Wednesday, November 6, 2013
သုံးဘီးတွေဟာ ကား မဟုတ်ဘူး၊ ဘာကြောင့်လဲ။
အဖြေက ရှုပ်ပါတယ် - လေးဘီးမဟုတ်လို့ပေါ့။
အခုခေတ် အသက် ၃၀ အောက်တွေက သုံးဘီးကားရောင် ဆိုတဲ့ အသုံးအနှုန်းကို သုံးကြသေးရဲ့လား။
သုံးဘီးကားရောင် ဆိုတာ လိမ္မော်ရောင်တမျိုးကို ခေါ်တာပါ။ ကားအရောင်ကို အစွဲပြုပြီး ပေါ်ပေါက်ခဲ့တဲ့ စကားလုံးဖြစ်ဖွယ်ရှိပါတယ်။
သုံးဘီးကားတွေဟာ တချိန်က ရန်ကုန်မှာပဲ အလုံးအရင်းနဲ့ရှိခဲ့တာပါ။
နယ်နှင်ခံရပြီးနောက်ပိုင်းမှာမှ တခြားသောမြို့ကြီးများကို ရောက်သွားပါတော့တယ်။
ကားလို့ အသိအမှတ်မပြုတာဟာ ဘီး လေးလုံး တပ်မထားလို့လား၊ သူ့ရဲ့အင်ဂျင်က ကားအင်ဂျင် မဟုတ်လို့လား။
ကား လို့ အသိအမှတ်ပြုခံရရေးဟာ ဒီကနေ့အချိန်မှာ သုံးဘီး ပိုင်ရှင်တို့အတွက် အရေးကြီးပါတယ်။
ယာဉ်အိုယာဉ်ဟောင်းတွေအပ်နှံရင် ယာဉ်သစ်တစီး ဈေးသက်သာစွာနဲ့ဝယ်ခွင့်ရတဲ့ကာလ မဟုတ်လား။ ဒါကြောင့် နံပတ်မှာ ဟ အက္ခရာပါတဲ့ သုံးဘီးကို ကား ဖြစ်စေလိုကြတာပါ။
အခုတော့ ဟ အက္ခရာကို ကျော်ပြီး တခြားကားတွေကိုပဲ ကားသင်္ချိုင်းက လက်ခံနေတာပါ။
ဒါကြောင့် သုံးဘီးကားတွေ လမ်းပေါ်မှာ ချာချာလည်နေရဦးမှာပါပဲ။
ပြီးခဲ့တဲ့ရက်ပိုင်း မော်လမြိုင်ကို ရောက်တော့ သုံးဘီးတွေကို တွေ့ခဲ့ရပါတယ်။ အင်ဂျင်သံကတော့ တကယ့်ကို ဆူဆူညံညံပါပဲ။ ခရီးသည် ၄ ယောက် လို့ ရေးထားသော်ငြား တကယ် တင်တော့ ၆ ယောက်လည်း ဆံ့တာပါပဲ၊ တင်တာပါပဲ။
မြို့လယ်ကနေ မြို့အထွက် တံတားထိပ်ကို ၁၅၀၀ ပေးရပါတယ်။
ခေတ်ဟောင်းသုံးဘီးထက် ပိုအဆင့်မြင့်တယ်လို့ ယူဆလိုက ယူဆနိုင်တဲ့ နောက်ပေါ် သုံးဘီး
မော်လမြိုင်မှာ မူလလက်ဟောင်းသုံးဘီးတွေရဲ့ ပြိုင်ဘက်ကတော့ ထိုင်းကသွင်းလာတဲ့ ဆမ်မလော့တွေပါပဲ။
ဆမ်မလော့ ဆိုတာ ထိုင်းစကားပါ၊ မြန်မာလိုတော့ သုံးဘီးပေါ့။
ထိုင်းသုံးဘီးတွေဟာ ဆိုင်ကယ်ကို နောက်တွဲတပ်ပြီးဆင်ထားတာပါပဲ။ နယ်စပ်မြို့တွေမှာ တွေ့ရမှာပါ။ စက်တွေကို ထိုင်းကနေ သွင်းတယ်၊ ပြည်တွင်းမှာ သုံးဘီးဖြစ်အောင် ဆင်တယ်လို့ ဆိုပါတယ်။
ထိုင်းသုံးဘီးရဲ့ အားသာချက်က ပစ္စည်း များများဆံ့တာပါပဲ။ ဆွဲအားလည်း ပိုကောင်း၊ ဝယ်ဈေးလည်း ပိုများဖွယ် ရှိပါတယ်။
မီးခိုး အလွန်အကျွံ ထွက်ခြင်းကို သည်းမခံကြတဲ့ခေတ်ရောက်ရင်တော့ မူလလက်ဟောင်း သုံးဘီးတွေ သံရေကြိုစက် ရောက်ကြဖွယ် ရှိတယ်လို့ ယူဆရပါတယ်။
ပြီးခဲ့တဲ့ရက်ပိုင်း အတွင်း မော်လမြိုင်က သုံးဘီး ရှေ့ခန်း နဲ့ သုံးဘီးဆရာကို နောက်ကျောဘက်က မြင်ရပုံ
အခုချိန်မှာတော့ သဘာဝပတ်ဝန်းကျင် ထိန်းသိမ်းရေး နဲ့ လေထု သန့်ရှင်းမှုကို ဦးစားမပေးနိုင်ကြသေးတဲ့အတွက် မူလလက်ဟောင်း သုံးဘီးတွေ မော်လမြိုင်မှာ ပန်းပန်လျက် ရှိတာ တွေ့ခဲ့ရပါတယ်။
.
0 ကွန်မန့်ရေးရန်:
Post a Comment