မြန်မာပြည်သားများ တရုတ်ပြည် လူသားဈေးကွက်သို့ ရောက်ရှိခြင်း ....................

Essential Moe

၁၉၉၅ ဝန်းကျင်လောက်မှစကာ တရုတ်ပြည်တွင် လူသားများအတွင်း ကလီစာများဖြစ်သော ကျောက်ကပ်၊ အသဲ၊ အဆုပ်၊ နှလုံး၊ မျက်ကြည်လွာများ (cornears) အတော်ကြီးပင် ကျယ်ကျယ်ပြန့်ပြန့် အစားထိုး ကုသမှုများ ပြုလုပ် လာကြသည် ။
တရုတ်ပြည်၏ ဒုတိယ ကျန်းမာရေးဝန်ကြီးဖြစ်သူ ဟွန်ချီဖူက နှစ် ကာလ တော်တော်ကြာစမ်းသပ်ခဲ့ပြီးနောက် ယခုအခါ လုံးလုံးစိတ်ချရသော အခြေနေသို့ ရောက် ရှိအောင်မြင်သွားပြီဟု ရှန်ဟိုင်းဆေးရုံအုပ်ကြီးမှ ၂ဝ၁၂ ကျန်းမာရေးဆိုင်ရာ စီမီနာတခုတွင်
အတိလင်း ထုတ်ဖေါ်ပြောဆိုခဲ့သည်။

တရုတ်ပြည်တွင် လူသားကလီစာများ အစားထိုးကုသရန်ငွေကြေးပြည့်စုံပြီး
စောင့်ဆိုင်းနေသော ဝယ်လိုအား မြင့်တက်လာသည်မှာ လူနာဦးရေ တနှစ်လျင် တသန်းခွဲ နီးပါးမျှဖြစ်လာလေသည်။ ထိုကြောင့် လူသားကလီစာများ အမြန်ရရှိရန် တရုတ်ပြည် တနံတလျားတွင် လူမှောင်ခိုဂိုဏ်းများ တိုးပွားလာတော့သည်။ တရုတ်ပြည်၏ တည်ဆဲ ဥပဒေအရ တရုတ်ပြည်အတွင်း လူမှောင်ခိုးကူးသန်းသည်ကို ကြီးမားသော ရာဇဝတ်မှုအဖြစ် ကြီးမားသောပြစ်ဒဏ်နှင့် သေဒဏ်ထိ ချမှတ်ရန်
ပြဋ္ဌာန်းထားသောကြောင့် တရုတ်ပြည်သားအချင်းချင်း ရောင်းဝယ်ဖောက်ကားရေး
ဖက်သို့ ဦးမလှည့်တော့ဘဲ ဆင်းရဲသော တိုင်းပြည်များဖြစ်သည့် တရုတ်ပြည်နှင့် နယ်ချင်းထိစပ်လျက်ရှိနေကြသော မြန်မာ၊ လာအို၊ ကမ္ဘောဒီးယားတို့သည် တရုတ်ပြည် လူမှောင်ခိုဂိုဏ်များ၏ ပစ်မှတ်ဖြစ်လာရတော့သည်။

တရုတ်ပြည်တွင် ကျောက်ကပ် တခုအား အရောင်းဝယ်လုပ်ရာတွင် အမေရိကန် ဒေါ်လာ ၃၅ဝဝ မှ ၅၅ဝဝ ထိဈေးပေါက်ကြောင်း (Xinhua News Agency) ဆင်ဟွာ သတင်းက တရားဝင်တင်ပြသွားရာ မတ်လ ၂၅ ရက် ၂ဝ၁၂ ခုနှစ် သတင်းစာက လူမှောင်ခိုဂိုဏ်းသားများအတွက် သတင်းကောင်းဈေးနှုန်း ဖြစ်ခဲ့သည်။ လူသား နှလုံးသားတခုသည် အမေရိကန်ဒေါ်လာ ၁၅ဝဝဝ ထိ ပေါက်ပြီး၊ မျက်ကြည်လွှာသည် အမေရိကန်ဒေါ်လာ ၄ဝဝဝ မှ ၆ဝဝဝ ထိ ဈေးရပြီး သန့်ရှင်းသော အဆုတ် အတွက် ဒေါ်လာ ၂ဝဝဝဝ ထိပေါက်ကြောင်း သိရသည်။

ယခု မြန်မာပြည်ထဲတွင် အသက် ၇ နှစ်မှ အသက် ၃ဝ အောက်ရှိသော လူပျောက်မှုဖြင့် ဒေသဆိုင်ရာ ရဲစခန်းနှင့် အာဏာပိုင်များအား တိုင်ကြားထားသော အမှုပေါင်း ၃၆၂ဝ ခန့်ရှိပြီဟု ပြည်ထဲရေးနှင့် ပတ်သက်သော ဌာနတခုက လက်သိပ်ထိုး ပြောဆိုထားသည်။လူကုန်ကူးမှု တိုက်ဖျက်ရေးနှင့်ပတ်သက်သော ထင်သာမြင်သာအောင် မြန်မာအစိုးရသတင်းစာများက ၂ဝ၁၁ ခုမှ စတင်ဆောင်ရွက်လာသော်လည်း ပူးပေါင်းဆောင်ရွက်မှု တာဝန်ပေးအပ်မှု တာဝန်ခံရမှုများသည် တိတိကျကျ မရှိ ကြောင်း တွေ့ရှိရသည်။

မြန်မာပြည်သားများအဖို့ ကျားကြောက်လို့ ရှင်ကြီးကိုး ရှင်ကြီးကျားထက်ဆိုးသော အဖြစ်များမှာ မိမိ၏မိသားစုမှ တဦးဦးပျောက်ဆုံးကြောင်း သွားရောက်တိုင်ကြားလျှင် တိုင်ကြားသူများကိုပင် ကြောက်ရွံ့အောင် အမျိုးမျိုး ပြောဆိုမေးမြန်းနေသော ရဲစခန်းများမှ ရဲဝန်ထမ်းများ၏ စရိုက်က ပိုပြီး ကြောက်မက် ဖွယ်ရာ ကောင်းနေသည့်အပြင် အဆိုပါ ရဲဝန်ထမ်းများအား မိမိ၏ အပူသောကများအကြားမှ ထိထိရောက်ရောက် ဆောင်ရွက်ပေးရန် ထပ်မံ ပိုက်ဆံများပေးနေကြရသည်။ ထိုကဲ့သို့ အမျိုးသားရေးအမြင်၊ လုံခြုံရေးအမြင်နှင့် ဥပဒေ အကာကွယ် အားနည်းမှုများကြောင့် မြန်ပြည်မှ လူသားအညွှန့် အဖူးလေးများသည် ကလီစာထုတ်ခံရသော နေရာများသို့ ပုံစံမျိုးစုံ အကြောင်းပေါင်းစုံဖြင့် အကြီးအကျယ်ရောက်ရှိကာ လူမှောင်ခိုဂိုဏ်းသားများ၏ ရောင်းဝယ်ဖောက်ကားခံရသော ဘဝသို့ နေ့စဉ်သက်ဆင်းနေကြရမည် ဖြစ်ပါကြောင်း….. ။

Credit by နေ့သစ်

Posted in: လူကုန်ကူးမူ