Wednesday, May 14, 2014

အ၀လွန်ရောဂါကုသရန် သည်းခြေရည် အက်ဆစ်လုပ်ငန်းများက ပိုမိုအရေးပါနိုင်.................

Posted by: Ko Myo on Tuesday, May 13, 2014 Categories:

Health Updates Journal No. 116

အ၀လွန်ရောဂါအတွက် ခွဲစိတ်ကုသမှုသည် ကိုယ်အလေးချိန်ကျစေရန်အတွက်သာမက ဆီးချိုသွေးချိုရော ဂါနှင့် နှလုံးရောဂါတို့ အတွက်ပါ အကျိုးကျေးဇူးများရရှိစေကြောင်း Sahlgrenska Academy နှင့်University of Cincinnati့ မှ သုတေသီများကဆိုသည်။

ခွဲစိတ်ကုသခြင်းကြောင့်ရရှိလာသည့် အကျိုးကျေးဇူးများသည် အစာအိမ်အရွယ်အစား လျော့နည်း သွားခြင်းကြောင့် မဟုတ်ဘဲ သွေးတွင်း သည်းခြေရည်အက်ဆစ်များလာခြင်းကြောင့် ဖြစ်ကြောင်း သုတေသနစာတမ်းတွင် ဖော်ပြထားသည်။

သုတေသနတွင် သည်းခြေရည် အက်ဆစ်အချက်ပြစနစ်၏ လက်ခံပစ္စည်းတစ်မျိုးဖြစ်သော FXR ကို အဓိကထားလေ့လာခဲ့သည်။ FXR ထုတ်လုပ်နိုင်သည့် မျိုးဗီဇပါဝင်သူ ကြွက်များနှင့် မပါဝင်သူ ကြွက်များကို အစာအိမ်ဖြတ်တောက် ခွဲစိတ်မှုပြုလုပ်ခဲ့ပြီး စောင့်ကြည့်လေ့လာခဲ့ရာFXR မျိုးဗီဇပါဝင်သူ ကြွက်များတွင် ကိုယ်အလေးချိန်ကျလာပြီး အချိုဓါတ်ချေဖျက်နိုင်စွမ်းလည်း တိုးတက်လာသော်လည်း FXR မျိုးဗီဇမပါ သည့် ကြွက်များတွင်ခွဲစိတ်မှုမှာ အကျိုးမဖြစ်ထွန်းသည်ကို တွေ့ရသည်။

အစာအိမ် ဖြတ်တောက်မှုကြောင့် အူအတွင်းပိုးမွှားများ ပြောင်းလဲမှုဖြစ်ပေါ်ရာ FXR လက်ခံပစ္စည်း၏ အချက်ပြမှုများပါ ပြောင်းလဲပြီး အချိုဓါတ်ချေဖျက်နိုင်စွမ်းမြင့်တက်လာသည်။

ထို့ကြောင့် ခွဲစိတ်ကုသခြင်းထက် အူတွင်းပိုးမွှားများနှင့် FXR လက်ခံပစ္စည်းတို့ကို ပြောင်းလဲမှု များ ဖြစ်ပေါ်စေရန် တိုက်ရိုက်ဦးတည်ကုသခြင်းသည်သာ အ၀လွန်ရောဂါ နှင့် ဆီးချိုသွေးချိုရောဂါတို့ အတွက် အကျိုးရှိမည်ဖြစ်ကြောင်းသိရသည်။

အ၀လွန်ရောဂါသည် ကမ္ဘာတစ်ဝှန်း အဖြစ်များလျက်ရှိရာ အ၀လွန်သူတိုင်းကို အစာအိမ်ဖြတ်တောက်၍ ခွဲစိတ်ကုသရန် မလွယ်ကူသောကြောင့် FXR လက်ခံပစ္စည်းကို တိုက်ရိုက်ဦးတည် ကုသမှုများသည်သာ အနာဂါတ်တွင် အရေးပါလာမည်ဖြစ်ကြောင်း သုတေသီများက ဆိုသည်။

ဇော်ကို
Ref:MNT
-------------------------------------------------
ကိုမျိုး (lwanmapyay.blogspot.com)

0 ကွန်မန့်ရေးရန်:

Post a Comment