Sunday, October 20, 2013

" မဟူရာညရဲ့ ကချေသည် " အပိုင်း(၁)


*****************************************
ကျမ ဒီလောကထဲ စရောက်ဖြစ်ခဲ့တာက သူများတွေနဲ့ ထူးမခြားနားပါပဲ ....
ကျမက တစ်ခုလပ်မ ငယ်ငယ်ရွယ်ရွယ်နဲ့စိတ်ကစားတဲ့အရွယ်မှာ အိမ်ထောင်ကျတယ် ....
ပြီးတော့ ယောက်ျားကလဲအသက်ငယ်တော့ လက်ကြောမတင်းဘူး နှစ်ယောက်ထဲခွဲနေတော့လဲ မိဘအိမ်ကပဲပြန်တောင်းရတာပဲ ....
ဒီတော့ စီးပွားရေးဘာမှမရှိတော့ အိမ်ထောင်ရေးလဲရေရှည်မခံဘူး ယောက်ျားနဲ့လွယ်လွယ်လေးကွဲသွားခဲ့တယ် .....
ကျမက အိမ်ထောင်ပျက်တစ်ယောက်ဖြစ်သလို ဘာအလုပ်မှလဲမရှိတော့ အိမ်မှာနေရတာမိသားစုနဲ့သိပ်အဆင်မပြေဘူး ....

" အလတ်မ နင်အလုပ်ကောလုပ်ဖို့ စိတ်ကူးမရှိဘူးလားဟင် ဟိုပေါက်စအငယ်ကောင်တောင် ခုဆိုအိမ်ကိုတောင်ပြန်ထောက်နိုင်ပြီ နင်ကအကြီးဖြစ်ပြီးဘာမှသုံးစားမရဘူး "

အမေကလဲ သိပ်မကြည်ဖြူဘူး ပြဿနာတစ်ခုခုဖြစ်တိုင်း ကျမဘက်ပဲမြှားဦးလှည့်လာတယ် ....
ကျမမောင်လေးက ၈ တန်းနဲ့ကျောင်းထွက်ပြီး အခုဝပ်ရှော့မှာဝင်လုပ်လို့ လစာတောင် တော်တော်ရနေပြီလေ ဒီတော့ ကျမကိုမြင်ပြီပေါ့ .....

" လုပ်မှာပါ အမေရယ် ဒီလကုန်ရင် မသွယ်တို့နဲ့ နယ်ဘက်သွားအလုပ်လုပ်ဖို့ပြောထားတယ် မသေချာသေးလို့ အမေ့ကိုမပြောတာ "

" ဘာအလုပ်လဲ "

" အလှပြင်ဆိုင်မှာ လုပ်ရမယ်လို့ပြောတာပဲ ပညာသင်အလုပ်လုပ်ပေါ့ လစာကောင်းတယ်တဲ့ "

" အေး အဲဒါဆိုလဲသွားလေ အိမ်မှာထိုင်နေအလကားပဲဟာကို အလုပ်လေးရှိတော့ သုံးနိုင်စွဲနိုင်မှာပေါ့ ခုဟာက ညည်းကအပိုသက်သက်ဖြစ်နေတယ် "

အမေကတော့ အလုပ်မရမချင်း တစ်ဗျစ်တောက်တောက်တော့ပြောနေတော့မှာဆိုတာသိတယ် ....

ဒီလိုနဲ့ မသွယ်ခေါ်တဲ့နောက် အလုပ်လုပ်ဖို့လိုက်လာခဲ့တယ် ...

" နင့်အမေကို ဘယ်လိုပြောထားခဲ့လဲ စံပယ် "

" အင်း အလှပြင်ဆိုင်မှာ လုပ်မယ်လို့ပြောထားခဲ့တယ် မသွယ် "

" အေး ကောင်းတယ် ဟိုရောက်ရင်ငါပြောတဲ့အတိုင်းနေနော် ဘာမှကြောက်စရာမလိုဘူး အစစအရာရာငါသင်ပေးမယ် နောက်တော့ အလုပ်ကသင်ပေးသွားမှာပါ နင်လိမ္မာရင် လိမ္မာသလိုရတယ် ဘိုင်ကောင်းကောင်း သုံးလေးယောက်လောက်ရှိရင် အေးဆေးပဲ "

" ၀င်ငွေတော့ကောင်းလောက်ပါတယ်နော် "

" အမလေးစိတ်ချ နင့်ရုပ်နင့်ရည် အလုံးအပေါက်နဲ့ အဲဒီမှာက တောပွဲစားတွေများတယ် တောသားတွေဆိုတော့ မိန်းမလှလှနဲ့ထိုင်ရရင် အလိုလိုထွက်ပြီးသား အပြောအဆိုနပ်ဖို့အရေးကြီးတယ် "

" အင်း "

" ချူတတ်ဖို့ လှည့်တတ်ပတ်တတ်ဖို့ ရှောင်တတ်သိမ်းတတ်ဖို့တော့လိုတယ် ယောက်ျားတွေက မတွေ့ခင်အထိတော့ အကုန်အကျခံနိုင်တယ် တစ်ခါတွေ့ပြီးရင်ခွာသွားတာ တန်ဖိုးကျသွားတယ် ဒါကြောင့် အလွယ်မလိုက်မိစေနဲ့ "

မသွယ်ရဲ့အသင်အပြတွေကို နားထောင်ရပေမယ့် ဒီအလုပ်မလုပ်ဖူးတော့ သိပ်နားမလည်သလို နည်းနည်းတော့ကြောက်မိတယ် ဘယ်လိုယောက်ျားတွေနဲ့များကြုံရမလဲလို့ ....
အို သူများတွေတောင်လုပ်သေးတာပဲ မသွယ်ဆို လုပ်သက် ၂ နှစ်အတွင်း ရွှေနဲ့ငွေနဲ့ဖုန်းနဲ့တောင်ဖြစ်နေပြီ ဘာဖြစ်ဖြစ် လုပ်ရမှာပဲ .....
ကိုယ်လဲအပျိုအစစ်မှမဟုတ်တာ နာမည်ပျက်ရုံကလွဲပြီး ဒီထက်လဲဘ၀ပျက်စရာအကြောင်းတော့မရှိပါဘူး .......
အရေးကြီးတာ လူလူသူသူသုံးစွဲနိုင်ဖို့နဲ့ ပင်ပင်ပန်းပန်းမလုပ်ရပဲ ငွေလွယ်လွယ်ရနိုင်ဖို့ပဲမဟုတ်လား ....

***********************************************************************************

" ဟော မိုးတို့ရောက်လာပြီလား ပေးပေးအထုပ်တွေပေး "

အသက် ၄၀ အရွယ်၀၀ဖိုင့်ဖိုင့်နဲ့ အမျိုးသမီးကြီးက ကျမနဲ့မသွယ်လက်ထဲက အထုပ်တွေကိုဆွဲယူရင်း လွတ်တဲ့နေရာမှာ နေရာချပေးတယ် ....
ကျမတို့နေရမှာက အမျိုးသမီးတွေသီးသန့်နေတဲ့အဆောင် အဆောင်ဆိုတာက အပေါ်ထပ်အောက်ထပ် ဘာအခန်းမှမရှိပဲ ဟောကြီးသီးသန့် ....
အဲဒီမှာမှ ကိုယ့်နေရာနဲ့ကိုယ် ဖျာလေးတွေခင်းပြီး နေကြတာ နေ့လည်နေ့ခင်းဆိုတော့ ဘာအလုပ်မှမရှိတော့ အကုန်အိပ်နေကြတယ်နဲ့တူတယ် ....
ခုနက အမျိုးသမီးကြီးရဲ့အသံကြားတော့ တစ်ချို့ကအသစ်ရောက်တယ်ကြားတော့ အိပ်နေရာက ခေါင်းထောင်ကြည့်ကြတယ် စပ်စုတဲ့မျက်လုံးတွေနဲ့ အကုန်လုံးနီးပါးကလဲ ခေါင်းမှာ အနီအ၀ါအစုံဆိုးဆေးတွေနဲ့ အိပ်မှုန်စုန်မွှားဖရိုဖရဲ ....

" ဒါက အဆောင်မှုးလေ ဒေါ်မိုခမ်းတဲ့ .... အမ ဒါကကျမညီမ စံပယ်တဲ့ ခုမှစလုပ်ဖူးမှာ "

မသွယ်က ကျမနဲ့အဆောင်မှုးဆိုတဲ့ အမကြီးကိုမိတ်ဆက်ပေးတယ် အသက်ကြီးပေမယ့်သူလဲ ခေါင်းမှာဆိုးဆေးတစ်ချို့တစ်ဝက်တင်ထားတာတွေ့ရတယ် ပုံစံကတော့ စရိုက်ကြမ်းမယ့် ခပ်သွက်သွက်ပုံစံပါပဲ ....

" အေးလေ အဲဒါဆိုလဲ သူ့ကို စီနီယာထိပ်ဆုံးထားပေးလိုက် မလုပ်ဖူးသေးရင်တော့ မသွယ်ပဲအတူဝင်ပြီး ကြည့်ထိန်းပေးလိုက်ပေါ့ ဧည့်သည်တွေကိုတော့ ဒီနေ့အသစ်ရောက်မယ်ပြောထားတယ် ဒီနေ့ဟိုပွဲစားအုပ်စုလာမယ်ထင်တယ် မိုးဝင်ဖူးတဲ့လူတွေပဲလေ "

မသွယ်နာမည်က ဒီမှာမိုးစက်လို့ပေးထားတယ် နေရာတစ်နေရာပြောင်းရင် နာမည်တစ်မျိုးပြောင်းကြတယ်တဲ့ ကျမလဲ စံပယ်ဆိုတဲ့နာမည်ကရိုးနေတော့ နာမည်တစ်ခုခုပေးမှထင်တယ် .....

" နာမည်ပြောဦးသမီး စီနီယာစာရင်းထဲထည့်မလို့ "

ကျမ မသွယ်ကိုလှမ်းကြည့်လိုက်တယ် မသွယ်ကလဲသဘောပေါက်တဲ့အနေနဲ့ ....

" သူ့နာမည်စံပယ် ဒါပေမယ့် နာမည်ကရိုးတော့ပြောင်းပေးလိုက်မယ်လေအမ နာမည်တူမရှိအောင် မိုးမခ လို့ပေးလိုက်အမ "

ပြောပြောဆိုဆို အဆောင်မှုးက စီနီယာဘုတ်ရဲ့ထိပ်ဆုံးမှာ ကျမအတွက်နာမည်ရေးလိုက်တယ် ... ကျမအောက်ကနာမည်တွေကို ဆက်ဖတ်ကြည့်တဲ့အခါမှာ ကြယ်စင် ၊ ကဗျာ ၊ မြတ်နိုး ၊ မိုးတိမ် ၊ လပြည့် ၊ တိမ်လွှာ ၊ လမင်း ၊ လင်းလက် ၊ ရောင်စဉ် အားလုံးနာမည်လှလှလေးတွေနဲ့ အယောက် ၃၀ လောက်ရှိမယ်ထင်တယ် .....

" မာမီ စီနီယာတွေ ဘာတွေ နားမလည်ဘူးနော် အဲဒီအဖွဲ့ထဲမှာ သမီးဘိုင်ပါတယ် ကျော်မထည့်နဲ့ "

အိပ်နေတဲ့ကောင်မလေးတွေထဲက ဆံပင်အနီရောင်ဆိုးထားတဲ့ အသံစာစာနဲ့ ခပ်ပိန်ပိန်ကောင်မလေးတစ်ယောက်က ထပြောတယ် မျက်လုံးကတော့မဖွင့်ဘူးပိတ်လျှက် ...

" အေးပါဟယ် နင့်ဘိုင်လာမှတော့နင့်ပဲခေါ်မှာပေါ့ အသစ်ပါလာရင်တော့အသစ်ပဲထည့်ပေးရမှာပေါ့ ငါ့ဆရာလာလုပ်နေတယ် ဒေါင်းဇားမရယ် "

အသစ်တစ်ယောက်ရောက်လာပြီဆိုတာနဲ့ တချို့ကသွေးတိုးစမ်းကြသလို တချို့ကပညာပြကြတယ် အသစ်ဆိုတဲ့ဂုဏ်က ဒီလောကမှာ ဧည့်သည်တွေအတွက် အရေးပါသလို မိန်းကလေးတွေအတွက်လဲ တစ်ပန်းသာပါတယ် ဒါကြောင့် အသစ်တစ်ယောက်ရောက်လာရင် ခြေထိုးခံတဲ့လူကများတယ်လို့ မသွယ်ကပြောပြတယ် ....

" ဧည့်သည်လာပြီ စီနီယာ ၂ ယောက် ဘိုင် ၅ ယောက်ဝင်မယ် "

အလှတွေပိန်းနေအောင်ပြင်ထားတဲ့ကျမ မသွယ်ဝယ်ပေးတဲ့ တစ်ခါမှမ၀တ်ဖူးသေးတဲ့ ဂါဝန်တိုတိုလေးကိုဆွဲချရင်း ဟိုက်နေတဲ့ရင်ဘတ်ကို မတင်လိုက်တယ် ကျမနဖူးမှာချွေးအနည်းငယ်စို့နေတယ် ဘယ်လိုလူမျိုးနဲ့များ တွေ့မလဲဆိုတဲ့အတွေးနဲ့ ကြောက်စိတ်တွေကို မျိုချရင်း ပထမဆုံးလုပ်ရမယ့်အလုပ်ကို စတင်ခြေလှမ်းမိပါတော့တယ် ......

(ဆက်ပါဦးမည်)
 

Reactions:

0 ကွန်မန့်ရေးရန်:

Post a Comment