Tuesday, January 19, 2010
လောင်းကစားနှင့် ဗေဒင်ပညာရှုထောင့်
နောင်သောအခါ ဗေဒင်ပညာကို လေ့လာလိုက်စားမှုပိုမိုလာခဲ့သောအချိန်တွင် ယင်းလောင်းကစားနှင့်ပတ်သက် သော အချက်အလက်များကို စုဆောင်းလေ့လာခဲ့ပါသည်။ ထိုအခါတွင် လောင်းကစားနှင့် ပတ်သက်သောအဓိ က ဂြိုဟ် ကို တွေ့ရှိခဲ့ပါသည်။ ယင်းဂြိုဟ်မှာ စနေဂြိုဟ်ဖြစ်သည်။ ထိုသို့ဆိုလျှင် အချို့သော သူတို့က ကျွန်တော့်ကို ရယ်သွမ်းသွေးချင်လည်း ရယ်သွမ်းသွေးကြပေလိမ့်မည်။ ခုမှသိရသလားဟူပြီးလျှင်။ ကျွန်တော့်အနေနှင့်မူ ကိုယ် တိုင် ဆန်းစစ်လေ့လာကြည့်ပြီးမှ သေချာသည်ဟု စိတ်ချလက်ချယုံကြည်နိုင်သောအခါမှသာ ထိုအယူကိုလက်စွဲ ပြုတတ်သောအကျင့်ရှိနေသောကြောင့် စာဖတ်ရုံ ၊ တစ်ဦးတစ်ယောက်က ပြောရုံမျှ ဖြင့် အလွယ်တစ်ကူလက် ခံနိုင်ခဲ့ခြင်းမရှိခဲ့ပါပေ။
လောင်းကစား နှင့် ပတ်သက်ပြီး ယင်းသို့ စနေဂြိုဟ်သည် ဆက်နွယ်အားပြုပေးလျှက်ရှိ ကြောင်းတွေ့ရှိရပြီးနောက် ..ယင်းအချက်သည်ကျွန်တော့်အတွက် အလွန်အကျိုးကျေးဇူးရရှိစေခဲ့ပါသည်။ အထူးသဖြင့် နုနယ်သေးသော ကလေးသူငယ်လေးများ ကိုနာမည်ပေးခွင့်ကြုံတိုင်း ယင်းအကျိုးကျေးဇူးကို ပီတိ ဖြစ်ခဲ့ရသည်ချည်းပင်။ အဘယ်ကြောင့်နည်း .... ။
လောင်းကစားကို အလွန်အကျုးလုပ်သော သူများတွင် နာမည် အဖျားစာလုံး စနေသည် တွန်းအားအလွန်ပေး၏။ နာမည်အဖျားစလုံးစနေသည် ပုတိ ရာဇ ဌာနတစ်ခုခုတွင် ရပ် တည်နေလျှင် လောင်းကစားစိတ်ပိုမိုအားကောင်းလာ၏။ အာလပ္ပနကာရကအမည်ဖြစ်ပါမူ .....လောင်းကစားကို စွန့်လွှတ်နိုင်သည်ဟူပြီးမရှိနိုင်တော့ပဲ ...အချိန်တန်သည်နှင့် လောင်းကစားပြန်လုပ်စေအောင်တွန်းအားပေး၏။ အဆိုပါအချက်တို့ကို ရရှိခဲ့သောကြောင့်ပင် အမည်ပေးရာတွင် ကျွန်တော့်အတွက် ကြီးစွာအထောက်အကူရရှိခဲ့ ပါသည်။ ကျွန်တော်လေ့လာမှတ်တမ်းတင်ခဲ့သော လောင်းကစားလောကတွင်ကျင်လယ်နေသူအချို့ ၏ မူလ မဟာဘုတ်နှင့် နာမည်အနေအထားများ ကို ဆက်လက်တင်ပြသွားပါမည်။ လေ့လာကြည့်ကြပါစို့။
ဥပဒေသ (၁) နာမည်အဖျားစာလုံးသည် စနေဂြိုဟ်ပိုင်အက္ခရာတစ်ခုခုဖြင့် မှည့်ခေါ်ခဲ့ပါမူ လောင်းကစားစိတ်၊ သို့မဟုတ် ကံကိုပုံပြီး လုပ်ကိုင်ကြည့်လိုသောစိတ်မျိုး ရှိလာတတ်ပေသည်။
ဥပဒေသ (၂) အာလပ္ပနကာရကအမည်အမျိုးအစားသည် အလုပ်ဟောင်းကို တစ်ဖန်ပြန်လည်ပြီး လုပ်ကိုင်မိစေ တတ်သော အာနိသင်မျိုးရှိ၏။ အာလပ္ပနကာရကအမည်မျိုးကို နာမည်အဖျားစာလုံးစနေဖြစ်အောင် ကြာသာပတေးစ စနေအဆုံးဖြင့်မှည့်ခေါ်ထားသောအမည်များသည် လောင်းကစားမှုကို တစ်ဝဲလည်လည် လုပ်ကိုင်ဆောင်ရွက်မိစေရန် တွန်းအားအထူးပေး၏။
ဥပဒေသ (၃) ပုတိဌာနသည် လူတစ်ယောက်၏ ၀ါသနာ နှင့် ပျော်မွေ့နှစ်လိုသော အကြောင်းအရာများကိုဖော် ပြ၏။ အဆိုပါဌာနတွင် စနေဂြိုဟ် ရပ်တည်နေခြင်း သည် လောင်းကစား သို့တည်းမဟုတ် ကံကိုပုံပြီး လုပ်ရသောအလုပ်များတွင် စိတ်ပျော်မွေ့ မှုဖြစ်စေရန်တွန်းအားပေးသောအနေအထားဖြစ်၏။
ဥပဒေသ (၄) ရာဇ ဌာနသည် လူတစ်ယောက်၏ အနာဂတ်မျှော်မှန်းချက် နှင့် လိုလားတောင့်တချက်များကို ဖော် ပြ၏။ အဆိုပါဌာနတွင် ရပ်တည်သော စနေသည် ကံတရား၏ စေစားမှုအရ ရရှိလာသော ကောင်းကျိုးများကို .... မျှော်လင့်လိုမှုနှင့် လောင်းကစားဆန်ဆန် ပြုလုပ်လိုသော ရည်မှန်းချက်များထားရှိမှုကို ဖြစ်စေရန်တွန်းအားပေး၏။
ဥပဒေသ (၅) မရဏဌာနတွင်ရပ်တည်သော အညွန့်ဂြိုဟ် သို့မဟုတ် နာမည်အဖျားစာလုံးသည်လည်း လောင်းကစားမှု သို့မဟုတ် ကံကိုယုံကြည်ပြီးလုပ်ကိုင်ရသော အသက်မွေးမှု နှင့် ဘ၀ဦးတည်ချက် တို့ကို ...အခါအားလျော်စွာဖြစ်ပွားစေတတ်၏။
အထက်ပါဥပဒေသငါးချက် နှင့် ကိုက်ညီမှုများ အားကောင်းပါက လောင်းကစားစိတ်အားကောင်းသောသူ တစ် ဦးဖြစ်လာတတ်၏။
ကိုမင်းနိုင်
်မွေးခုနှစ်သက္ကရာဇ် ၁၃၃၆ ခုနှစ် နယုန်လပြည့်ကျော် (၈) ရက် ဗုဒ္ဓဟူးနေ့ တွင်ဖွားမြင်သည်။
မူလမဟာဘုတ်ဇာတာခွင်အရ ၆ခုကြွင်းဖွား ဗုဒ္ဓဟူး ရာဇဖွား ဖြစ်သည်။
အမည်အမျိုးအစားမှာ ကြာသာပတေးစ စနေအဆုံး (အာလပ္ပနကာရကအမည်) အမျိုးအစားဖြစ်သည်။
ဇာတာရှင်မှာ စာရေးသူ၏ ဦးလေးဦးမင်းတစ်ယောက်ဖြစ်ပါသည်။ စာရေးသူနှင့် အသက်ခြင်းကား သိပ်မကွာလှ ပါ။ သူ့ဘ၀၏ ဖြစ်စဉ် တစ်လျောက်လုံးနီးနီးလောက်ပင် တွေ့ မြင်ခဲ့ရပါသည်။ အထက်ပါဥပဒေသများအရ ဥပဒေသ (၁) (၂) (၃) သုံးချက်လုံးနှင့် ကိုက်ညီသော သူလည်း ဖြစ်ပါသည်။ သူသည်ငယ်စဉ်ကတည်းကပင် လောင်းကစားစိတ်အလွန်များပါသည်။ သရေပင်တမ်း ဘတ်စေ့လှည့်ခြင်းမှ အစ လောင်းကစားနည်းမျိုးစုံ သူမတတ်သည်မရှိ။ အရွယ်ရောက်လာသောအခါတွင် ပိုပြီးသောင်းကျန်းလာပါသည်။ အိမ်ရှိပစ္စည်းများကို ပေါင်နှံပြီး လောင်းကစားမှု မကြာခဏပြု၏။ သူ၏အစ်ကို အကြီးဆုံးက လိုက်ရှာ၊ ဖမ်း၊ လည်ပင်းကိုကြိုးတပ်၊ အရပ်ထဲတိရိစ္ဆာန်လို ဆွဲခေါ်ပြီး ရှက်အောင် ပျောက်အောင် မကြာမကြာလုပ်ပေး၏။ မရပါပေ။ သူကား အကျင့်မပျောက်ခဲ့။ သူသည်အလုပ်လုပ်၏။ ကြိုးစား၏။ အရက်မသောက် မိန်းမမလိုက်စား၊ သို့သော် လောင်းကစားမှုနှင့် ကား ထိလိုက်သည်နှင့် ချက်ချင်းငြိ၏။ အရပ်ထဲတွင် တစ်ယောက်ယောက်နေမ ကောင်းဖြစ်လျှင် ထိုအိမ်နားတွင် သူသည် ရစ်သီ ရစ်သီလုပ်နေတတ်၏။ အိမ်ရှင်များမှ မကျေနပ်သဖြင့် မကြာခဏဆိုသလို သူ၏မိခင်ကို လာလာတိုင်ကြားလေ့ရှိခဲ့ပေသည်။ ထောင်ကျခဲ့၏။ ထောင်ထဲတွင်ပင် လောင်း ကစားမှုကို ဆပ်ပြာတုံးဖြင့် ဂျင်သီးလုပ်ကာ ဒိုင်ကိုင်သဖြင့် ထပ်မံထောင်ကျပြန်၏။ ဇနီးကိုချစ်၏။ သမီးကိုချစ်၏။ အလုပ်ကို ကျွဲလိုနွားလို လုပ်ကိုင်၏။ လောင်းကစားမှုကတော့မပျောက်။ ယနေ့ထက်တိုင် စာရေးသူ၏ ဦးမင်း သည် .......................................။
တစ်ယောက်သောသူကိုထပ်မံတင်ပြပေးပါမည်။ သူသည်ကား စာရေးသူ၏ မိတ်ဆွေတစ်ဦးဖြစ်ပါသည်။
ကိုကျော်လင်းထွန်း (နာမည်ကို အနဲငယ်ပြောင်းလည်းထားပါသည်။)
မွေးခုနှစ်သက္ကရာဇ် ၁၃၃၇ခုနှစ် တန်ဆောင်မုန်းလပြည့်နေ့ တနင်္လာနေ့ တွင်ဖွားမြင်သည်။
မူလမဟာဘုတ်ဇာတာခွင်အရ (၀) ကြွင်းဖွား တနင်္လာသိုက်ဖွား ဖြစ်သည်။
အမည်အမျိုးအစားမှာ တနင်္လာအစ စနေအဆုံး ကမ္မကာရကအမည်အမျိုးအစားဖြင့်မှည့်ခေါ်ထား၏။
ယခုဇာတာရှင်မှာ စာရေးသူနှင့် ငယ်ပေါင်းကြီးဖော် တစ်ဦးဖြစ်၏။ လောင်းကစားဟူသည်မှာ သူ့ဘ၀ကိုလွှမ်းမိုး
ထားသောအရာတစ်ခုတော့ မဟုတ်ခဲ့ပါပေ။ သို့သော် သူသည်လည်း ဥပဒေသ (၁) နှင့် (၅) တို့ဖြင့် ကိုက်ညီမှုရှိ
နေသော သူတစ်ဦးကားဖြစ်ပေသည်။ ဘွဲ့တစ်ခုရပြီးချိန်အထိ သူ့ဘ၀သည် လောင်းကစားနှင့်ထဲထဲဝင်ဝင်ပတ်
သက်ဆက်နွယ်မှုမရှိခဲ့ပါပေ။
တစ်နေ့သောအခါ သူသည် လောင်းကစား ဘောလုံး နှစ်လုံး သုံးလုံး အားလုံးကို ကော်မရှင်ကိုင်ပေးရသော အကြီးစားကော်မရှင်စား တစ်ဦးဖြစ်လာ၏။ အမည်၏ ကမ္မကာရက သဘောတရားသည် သူတစ်ပါးကိုယ်စား ၀င်
ရောက်လုပ်ကိုင်ရခြင်းကို အားပေးလှုံ့ဆော်ထားပြီး၊ နာမည်အဖျားစာလုံးစနေ နှင့် (တနင်္လာ + စနေ) အမည်တွဲ
သည် ကိုယ်စားလှယ်နှင့် ကော်မရှင်လုပ်ငန်းများကို တွန်းအားပေးထားသော အနေအထားများဖြစ်၏။ စနေသည်
တာဝန်နှင့် အဓိကပတ်သက်ဆက်နွယ်နေသောဂြိုဟ်ဖြစ်ပြီး တနင်္လာသားအတွက် ကမ္မကာရကဂြိုဟ်ဖြစ်ခြင်း
ကြောင့် သူတစ်ပါးအတွက်တာဝန်ခံဆောင်ရွက်ပေးရခြင်းမျိုးကို အထူးဖြစ်ပွားနိုင်စေ၏။ ယင်းအနေအထားများ
က သူ့အား ကံဇာတာဇယားကွက်ကို ဖော်ညွှန်းပြဆိုပေးခဲ့၏။
စာရေးသူ၏မိတ်ဆွေ ကျော်ဝင်းထွန်းသည် လောင်းကစားကော်မရှင်စားဘ၀ဖြင့် အကြီးအကျယ်အောင်မြင်ခဲ့၏။
လက်ဖျားတွင်ငွေသီး၏။ သွားလေရာလမ်းဖြစ်၏။ ပေါက်ရောက်၏။ ကျယ်ပြန့်၏။ တစ်နေ့......စာရေးသူနယ်တွင်
ဟောခန်းဖွင့်စဉ် သူရောက်လာ၏။ မြင်ရသည်မှာ .... ကတုံးတုံးထား၏။ ပိန်ချုံးနေ၏။ လှီ၏။ စိတ်မချမ်းသာစရာပင်။ အောင်မြင်စဉ်က မတွေ့ခဲရသော်လည်း ဒုက္ခရောက်သောအခါတွင် အားကိုးရာမဲ့ဖြစ်သည့်အဆုံး စာရေးသူထံ ဗေဒင်လေးလာမေးခြင်းဖြစ်သည်။ သူအကြောင်းကိုလည်း ပြောပြ၏။
ကောဇာမြန်မာခုနှစ် ၁၃၆၆ ခုနှစ်အတွင်း လောင်းကစားကော်မရှင်လုပ်ငန်းအကြီးအကျယ်လုပ်ကိုင်ခြင်းကြောင့်
ကျော်ဇောမှုဖြင့် တိုင်းအဆင့်မှ ဆင်းပြီးအရေးယူဖမ်းဆီးခြင်းကိုခံလိုက်ရကြောင်း။ ငွေလည်း တက်တက်ပြောင်
အောင် ကုန်သွားကြောင်း။ သူ့ကံဇာတာလေးကို ဆက်ပြီးအခြေအနေ ပြန်ကောင်းနိုင်မကောင်းနိုင် နှင့် နောင်
လည်း ဒီလောင်းကစားအလုပ်ကို မလုပ်တော့ကြောင်း။ လုပ်ဖို့လည်း အခြေအနေကမပေးတော့ကြောင်း စသည်
ဖြင့် စုံစုံလင်လင်ပြောပြရှာပါသည်။
စာရေးသူက တွက်စစ်ကြည့်လိုက်ပြီးနောက်။ ပြန်မလုပ်တော့ဘူးဆိုသည်ကို မယုံကြောင်း။ ပြန်လုပ်မည်သာဖြစ်
ကြောင်း။ ပြန်လည်အောင်မြင်ဦးမည်ဖြစ်ကြောင်း။ အောင်မြင်လာပြီးလျှင်လည်း သတိထားဖို့လိုကြောင်း။ အထူး
သဖြင့် အသက် ၄၀ မှ ၅၀ အတွင်း ထောင်နှစ်ရှည် ကျတတ်ကြောင်း။ စွန့်နိုင်လျှင် အကောင်းဆုံးဖြစ်ကြောင်း
ပြောဆိုပြီး။ နလံထူမည့် ကံ ကို တစ်ဖန်ပြန်လည်တွက်စစ်ပေး ၊ သင့်လျော်သောယတြာနှင့် နာမည်အရ နာမက္ခရ
သဘာဝယတြာ အချို့ ကို လမ်းညွှန်ပေးလိုက်ပါသည်။
လွန်ခဲ့သော နှစ်လခန့်က စာရေးသူ၏ ဦးလေးတစ်ဦးနယ်မှ ရန်ကုန်သို့ရောက်ရှိလာချိန်တွင် သူ့သတင်းကို ကြားလိုက်ရပါသည်။ ကျော်ဝင်းထွန်းကြီးတော့ ပြန်အဆင်ပြေနေပြီကွ။ ပြေတာမှ တော်တော်လေးကို ပြေတာဟေ့။ ကြောက်ဖို့ကောင်းလောက်အောင် စီးပွားဖြစ်နေတာ။ ဒီကောင်က ဒီကော်မရှင်စားအလုပ်နဲ့တော့ တော်တော်လေးအကျိုးပေးပုံပဲ ဟု ဦလေးဖြစ်သူမှ သတင်းပြောရင်း ကောက်ချက်ချသွားခဲ့ပါသည်။
စာရေးသူစိတ်ထဲ တစ်ရစ်ဝဲ၀ဲမြင်ယောင်နေမိသည်ကတော့ သူ၏မူလမဟာဘုတ်ခွင်ပေါ်မှ ဘင်္ဂဌာနရှိ နာမည်
အဖျားစာလုံး ထွန်း(စနေပိုင်အက္ခရာ) လေးကိုသာ ဖြစ်ပါတော့သည်။
ချမ်းမြေ့ကြပါစေ။
ကိုစိုးမိုးထွန်း (ဗေဒင်ပညာသုတေသီ)
0 ကွန်မန့်ရေးရန်:
Post a Comment