုင်ပါတယ်။ ကမ္ဘာ့ကလပ်အသင်းကြီးများမှာ ဈေးကြီးပေးတဲ့ ဘောသမားကောင်း များစွာလည်း ပါဝင်ကစားကြပါတယ်။ အာဖရိကအသင်းအားလုံး ဒုတိယအဆင့်ကို တက်လှမ်းနိုင်ပေမဲ့ နိုင်ဂျီးယား၊ အယ်ဂျီးယား ၂သင်းပဲ အုပ်စုဒုတိယနဲ့ ခက်ခက်ခဲခဲ ကစားပြီး တက်သွားပါတယ်။ ဂါနာ၊ အိုင်ဗရီကို့စ် ၂သင်းကတော့ အုပ်စုတတိယပဲရပြီး ထွက်ရပါတယ်။ အထူးသဖြင့် ဂါနာအသင်းဟာ ဂျာမဏီအသင်းကြီးကို ၂း၂ သရေကျအောင် အပြန်လှန် ဂိုးသွင်းခြေစွမ်းပြနိုင်ခဲ့ပါတယ်။ အလားတူ အိုင်ဗရီကို့စ်အသင်းလည်း ဂျပန်တစ်ခုပဲ ၂း၁ အနိုင်ရပြီး၊ ကျန်တဲ့ပွဲ အထူးသဖြင့် နောက်ဆုံးပွဲမှာ သရေကျရင်တောင် အုပ်စုတက်မဲ့ပွဲမှာ ဂရိကို ၂း၁ နဲ့ရှုံးသွားလို့ အုပ်စုကထွက်ရပါတယ်။ 

အာဖရိကအသင်း၂ခုကတော့ ဒုတိယအဆင့်မှာ  ပြင်သစ်-နိုင်ဂျီးယား၊ ဂျာမဏီ-အယ်ဂျီးယား တွေ့ကြမယ်ဖြစ်ပါတယ်။
အာရှတိုက်အသင်းများကတော့ နဂိုကတည်းက အုပ်စုတက်ဖို့အလွန်ခဲယဉ်မယ် သတ်မှတ်ထားပါတယ်။ တကယ်လဲ တောင်ကိုးရီးယား၊ ဂျပန်၊ အီရန်၊ သြစတြေးလျား ၄သင်းစလုံး အုပ်စု ဘိတ်ချီးဘဝနဲ့ ထွက်ခွာရပါတယ်။ အုပ်စုထဲမှာ နောက်ဘိတ်ဆုံး ဆိုပေမဲ့ သြစတြေးလျားတစ်သင်းပဲ အုပ်စုကြပ်ထဲကျပြီး ပွဲတိုင်း ရှုံးသွားရပါတယ်။ ကျန်တဲ့ တောင်ကိုးရီးယား၊ ဂျပန်၊ အီရန်တို့ တစ်ပွဲတော့ သရေကစားနိုင်ပါတယ်။ ခြေမသာပေမဲ့ အသင်းလိုက်၊ စည်းကမ်းနဲ့ အပြန်အလှန်ကစားနိုင်ပါတယ်။ ပွဲတိုင်းနီးပါးလည်း ပြိုင်ဖက်များကို ဂိုးပြန်သွင်းနိုင်ပါတယ်။ အဆင့်အတန်းရှိရှိ ၊ သိက္ခာရှိစွာနဲ့ ရှုံးရခြင်းဖြစ်ပါတယ်။

အုပ်စုပွဲမှာ ၃ပွဲစလုံး၊ ပွဲတိုင်းကိုအနိုင်ရပြီး၊ ၉မှတ်အပြည့်ရတဲ့ အသင်းများကတော့ နယ်သာလန်၊ ကိုလံဗီယာ၊ အာဂျင်တီးနား၊ ဘယ်လဂျီယံတို့ဖြစ်ပါတယ်။ ဘရာဇီး၊ ဂျာမဏီ၊ ပြင်သစ်၊ ကိုစတာရီကာ တို့လည်း ၂ပွဲနိုင်၊တစ်ပွဲသရေနဲ့ အုပ်စုပထမရပါတယ်။ အဲဒီ အုပ်စုပထမရတဲ့ ၈သင်းထဲကပဲ ဆက်လက်နိုင်ပွဲဆက်မယ်လို့ မျှော်လင့်ပေမဲ့၊ ဥရောပအသင်း ဆွဒ်ဇာလန်၊ ဂရိ၊ အမေရိကတိုက်က မက္ကဆီကို၊ ချီလီ၊ အမေရိကန်၊ ဥရုဂွေးအသင်းများလည်း အကြိတ်အနယ်ယှဉ်ပြိုင်နိုင်ပါတယ်။ အာဖရိကအသင်း၂သင်း အယ်ဂျီးယာ၊ နိုင်ဂျိးယား မှာလည်း ဘောသမားတဦးချင်းထူးချွန်သူ များစွာ ပါဝင်ပြီး၊ အသင်းလိုက်ညီညွတ်လာရင် မထင်မှတ်တာတွေ ဖြစ်လာနိုင်ပါတယ်။

ကမ္ဘာ့ဖလားနိုင်ငံအချို့မှအမျိုးသမီးနိုင်ငံခေါင်းဆောင်များ

မှတ်မှတ်ရရ ဘရာဇီးနိုင်ငံရဲ့ သမ္မတရွေးပွဲ ၂၀၁၄မှာ အမျိုးသမီးသမ္မတတက်လာပါတယ်။ Dilma Rousseff ဆိုတဲ့ အမျိုးသမီးကြီး၊ နိုင်ငံသမ္မတဖြစ်လာပြီး၊ လက်ရှိကမ္ဘာ့ဖလားပွဲကို သူပဲဖွင့်လှစ်ပေးခဲ့ပါတယ်။ အမျိုးသမီးများဟာ အမျိုးသားများမညီညွတ်ဖြစ်နေချိန်မှာ အလွန်ကောင်းမွန်တဲ့ ခေါင်းဆောင်များဖြစ်လာလေ့ရှိပါတယ်။ အမျိုးသားခေါင်းဆောင်များ အခက်ခဲဖြစ်နေချိန် အမျိုးသမီးကိုခေါင်းဆောင်တင်ပေးလိုက်ရင်၊ ကြားခံဖြေရှင်းပေးနိုင်စွမ်း ရှိပါတယ်။ တောင်ကိုးရီးယားသမ္မတလည်း အမျိုးသမီး Park Geun Hye ဖြစ်ပါတယ်။ ကမ္ဘာ့စီးပွားရေးအင်အားကြီး ဂျာမဏီနိုင်ငံခေါင်းဆောင် နန်းရင်းဝန် Angela Merkel ဖြစ်ပါတယ်။ ဂျာမန်ဘောလုံးအသင်းကန်တဲ့တိုင်းပြည်ကို အဲဒီအမျိုးသမီးကြီး ရောက်လာပြီး အားပေးလေ့ရှိပါတယ်။ အာဂျင်တီးနားသမ္မတ Christian ဆိုတဲ့အမျိုးသမီးကြီးဖြစ်ပါတယ်။ ချီလီသမ္မတလည်း အမျိုးသမီး Michelle Bachelet၊ ဆွဒ်ဇာလန်ဦးရှောင်အဖွဲ့ဝင်အမျိုးသမီးကြီး Simonetta Sommaruga ၊ ကောစတာရီကာသမ္မတ Laura Chinchilla တို့ဖြစ်ပါတယ်။ မြန်မာနိုင်ငံခေါင်းဆောင်ကတော့ အမျိုးသမီးဖြစ်ဖို့ခဲယဉ်ပါတယ်။ လောလောဆယ်တော့ အမျိုးသမီး ဝန်ကြီးရယ်လို့တောင် ၃၂ပါးမှာ တစ်ယောက်မှမရှိသေးပါဘူး။ သူများနိုင်ငံမှာ အမျိုးသမီးများကို ဦးစားပေးနေတဲ့ သာယာဝပြောသောနိုင်ငံအချို့က အမျိုးသမီးခေါင်းဆောင်များဖြစ်ပါတယ်။ 
အမျိုးသမီးနိုင်ငံခေါင်းဆောင်ဖြစ်နေတဲ့ ဂျမဏီခေါင်းဆောင်အမျိုးသမီးကြီးလဲ ဘရာဇီးနိုင်ငံအထိ သွားရောက်အားပေးနေတာကို တီဗွီမှာတွေ့ရပါတယ်။ ဘောလုံးထိပ်သီး အာဂျင်တီးနားနိုင်ငံရဲ့ အကြီးအကဲလဲ အမျိုးသမီးကြီးဖြစ်ပါတယ်။ ဘရာဇီးနိုင်ငံအကြီးအကဲ အုပ်ချုပ်သူလဲ အမျိုးသမီးကြီးပဲ ဖြစ်နေပြန်ပါတယ်။ 

(ပုံ)

Leisure Time အားလပ်ချိန်၊ငွေအသုံးဆုံးဘောလုံးကစားပွဲ

ကမ္ဘာပေါ်မှာ အားလပ်ချိန်ငွေသုံး၊ဖြုန်းဆုံးကတော့ အားကစားပဲဖြစ်ပါတယ်။ ဂီတ၊ရုပ်ရှင်၊ခရီးသွား၊ စာအုပ် စသဖြင့် ဘယ်လိုပဲ တရားမျှတမှုကို ကြိုးစားပေမဲ့၊ ဘောလုံးလောက် ငွေမသုံးကြပါဘူး။ လူလည်း စိတ်အဝင်စားဆုံးဖြစ်ပါတယ်။ အခုနောက်ပိုင်း မိန်းကလေး ဘောလုံးပွဲများတောင် ကစားလာတဲ့အတွက် ဘောလုံးပွဲဟာ လူကြိုက်အများဆုံး၊ တီဗွီပိုက်ဆံအရဆုံး ဖြစ်နေဆဲပါပဲ။  

ဖီဖာ FIFA ကမ္ဘာ့ဘောလုံးအဖွဲ့ချုပ်ကို ၁၉၀၄မှာ စတင်ပြီး ဌာနချုပ်က ဆွဒ်ဇာလန်နိုင်ငံမှာ ရှိပြီး၊ အခု နိုင်ငံပေါင်း ၂၀၉နိုင်ငံ အဖွဲ့ဝင်ထားပါတယ်။ ထုံးစံအတိုင်း လုပ်ပွဲများ၊ ဒိုင်လူကြီးဖက်လိုက်မှု၊ အိမ်ရှင်အသင်းကို အသားပေးမှု၊ ဒိုင်လူကြီး စိတ်လိုက်မာန်မာ ပင်နယ်တီပေးခြင်း၊ ကစားသမားဒေါသ၊ ဒိုင်လူကြီးဒေါသ၊ ပရိသတ်ဒေါသ ..စတဲ့ လောဘ၊ ဒေါသ၊ မောဟ များကြောင့် မမျှတမှုများကို တွေ့မြင်နေရဦးမယ်ဖြစ်ပါတယ်။ အခုချိန်ထိတော့ အသင်းများ၊ ကစားသမားများ၊ ဒိုင်လူကြီးများ၊ ပရိတ်သတ်များ၊ အုပ်ချုပ်သူများ ..အားလုံးအခြေအနေကောင်းလျှက် ရှိနေဆဲ ဖြစ်ပါတယ်။  နည်းပညာနဲ့ကာကွယ်ထားတဲ့အတွက် Drug စိတ်ကြွဆေးစားသုံးမှု၊ ဂိုးဝင်/မဝင် ဆုံးဖြတ်မှု၊ ကြမ်းရမ်းအနီကဒ်ကစားသမားလည်း နည်းပါတယ်။

ယခင်ကတော့ အမေရိကန်နိုင်ငံမှာ ဘော့စ်ဘော၊ ဘတ်စကက်ဘော၊ ဂေါက်သီး၊ တင်းနစ် စတဲ့ အားကစားပွဲတွေပဲ လူတွေကစား၊ တီဗွီပွဲကြည့်ကြပါတယ်။ အမေရိကန်ရောက် အာရှ၊ ဥရောပတိုက်သားများကတော့ ဘောလုံးပွဲကို အထူးစိတ်ဝင်တစား၊ ကြည့်ရှုကြပေမဲ့ အမေရိကန်ဘိုးဘွားအဆက်ဆက် နေထိုင်လာသူများကတော့ ဘေ့စ်ဘော၊ ဘတ်စကတ်ဘောပဲ ဦးစားပေးနေဆဲဖြစ်မှာပါ။ လော့အိန်ဂျယ် ကမ္ဘာ့အိုလံပစ်ပွဲ ဘောလုံးပွဲတွေမှာ အမေရိကန်အစိုးရက အားပေး၊ မြှင့်တင်မှုတွေကြောင့် ဘောလုံးကစားနည်း ခေတ်စားလာခဲ့ပါတယ်။ အခုဆို အမေရိကန်ဘောလုံးအသင်းဟာ ၄နှစ်တခါ ကမ္ဘာ့ဖလားခြေစစ်ပွဲကို ဆက်တိုက်အောင်မြင်လာပါတယ်။ အခု ဘရာဇီးပွဲမှာလည်း အုပ်စုအဆင့်ကနေ ကျော်လွန်ပြီး ဒုတိယအဆင့်ကို တက်သွားပါတယ်။

ဗိုလ်စွဲတဲ့အသင်းဟာ ဆုကြေးငွေ ကန်ဒေါ်လာ ၃၅သန်း ရမှာဖြစ်ပါတယ်။ ဒုတိယ ၂၅သန်း၊ တတိယ ၂၂သန်း၊ စတ္တုထ ၂၀သန်း၊ ကွားတားဖိုင်နယ်တက်လာရင် ၁၄သန်း၊ အုပ်စုအဆင့်ကျော်လာရင် ၉သန်း၊ အုပ်စုပြိုင်ပွဲဝင်တဲ့အသင်းတိုင်းကို ကန်ဒေါ်လာ၈သန်း ဆုကြေးပေးမယ်ဖြစ်ပါတယ်။ အသင်းတိုင်း ပြင်ဆင်စရိတ် ဒေါ်လာ၁.၅သန်း ပေးမယ်ဖြစ်ပါတယ်။ ကမ္ဘာ့ဘော်လုံးအဖွဲ့ချုပ် FIFAက  စုစုပေါင်း ဆုကြေးငွေ ဒေါ်လာသန်းပေါင်း ၅၇၆သန်း သုံးစွဲမယ်ဖြစ်ပါတယ်။

လာဘ်စားမှု၊ အာဏာအလွဲသုံးမှုအနည်းငယ်
ဆုကြေးတွေလည်း များစွာပေးမယ်ဖြစ်ပါတယ်။ အလွန်သြဇာကြီးလှတဲ့၊ ငွေကြေးချမ်းသာလှတဲ့၊ ကမ္ဘာဘောလုံးအဖွဲ့ချုပ် FIFA ဥက္ကဌနေရာ ၁၆နှစ်ကျော် (၃ကြိမ်) ရွေးချယ်ခံရထားတဲ့ ဆွဒ်ဇာလန်နိုင်ငံသား ဆက်ဘလိတ်တာ (၇၈နှစ်) Sepp Blatter ကို ဖယ်ပေးဖို့ တောင်းဆိုလာပါတယ်။ ဖီဖာဥက္ကဌဖြစ်ဖို့ ငွေချမ်းသာဖို့မလိုပါဘူး။ သြဇာကြီးဖို့၊ တရားမျှတသူဖြစ်ဖို့ပဲ အထူးလိုအပ်ပါတယ်။ 

 သူ့ကို ယုံကြည်မှုပျက်ပြားခြင်း ဖြစ်ပုံက ၂၀၁၈ ကမ္ဘာ့ဖလားပွဲကို အာရပ်သူဌေးနိုင်ငံ ကာတာ ကျင့်ပခွင့်ရသွားတဲ့ ကိစ္စဖြစ်ပါတယ်။ ရွေးချယ်ရေးအတွက် မဲပေးအာဏာရှိသူများ တစ်ယောက်စီကို ဒေါ်လာ၂သန်းကျော် လာဘ်ထိုးတဲ့ကိစ္စ ပေါ်လာလို့ဖြစ်ပါတယ်။ ကာတာ တာဝန်ရှိသူများက လာဘ်မဟုတ်ပါ၊ လက်ဆောင်၊ ဂုဏ်ပြုငွေ လိုလို ဆိုကြပေမဲ့ လက်ရှိဥက္ကဌကတော့ နောက်ထပ်ရွေးကောက်ပွဲမှာ ဝင်ဦးမယ်လို့ ဆိုပါတယ်။ ပိုက်ဆံရှိပေမဲ့ နာမည်လိုချင်၊ အာဏာလိုချင်တော့ ထိုင်ခုံဖယ်မပေးချင်တာ မဆန်းပါဘူး။ စောင့်ကြည့်ရပါမယ်။ မြန်မာပြည်မှာလည်း လာဘ်နဲ့လက်ဆောင် အတူတူပဲ သဘောထားနေကြချိန်မှာ တရားမျှတပါတယ်ဆိုတဲ့ ကမ္ဘာ့ဘောလုံးအဖွဲ့ချုပ်မှာတောင် ငွေကြေးဟာ အခန်းကဏ္ဍတစ်ခုက ကြီးများစွာ ပါဝင်နေတာကို တွေ့ရပါတယ်။ 

ကိုယ်တိုင် ပိုက်ဆံမယူ၊ လာဘ်မစားပေမဲ့ Corruption & Nepotism ဆိုတာ ဆင်းရဲချမ်းသာမရွေးပါဘူး။ လောကနိယာမအရဆိုရင် ဆင်းရဲတဲ့နိုင်ငံများမှာ အာဏာ၊ငွေ ရှိသူက အကျင့်ပျက်လေ့ရှိပါတယ်။ မြန်မာလိခ်  ဖေဖေါ်ဝါရီ-၂၀၁၄  အောင်ဆန်းကွင်းမှာ ဇွဲကပင်အသင်းပိုင်ရှင် သူဌေးကြီးက သူ့အသင်း ရတနာပုံကို ရှုံးလို့ ပွဲကစားပြီးချိန် ကွင်းလည်ဒိုင်လူကြီးကို လူပုံအလယ်မှာပါးရိုက် ဆုံးမလိုက်တယ်။ မြန်မာဘောလုံးအဖွဲ့ချုပ်ကလဲ ဘာမှမပြော၊ ဒိုင်လူကြီးကလဲ ပါးရိုက်ခံ၊ ပြန်မတိုင်ဘူး၊ သူဌေးကလဲ ဒေါသနဲဆဲဆိုကြိမ်းမောင်းပြီး ပြန်သွားတယ်။ သူဌေးဆိုတော့ အတိုင်းတာတစ်ခုထိ အာဏာ၊သြဇာရှိပါတယ်။ နိုင်ငံတကာမှာတော့ ဒါမျိုးလုပ်ခွင့်မပါဘူး။ မြန်မာပြည်မှာလည်း အုပ်ချုပ်သူအာဏာပိုင်များက တိုးတက်၊ ပြုပြင်ပြောင်းလဲလာမယ်မျှော်လင့်ပါတယ်။

ဆင်းရဲတဲ့နိုင်ငံများ အထူးသဖြင့် အာဖရိကတိုက်ဘောလုံးသမားများ အမြဲတမ်း ဆုကြေးငွေပြသနာတက်ကြပါတယ်။ သူတို့နိုင်ငံဘောလုံးအဖွဲ့ချုပ်က လူကြီးတွေ အသုံးစရိတ်များသွားလို့ တကယ်ကန်တဲ့ဘောသမားတွေ ဆုကြေးမရဖြစ်သွားလေ့ရှိပါတယ်။ အုပ်စုပွဲ ၃ပွဲကန်ပြီးအုပ်စုကထွက်ရင် အသင်းတိုင်း ကန်ဒေါ်လာ၈သန်း ဆုကြေးနဲ့ ပြင်ဆင်စရိတ် ဒေါ်လာ၁.၅သန်း၊ စုစုပေါင်း ဒေါ်လာ၉.၅သန်း အနည်း ဖီဖာက ပွဲပြီးတာနဲ့ ချက်ခြင်းပေးပါတယ်။ ဒါပေမဲ့ အာဖရိကအသင်းအုပ်ချုပ်သူတွေက နည်းမျိုးစုံနဲ့ငွေတွေကြိုသုံးမိလို့ ဘတ်ဂျတ်အသုံးမတတ်ခြင်း၊ စာရင်းစစ်မရှိခြင်း စတဲ့ ဖွံ့ဖြိုးဆဲနိုင်ငံများရဲ့ ဖြစ်လေ့ရှိတဲ့အတိုင်း ငွေနဲ့ပတ်သက်လာရင် ပြသနာဖြစ်လာပါတယ်။ နောက်ဆုံးတော့ ဘောလုံးသမားတွေ ရသင့်တာမရဖြစ်သွားလေ့ရှိပါတယ်။ တခြားနိုင်ငံတွေမှာ ဖြစ်လေ့မရှိပါဘူး။ 

ဒီနှစ်မှာတော့ အကြိတ်အနယ်ကစားပေးသွားတဲ့ ဂါနာဘောလုံးသမားတွေက ခါတိုင်းလိုမဖြစ်အောင် ကြိုတင်ညီညွတ်စွာ တောင်းဆိုကြပါတယ်။ ဂါနာဘောလုံးအဖွဲ့ချုပ်က သူတို့နိုင်ငံရတဲ့ ဒေါ်လာ၉.၅သန်းကို ဘောလုံးသမား ၂၂ယောက်၊ တစ်ယောက်ကို ဒေါ်လာ၇၅၀၀၀ နဲ့ ၁၀၀၀၀၀ (၇သောင်းခွဲနဲ့တစ်သိန်းကြား) ပေးမယ်လို့ ကတိထားပါတယ်။ အဖွဲ့ချုပ်က ကတိမတည်ဖြစ်တတ်လွန်းလို့ ကစားသမားများက သူတို့ဘဏ်စာရင်းထဲကို ငွေကြိုပြီး ထည့်ပေးစေချင်ကြပါတယ်။ မထည့်ပေးရင် ဘရာဇီးကိုမသွားဖူးလို့ ဂါနာ၊ ကင်မရွန်းအသင်းတွေက ဆန္ဒပြပါတယ်။ ဂါနာနိုင်ငံက သမ္မတကိုယ်တိုင် ဝင်ဖြေရှင်းပေးရပါတယ်။ ဆုကြေးငွေ ဒေါ်လာ၈သန်းမှာ ဂါနာဘောလုံးသမားများ ၁.၇ - ၂.၃သန်း လောက်ဆုကြေးရမယ်ဖြစ်ပါတယ်။ နောက်ဆုံးပွဲ ဂါနာ-ပေါ်တူဂီ မကစားခင် ဂါနာအစိုးရက ဒေါ်လာ၃သန်း လေယဉ်နဲ့တင်ပြီး ဘရာဇီးအသင်းကို သွားပေးလိုက်ပါတယ်။ ကမ္ဘာ့ဘောလုံးအဖွဲ့ ဖီဖာကလည်း ပွဲပြီးမှ ဒေါ်လာ၈သန်း၊ ပေးမှာဖြစ်လို့၊ ဘောလုံးသမားများလဲ ပွဲအားလုံးပြီးမှ ပိုက်ဆံရမှာဖြစ်ပါတယ်။ 

ဒုတိယအဆင့် တက်သွားတဲ့အသင်းတွေလည်း ထုံးစံကတော့ တဆင့်ပြီးရင်၊ ဆုကြေးငွေ ချက်ခြင်းသူတို့ ဘဏ်ထဲထည့်ပေးလေ့ရှိပါတယ်။ ပိုက်ဆံနဲ့ပတ်သက်ပြီး ဘောလုံးသမားတွေ စိတ်အနှောက်ယှက်မဖြစ်စေလိုခြင်းပါ။ နိုင်ဂျီးယားအသင်းလဲ အုပ်စုအဆင့်ကို ကျော်ရင် ဆုကြေး ဒေါ်လာ၃သောင်း ရမယ်ဆိုပါတယ်။ မနှစ်ကအတွေ့အကြုံကြောင့် ဒုတိယအဆင့်မှာ ပြင်သစ်နဲ့ကစားရမဲ့ ဘောလုံးသမားများက လေ့ကျင့်ခဏ်မဆင်းပဲ သပိတ်မှောက်ပါတယ်။  အသင်းကလည်း ဖီဖာ FIFA ဆုကြေးမရသေးခင် ဘောသမားများကိုပေးဖို့ ခက်ခဲနေပါတယ်။ နိုင်ဂျီးယားသမ္မတက ကြားဝင်ပြီး အာမခံပေးရပါတယ်။

မြန်မာနိုင်ငံကတော့ အောင်ပွဲရအားကစားသမားများကို ဆုတံဆိပ်သာမက၊ ငွေကြေးနဲ့ပါ ဂုဏ်ပြုပါတယ်။ ပြီးခဲ့တဲ့ ၂၀၁၃ အရှေ့တောင်အားကစားပြိုင်ပွဲ ရွှေငွေကြေး ဆုရသူများကို၊ ငွေကြေးအားဖြင့်လည်း ကျပ်သိန်းပေါင်းများစွာ ဆုချခဲ့ပါတယ်။ ဒါကြောင့် မြန်မာ့အားကစား အုပ်ချုပ်သူများဟာ အာဖရိကဘောလုံးအသင်းများထက် သာပါတယ်။
လက်ရှိ ကမ္ဘာ့ဖလားပြိုင်ပွဲများမှာတော့ အုပ်စုပွဲတွေအထိ တရားမျှတမှုရှိတယ်လို့ ဆိုရပါမယ်။




ဒုတိယအဆင့် ပွဲစဉ်များဇယား (ပုံ)

အတိုင်းဆိုရင် ၈သင်းအုပ်စု၂ခုမှာ ၊ အများစုက မှန်းထားတဲ့အသင်းတွေ ဖြစ်နေပါတယ်။ အစဉ်အလာကြီးပြီး၊ ကမ္ဘာ့ဖလားရဖူးတဲ့ တကယ်လဲကောင်းတဲ့အသင်းများပဲ အနိုင်ရ ကွာတာ၊ ဆီးမီး၊ ဖိုင်နယ် တက်လာဖို့ များပါတယ်။ ပထမ ၈သင်းမှာ ဘရာဇီး-ချီလီ၊ ကိုလံဗီယာ-ဥရုဂွေး၊ ပြင်သစ်-နိုင်ဂျီးယား၊ ဂျာမဏီ-အယ်ဂျီးယား တို့ဖြစ်ပြီး ဂျာမဏီနဲ့ဘရားဇီးတို့ ဆီးမီးဖိုင်နယ်တက်လာဖို့ များတယ် ခန့်မှန်းကြပါတယ်။ ဒုတိယ ၈သင်းအုပ်စုမှာတော့ နယ်သာလန်-မက္ကဆီကို၊ ကိုစတာရီကာ-ဂရိ၊ အာဂျင်တီးနား-ဆွဒ်ဇာလန်၊ ဘယ်လဂျီယံ-အမေရိကန် တို့ဖြစ်ပြီး၊ နယ်သလန်နဲ့အာဂျင်တီးနားတို့ ဆီးမီးဖိုင်နယ်ကို ရောက်ဖို့ အများစုမျှော်လင့်ပါတယ်။ ဗိုလ်လုပွဲကိုတော့ ဂျာမဏီ-ဘရာဇီး၊ နယ်သာလန်-အာဂျင်တီးနား ၄သင်းမှာ ဘရာဇီး-အာဂျင်တီးနားတို့ ဗိုလ်လုပွဲတက်ပြီး၊ အိမ်ရှင်ဘရာဇီး ဗိုလ်စွဲမယ်လို့ စာရေးသူ မျှော်လင့်ခန့်မှန်းပါတယ်။

ဘောလုံးဆိုတာ လုံးနေတာဖြစ်လို့ အသင်းငယ်များဖြစ်ပြီး ဒုတိယပွဲစဉ်များမှာ အမေရိကတိုက်က နိုင်ငံများဖြစ်တဲ့ ချီလီ၊ ကိုလံဗီယာ၊ ကိုစတာရီကာ၊ မက္ကဆီကို တို့လည်း အကြိတ်အနယ်ကစားကြမှာဖြစ်ပါတယ်။ ရလဒ်ကိုတော့ စောင့်ကြည့်ရမှာပါ။ ဂိုးများများ သွင်းပြီး လူထုစိတ်ဝင်စားတဲ့၊ အားကစားစိတ်ဓါတ်နဲ့ငြိမ်းချမ်းရေးမြှင့်တင်ပေးတဲ့ ကမ္ဘာ့ဖလားဘောလုံးပွဲဖြစ်ပါစေ၊ မြန်မာပြည်မှာလည်း အာဏာပိုင်များကိုယ်တိုင် အားကစားစိတ်ဓါတ်မျိုးနဲ့ တိုင်းပြည်ကိုအုပ်ချုပ်နိုင်ပါစေလို့ မျှော်လင့်ဆုပန်လိုက်ပါတယ်။ 

(မိုးမခအားကစား ၂၇-ဇွန်-၂၀၁၄)


Largest gathering for outdoor screen in Korea 2002  world cup , Red Devil
Categories:

Reactions:

0 ကွန်မန့်ရေးရန်:

Post a Comment