အယောင်ဆောင် ဘုရင့်သမီး ( ၂ )

by Spring Flowers on Thursday, May 3, 2012 at 5:20am

•                        ၁၉၃၈ မှာ အန်ဒါဆွန်နဲ့ သူ့လူတွေဟာ ဇာဘုရင်ရဲ့ အမွေတွေကို ဂျာမန်တရားရုံးကနေ တောင်းဆိုတယ်။တရားရုံးကလည်း အန်ဒါဆွန်ဟာ မင်းသမီး အန်နာစတေးရှား ဖြစ်ကြောင်း သက်သေအထောက်အထားပြဖို့ ပြန်တောင်းဆိုပါတယ်။ သူ့အမှုဟာ ဒုတိယကမ္ဘာစစ်ကြီး ဖြစ်ချိန်ကို ဖြတ်သန်းရတာရယ်၊ ဇာဘုရင်မိသားစုရဲ့ နိုင်ငံခြားက အမျိုး မင်းမျိုးမင်းနွယ်တွေကို သက်သေအဖြစ် ခေါ်ရတာရယ် စတာတွေကြောင့်ကြန့်ကြာပြီး ဂျာမနီရဲ့ တရားစီရင်ရေးသမိုင်းမှာ အရှည်ဆုံး အမှုတစ်ခု ဖြစ်ခဲ့တယ်။ ပါဝင်ရတဲ့ သူတွေမှာလည်း စရိတ်စက ကုန်လိုက်တာ သောက်သောက်လဲ။ ( ၁၉၃၈ ) က စလိုက်တဲ့ အမှုဟာ (၁၉၇၀ ) မှာမှ ပြီးတယ်ဆိုတော့ စဉ်းစားသာကြည့်ပေတော့ ကိုယ့်လူရေ။ ( ၃၂ ) နှစ်တိတိ ကြာပြီး စီရင်ချက်ချတော့ အန်ဒါဆွန်ဟာ အန်နာစတေးရှားလို့ဆိုနိုင်တဲ့ သက်သေမခိုင်လုံလို့ တရားရုံးအနေနဲ့ ဟုတ်၏ မဟုတ်၏ မဆုံးဖြတ်နိုင်ပါဘူး   neither established nor refuted   တဲ့။ တကယ်တမ်းတော့ အန်ဒါဆွန်ရှုံးတာပါ။ သူက အသိအမှတ်ပြုခံချင်သူလေ။ သို့သော် တရားရုံးက မထောက်ခံပေမယ့် သူကတော့ ထောက်ခံယုံကြည်သူတွေဝန်းရံပြီး  ပန်းပန်လျှက်..............။

                                ***********************************************

•               ၁၉၈၄ အသက် ၈၈ နှစ် အရွယ်မှာ အန်ဒါဆွန်ဟာ အမေရိကန်နိုင်ငံမှာ ကွယ်လွန်ခဲ့တယ်။ သူ့ကို လူအများသတိစထားမိတဲ့ ၁၉၂၀ က သေသည်အထိ အန်နာစတေးရှား ဆိုတဲ့ နာမည်ကြောင့် ( ဟုတ်သည်ရှိ မဟုတ်သည်ရှိ ) စောင့်ရှောက်ကြည့်ရှုမယ့်သူ မပြတ်ခဲ့ပါ။ သူကလည်း သေသည်အထိလည်း သူ့ကိုယ်သူ ဘုရင့်သမီးဆိုတာကနေ တစ်ပြားမှ မလျှော့။ ယုံတဲ့လူတွေကလည်း ယုံနေတာကိုး။ အမေရိကန်ကို မပြောင်းခင်က သူဟာ ဂျာမနီက နယ်မြို့လေးတစ်မြို့မှာ ဂျာမန်မင်းသားတစ်ပါး ပေးသနားတဲ့ အိမ်အို အိမ်ဟောင်းတစ်လုံးမှာ တစ်ကိုယ်တည်း အနှစ်  ( ၂၀ ) ကျော် နေခဲ့တယ်။ တစ်ခါတစ်လေလာလည်တဲ့ ရုရှားနန်းတွင်းသူနန်းတွင်းသားဟောင်းတွေကို လက်ခံတွေ့တာကလွဲလို့ အပြင်လူတွေနဲ့ သိပ်မရောခဲ့ဘူး တဲ့။ သူ့ကို ဇာဘုရင်မျိုးဆက်ဆိုပြီး အိမ်ရှေ့က တ၀ဲလည်လည် လာကြည့်တဲ့ တိုးရစ်စ်တွေတောင် ရှိသတဲ့။ သူတို့တွေဟာ အန်ဒါဆွန်နေပုံထိုင်ပုံကို ကြည့်ပြီး ပါးစပ်အဟောင်းသား ဖြစ်ဖြစ်သွားတတ်ကြတယ်။  ဘာကြောင့်လည်းဆိုတော့ အန်ဒါဆွန်ရဲ့အိမ်မှာ ကြောင်အကောင် ၆၀ ကျော်နဲ့ ခွေးတွေ တစ်အုပ်ကြီး မွေးထားတယ်။  တစ်ဝင်းလုံး ခွေးစာ ကြောင်စာတွေနဲ့ အမှိုက်တွေကြားမှာ အနံ့အသက် ဆိုးရွားလွန်းလို့ အိမ်နီးချင်းတွေကတောင် သက်ဆိုင်ရာကို တိုင်ရတဲ့အထိ ညစ်ပတ်သတဲ့။

                   တစ်ခါမှာတော့ သူနေမကောင်းလို့ ဆေးရုံတက်နေခိုက် ဂျာမန်မင်းသားဟာ သူ့တစ်အိမ်လုံးကို သန့်ရှင်းရေး လုပ်ခိုင်းလိုက်တယ်။ သူ့ခွေးတွေကြောင်တွေကိုတော့ တစ်ကောင် တစ်မြီးမျှမကျန်အောင် သတ်ခိုင်းလိုက်ပါတော့တယ်။ အန်ဒါဆွန်ဟာ ဆေးရုံက ဆင်းလို့ ဒီအကြောင်းကို ကြားတော့ စိတ်တွေ ဆိုးပြီး အမေရိကားကို ထွက်သွားခဲ့တယ်။

•                    အမေရိကန်ကို ရောက်လို့ ခြောက်လမကြာခင် အန်ဒါဆွန်ဟာ သူ့ကို အန်နာစတေးရှားဆိုပြီး အသေလေးစားနေတဲ့ တက္ကသိုလ်ဆရာသဌေးတစ်ယောက်နဲ့ မင်္ဂလာဆောင်လိုက်တယ်။ ပိုင်ချက်ကတော့လား ။ အဲဒီအချိန်မှာ အန်ဒါဆွန်က အသက် ၇၀ နားကပ်နေပြီး သူယူလိုက်တဲ့ မျိုးရိုးဗေဒပညာရှင်ဆရာ Jack Manahan က သူ့ထက် အသက် ၂၀ ကျော်ငယ်ပါသတဲ့ကွယ်။ ဖွားဖွားကို  ယူတဲ့ Jack ကလည်း ခေသူမဟုတ်။ ယူပြီးတော့ သူ့ကိုယ်သူ ဇာဘုရင်ရဲ့ သားမက် ၊ မင်းသားလောင်း ဆိုပြီး ပျော်နေသတဲ့။

အန်ဒါဆွန်ထက် အသက် ၂၀ ကျော်ပိုငယ်တဲ့ ဂျက်ခ် ( အမှိုက်ကောက်နေပုံ )

•                တိုတိုပြောရရင်တော့ သူတို့နှစ်ယောက်ဟာ သူတော်ချင်းချင်း သူတင်းလွေ့လွေ့ အတော်လေး ပေါင်းမိကြသတဲ့။ လူချမ်းသာရပ်ကွက်က ဂျက်ခ် ရဲ့ အိမ်ကြီးဟာ မကြာခင်မှာဘဲ ကြောင်တွေခွေးတွေနဲ့ စည်စည်ကားကား။ အိမ်ရှေ့အိမ်နောက်ခြုံတွေထ။ ခွေးစားခွက်ကြောင်စားခွက်တွေ ဟိုဟိုဒီဒီ ။ အန်ဒါဆွန်ဟာ ရှိသမျှ အမှိုက်ကို မလွှင့်ပစ်ဘဲ အိမ်မှာဘဲထားတတ်တယ်။ ဂျက်ခ်ကလည်း သူ့သဘောဘဲလေ ဆိုပြီး လွှတ်ထားတဲ့အပြင် သူ့အလိုကိုပါ လိုက်သေးတယ်။ သူတို့ နှစ်ယောက်ဟာ များသောအားဖြင့် နေ့ဘက်တွေဆို အိမ်မှာမရှိဘဲ ကားတစ်စီးနဲ့ လျှောက်သွားနေတတ်တယ်။ သူတို့ကို လုပ်ကြံမယ့်သူ( ဘုရင်စနစ်ကို မုန်းသူ ရုရှား ) တွေရှိတယ်ဆိုပြီး အဲဗားကြောက်နေတတ်ကြသတဲ့လေ။ ကားကို ကြုံတဲ့နေရာမှာ ရပ် အစားအသောက်ဝယ်ပြီး ကားထဲမှာ စားတတ်တယ်။ အဆိပ်ခတ်ခံရမှာ စိုးလို့တဲ့။ ကားတစ်စီးလုံးလည်း ရစရာမရှိအမှိုက်တွေပွ။ ကြာတော့သူတို့လင်မယားအဲလို ထူးထူးဆန်းဆန်နေပုံဟာ မြို့က လူတွေအမြင်မှာ ရိုးသွားပြီး အားလုံးက ဘေးမဲ့ပေးထားလိုက်ကြတယ်။ လိုက်လည်းလိုက်တဲ့ သူတို့နှစ်ယောက်ဟာ အဲလိုပုံနဲ့ အန်ဒါဆွန် သေသည်ထိ ၁၆ နှစ် ပေါင်းသင်းနေထိုင်သွားကြတယ်။

အသက် ၈၀ ကျော် အန်ဒါဆွန် နဲ့ သူ့ကြောင်တစ်ကောင်

•                အန်ဒါဆွန်ဟာ သူ့ခွေးတွေကြောင်တွေကို အတော်ချစ်သတဲ့။သူ့တိရစ္ဆာန်တွေဟာ ရုရှားက သေသွားတဲ့ မင်းမျိုးတွေ ၀င်စားတာဆိုပြီး တစ်ကောင်ကောင် နေမကောင်းဖြစ်ရင် တိရစ္လာန်ဆရာဝန်ဆီမခေါ်သွားရဘူး။ မင်းမျိုးမင်းနွယ်တွေကို ဘာကြောင့်တိရစ္လာန်ကုဆရာဝန်ဆီ ခေါ်ရမှာလဲ ဆိုဘဲ။ အကောင်တစ်ကောင်သေရင် သူ့တို့အိမ်က မီးလင်းဖိုမှာ သဂြိုလ်တတ်တယ်။

                   ဒီလိုနဲ့ စိတ်ညစ်လို့ ရေထဲခုန်ချတဲ့ အရူးမလေးဟာ ကံမကုန်တော့ မသေလိုက်ဘဲ ဘုရင့်သမီးအဖြစ် ( တရားဝင်အသိအမှတ်ပြုမခံလိုက်ရသည့်တိုင် ) အသက် ၈၈ နှစ်ထိ သက်သက်သာသာနေသွားနိုင်ခဲ့တယ်။ သူပေါ်လာခဲ့တဲ့ ၁၉၂၀ ပတ်ဝန်းကျင်နှစ်များမှာ စစ်ကြောင့် ဒုက္ခရောက်သူတွေ သန်းနဲ့ချီရှိပေမယ့် သူကတော့ အေးဆေး။ ၁၉၃၀ နဲ့ ၄၀ ကြားမှာ ဖြစ်တဲ့ တကမ္ဘာလုံး အနှံ့အငတ်ဘေးကြီးမှာလည်း သူကတော့ဘာမှမဖြစ်လိုက်။ စိတ်မနှံ့တဲ့လူ၊ အလုပ်မလုပ်နိုင်တဲ့လူတစ်ယောက်အနေနဲ့သာ နေခဲ့ရမယ်ဆို ဘယ်လိုမှလွယ်မှာ မဟုတ်တဲ့ ခေတ်တွေကို သူကတော့ ကံတရားရဲ့မျက်လှည့်ကြောင့်မပင်မပန်း ဖြတ်ကျော်သွားခဲ့တယ်။ ငယ်ငယ်တုန်းက သူဖြစ်ချင်တဲ့ ရုပ်ရှင်မင်းသမီးဆိုတာလည်း တနည်းအားဖြင့် ဖြစ်ခဲ့တယ်လို့ ဆိုရမယ် မဟုတ်လား။ သူ့အတွက်တန်ပါတယ်။ မတန်တာကတော့ သူ့အမှုမှာ ပါတဲ့လူတွေရဲ့ ကိုယ်အား၊ ငွေအား၊ စိတ်အားတွေ အကြီးအကျယ် ကုန်ခဲ့ရတာပါ။ သူ့ကို အန်နာစတေးရှား မဟုတ်မှန်း သိနေတဲ့ လူတွေရဲ့ ဒေါသတွေ၊ ကိုယ်ချစ်ခင်ခဲ့ရတဲ့ သေသွားတဲ့သူရဲ့ နာမည်ကို ယူပြီးလုပ်စားခံရတဲ့ အတွက် မခံချင်စိတ်တွေဟာ အတိုင်းအဆမရှိ။ တစ်နှစ်ကိစ္စ မဟုတ်၊ နှစ်နှစ်ကိစ္စမဟုတ်ဘဲ အနှစ် ၆၀ ကျော် ၇၀ နီးပါး လုပ်စားသွားခဲ့သူ။

• အန်ဒါဆွန်ရဲ့ ပုံရိပ်များနဲ့ သူမရဲ့ ပြာများကို မြှုပ်နှံ့ရာ...........။

•                 သူ့ရဲ့ လံကြုပ်ဇာတ်လမ်းကို အခြေခံပြီး ရေးခဲ့ရိုက်ခဲ့တဲ့ သီချင်း၊ ရုပ်ရှင်၊ စာအုပ်တွေရဲ့ မူပိုင်ခွင့်တွေနဲ့ကောင်းစားချမ်းသာသွားသူတွေကော နည်းသလားကွယ်။ ဒါပေမယ့်  ဒီလိမ်လည်မှုမှာ ပါဝင်အားပေးခဲ့လို့ ပျက်စီးသွားရသူတွေလည်းရှိခဲ့ပါရဲ့။ အဲဒီထဲက တစ်ယောက်ကတော့ ရှေ့နေ ဖယ်လို ဆိုတဲ့သူ။ သူဟာ အန်ဒါဆွန်ကို စပေါ်လာကတည်းက မင်းသမီးအဖြစ် မြှောက်ပေးတဲ့သူတွေထဲမှာ ရှေ့ဆုံးကဘဲ။ သူက ဇာဘုရင်ဟာ သူ့သားသမီးတွေဖို့ နိုင်ငံခြားတိုင်းပြည်တွေမှာ အိမ်ခြံမြေအမွေတွေထားခဲ့တယ်လို့ ဆိုတယ်။  အန်ဒါဆွန်ကို မြှောက်ပေးပြီး အဲဒီပစ္စည်းတွေကို တရားရုံးကတဆင့် တောင်းခိုင်းခဲ့တယ်။ သူကဘဲ ကိုယ့်ပိုက်ဆံနဲ့ကိုယ် အန်နာစတေးရှားနာမည်နဲ့ ကုမ္မဏီတစ်ခုထောင်ပြီး အဲဒီအိမ်ခြံမြေဆိုတာတွေရဲ့ ရှယ်ယာတွေကို ကြိုရောင်းခဲ့တယ်။ လောဘ...လောဘ...။ တကယ်တော့ ဇာဘုရင်မှာ မယ်မယ်ရရကျန်တာ ဘာမှ သိပ်မရှိပါဘူး။ တကယ်တမ်းထွက်လာတာက နိုင်ငံခြားဘဏ်တစ်ခုက ပိုက်ဆံနည်းနည်းလေးပါ။ အဲဒါတွေကို ဇာဘုရင်ရဲ့ ဆွေမျိုးအရင်းတွေက ခွဲယူလိုက်ကြလို့ သူ့ကတော့ တစ်ပြားမှမရလိုက်။ အိမ်ခြံမြေဆိုတာတွေလည်း ပေါ်မလာ။ သူ့မှာသာ မျှော်တော်ယောင်လုပ်ရင်း ကုမ္ပဏီက အရှုံးတွေပြ ။နောက်ဆုံးကုန်းကောက်စရာမရှိအောင် ဖြစ်ပြီး ဆင်းဆင်းရဲရဲ သေသွားခဲ့ရတယ်။

•              ဒီဇာတ်လမ်းကြောင့် သေတဲ့အထိ စိတ်မချမ်းသာဖြစ်သွားရသူတစ်ယောက်ကတော့ ဇာဘုရင်ရဲ့ ညီမအရင်း ( အန်နာစတေးရှားရဲ့ အဒေါ် ) ဖြစ်သူ မင်းသမီး အော်ဂါ ပါဘဲ။ အော်ဂါဟာ သူ့တူ၊ တူမတွေနဲ့ အနီးကပ်နေခဲ့သူ ။ ၁၉၁၇ တော်လှန်ရေးအပြီးမှာ သူဟာ အမေဘုရင်မကြီးကို ခေါ်ပြီး နိုင်ငံခြားကို ထွက်ပြေးခဲ့ရတယ်။ သူ့မောင်၊ ယောက်မနဲ့ တူ၊တူမငါးယောက်ရဲ့ အဖြစ်ဆိုးကိုအဝေးကနေ ကြားရင်း ရင်ကျိုးခဲ့ရပြီးနောက် အန်ဒါဆွန်ရဲ့ ဇာတ်လမ်းကို ကြားကတည်း လုံးဝမယုံခဲ့ဘူး။ မယုံလို့ အန်ဒါဆွန်ကို ထောက်ခံသူများက သူ့ကို လောဘကြီးသူ၊ ဇာဘုရင့် အမွေတွေကို လက်ဝါကြီးအုပ်ချင်သူ၊ သူ့တူမအရင်းကို အသိအမှတ် မပြုချင်သူ လို့ စွပ်စွဲတာကို အတော်ခံစားလိုက်ရတယ်။ ဒါတင်ဘယ်ကဦးမလဲ.... အန်ဒါဆွန်ကို မျက်စိကွယ်နားကွယ် ထွက်သွားဖို့ ပိုက်ဆံပေးပြီး နှုတ်ပိတ်ခဲ့သူလို့ သတင်းလွှင့်ခဲ့ကြတယ်။ တကယ်တော့ အော်ဂါတို့မှာ အဲဒီလို လုပ်ဖို့ အကြောင်းမရှိသလို ပေးဖို့လည်း ဘယ်က ပိုက်ဆံရမှာတဲ့တုန်း။ သူကိုယ်တိုင်က ပြည်ပြေးအဖြစ်နဲ့ တမြေရပ်ခြားမှာ ပန်းချီဆွဲပြီး အသက်မွေးခဲ့ရသူ။ သူ့အမေ နန်းကျ ဘုရင်မကြီးဟာ သူတို့နဲ့ အမျိုးတော်တဲ့ အင်္ဂလန်ဘုရင်က ပေးသနားတဲ့ ပင်စင်ကို ရှက်ရှက်နဲ့ယူပြီး ရပ်တည်နေရသူ။

•             မင်းသမီးအော်ဂါဟာ နောက်ဆုံးမှာ အန်ဒါဆွန်ကို မယုံပေမယ့် အခွင့်အရေးတစ်ခုပေးတဲ့အနေနဲ့သွားကြည့်ခဲ့တယ်။ မြင်မြင်ချင်း သူ့တူမ မဟုတ်ဘူး ဆိုတာကို တန်းသိတယ်။ စမ်းသပ်မှုတွေ အမျိုးမျိုးလည်း လုပ်ကြည့်ပါရဲ့။ သူနဲ့ သူ့တူမသာသိတဲ့ စကားဝှက်မျိုးတွေကို ပြောကြည့်တယ်။ အန်ဒါဆွန်ရဲ့ ကိုယ်ပေါ်က အမှတ်အသားတွေကို ကြည့်တယ်။ ရုရှားလိုပြောကြည့်တယ်။ သူ့တူမ ကျွမ်းကျင်တဲ့ ပြင်သစ်စကား၊ အင်္ဂလိပ်စကားနဲ့ မေးကြည့်တယ်။ အန်ဒါဆွန်ဟာ သူစမ်းသပ်တာတွေကို တစ်ခုမှ မအောင်မြင်။

                 ၁၉၆၀  အသက် ၇၆ နှစ်မှာ အော်ဂါဟာ ကနေဒါနိုင်ငံမှာ မထင်မရှား ဆုံးပါးသွားပါတယ်။ မဆုံးခင် ( ၁ ) နှစ်မှာ သူဟာ ဂျာမနီက တရားရုံးမှာ အန်ဒါဆွန်ဟာ သူ့တူမ အန်နာစတေးရှား မဟုတ်ကြောင်း နောက်ဆုံးအကြိမ် သက်သေထွက်ဆိုသွားခဲ့တယ်။

အော်ဂါနဲ့ သူ့တူမ အန်နာစတေးရှား

•               ၇၄ နှစ်တိုင်တိုင်ရှည်ကြာခဲ့တဲ့ ရုရှား ကွန်မြူနစ်ဝါဒကြီးဟာ ၁၉၉၁ မှာ ဆုံးခန်းတိုင်ပါတယ်။ တိုင်းပြည် အရင်ထက်ပိုလွတ်လွတ်လပ်လပ်ဖြစ်လာချိန်မှာ  ဇာဘုရင်တို့ကို မြှုပ်ထားတဲ့နေရာကို တူးဖော်ရေးလုပ်တော့ လူခေါင်း ၉ ခုနဲ့ အရိုးစုတွေ ထွက်လာပါသတဲ့ကွယ်။ ကံကောင်းထောက်မစွာနဲ့ ၁၉၉၀ နှစ်များတ၀ိုက်မှာ DNA test ဆိုတာပေါ်နေပါပြီ။ ဒါကြောင့်အဲဒီ အရိုးတွေကို DNA test လုပ်ကြည့်ကြတယ်။ ထွက်တဲ့ အဖြေကို ဇာဘုရင်တို့ရဲ့ ဆွေမျိုးတစ်ယောက်ဖြစ်တဲ့ ဂျာမန်မင်းသား ဖိလစ် ( အခုလက်ရှိ အင်္ဂလန်ဘုရင်မကြီး အဲလိဇဘက်ရဲ့ ယောက်ျား ) ရဲ့ DNA နဲ့ တိုက်ကြည့်တော့တူနေတာကို တွေ့ရတယ်တဲ့။ ဒါကြောင့်ဒီအရိုးတွေဟာ ဇာဘုရင့်မိသားစုရဲ့ အရိုးတွေဆိုတာ သေချာသွားခဲ့တာပေါ့။ ဒါပေမယ့် အသတ်ခံလိုက်တဲ့ ၁၁ ယောက်ထဲက ၉ ယောက်ရဲ့ အရိုးကိုသာ တွေ့တော့ မတွေ့တဲ့အရိုးတွေဟာ ဘယ်သူ့အရိုးတွေလဲဆိုတာ စုံစမ်းကြရပြန်ရော။ အဖြေထွက်တော့ စတုတ္ထသမီး အန်နာစတေးရှားနဲ့ သား အလက်ဆီရဲ့ အရိုးစုတွေဖြစ်နေတာမို့ အန်ဒါဆွန်ဟာ မင်းသမီးအတုဆိုတာကို ဖော်ဖို့ အထောက်အထားမရှိတဲ့ အပြင် အန်နာစတေးရှားဟာ တကယ်လွတ်သွားနိုင်တယ်ဆိုတဲ့ အတွေးကို ပိုခိုင်မာစေခဲ့တယ်။ အင်း...တော်တော်ရှည်တဲ့ဇာတ်ပါလားဟယ် ။

တူးဖော်မိသော အရိုးများကို စစ်ဆေးစဉ်

•               ဖြစ်ချင်တော့အန်ဒါဆွန်လည်း သေတာကြာပြီ၊ သူ့အလောင်းကိုလည်း မီးသဂြိုလ်လိုက်လို့ DNA test စစ်လို့ မရတော့ပါ ။ ကံအားလျော်စွာ ၁၉၉၄ မှာမှ အန်ဒါဆွန်ရဲ့ ဆံပင်မျှင်တွေကို သူ့နေခဲ့တဲ့ အိမ်က စာအုပ်ကြိုစာအုပ်ကြားက ရှာတွေ့ခဲ့ကြတယ်။ ပြီးတော့ အန်ဒါဆွန်မသေခင်က အူရောင်လို့ ခွဲရစဉ်က ခွဲထုတ်လိုက်တဲ့ အူကို အမေရိကန်ဆေးရုံက သိမ်းထားခဲ့တယ်။ အဲဒါတွေကို DNA test လုပ်တော့ ဇာဘုရင်မိသားစုနဲ့ လားလားမှ မတူပါတကား။ ဘယ်သူနဲ့ သွားတူနေလဲဆိုတော့ ပိုလန်သူ ဖရန်ဇီစကာမိသားစုက အစ်ကို လုပ်သူရဲ့ DNA နဲ့ သွားတူနေပါသတဲ့ကွယ်။ အဲဒီ test တွေကို ရုရှား၊ အမေရိကန်၊ ဗြိတိန် သုံးနိုင်ငံက သိပ္ပံပညာရှင်တွေက လုပ်တာဖြစ်တယ်။ 

•                 ၁၉၉၈ မှာ ရုရှားအစိုးရဟာ အဲဒီအရိုးတွေကို စိန့်ပီတာစဘတ် St.Petersburg မြို့က ရိုမန်နော့ဗ် မင်းမျိုးတွေကို မြှုပ်ရာ ဘုရားကျောင်းကြီထဲမှာ အခမ်းအနားနဲ့ မြှုပ်ပေးခဲ့တယ်။ ဇာဘုရင်တို့မိသားစု အသတ်ခံရတာက ၁၉၁၈ မှာ ။ သူတို့အရိုးတွေနဲ့အသုဘအခမ်းအနားကို လုပ်တာ ၁၉၉၈ မှဆိုတော့ ကြားထဲမှာ အနှစ် ၈၀ တိတိ ကြာခဲ့တယ်။ မြန်မာလိုဆို သရဏဂုံမတင်ဘဲ ကြာခဲ့တဲ့ အချိန်ဆိုပါတော့။

အခမ်းအနားကို နိုင်ငံပေါင်း ၅၀ ကျော်မှ ဇာဘုရင့်အမျိုး မင်းမျိုးမင်းနွယ်များနဲ့ သံတမန်များ တက်ရောက်ခဲ့......။

•               အန်ဒါဆွန်ဟာ လူလိမ်ဆိုတာ အဲဒီမှာတင် ရှင်းသွားပါတယ်။  မင်းသမီးအစစ် အန်နာစတေးရှား လွတ်သွားနိုင်သလားဆိုတဲ့ သို့လော သို့လောကတော့ ၂၀၀၇ ကျမှ ရှင်းတော့တယ်။ ကျန်တဲ့ အရိုးတွေကို အရင်အရိုးစုတွေတွေ့တဲ့ နေရာနဲ့ ပေ ၂၀၀ လောက်အကွာမှာ သွားတူးဖော်မိလို့ပါဘဲ။  တိုတိုပြောရရင်တော့ နောက်ဆုံး DNA test တွေ အပြီးမှာ ဇာဘုရင်တစ်မိသားစုလုံး တစ်နေ့တည်းမှာ သေပါတယ်ဆိုတာကို အတည်ပြုလိုက်နိုင်ပါတယ်။ နောက်ဆုံးတော့ နိကိုးလပ်စ်တို့ မိသားစုအားလုံးရဲ့ အရိုးတွေဟာ  ဇာဘုရင်အဆက်ဆက်ကို မြုပ်နှံရာဖြစ်တဲ့ Peter and Paul Fortress လို့ အမည်ရတဲ့ ဘုရာကျောင်းကြီးထဲမှာ အိပ်စက်အနားယူသွားခဲ့..............။

•                    နိဂုံးချုပ်မှာ နည်းနည်းလေး လျှာရှည်ခွင့်ပြုပါ။ ဒီအရိုးတွေကို ဘုရားကျောင်းကြီးထဲမှာ အခမ်းအနားနဲ့ ဂူသွင်းပေးတဲ့ကိစ္စဟာ ရုရှားလူမျိုးတွေကြားထဲမှာ စိတ်ဝမ်းကွဲစရာ အငြင်းပွားစရာ ဖြစ်ခဲ့ရတယ်။ တစ်ချို့သောသူတွေက ဘုရင်စနစ်ဟာ အာဏာရှင်စနစ် ။  နိကိုးလပ်စ်တို့ဟာ ဆင်းရဲသားတွေရဲ့ ချွေးနဲ့ သွေးနဲ့ ရင်းပြီး လုပ်လို့ရတဲ့ ပိုက်ဆံ တိုင်းပြည်ဘဏ္ဍာနဲ့ စည်းစိမ်ယစ်နေခဲ့သူတွေ၊ ပြည်သူကို ပြန်မကြည့်လို့ အငတ်ဘေးကြောင့် ဆင်းရဲမှုကြောင့် သေရသူတွေ မရေတွက်နိုင်အောင်ဘဲလို့ ဆိုပါတယ်။ သူ့ဟာနဲ့သူကတော့ မမှားပါဘူးလေ ။ အရင်ရေးခဲ့ဖူးတဲ့ ကြက်ဥများက ပြောသောသမိုင်းမှာလည်း ပါပါတယ်။ ဘုရင်က ဘုရင်မကို နှစ်တိုင်းပေးတဲ့ ဖာဘယ်ဂျေးကြက်ဥတစ်လုံးရဲ့ တန်ဖိုးတင် နည်းတာမှမဟုတ်တာနော်။ မွေးကတည်းက ရွှေဇွန်းကိုက်ပြီး မွေးသူတွေအဖို့ ဆင်းရဲသားတွေ စားရတဲ့ ပေါင်မုန့်တစ်ပိုင်းရဲ့ တန်ဖိုးဆိုတာ ဘယ်တွေးတတ်ပါ့မလဲ။ နိကိုးလပ်စ်ဟာ အစကတည်းက အုပ်ချုပ်ရေးဝါသနာမပါဘဲ အဖေဘုရင်မို့လို့သာ သူလည်း ဘုရင်လုပ်ခဲ့ရတာ။ စက်မှုထွန်းကားရေးတွေကို ဇွတ်လုပ်ပေမယ့် အဲဒီလုပ်ငန်းတွေမှာ တကယ်လုပ်ခဲ့ရတဲ့ ဆင်းရဲသားပြည်သူ သန်းပေါင်းများစွာရဲ့ တိုးတက်ရေးကို လျစ်လျူရှုခဲ့တယ်။ ပညာတတ်ပေမယ့် ကိုယ့်ကိုယ်ကို ယုံကြည်မှုနည်း၊ ပျော့ညံပြီး နိုင်ငံရေး ဥာဏ်ပညာမရှိခဲ့ဘူး။ တိုတိုပြောရရင်တော့ ပြည်သူတွေ တော်လှန်ခဲ့တာဟာ ဘုရင်အုပ်ချုပ်မှုညံ့ဖျင်းလွန်းလို့၊ ဆင်းရဲလွန်းလို့ပါ ။ အထူးသဖြင့် ရုရှားကွန်မြူနစ်လက်ဟောင်းတွေက ဇာဘုရင်သေရတာဟာ သူတို့လုပ်ခဲ့တဲ့ ကံတရားကို သူတို့ ပြန်ခံစားရတာဖြစ်လို့ ဘာမှ ကြီးကြီးကျယ်ကျယ်ခမ်းခမ်းနားနားလုပ်ပေးနေစရာမလိုဘူး လို့ ဆိုကြတယ်။

•                      တစ်ချို့သော ရုရှားတွေကျပြန်တော့လည်း နိကိုးလပ်စ်တို့ဟာ ရုရှားဘုရင်စနစ်မှာ နောက်ဆုံးဖြစ်တယ်။ သူတို့ကို သတ်ပစ်တာဟာ ရုရှားသမိုင်းမှာ ရှက်ဖွယ်ကိစ္စတစ်ခုဖြစ်တယ်။ ဒါတွေကို အဖတ်ပြန်ဆယ်ဖို့အခမ်းအနားနဲ့ သဂြိုလ်သင့်တယ်လို့ဆိုပါသတဲ့........။

•                     ဒီကြားထဲမှာတစ်ခါ နောက်ထပ် အငြင်းပွားစရာတစ်ခု ထပ်ထွက်လာပြန်တယ်။  ရုရှား Orthodox ခရစ်ယာန်ဂိုဏ်းအုပ်က နိကိုးလပ်စ်တို့ မိသားစုကို သူတော်စင် Saint တွေ အဖြစ် သတ်မှတ်ပေးချင်သတဲ့။ ( Saint မှာမှ အမြင့်ဆုံး အာဇာနည် Martyr အဖြစ်သတ်မှတ်ပေးချင်တာ။ အာဇာနည်ဆိုတာ များသောအားဖြင့် ယေရှုကဲ့သို့ ယုံကြည်မှုအတွက် အသက်ပေးရဲသူများကို ဆိုလိုတယ်။ ) ဒါပေမယ့်ဒီအရိုးတွေဟာ နိကိုးလပ်စ်တို့ရဲ့ အရိုးအစစ်ဆိုတာ မယုံတဲ့ အတွက် သဂြိုလ်တဲ့ အခမ်းအနားကို ကမကထ မလုပ်ပေးနိုင်ဘူးလို့ ငြင်းပါတယ်။ ဒါကြောင့် အခမ်းအနားမှာ ဂိုဏ်းအုပ်ကိုယ်တိုင် မတက်ရောက်ဘဲ ၀ါနုတဲ့ ဘုန်းကြီးတွေဘဲ ကြွရောက်လာပါတယ်။  သမ္မတ ဘောရစ် ယဲ့ဆင် Boris Yeltsin က ဂိုဏ်းအုပ်ရဲ့ သဘောကို လေးစားတဲ့ အနေနဲ့ အစပိုင်းမှာ သူလည်း အခမ်းအနားကို မတက်ရောက်ဘူးလို့ ကြေငြာခဲ့တယ်။ တကယ်လုပ်တော့မှ ပေါက်ချလာပါတယ်။ သူဘဲ အညိုးညိုးကွာ ။ ဒီလို သမိုင်းဝင် အခမ်းအနားကို မလာဘဲ နေလို့ မဖြစ်ဘူးလို့ ဆိုတယ်။

•          အဲသလိုနဲ့ တိုင်ပတ် အငြင်းပွားတာတွေ နင်းကန်ဖြစ်ပြီးနောက် ၂၀၀၀ ခုနှစ်မှာ ဂိုဏ်းအုပ်ကိုယ်တိုင် နိကိုးလပ်စ်တို့ မိသားစုကို passion bearers အဖြစ် သတ်မှတ်ပေးလိုက်ပါတယ်။ passion bearer ဆိုတာ သေခြင်းတရားကို ခရစ်တော်ကဲ့သို့ တည်တည်ငြိမ်ငြိမ် ရင်ဆိုင်သွားနိုင်သူများ လို့ အဓိပ္ပါယ်ရတယ်။ အာဇာနည်အဆင့်ထက် နိမ့်ပါတယ်။ အစက အာဇာနည်တွေအဖြစ် သတ်မှတ်ပေးချင်ပေမယ့် များစွာသောရုရှားတွေက '' နိကိုးလပ်စ်တို့ကို အာဇာနည်အဖြစ်သတ်မှတ်ရလောက်အောင် မထိုက်တန်ဘူး ''  လို့ ဆန့်ကျင်ကြလို့ တဆင့်လျော့ပေးလိုက်တာ ဖြစ်တယ်။

 Passion bearers နိကိုးလပ်စ်တို့မိသားစုပုံ

•                     ကဲ...ဒါပါဘဲကွယ်။ ဒီအကြောင်းကို ရေးရတာ တော်တော်လေး ဦးနှောက်စားပါတယ်။ ချဲ့ကားပြီး ရေးထားတဲ့ source တွေ link တွေ အတော်တွေ့ခဲ့တယ်။ You tube မှာလည်း တော်တော် တွေ့ပါတယ်။ You tube မှာတင်ထားတာ တစ်ချို့က မယုံရဘူးဆိုတာ ဒီအကြောင်းရေးမှ ပိုသိ။ ဘာကြောင့်လည်းဆိုတော့ အရိုးစုတွေကို  မတွေ့ခင် ၊ DNA test မလုပ်ခင် ရိုက်ထားခဲ့တဲ့ documentary တွေလည်း တွေ့လို့။ up to date မဖြစ်ဘဲ အန်ဒါဆွန်နဲ့ အန်နာစတေးရှားဟာ အတူတူ ဆိုတဲ့ ပုံမျိုးပေါက်အောင် ပြောထား ရေးထားတာတွေကိုလည်း တွေ့ခဲ့တယ်။

                   ဒီစာကို

Anna Anderson Exposed

Busting the myth of the most infamous royal imposter

http://www.freewebs.com/anna-anderson/index.htm  ဆိုတဲ့ site ကို အခြေပြုပြီး ဆီလျော်အောင် ဘာသာပြန်ထားတယ်။ အတော်ပြည့်စုံပြီး ဘက်မလိုက်ရေးထားတယ်လို့ ထင်လို့ပါ။ အခုဘာသာပြန်ရာမှာတော့ အများကြီး ချုံ့ထားပါတယ်။ ဇာတ်လမ်းတစ်ခုလုံးရယ် ၊ ကြိုးကြောင်းဆီလျော်တဲ့ သုံးသပ်ချက်များအပြင်  DNA သဘောတရားများ၊ ဇာဘုရင့်မိသားစုအရိုးတွေကို DNA စစ်တော့ ထွက်တဲ့ အဖြေများ ကို အဲဒီ link မှာ အသေးစိတ်ပြထားတာရှိတယ်။ ထပ်သိချင်ရင် အဲဒီမှာ သွား ကြည့်ကြပါကုန် ။

ဒီ link အပြင်

http://news.bbc.co.uk/2/hi/133725.stm

http://www.alexanderpalace.org/palace/AlexPalaceNRbio.html

http://www.pbs.org/newshour/bb/europe/july-dec98/romanov_7-17a.html

http://en.wikipedia.org/wiki/Canonization_of_the_Romanovs

http://en.wikipedia.org/wiki/Nicholas_II_of_Russia များကိုလည်း ref  အဖြစ်ယူထားပါသည်။

 

 

Posted in: