လောင်းကစားသည်လည်း လူသားတို့၏ ဗီဇစိတ် တွင်ပင် တည်ရှိနေပြီး ဦးနှောက်တွင်း စွဲမြဲစွာ အမြစ်တွယ်နေဟန် ရှိရာ ဤသည်က အဆုံးတွင် ပျက်စီးဆုံးရှုံးမှုနှင့်သာ အဆုံးသတ်မည့် စရိုက်တစ်ခုသည် အဘယ်ကြောင့် ထမင်းစားရေသောက် ဆန်နေရသနည်း ဆိုသော မေးခွန်းအတွက် အဖြေတစ်ခု ဖြစ်နိုင်ပါသည်။ မျောက်များလည်း လောင်းကစားသည်။ သစ်သီးဖျော်ရည် ဆုပေးသော လောင်းကစား တစ်ခုတွင် မျောက်များ၏ လောင်းကစား လုပ်ချင်သော ဆန္ဒကို စမ်းသပ်ရာ ရနိုင်မည့် ဆုလာဘ်အား လျှော့ချလိုက်သည့် အချိန်တွင်သော်မှ အနည်းမျှလေးသာ ပိုရနိုင်မည့် အခွင့်အလမ်းကို မျှော်ကိုးကာ လူသားတို့၏ ဆွေမျိုးများက တက်ကြွစွာ လောင်းကစားကြသည်ကို တွေ့ရ၏။ ယမန်နှစ်က Neuron ဂျာနယ်တွင် ပုံနှိပ်ဖော်ပြခဲ့သည့် လေ့လာမှုတစ်ခုတွင် ဦးနှောက်တွင်းရှိ အနိုင်ရမှုနှင့် ဆက်နွယ်သည့် ဇီဝဆားကစ်များက လောင်းကစားမိစေရန် မြှောက်ထိုးပင့်ကော် လုပ်သည်ဟု ဆို၏။ လောင်းကစားသူသည် ကပ်လွဲခြင်းအား ထူးခြားဖြစ်စဉ် (နီးစပ်လာပြီဟု ယူဆခြင်း) ဟု ဘာသာပြန်ပြီး ဤသည်က ဆက်လက် လုပ်ဆောင်မိစေရန် အားပေးအားမြှောက် ပြုသည်ဟု Cambridge တက္ကသိုလ်မှ Luke Clark က ဆိုသည်။ အဖြူအမဲ ရလဒ်မှာ လုံးလုံးလျားလျား အရှုံး ဖြစ်သော်လည်း ကပ်လွဲခြင်းများအား ဦးနှောက်မှ အနိုင်ရခြင်းကဲ့သို့ပင် တုံ့ပြန်ကြောင်း ၎င်းတို့၏ လေ့လာမှုများအရ တွေ့ရှိခဲ့သည်ဟု သူက ဆိုသည်။ အခြားသော လေ့လာမှုများတွင် အရှုံးသည် လောင်းကစားသူအား ရှုံးမဲ,မဲစေသည်ဟုလည်း ဖော်ပြကြသည်။ မည်သည့် ပမာဏခန့် လောင်းကစားမည် ဆိုသည်ကို ကြိုတင်ပြင်ဆင်ခြင်းတွင် လူများသည် အေးဆေးတိကျပြီး ဆင်ခြင်တုံတရား လက်ကိုင်ထားနိုင်ကြသည်။ သို့ရာတွင် ရှုံးပြီဆိုသည်နှင့် ဆင်ခြင်တုံတရားအား မြေပေါ်ချနင်းကာ မူလ သတ်မှတ်ထားသည့် ပမာဏအား မေ့ပစ်ပြီး ပို၍ပင် ရှုံးမဲမဲ လောင်းထပ်လေ့ ရှိကြသည်ဟု လေ့လာမှုတစ်ခုက ယမန်နှစ်က ဖော်ပြခဲ့သည်။
0 ကွန်မန့်ရေးရန်:
Post a Comment