မေ ၁၁ သတင်းများ မိုးမခက စုစည်းသည်

 

 

အစိုးရ တပ်စခန်းတခု KIA သိမ်း၊ ရင်းမှူး အပါအဝင် ခြောက်ဦး ကျဟုဆို

ဖနိဒါ | သောကြာနေ့၊ မေလ ၁၁ မဇ္စျိမ

ချင်းမိုင်(မဇ္စျိမ) ။ ။ ကချင်ပြည်နယ် မြောက်ပိုင်း ဆွမ်ပရာဘွမ်မြို့နယ်၊ ခဂရန်းယန် ကျေးရွာတွင် တပ်စွဲထားသော မြန်မာအစိုးရ၏ တပ်စခန်းတခုအား ကချင် လွတ်လပ်ရေးတပ် KIA က သိမ်းပိုက်လိုက်ကြောင်း သိရသည်။

အစိုးရ၏ ခလရ ၁၃၈ လက်အောက်ခံ အဆိုပါတပ်စခန်းကို KIO တပ်မဟာ ၁ လက်အောက်ခံ တပ်ဖွဲ့များက ကြာသပတေးနေ့တွင် တိုက်ခိုက်သိမ်းယူလိုက်ခြင်းဖြစ်ပြီး တိုက်ပွဲတွင် အစိုးရတပ်မှ တပ်ရင်းမှူး အပါအဝင် ခြောက်ဦး ကျဆုံးခဲ့သည်ဟု KIA ရှေ့တန်းသတင်းရပ်ကွက်က ပြောသည်။

“မနေ့ညနေ ၅ နာရီကျော်လောက်မှာ အစိုးရဲ့ စခန်းတခုကို သွားတိုက်တာ သူတို့ဘက် ခြောက်ယောက် သေတယ်။ ကျနော်တို့ဘက်က တယောက် ဒဏ်ရာရတယ်။ ခု အဲဒီကို ကျနော်တို့တပ်ဖွဲ့တွေ နေရာယူထားတယ်” ဟု KIA ရဲဘော်တဦးက မဇ္စျိမကို ပြောသည်။

အစိုးရဘက်မှ ကျဆုံးသူ ခြောက်ဦးတွင် ခလရ ၁၃၈ တပ်ရင်းမှူး ဗိုလ်မှူး အေးကိုဦးနှင့် တပ်ကြပ်တဦး ပါဝင်ပြီး KIA ဘက်မှ တဦး ဒဏ်ရာသည်ဟု KIA ရှေ့တန်းသတင်းက ဆိုသော်လည်း မဇ္ဈိမက သီးခြားအတည်ပြုချက် မရယူနိုင်သေးပေ။

သို့သော် နေပြည်တော်ရှိ အစိုးရနှင့် နီးစပ်သူတဦးအဆိုအရ အစိုးရတပ် အင်အား ၃၅ ဦး ရှိရာ ထိုတပ်စခန်းအား KIA ဘက်မှ အင်အား ၁ဝဝ ခန့်က တိုက်ခိုက်ခဲ့ရာ အင်အားမမျှ၍ အစိုးရဘက်မှ ၆ ဦးသေဆုံးက ၈ ဦး ပျောက်ဆုံးနေ သည်ဟု သိရသည်။ အနီးရှိ လှုပ်ရှား တပ်မတော် စစ်ကြောင်းများက လိုက်လံ ရှင်းလင်းလျက်ရှိကြောင်း သူက ဆိုသည်။

ထိုတိုက်ပွဲမှ ၆ဝ မမ တလက်နှင့် ၎င်းဗုံးသီး ၆ လုံး၊ MA 4 စက်လက် ၁၈ လက်နှင့် ၎င်းကျည် ၂ဝ တောင့်၊ MA ကျည် ၁,ဝဝဝ၊ ဗုံးသီး ၁ဝ လုံး၊ သေနတ်တို ၁ လက်၊ စစ်ဝတ်စုံ၊ ကုလားပဲ ၉ အိတ်၊ ဆားအိတ် ၆ အိတ်၊ ဆန် တပေပါနှင့် အိတ် ၁ဝဝ တို့ KIA မှ သိမ်းဆည်းရမိသည်ဟု KIA ရှေ့တန်းသတင်းက ဆိုသည်။

ဆုတ်ခွါသွားသည့် အစိုးရတပ်ဖွဲ့များမှာ မေလ ၅ ရက်နေ့က ဆွမ်ပရာဘွမ်မြို့ရှိ KIO ၏ ဆက်ဆံရေး ရုံးအား မီးရှို့ ဖျက်ဆီးခဲ့သည့် တပ်ဖွဲ့များဖြစ်သည်ဟု KIA ၏ ရဲဘော်တဦးက စွပ်စွဲပြောဆိုသည်။

မေလ ၈ ရက်နေ့က ဗန်းမော်မြို့နယ် ဒေါ့ဖုန်းယန် မြို့နယ်ခွဲအတွင်းရှိ KIO ၏ တပ်မဟာ ၅ လက်အောက် တပ်ရင်း ၁၉ တပ်စခန်းကို အစိုးရစစ်တပ်ဖွဲ့က သိမ်းယူလိုက်သည်။ KIA တပ်ဖွဲ့က ပြန်လည်သိမ်းယူရန် သွားရောက် တိုက်ခိုက်စဉ် KIA တပ်သားတဦး ကျဆုံးခဲ့သည်ဟု KIA ဌာနချုပ် အရာရှိတဦးက မဇ္ဈိမကို ပြောသည်။

KIO နှင့် အစိုးရအကြား အပစ်အခတ် ရပ်စဲရေး သုံးကြိမ်တိုင် ဆွေးနွေးခဲ့သော်လည်း သဘောတူညီမှု မရသေးဘဲ တိုက်ပွဲများ ဆက်လက် ဖြစ်ပွားခဲ့ရာ မေလ ၈ ရက်နေ့ထိ တိုက်ပွဲပေါင်း ၁,၃ဝဝ ကြိမ် ဖြစ်ပွားခဲ့သည်။

သမ္မတ ဦးသိန်းစိန် ဦးဆောင်သော ပြည်ထောင်စု ငြိမ်းချမ်းရေး ဖော်ဆောင်ရေးအဖွဲ့သစ်ကို ဖွဲ့စည်းခဲ့သော်လည်း ယနေ့ထိ မည်သည့် တိုင်းရင်းသား လက်နက်ကိုင် အဖွဲ့အစည်းနှင့်မျှ ပြန်လည် တွေ့ဆုံခြင်း မရှိသေးပေ။

ပြုပြင်ပြောင်းလဲရေး ဒုတိယအဆင့် မဟာဗျူဟာ သမ္မတ ညွှန်ကြား

မျိုးသန့် | သောကြာနေ့၊ မေလ ၁၁ မဇ္စျိမ

ချင်းမိုင် (မဇ္ဈိမ) ။ ။ ပြည်သူဗဟိုပြု ဖွံ့ဖြိုးရေးအတွက် ဒုတိယအဆင့် မဟာဗျူဟာ ရေးဆွဲကာ ပြုပြင်ပြောင်းလဲမှုများ လုပ်သွားရန် သောကြာနေ့နံနက် နိုင်ငံတော် သမ္မတရုံးတွင် ပြုလုပ်သည့် လုပ်ငန်းညှိနှိုင်းအစည်းအဝေးတွင် သမ္မတ ဦးသိန်းစိန်က လမ်းညွှန် မှာကြားသွားသည်ဟု သမ္မတရုံး၏ အင်တာနက် စာမျက်နှာတွင် ဖေါ်ပြထားသည်။

“အုပ်ချုပ်မှုဆိုင်ရာ စီမံခန့်ခွဲလုပ်ဆောင်ရာတွင် ရှေးကနှင့်မတူဘဲ စိတ်ဓါတ်အရ၊ လူမှုဆက်ဆံရေးအရ ပြည်သူ့အကျိုး စီးပွားအတွက် ပြည်သူများကို မိမိတို့မိဘသဖွယ် တိုးတက်အောင် ကူညီစောင့်ရှောက်ရေးနှင့် ပြည်သူ မလိုလားသော လာဘ်ပေးလာဘ်ယူမှုများ၊ အဂတိ လိုက်စားမှုများ၊ ဆက်ဆံရေး မပြေပြစ်မှုများကို ရှောင်ရှားကြရေးအတွက် အဓိက္က ဦးစားပေး ပြောင်းလဲလာအောင် ကြပ်မတ်ကြိုးပမ်း ဆောင်ရွက်သွားကြစေလိုကြောင်း” ဟု ဦးသိန်းစိန်က ညွှန်ကြား သွားသည်။

ဖွံ့ဖြိုးရေး လုပ်ငန်းများအတွက် လိုအပ်သည့် ငွေကြေး၊ နည်းပညာ၊ လူ့စွမ်းအား အရင်းအမြစ်တို့ကိုလည်း နိုင်ငံ၏ ဘဏ္ဍာငွေ တခုတည်းအပေါ် မှီခိုလုပ်ဆောင်ခဲ့ရာမှ နိုင်ငံတကာအကူအညီများ ရရှိရေးအတွက် ပြုပြင်ပြောင်းလဲမှုများ ပြုလုပ်သွားရန် လိုအပ်သည်ဟုလည်း သမ္မတက ပြောကြားသွားသည်။

“မြန်မာနိုင်ငံ လူမှုစီးပွားရေး အကြံပေးကောင်စီ ဖွဲ့စည်းပြီး ဆောင်ရွက်သွားမည်ဖြစ်ရာ ပုဂ္ဂလိက လူမှုရေး၊ စီးပွားရေး အသင်းအဖွဲ့များက နိုင်ငံတော် ပြုပြင်ပြောင်းလဲမှုတွင် ပြည်သူတရပ်လုံး ပူးပေါင်းပါဝင် ဆောင်ရွက်လာအောင် ကြိုးပမ်းရမည်” ဟု ညွှန်ကြားထားသည်။

ပြည်ပရောက် မြန်မာ ပညာရှင်များ၊ ဘာသာရပ် ကျွမ်းကျင်သူများ၊ စီးပွားရေး လုပ်ငန်းရှင်များသာမက အလုပ်မျိုးစုံ သွားရောက်လုပ်ကိုင်နေကြသူများ ပြန်လာရေးနှင့် စီးပွားရေး အလုပ်အကိုင်များ ပြန်လည် လုပ်ကိုင်နိုင်ရေးအတွက် အခက်အခဲများ တင်ပြလာလျှင် နိုင်ငံတော်က စီစဉ်ဆောင်ရွက်ပေးသွားမည် ဖြစ်ကြောင်း သမ္မတ က ပြောသည်။

ပြည်ထောင်စု ငြိမ်းချမ်းရေး ဖေါ်ဆောင်ရေး ဗဟိုကော်မတီ ဥက္ကဋ္ဌဖြစ်သူ သမ္မတ ဦးသိန်းစိန်က “ငြိမ်းချမ်းရေး ဆွေးနွေးသဘောတူပြီးသော တိုင်းရင်းသား အဖွဲ့အစည်းများ၏ အလုပ်အကိုင် အခွင့်အလမ်း ရရှိရေးအတွက် စိုက်ပျိုးရေး၊ မွေးမြူရေးနှင့် လူ့စွမ်းအား အရင်းအဖြစ် ဖွံ့ဖြိုးရေးလုပ်ငန်းများကို ဝိုင်းဝန်းကူညီ ဆောင်ရွက်ပေးကြရန်” ပြောဆိုသွားသည်။

သောကြာနေ့ မနက် အစည်းအဝေးသို့ ဒု-သမ္မတ ဒေါက်တာစိုင်းမောက်ခမ်း၊ ပြည်သူ့လွှတ်တော် ဒု-ဥက္ကဋ္ဌ ဦးနန္ဒကျော်စွာ၊ ပြည်ထောင်စု ဝန်ကြီးများ၊ တိုင်းဒေသကြီးနှင့် ပြည်နယ် ဝန်ကြီးချုပ်များ၊ ကိုယ်ပိုင် အုပ်ချုပ်ခွင့်ရ တိုင်း/ဒေသ ဥက္ကဋ္ဌများ တက်ရောက်ခဲ့ကြသည်။

ကျန်းမာရေး အကြောင်းပြချက်ဖြင့် ရာထူးမှ နှုတ်ထွက်သွားသည်ဟု သတင်းများ ထွက်ပေါ်နေသည့် ဒု-သမ္မတ သီဟသူရဦးတင်အောင်မြင့်ဦးမှာ သောကြာနေ့ အစည်းအဝေးသို့ တက်ရောက်လာခြင်း မရှိပေ။

အမျိုးသားလွှတ်တော် ဥက္ကဋ္ဌ ဦးခင်အာင်မြင့်နှင့် ဒုတိယဥက္ကဋ္ဌ ဦးမြငြိမ်းတို့မှာ မေလ ၅ ရက်နေ့မှစ၍ ဂျပန်နိုင်ငံသို့ ချစ်ကြည်ရေးခရီး သွားရောက်လျက်ရှိသည်။ ပြည်သူ့လွှတ်တော် ဥက္ကဋ္ဌ သူရဦးရွှေမန်းမှာလည်း မေလ ၆ ရက်နေ့မှစ၍ ဥရောပ နိုင်ငံများသို့ ချစ်ကြည်ရေးခရီး ထွက်လျက်ရှိသည်။

ရွှေနံ့သာမြေပေါ် စီမံကိန်း ဆိုင်းငံ့၊ လယ်မလုပ်ရ တားမြစ်ထား

မဇ္ဈိမသတင်းဌာန | ကြာသပတေးနေ့၊ မေလ ၁၀ မဇ္စျိမ

ရန်ကုန် (မဇ္ဈိမ) ။ ။ စက်မှုဇုန် စီမံကိန်းအတွက် သိမ်းယူထားခြင်းခံရသည့် ရွှေနံ့သာ ကျေးရွာအုပ်စုရှိ လယ်မြေများပေါ်တွင် စီမံကိန်း ဆိုင်းငံ့ရန်နှင့် ယခုနှစ်အတွက် ထွန်ယက် စိုက်ပျိုးခြင်း မပြုလုပ်ရန် သက်ဆိုင်ရာမှ တားဆီးထားကြောင်း မင်္ဂလာဒုံမြို့နယ် အုပ်ချုပ်ရေးမှူး ဦးငြိမ်းထွေး က ပြောသည်။

မေလ ၉ ရက်နေ့တွင် မြိ့နယ် အထွေထွေ အုပ်ချုပ်ရေးမှူးရုံးမှ ထုတ်ပြန်လိုက်ခြင်း ဖြစ်သည်။

“သက်ဆိုင်ရာက စက်မှုဇုန်အတွက် စီမံကိန်းဆောင်ရွက်မှုကိုလည်း ရပ်ဆိုင်းထားပါတယ်။ ထွန်ယက် စိုက်ပျိုးတဲ့ လုပ်ငန်းတွေကတော့ ၂ဝ၁၂ ခုနှစ် လယ်ယာမြေ လုပ်ကိုင်ခွင့် သီးစားခွင့်ပြုချက် တင်ပြဆဲကာလအတွင်းမှာမို့ တားမြစ် ထားရတာပါ” ဟု ဦးငြိမ်းထွေးက ပြောသည်။

တောင်သူများက မိမိတို့၏ လယ်မြေများတွင် စိုက်ပျိုးရေး လုပ်ငန်း စတင်ရန်အတွက် ကြာသပတေး နံနက် ၁ဝ နာရီခန့်တွင် ကြိုးပမ်းခဲ့သော်လည်း ကျေးရွာနှင့် မြို့နယ်အုပ်ချုပ်ရေးမှူးရုံးမှ လာရောက်တားမြစ်ခြင်းဖြစ်ကြောင်း သိရသည်။

“ကုမ္ပဏီကလည်း စက်ယန္တရားတွေ ဆောင်ရွက်နေတုန်းပဲ။ ဒီနေ့မနက် ကျနော်တို့ လယ်ထွန်မယ်လို့ ပြောပြီး လယ်ထွန်စက် နှစ်စီး ရောက်လာတော့ မြို့နယ်အုပ်ချုပ်ရေးမှူး ကျေးရွာ အုပ်ချုပ်ရေးမှူးတွေ ရောက်လာပြီးတော့ တားတယ်။ သူတို့ကိုလည်း ရောက်လာမှ ဆက်မလုပ် ဖို့တားတယ်” ဟု ဒေသခံ တောင်သူတဦးက ပြောသည်။

စက်မှုဇုန် ၄ အဖြစ် အဆိုပါ လယ်မြေများကို မြေညှိရန်အတွက် ဇေကမ္ဘာကုမ္ပဏီမှ စက်ယန္တရားများ အသုံးပြုဆောင်ရွက်နေလျက်ရှိသော်လည်း စီမံကိန်း ဆောင်ရွက်မှုများကိုပါ ရပ်ဆိုင်းထားရန် ညွှန်ကြားထားသည်။

စက်မှုဇုန် အကောင်အထည်မဖော်မီ လယ်သမားများအနေနှင့် လုပ်ပိုင်ခွင့် ရှိသင့်ကြောင်း ရွှေနံ့သာ မြေယာအရေးတွင် လိုက်ပါဆောင်ရွက်နေသူ ဦးနေမျိုးဝေ က ပြောသည်။

“ဒီနေရာက စက်မှုဇုန် အကောင်အထည်ဖော်တဲ့ နေရာလို့ပြောပေမယ့် လမ်းနဲ့ မီးတိုင်တွေပဲ ရှိသေးတယ်။ ဘာမှ အကောင်အထည် မပေါ်သေးဘူး။ လယ်သမားတွေအတွက် နစ်နာမှုတွေနဲ့ ကိုယ့်မြေကိုယ် ရရှိရေးအတွက် လိုအပ်ပါတယ်” ဟု နေမျိုးဝေက ပြောသည်။

သို့သော် နှစ်ဘက်လုံးအား သက်ဆိုင်ရာက တားမြစ်ထားစဉ်တွင် ကုမ္ပဏီမှ မေလ ၉ ရက်နေ့ထိ စက်ယန္တရားကြီးများနဲ့ စီမံကိန်းဆောင်ရွက်လျက်ရှိပြီး တားမြစ်ချက်ကို ချိုးဖောက်လျက်ရှိသည်ဟု ဆိုသည်။

ဇေကမ္ဘာကုမ္ပဏီသည် မင်္ဂလာဒုံမြို့နယ်၊ ပုလဲမြို့သစ် ရွှေနံ့သာနှင့် ပေါင်းကူရွာတို့မှ လယ်ဧက ၈ဝဝ ကျော်ကို စက်မှုဇုန် စီမံကိန်းအတွက် ၂ဝ၁ဝ ခုနှစ်အတွင်း သိမ်းယူခဲ့ပြီး ကွန်ကရစ်လမ်းများ၊ လမ်းမီးတိုင်များ ဆောက်လုပ်နေပြီး လျှပ်စစ် မီးကြိုးများလည်း သွယ်တန်းလျက် ရှိနေသည်။

အဆိုပါ လယ်မြေများပေါ်တွင် အဆောက်အဦများ မဆောက်လုပ်မီအထိ လယ်ယာ စိုက်ပျိုးခွင့်ရှိကြောင်း လယ်သမားများနှင့် ဇေကမ္ဘာကုမ္ပဏီတို့ သဘောတူညီထားခဲ့သည်။

တဧကလျှင် ကျပ်သုံးသိန်းနှုန်းဖြင့် လယ်မြေ သိမ်းယူစဉ်က ဇေကမ္ဘာကုမ္ပဏီမှ နစ်နာကြေး ပေးခဲ့သော်လည်း လယ်သမားများဘက်မှ အဆိုပါ နစ်နာကြေးသည် နည်းလွန်းသည်ဟုဆိုကာ တိုးမြှင့်ပေးရန် တောင်းဆိုထားပြီး ကုမ္ပဏီနှင့် လယ်သမားတို့အကြား ယခုတိုင် ပြေလည်မှု မရရှိသေးပေ။

ပထမဆုံးသော ပါတီညီလာခံ NLD ကျင်းပရန် စီစဉ်

မျိုးသန့် | ဗုဒ္ဓဟူးနေ့၊ မေလ ၀၉

ချင်းမိုင် (မဇ္ဈိမ) ။ ။ ၁၉၈၈ ခုနှစ် ပါတီ စတင် တည်ထောင်စဉ် ကတည်းက ပါတီညီလာခံ ကျင်းပနိုင်ခြင်း မရှိခဲ့သော အမျိုးသား ဒီမိုကရေစီအဖွဲ့ချုပ် NLD သည် ယခုနှစ်ကုန်ပိုင်းတွင် ပထမဆုံးညီလာခံ ကျင်းပကာ ပြန်လည် ဖွဲ့စည်းသွားမည်ဟု ပါတီ ပြောခွင့်ရ ဦးအုန်းကြိုင်က မဇ္ဈိမကို ပြောသည်။

“ပါတီညီလာခံအနေနဲ့ကတော့ ဒါ ပထမဆုံးအကြိမ်ပါပဲ။ ကျနော်တို့ အဖွဲ့ချုပ်ကို ရပ်ကွက်အဆင့်၊ ကျေးရွာအုပ်စုအဆင့်၊ မြို့နယ် အဆင့်၊ ခရိုင်အဆင့်၊ တိုင်းနဲ့ပြည်နယ်အဆင့် အားလုံး ဒီမိုကရေစီနည်းကျ ဗဟိုအဆင့်အထိ ဖွဲ့စည်းဖို့အတွက် ညီလာခံတွေ လုပ်မှာ ဖြစ်ပါတယ်။ ခြုံပြောရရင်တော့ စစ်မှန်တဲ့ ဒီမိုကရေစီနိုင်ငံကို ထူထောင်ဖို့ ရည်ရွယ်တဲ့ အဖွဲ့ချုပ် ကိုယ်တိုင် ဒီမိုကရေစီနည်းကျ ဖွဲ့စည်းတာမျိုး လူကြီးတွေ ဆန္ဒရှိပါတယ်” ဟု ပြောသည်။

အဆင့်ဆင့်သော ညီလာခံများပြီးနောက် ဗဟိုညီလာခံကို ဒီဇင်ဘာလ နောက်ဆုံးပတ်တွင် ကျင်းပနိုင်ရန် ပြင်ဆင်လျက် ရှိသည်ဟုလည်း ဦးအုန်းကြိုင်က ပြောသည်။

NLD ပါတီသည် ၁၉၈၉ ခုနှစ် ဧပြီလတွင် ဗဟိုညီလာခံ ကျင်းပနိုင်ရန် ပြင်ဆင်ခဲ့သော်လည်း နဝတ အစိုးရ၏ ဖိနှိပ်မှုများကြောင့် ပါတီညီလာခံ ကျင်းပနိုင်ခဲ့ခြင်း မရှိဟု ဦးအုန်းကြိုင်က ဆိုသည်။

“အဲဒီမှာ အဖွဲ့ချုပ်က လူကြီးတွေနဲ့ အဖွဲ့ချုပ်လည်း ဖြိုခွင်းခံရပြီးတော့ ပြောရရင်တော့ တိုက်ပွဲထဲ ရောက်သွားပြီးတော့ ညီလာခံတွေ ရပ်ထားခဲ့ရပါတယ်။ ဥက္ကဋ္ဌနဲ့ အထွေထွေ အတွင်းရေးမှူး ဒေါ်အောင်ဆန်းစုကြည်တို့ တားမြစ်ခံဘဝမှာပဲ အဖွဲ့ချုပ်ကို မပြိုမကွဲ ဆက်လက် ရပ်တည်သွားနိုင်အောင် ကျနော်တို့ အချိန်ပေးခဲ့ရပါတယ်။ အဲဒါကြောင့် ညီလာခံ အထမမြောက်ခဲ့ဘူး” ဟု ဦးအုန်းကြိုင်က မဇ္ဈိမကို ပြောသည်။

NLD သည် ၂ဝ၁ဝ ခုနှစ် နိုင်ငံရေးပါတီများ မှတ်ပုံတင်ခြင်း ဥပဒေအရ ပြန်လည် မှတ်ပုံတင်ခြင်း မရှိခဲ့သည့် အတွက် အလိုအလျောက် တရားမဝင် ဖြစ်ခဲ့ရကာ ထိုနှစ်ရွေးကောက်ပွဲကိုလည်း သပိတ်မှောက်ခဲ့သည်။ ထို့နောက် ပါတီ မှတ်ပုံတင် ဥပဒေပါ စာသားတချို့အား ပြုပြင်လိုက်ပြီးနောက် ၂ဝ၁၁ ခုနှစ် နိုဝင်ဘာ ၂၄ ရက်နေ့တွင် ပြန်လည် မှတ်ပုံပြန်တင်ခဲ့သည်။

ယင်းနောက် ပါတီခေါင်းဆောင်ပိုင်း ပြောင်းလဲမှုများ ပြုလုပ်လာပြီး ပါတီ စတင် တည်ထောင်စဉ်ကတည်းက အထွေထွေ အတွင်းရေးမှူ တာဝန်ယူခဲ့သူ ဒေါ်အောင်ဆန်းစုကြည်သည် ပါတီဥက္ကဋ္ဌ တာဝန်ကို ပြောင်းလဲယူခဲ့ပြီး ပါတီဒုဥက္ကဋ္ဌဖြစ်သူ ဦးတင်ဦးမှာ ပါတီနာယက ဖြစ်လာခဲ့သည်။

ပါတီဝင်အားလုံးကိုလည်း လျှောက်လွှာ ပြန်တင်စေခဲ့ခြင်းဖြင့် ပါတီ ဖွဲ့စည်းမှုများ ပြုပြင်ခဲ့သည်။

ယခုအချိန်တွင် ပါတီဝင် လျှောက်လွှာ ခြောက်သိန်းခွဲကို ဖြန့်ဝေထားပြီး မေလကုန်တွင် ပါတီဝင် လျှောက်လွှာအားလုံး အဖွဲ့ချုပ်ဗဟိုသို့ ပေးပို့ရန်လည်းနှိုးဆော်ထားသည်။

၂ဝ၁ဝ ခုနှစ်အတွင်း NLD မှခွဲထွက်၍ ပါတီသစ်ထောင်ကာ ရွေးကောက်ပွဲဝင်ခဲ့ကြပြီးနောက် ယခုတဖန် NLD သို့ ပြန်လည်ဝင်ရောက်ရန် လျှောက်ထားမှုများနှင့်ပတ်သက်၍လည်း ညီလာခံမှ ဆုံးဖြတ်ပေးမည်ဟု ဦးအုန်းကြိုင်က ပြော သည်။

“ကျနော်တို့ ဖြတ်သန်းခဲ့တဲ့ ခရီးရှည်ကြီး တလျှောက်မှာ ကျနော်တို့ ပါတီဝင်တချို့မှာ ပါတီ စည်းမျဉ်းစည်းကမ်းပိုင်း ဆိုင်ရာအရ တချို့အချက်တွေ ငြိစွန်းနေတာတွေ ရှိပါတယ်။ အများဆန္ဒနဲ့ ဆုံးဖြတ်ချက်ကို မလိုက်နာခဲ့တာမျိုးပေါ့။ ဒီပါတီ ညီလာခံဟာ ကျနော်တို့ ပါတီရဲ့ ရေးရာအားလုံးကို ကောင်းကျိုးဆိုးကျိုးကို ဆုံးဖြတ်ပေးနိုင်တဲ့ တခုတည်းသော အာဏာပိုင် အဖွဲ့အစည်းပဲ ဆိုပြီးတော့ အဲဒီပုဂ္ဂိုလ်တွေရဲ့ ဆောင်ရွက်ခဲ့မှုကိုလည်းပဲ ညီလာခံကို တင်ပြပြီးတော့ ဆုံးဖြတ်မှာပါ” ဟု မဇ္ဈိမကို ပြောသည်။

ညီလာခံ ကျင်းပနိုင်ရေး ဗဟိုကော်မရှင်ကိုလည်း အဖွဲ့ဝင် ၉ ဦးဖြင့် ဗုဒ္ဓဟူးနေ့တွင် ဖွဲ့စည်းလိုက်ပြီး ဥက္ကဋ္ဌအဖြစ် ဦးတင်ဦး က တာဝန်ယူ၍ ဦးဉာဏ်ဝင်းက အတွင်းရေးမှူးအဖြစ် တာဝန်ယူထားသည်။

ဧပြီလ ၁ ရက်နေ့ ကြားဖြတ်ရွေးကောက်ပွဲတွင် NLD သို့ မဲမပေးနိုင်အောင် မဲဆန္ဒပြားများတွင် ဖယောင်းသုတ်မှုများ ရှိခဲ့ကြောင်း တိုင်ကြားခဲ့သော်လည်း ရွေးကောက်ပွဲ ကော်မရှင်က အဆိုပါ ဖြစ်စဉ်မျိုး မရှိခဲ့ဟု ဗုဒ္ဓဟူးနေ့တွင် ထုတ်ပြန် ကြေညာခဲ့သည်။

“သတင်းအခြေအမြစ် မရှိသည့် တဆင့်ကြားစကား၊ ထင်မြင်ချက် စကားများဖြင့် ကော်မရှင်သို့ တိုင်ကြားခြင်း ဖြစ်ကြောင်း” ဟု နိုင်ငံပိုင် သတင်းစာများမှတဆင့် ထုတ်ပြန်သည်။

NLD ၏ တိုင်ကြားမှုသည် ပြည်သူများကို ထင်ယောင်ထင်မှား ဖြစ်စေပြီး ယင်းသို့ ထုတ်ဖေါ်ရေးသား ပြောဆိုခြင်း မပြုရန်တွက် ပါတီအတွင်းရေးမှူးအား လိုအပ်ပါက အရေးယူနိုင်ရန် အသိပေး ပြောကြားပြီးဖြစ်သည်ဟုလည်း ထုတ်ပြန်ချက်တွင်ဖေါ်ပြသည်။

ကော်မရှင်၏ ထုတ်ပြန်ချက်နှင့်ပတ်သက်၍ “အဲဒီကိစ္စနဲ့ ပတ်သက်လို့တော့ ဗဟိုအလုပ်အမှုဆောင်အဖွဲ့က သီးသန့် ဆုံးဖြတ်ချက် မရှိသေးဘူးဗျ။ ဥပဒေရေးရာအဖွဲ့နဲ့ တိုင်ပင်ရပါဦးမယ်။ ဘယ်လို ဆုံးဖြတ်မယ်ဆိုတာကို၊ အဆုံးအဖြတ် တခုခုတော့ မပေးသေးဘူး” ဟု ဦးအုန်းကြိုင်က မဇ္ဈိမကို ပြောဆိုသွားသည်။

သံတွဲကမ်းခြေ အများပိုင်မြေကွက် ပိုင်ဆိုင်မှုအပေါ် သမ္မတထံ တိုင်ကြား

နေမျိုး | ကြာသပတေးနေ့၊ မေလ ၁၀ မဇ္စျိမ

နယူးဒေလီ (မဇ္ဈိမ) ။ ။ ရခိုင်ပြည်နယ်၊ သံတွဲကမ်းခြေရှိ အများပြည်သူပိုင် အပန်းဖြေနေရာအား တိုင်းမှုးဟောင်း ကတော်တဦးက ပိုင်ဆိုင်ကြောင်း ပြောဆိုလာသဖြ င့် ဒေသခံများက မကျေနပ်၍ သမ္မတဦးသိန်းစိန်ထံ ကန့်ကွက်လွှာပေးပို့ခဲ့ကြောင်း သိရသည်။

နပခ တိုင်းမှုးဟောင်း ဗိုလ်ချုပ်သောင်းအေး၏ ဇနီးဖြစ်သူ ဒေါ်သင်းမျိုးမျိုးအောင် က မြေနေရာ ၄၇၅ ပေ အကျယ်အဝန်း ရှိ ပင်လယ်ကမ်းခြေ မြေကွက်အား သူမ၏ အမည်ပေါက်ဖြင့် ပိုင်ဆိုင်ကြောင်း မြို့နယ်အထွေထွေ အုပ်ချုပ်ရေးမှုး ဦးအောင်မြတ်ကျော် မှတဆင့် ခေါ်ယူပြောဆိုလာမှုအား ဒေသခံများက ကန့်ကွက်ကြခြင်း ဖြစ်သည်။

သံတွဲမြို့နယ်၊ မြဇင်ကျေးရွာအုပ်စု၊ လင်းသာကျေးရွာအုပ်စုတို့မှ ရွာသား ၆၅ ဦးက ကန့်ကွက်ကြခြင်း ဖြစ်သည်။

“မေ ၉ ရက်နေ့က ကန့်ကွက်စာကို အမြန်ချောပို့စနစ်နဲ့ သမ္မတကြီးဆီ ပို့ထားပါတယ်။ အဲဒီမြေကွက်ကို ဒေါ်သင်းမျိုးမျိုးအောင်က အပိုင်ယူတာကြောင့် ကန့်ကွက်ရတာဗျ။ ဒေသခံပြည်သူတွေရဲ့ အများပြည်သူပိုင် နေရာ အမှန်ပါဗျာ။ ရပ်ကွက် ကျေးရွာအုပ်စု အုပ်ချုပ်ရေးမှုးတွေလည်း ကျနော်တို့ဘက်မှာ ပါပါတယ်ဗျ” ဟု လင်းသာရွာမှ ဦးဝဏ္ဏ က မဇ္စျိမကို ပြောသည်။

မြေကွက်မှာ ကျေးရွာအုပ်စုနှစ်ခုအကြား ကမ်းခြေစပ် ၄၇၅ ပေအရှည် ကမ်းပါးစောင်းဘေး ကပ်လျက်တွင် တည်ရှိပြီး ဒေသခံအချို့မှာ လာရောက် အပန်းဖြေသူများအပေါ် အားထားကာ ထိုမြေကွက်တွင် ဈေးရောင်းချခြင်းဖြင့် အသက်မွေးကြကြောင်း သိရသည်။

အဆိုပါ မြေကွက်ဘေး ပတ်လည်တွင် ဟိုတယ် အမြောက်အများရှိသော်လည်း ပင်လယ်ကမ်းခြေသို့ လာရောက် လည်ပတ်ကြသည့် နိုင်ငံတဝှမ်းမှ အများပြည်သူများ နားနေရန်သင့်တော်သည့် အခမဲ့ အပန်းဖြေနိုင်သည့်နေရာဖြစ်ကြောင်း သိရသည်။

“ကျနော်တို့မှာ စာရွက်စာတမ်း အပြည့်အစုံ ရှိပါတယ်။ ကျနော်တို့မြို့သူမြို့သားများက သက်ဆိုင်ရာမှာ တောင်းတဲ့ အတွက်ကြောင့် အဲဒီတုန်းက ခယက ဥက္ကဋ္ဌ ဗိုလ်မှုးကျော်ဆန်း က ဒီနေရာလေးကို အများပြည်သူ အပန်းဖြေဖို့ သတ်မှတ်ပေးထားတာဗျ” ဟု ဦးဝဏ္ဏ က ဆက်လက်ပြောပြသည်။

ထို့ပြင် ကန့်ကွက်ကြသူများထဲတွင် မြို့သူမြို့သား ၂၉ဝ ခန့်လည်း ထပ်မံပါဝင်လာကြရန်ရှိပြီး အခက်အခဲရှိပါက ရင်ဆိုင်သွားမည် ဖြစ်ကြောင်းလည်း ဦးဝဏ္ဏ က ပြောဆိုသွားသည်

“ပြောင်းလဲနေပြီလို့ မမြင်ပါဘူး။ ပြောင်းလဲဖို့ ခြေလှမ်းစနေပြီလို့ပဲ မြင်ပါတယ်”

ကွန်းချမ်း | ကြာသပတေးနေ့၊ မေလ ၁၀ မဇ္စျိမ

တကျွန်းဒဏ်မှ လွတ်မြောက်လာသူ နိုင်ယက္ခနှင့် အင်တာဗျူး

စံခလပူရီ (မဇ္ဈိမ) ။ ။ မွန်ပြည်သစ်ပါတီနှင့် မြန်မာအစိုးရတို့အကြား ငြိမ်းချမ်းရေး ဆွေးနွေးရာတွင် အထောက်အကူ ဖြစ်ရန်အတွက် မွန်ပြည်သစ်ဘက်မှ တစိုက်မတ်မတ် တောင်းဆိုခဲ့သည့် တကျွန်းကျ အကျဉ်းသား ပါတီဝင်နှစ်ဦးကို ဧပြီလ ၃ဝ ရက်နေ့တွင် နိုင်ငံတော် သမ္မတ၏ လွတ်ငြိမ်းချမ်းသာခွင့်ဖြင့် ပြန်လွှတ်ပေးခဲ့ပြီး မိခင်ပါတီကို လွှဲအပ်ခဲ့သည်။

ထိုသို့ လွတ်မြောက်လာသူ နှစ်ဦးမှာ အင်းစိန်ထောင်မှ နိုင်ယက္ခနှင့် သာယာဝတီထောင်မှ နိုင်မျိုးသွေးတို့ ဖြစ်ကြသည်။

နိုင်ယက္ခမှာ မွန်ပြည်သစ်ပါတီ ခရိုင်အလုပ်အမှုဆောင် ကော်မတီဝင်ဟောင်းနှင့် ဗဟို နိုင်ငံရေးသင်တန်း ဒုကျောင်းအုပ် ဖြစ်သည်။ နိုင်မျိုးသွေးမှာ မွန်အမျိုးသား လွတ်မြောက်ရေး တပ်မတော်က ဗိုလ်ကြီးဟောင်း ဖြစ်သည်။ ၎င်းတို့ နှစ်ဦးမှာ ၂ဝဝ၃ ခုနှစ် ဇူလိုင်လ ၁၇ ရက်နေ့က ရန်ကုန်မြို့တွင် ဖမ်းဆီးခံရပြီး နိုင်ငံတော် ပုန်ကန်ရန် ကြံစည်မှုဖြင့် သေဒဏ် ချထားရာမှ အယူခံဝင်၍ တသက်တကျွန်း ပြောင်းလဲချခံရသည်။

အပစ်အခတ် ရပ်စဲထားစဉ် ကာလအတွင်းတွင်ပင် ၎င်းတို့ အဖမ်းခံခဲ့ရပုံ၊ ထောင်တွင်း အတွေ့အကြုံ၊ လွတ်မြောက် လာခဲ့ပုံများအပြင် အပစ်အခတ် ရပ်စဲရေး၊ ပြည်တွင်းငြိမ်းချမ်းရေးနှင့် တိုင်းရင်းသား စည်းလုံးညီညွတ်ရေးတို့ အပေါ် သဘောထားများ သိရှိနိုင်ရန်အတွက် နိုင်ယက္ခ အား မဇ္ဈိမ က ဆက်သွယ်မေးမြန်းထားသည်။

ထောင်က လွတ်မယ်ဆိုတာ ဘယ်လို သိခဲ့ရတာလဲ။

ဧပြီလ ၃ဝ ရက်နေ့ မနက် ၆ နာရီမှာ ကျနော်တို့ကို လာနှိုးတယ်။ ကျနော်တို့က သီးသန့်မှာ ရှိနေတယ် ဆိုတော့ ထောင်ကြီးကို ခေါ်သွားတယ်။ ထောင်ကြီးကို ရောက်တော့ ရထားညွှန်မှူး ဗိုလ်မှူးကြီး စစ်ကိုကိုနဲ့ တွေ့တယ်။ သမ္မတကြီးက လွတ်ငြိမ်းချမ်းသာခွင့် ပေးမယ့်အကြောင်း၊ အကယ်၍သာ မွန်ပြည်သစ်ပါတီ မတရားအသင်းပုဒ်မ ပြန်ဖြစ်သွားရင် ဒီလွတ်ငြိမ်းချမ်းသာခွင့်လည်း အလိုလို ပျက်စီးသွားမယ့်အကြောင်း ပြောတယ်။ ကေအင်ယူက မန်းငြိမ်းမောင်လည်း ဒါလိုပဲ လက်မှတ် ထိုးထားတဲ့အကြောင်း ကျနော်တို့ကို ပြတယ်။ ကျနော်နဲ့ နိုင်မျိုးသွေး ထပ်ပြီး ဆွေးနွေးတယ်။ ကျနော် တို့ ဆုံးဖြတ်ချက်ချပြီး လက်မှတ်ထိုးကြတယ်။ အဓိပ္ပါယ်က ကျနော်တို့မှာ ထောင်ကြွေးကျန်နေတယ် ဆိုတဲ့သဘောပေါ့။

လက်မှတ်ထိုးလိုက်တဲ့ အထဲမှာ ဘာသဘောတူညီချက် ပါပါသလဲ။

စာထဲမှာတော့ သမ္မတကြီးက လွတ်ငြိမ်းချမ်းသာခွင့် ပေးလိုက်တဲ့ အကြောင်း၊ ရှေ့မှာ ပြစ်မှုတခုခု ဖြစ်ရင် ဒီကျန်နေတဲ့ပြစ်ဒဏ်ကို ပြန်ဆပ်ရမယ့် အကြောင်း၊ အဓိကကတော့ ဒါတွေပါပဲ။

ဘာတွေကို မလုပ်ရဘူး ဆိုတာမျိုး သဘောတူထား ခဲ့တာကော ရှိပါသလား။

မရှိပါဘူး။ မရှိပါဘူး။

ဘာ့ကြောင့် လွတ်လာတာလဲလို့ ပြောနိုင်မလဲ။

ဒါက နှစ်ပိုင်း ရှိတယ်။ တပိုင်းက အမေရိကန်တို့ အီးယူတို့ စတဲ့ နိုင်ငံတကာရဲ့ တွန်းအားပေါ့။ ကင်တားနားနဲ့လည်း ထောင်မှာ ကျနော် တွေ့ခဲ့ရတယ်။ ဒါက တပိုင်း။ အထူးသဖြင့် မွန်ပြည်သစ်ပါတီပေါ့လေ။ ဒီအခြေအနေတွေ ညီညွတ် လာလို့ လွတ်လာတာပဲလို့ မြင်ပါတယ်။

ဒါနဲ့ ဘာ့ကြောင့် မွန်ပြည်သစ်ပါတီကို ရောက်လာခဲ့ရတာလဲ။

၁၉၇၉ ခုနှစ် ကျနော် ကောလိပ် တက်တုန်းက (မော်လမြိုင် ကောလိပ် မွန်မဂ္ဂဇင်း) ဖြစ်မြောက်ရေး တွဲဖက်အတွင်း ရေးမှူး၊ နောက်နှစ်မှာ အတွင်းရေးမှူး ဖြစ်လာတယ်၊ မဂ္ဂဇင်းက ၁၉၈၁ လောက်မှာ ထွက်တယ်။ အဲဒီအချိန်မှာ ကျနော် မွန်ပြည်သစ်နဲ့ အဆက်အသွယ် ရှိနေပြီ။ မြေအောက် စည်းရုံးရေးမှူးပေါ့။ အဲဒီအချိန်ဆိုရင် ကျနော်တို့မှာ နိုင်ငံရေး ထွက်ပေါက် မရှိဘူး။ မဆလ ခေတ်ကိုး။ လက်နက်ကိုင် တော်လှန်ရေး လုပ်မှ ဖြစ်မယ်လို့ မြင်ပြီး မွန်ပြည်သစ်နဲ့ အဆက်အသွယ် လုပ်ခဲ့တယ်။

ကျောင်းပြီးတော့ ကျောင်းဆရာ ဖြစ်တယ်။ မူလတန်းပြကနေ အလယ်တန်းပြ။ ဒါပေမယ့် နိုင်ငံရေးနဲ့တော့ အဆက်အသွယ် မပြတ်ခဲ့ဘူး။ ရှစ်လေးလုံး ဖြစ်တော့ ကျနော်တို့ ဝင်ပြီး လှုပ်ရှားခဲ့တယ်။ ကျောင်းသားတွေ လက်နက်ကိုင် တော်လှန်ရေးနယ်မြေကို ရောက်ဖို့လည်း ကျနော် ကူညီခဲ့တယ်။ ၈၉ လောက်မှာ ကျနော့်အတွက် လုံခြုံရေးက မကောင်းတော့ဘူး။ မွန်ပြည်သစ်ကလည်း ကျနော့်ကို ခေါ်တော့ မွန်ပြည်သစ်ကို ရောက်လာရတာပါ။

အဖမ်းခံရတုန်းက အဖြစ်အပျက်ကို ပြန်ပြောပြပေးပါလား။

မွန်အမျိုးသား ဒီမိုကရေစီအဖွဲ့က ဗဟိုအလုပ်အမှုဆောင် နိုင်ပန်းအောင် ရဲ့ မဆလ ခေတ်က လုပ်ဖော်ကိုင်ဖက် တယောက်က သူတို့ ကုမ္ပဏီသစ်တခု ဖွင့်ထားတယ်။ နာမည်တော့ မသတ်မှတ်ရသေးဘူး။ တရုတ်ပြည်က အီလက်ထရောနစ် ပစ္စည်းတွေကို ကျနော်တို့ မွန်ပြည်နယ်မှာ ရောင်းချဖို့အကြောင်း၊ အလုပ်ကိစ္စအတွက် သူတို့ ကုမ္ပဏီမှာ လေ့လာဖို့အကြောင်း ကျနော်တို့ကို ဖိတ်ခေါ်တယ်။ ကျနော်တို့ကလည်း သမ္မာအာဇီဝ အလုပ်ပဲ ဆိုပြီး ရန်ကုန်ကို လိုက်တက်သွားတယ်။ ကျနော်တို့ သုံးယောက်ပေါ့။ ကျနော်ရယ်၊ နိုင်မျိုးသွေးရယ်၊ နိုင်အောင်လွန်းရယ်။

ဟိုရောက်တော့ သူတို့က ကျနော်တို့ကို ကျောက်မြောင်းက မလွှကုန်းတိုက်ခန်း ပထမထပ်ကို ခေါ်သွားတယ်။ အဲဒီကို ရောက်တာနဲ့ စစ်ထောက်လှမ်းရေးနဲ့ရဲ အယောက် ၃ဝ လောက်က လက်နက်တွေ၊ နံပါတ်တုတ်တွေနဲ့ အသင့်စောင့်နေပြီး ကျနော်တို့ကို ဝင်ရိုက်တော့တာပဲ။

ကျနော်တို့ဘက်ကဆို အားလုံးပေါင်း ၅ ယောက်။ သူတို့က အယောက် ၃ဝ လောက်။ ခဏလောက်တော့ လုံးထွေးကြသေးတယ်။ ဒါပေမယ့် သူတို့ဘက်က လူများတော့ ကျနော်တို့ဘက်က လက်လျှော့လိုက်တယ်။ ပြီးတော့ ကျနော်တို့ကို ကြိုးတုတ်၊ လက်ထိပ်ခတ်၊ မျက်နှာဖုံးစွပ်ပြီး၊ ကပ်ရပ် တိုက်ခန်းတခုကို ခေါ်သွားတယ်။ ဟိုရောက်တော့ မျက်နှာဖုံးဖွင့် တယ်။ အဲဒီတိုက်ခန်းမှာ အသင့်ပြင်ထားပြီးသား သေတ္တာကြီးတလုံး ထုတ်ပြီး ဖွင့်တော့ အထဲမှာ လက်နက်တွေ၊ ဗုံးတွေ၊ TNT ယမ်းတွေ မနည်းဘူး။ မော်တော်ကား တစီးစာ တိုက်လို့ မကုန်ဘူး။ အဲဒီပစ္စည်းတွေနဲ့ ကျနော်တို့ကို ဓါတ်ပုံ တွဲရိုက် လိုက်တယ်။

ဒါတွေနဲ့ပဲ ကျနော်တို့ကို နိုင်ငံတော် ပုန်ကန်မှု ဥပဒေပုဒ်မ (၁၂၂/၁)နဲ့ တရားစွဲပြီး သေဒဏ်ချလိုက်တယ်။ မွန်ပြည်သစ်ဘက်က ဒါကို အယူခံဝင်ပြီး ၅ လ၊ ၆ လလောက် အကြာမှာ တသက်တကျွန်း လျှော့ပေးတယ်။ ကျွန်းကြီးပေါ့ ၂၅ နှစ်။

အမှုတွဲမှာ ဘယ်သူတွေ ပါသေးသလဲခင်ဗျ။

ကျနော်တို့က ၃ ယောက်။ နိုင်ရွှေမန်းတို့က ၂ ယောက်။ ကိုဇော်သက်ထွေး (Eleven အားကစားဂျာနယ် အယ်ဒီတာဟောင်း)၊ ဦးအေးမြင့် (လမ်းပြကြယ်) တို့က ၅ ယောက်၊ အားလုံး ၁ဝ ယောက်ပါ။ ၂ လလောက် ကြာတဲ့အခါ တယောက်ကို သူတို့ လွှတ်ပေးလိုက်တယ်။ ၉ ယောက် ကျန်ပေါ့။ အားလုံးကို သေဒဏ်ချတယ်။ အယူခံဝင်တော့ ၅ ယောက်က ၂၅ နှစ်စီ။ ၄ ယောက်က ၃ နှစ်စီ။

နောက်တကြိမ် အယူခံ ထပ်ဝင်တော့ ၂၅ နှစ်သမားတွေထဲက နိုင်ရွှေမန်းက ၅ နှစ်၊ ကျန်တဲ့ ၄ ယောက်က အရင် အတိုင်းပဲ။ ၃ နှစ်သမားတွေက တနှစ် ဖြစ်သွားတယ်။ ထောင်ထဲမှာတော့ နိုင်အောင်လွန်းနဲ့ ဇော်မျိုးထက် နှစ်ယောက် ကျဆုံးသွားတယ်။ အခု ကျနော်တို့ လွတ်လာတဲ့အချိန်မှာတော့ သာယာဝတီထောင်မှာ ဖြူလေး (ခေါ်) ဇာနိုင်ထွန်း တယောက် ကျန်သေးတယ်။

သူက ဘာ့ကြောင့် မလွတ်ရတာလဲခင်ဗျ။

အထူးသဖြင့် မွန်ပြည်သစ်က ကျနော်တို့ကို သီးသန့် တောင်းတဲ့အတွက် ကျနော်တို့ လွတ်လာရတာပါ။ ကိုဇော်သက်ထွေး ဆိုရင် ဒီကိစ္စနဲ့ ဘာမှ မဆိုင်ပဲ အဖမ်းခံရတယ်။ ဆိုလိုတာက အမှုကြီးအောင် တမင် လုပ်လိုက်တာ ပဲ။ နိုင်ငံတကာက ဖိအား၊ ILO ရဲ့ ဖိအားတွေကြောင့် ကိုဇော်သက်ထွေးတို့က ထောင်ကျပြီး တနှစ်ကျော်ကျော်လောက် မှာ ပြန်လွတ်သွားတယ်။ ကျနော်တို့က ၉ နှစ်နီးပါး နေလိုက်ရတယ်။ ဖြူလေးကတော့ ဘယ်သူကမှ ဖိအားပေး တောင်းဆိုတာ မရှိလို့ မလွတ်နိုင်သေးဘူးလို့ ထင်ပါတယ်။

အဲဒီတုန်းက ဒီပဲယင်း အရေးကလည်း ဖြစ်ပြီးစ ဆိုတော့ စစ်ထောက်လှမ်းရေးတွေက အဲဒါကို အာရုံလွှဲချင်လို့ အကွက်ဆင် ဖမ်းလိုက်တယ်လို့ အတော်များများက ပြောကြပါတယ်။ ဒီအပေါ်ကော ဘယ်လို မြင်ပါသလဲ။

အမျိုးမျိုး ဖြစ်နိုင်ပါတယ်။ ဒီကိစ္စအပေါ် အချို့က အမြင် ၂ ခု ပေးကြတယ်။ တခုက ဒီပဲယင်းကို ပြည်သူတွေ အာရုံစိုက်နေတဲ့အချိန်ဆိုတော့ ဒါကို အာရုံလွှဲဖို့ဆိုပြီး ဖမ်းတယ်လို့ မြင်တယ်။ နောက်တခုက ကျနော်တို့ကို မျက်စိနောက်လို့ အကွက်ဆင် ဖမ်းတယ်လို့ ထင်ပါတယ်။

မျက်စိနောက်တယ် ဆိုတာ ဘာကို ဆိုလိုပါသလဲ။

ကျနော်တို့က လူငယ်တွေကို နိုင်ငံရေးသင်တန်းတွေ ပို့ချတယ်၊ သွားလာလှုပ်ရှားနေတယ်ဆိုတော့ သူတို့အမြင်မှာ တမျိုးဖြစ်နေလေမလားပေါ့။

ထောင်ထဲမှာ ညှဉ်းပမ်းနှိပ်စက်တာတွေ ခံခဲ့ရပါသလား။

တိုက်ရိုက် နှိပ်စက်တာတော့ မရှိဘူး။ ဒါပေမယ့် ကျန်းမာရေး ကုသမှုအပိုင်းမှာတော့ ဆိုးတယ်။ ကိုယ်ကြိုက်တဲ့အချိန် မှာ ဆေးဝါးကုသမှု ခံယူလို့ မရဘူး။ ဆရာဝန်တွေကို စောင့်ရတယ်။ နောက်တော့ ဆေးဝါး နည်းတယ်။ ကုချင်ရင် အပြင်က ဆေးတွေကို မှာယူပြီးမှ ကုလို့ ရတယ်ဆိုတော့ သိပ်နောက်ကျတာပေါ့နော်။ အိမ်ကလည်း တလတကြိမ်မှ လာတွေ့နိုင်တာကိုး။

ကျနော့်မှာဆို ထောင်မကျခင်ကတည်းက အစာအိမ်ရောဂါ အခံရှိတယ်။ ထောင်ထဲရောက်တော့ ရောဂါနှစ်ခု ထပ်ရလာ တယ်။ သွေးတိုးနဲ့ လိပ်ခေါင်း။ စိတ်ဓါတ်ရေးအရ ညှင်းပမ်းတာတွေတော့ ရှိတယ်။ ဒါပေမယ့် ကိုယ့်ကိုယ်ကို ပြန်လည် တည်ဆောက်ပြီး နေခဲ့ရတာပေါ့။

ဘယ်လို ပြန်တည်ဆောက်ပြီး နေခဲ့ရတာလဲ။

အဓိကကတော့ အနိဋ္ဌာရုံတွေကို မစဉ်းစားမိအောင် နေတာပေါ့။ ကိုယ့်အချင်းချင်း နိုင်ငံရေး ဆွေးနွေးတာတွေ လုပ်တယ်။ စိတ်တည်ငြိမ်အောင် ပုတီးစိပ်၊ တရားထိုင်တာပေါ့။

စစ်ကြောရေးမှာ ရှိတုန်းကရော။

သိပ်မဆိုးပါဘူး။ ကျနော်ကိုတော့ ရိုက်နှက်စစ်ဆေးတာတော့ မရှိပါဘူး။ ဒါပေမယ့် မအိပ်ရဘူး။ အစားအသောက် ကတော့ မနက် နို့တခွက် ညနေ နို့တခွက် ဒီလောက်ပဲ ရတယ်။ စစ်ကြောရေးမှာ နေရတဲ့ ၁ဝ ရက်လောက်မှာဆို။

ထောင်ထဲမှာကော စာရေး စာဖတ်ခွင့် ရှိပါသလား။

စာဖတ်တာပဲ ရတယ်။ စာရေးတာ မပြောနဲ့ ခဲတံက အစသမ္မတကြီးက လွတ်ငြိမ်းချမ်းသာခွင့်ပေးလိုက်တဲ့ အကြောင်း၊ ရှေ့မှာ ပြစ်မှု တခုခု ဖြစ်ရင်ဒီကျန်နေတဲ့ ပြစ်ဒဏ်ကို ပြန်ဆပ်ရမယ့် အကြောင်း၊ အဓိကကတော့ ဒါတွေပါပဲ။

ကိုင်ခွင့် မရှိဘူး။ စာဖတ်တာကတော့ အပြင်က ကိုယ်သွင်းနိုင် သလောက် ဖတ်လို့ ရပါတယ်။ အစိုးရ သတင်းစာတွေကိုတော့ နေ့တိုင်း ပေးဖတ်ပါတယ်။

ထောင်ထဲမှာ နေခဲ့တဲ့ ၉ နှစ်နီးနီးအချိန်မှာ ဘာတွေ အကျိုးဖြစ်ခဲ့သလဲ။

အများကြီး ရခဲ့ပါတယ်။ ၂ ခု ရှိတာပေါ့နော်၊ တခုက နိုင်ငံရေး စာပေတွေ၊ အင်္ဂလိပ်စာတွေကို လေ့လာခဲ့ရတယ်။ နောက်တခုကတော့ ကျနော်တို့ နိုင်ငံရေးသမားအချင်းချင်း အမြင်တွေဖလှယ် ဆွေးနွေးခဲ့ရတယ်။ ဒါတွေဟာ ထောင်ထဲ က အမြတ်တွေပါပဲ။

သမ္မတ ဦးသိန်းစိန်ရဲ့ လွတ်ငြိမ်းချမ်းသာခွင့်နဲ့ ပတ်သက်ပြီး ဘာတွေ ပြောချင်ပါသလဲ။

လွတ်တယ်ဆိုတော့ ကိုယ့်အတွက် ဝမ်းသာတာပေါ့နော်။ ဒါပေမယ့် နိုင်ငံရေး အကျဉ်းသားတွေ အထဲမှာ ကျန်နေသေးတော့ ဝမ်းနည်းတာပေါ့။ အခုချိန်မှာ ဒါတွေ မရှိသင့်တော့ပါဘူး။ အမြန်ဆုံး လွှတ်ပေးနိုင်ရင်တော့ သိပ်ကောင်းမှာ။

အဖမ်းခံရတဲ့အချိန်နဲ့ အခုအချိန်ဟာ အပြောင်းအလဲတချို့ ရှိခဲ့တယ်။ အခုကျနော်တို့ နိုင်ငံမှာ ပြောင်းလဲနေပြီလို့ တချို့က ပြောနေကြပြီ။ ဒီအပေါ်မှာကော ဘယ်လိုမြင်ပါသလဲ။

ပြောင်းလဲနေပြီလို့ မမြင်ပါဘူး။ ပြောင်းလဲဖို့ ခြေလှမ်းစနေပြီလို့ပဲ မြင်ပါတယ်။ ထောင်က လွတ်စပဲ ရှိသေးတော့ အပြင်က အဖြစ်အပျက်တွေကို လေ့လာရဦးမယ်။ ထင်မြင်ချက် ပေးဖို့ကတော့ စောပါသေးတယ်။

မွန်ပြည်သစ် အပစ်အခတ် ရပ်စဲရေးနဲ့ ပတ်သက်ပြီးကော ဘယ်လို မြင်ပါသလဲ။

စားပွဲခုံပေါ်မှာ ညှိနှိုင်းဆွေးနွေးလို့ ရရင် ဆွေးနွေးဖို့ နိုင်ငံတကာကလည်း လိုလားတယ်။ နိုင်ငံရေး ပြဿနာကို နိုင်ငံရေး အရ မဖြေရှင်းနိုင်လို့ပဲ လက်နက်နဲ့ ဖြေရှင်းနေရတယ် မဟုတ်လား။ စားပွဲခုံပေါ်မှာ ဆွေးနွေးနိုင်ရင်တော့ ပိုကောင်းတာပေါ့။

ဒီအကြိမ် အပစ်အခတ် ရပ်စဲရေးကကော ရေရှည် တည်တံ့နိုင်ပါ့မလား။

ဒါကတော့ နှစ်ဖက် စေတနာပေါ်မှာ မူတည်ပါတယ်။ နိုင်ငံ ဖွံ့ဖြိုးတိုးတက်ဖို့အတွက် စိတ်ဆန္ဒတွေ ရှိကြမယ်ဆိုရင် သူနည်းနည်းလျှော့ ကိုယ်နည်းနည်းလျှော့။ ဒီလို လုပ်ယူရမှာပဲ။ ကိုယ့်အလိုဆန္ဒအတိုင်း တကြိမ်တည်းနဲ့တော့ဖြစ်လာနိုင်မှာ မဟုတ်ပါဘူး။ အဓိကကတော့ ငြိမ်းချမ်းရေးကို လိုလားတဲ့ စေတနာပဲ။ ဒါက အခြေခံပဲ။ ကျနော်တို့နိုင်ငံရဲ့ ပကတိ အခြေအနေကလည်း အပစ်အခတ် ရပ်စဲဖို့ တောင်းဆိုနေပြီ။ ဒါပေမယ့် နှစ်ဖက်လုံးက စေတနာတွေဖြူစင်မယ် ဆိုရင်တော့ ရေရှည် တည်တံ့ပါလိမ့်မယ်။

ကျနော်တို့ နိုင်ငံမှာ ရှိတဲ့ ဗမာအပါအဝင် တိုင်းရင်းသားတွေအားလုံး စည်းစည်းလုံးလုံးနဲ့ အတူတကွ ယှဉ်တွဲနေထိုင်နိုင်ဖို့ ဘာတွေ လိုအပ်ပါသလဲ။ ဘာတွေက အဟန့်အတား ဖြစ်နေပါသလဲ။

အဟန့်အတား ဆိုတာက မဟာလူမျိုးကြီးဝါဒနဲ့ အမျိုးသားအမြင်ကျဉ်းဝါဒပဲ။ ဒါတွေကို နှစ်ဖက်လုံးက ပစ်ပယ်ပြီးဖြူစင်တဲ့စိတ်ထား စေတနာတွေနဲ့ လုပ်သွားမယ်ဆိုရင် ဖြစ်လာမှာပါ။

မော်ချီးတွင် ခဲတွင်းပြိုကျ၍ အမျိုးသားနှစ်ဦး သေဆုံး

ကြာသပတေးနေ့၊ မေလ 10 ကန္တာရ၀တီတိုင်း(မ်)

ကရင်နီပြည် မော်ချီးမြို့နယ်တွင် ခဲတွင်းပြိုကျလို့ ခဲတွင်းထဲမှာ ခဲတူးနေသော အမျိုးသားနှစ်ဦး မြေပိပြီး သေဆုံးသွားပါတယ်။

“ဖော်ထုတ်ယုံပဲ။ အသံတွေ ဘာတွေ မကြားတော့ဘူး။ မကြားဘူးဆိုတာ အထဲမှာ ပိတ်နေတာလေ” လို့ ၂၅ ရက်နေ့ မနက်ပိုင်းက မောင်ချစ်ကိုအား ဖော်ထုတ်နေသော ဒေသခံများက ပြောပါတယ်။

၂၅ ရက် ညနေပိုင်းအချိန်မှာ မောင်ချစ်ကိုအား ဖော်ထုတ်နေသော ဒေသခံများအထဲမှ အသက် ၂၅ ၀န်းကျင်အရွယ် အမျိုးသားတဦးလည်း ခဲတွင်းပြိုကျလို့ ထပ်မံ သေဆုံးသွားပါတယ်။

ပြီးခဲ့တဲ့ ဧပြီလ ၂၄ရက်နေ့မှာ အသက် ၂၈ နှစ်အရွယ် မောင်ချစ်ကိုဟာ တိုင်ထောင်မထားတဲ့ ခဲတွင်းထဲသို့ ခဲတူးယူနေစဉ် မြေပြိုကျပြီး သေဆုံးသွားခြင်းဖြစ်ပါတယ်။

မောင်ချစ်ကိုဟာ နတ်မောက်မြို့နယ် ရေထွက်ကျောက်တဲရွာကနေ မော်ချီးသို့လာရောက်ပြီး ခဲလုပ်ငန်းကို လုပ်ကိုင်ခြင်း ဖြစ်ပါတယ်။

“အဝေးကနေ လာလုပ်ကြတော့ တချို့က လောဘကြီးတယ်။ ရလေ ပိုလုပ်လေပဲ။ အန္တရာယ်ရှိမှန်းလည်း ဂရုမစိုက်ကြတော့ဘူး” လို့ မော်ချီးမြို့နယ် လိုခါးလိုမှ ဒေသခံတဦးက ပြောပါတယ်။

ကရင်နီပြည် မော်ချီးမြို့နယ်တွင် မြေပြိုကျပြီး အလုပ်သမားများ မကြာခဏ သေဆုံးခဲ့ရပြီး ခဲအလုပ်သမား များဟာ ဒေသခံအပြင် များသောအားဖြင့် ကျောက်ပတောင်း၊ မုံရွာ၊ နတ်မောက်နဲ့ ထားဝယ်ကနေ လာရောက် လုပ်ကိုင်ကြတယ်လို့ သိရပါတယ်။

ဓည၀တီနှင့် ဝေသာလီကို ရှေးဟောင်း ယဉ်ကျေးမှုဇုန် အဖြစ် အစိုးရက သတ်မှတ်

ကြာသပတေးနေ့၊ မေလ 10 နိရဉ္စရာ သတင်းဌာန

ယဉ်ကျေးမှု ၀န်ကြီးဌာနမှ မြန်မာနိုင်ငံမှ နေရာ (၅) နေရာအား ရှေးဟောင်း နေရာ တည်ရှိရာ ဇုန် နှင့် ကာကွယ်ထိန်းသိမ်းထားသော ဇုန်အဖြစ် သတ်မှတ်ရာ ထိုအထဲတွင် ရခိုင်မှ ဓည၀တီနှင့် ဝေသာလီ တို့ ပါဝင်သည်။

မြန်မာနိုင်ငံမှ ရှေးဟောင် နေရာ ၅ ခုကို ယဉ်ကျေးမှု ၀န်ကြီးဌာနမှ ဇုန်နယ်မြေ များအဖြစ် သတ်မှတ် ပြဌာန်းလိုက်ကြောင်းကို ယနေ့ (မေလ ၁၀ ရက်နေ့) ထုတ် ကြေးမုံသတင်းစာတွင် ဖော်ပြပြီး ဓည၀တီနှင့် ဝေသာလီကို မတ်လ ၉ ရက် ၂၀၁၂ ခုနှစ် နေ့ကပင် အမိန့်ကျေညာချက် ထုတ်ပြန် သတ်မှတ်ခြင်း ဖြစ်ကြောင်း သိရသည်။

၎င်း နေရာ (၅) မှာ ရခိုင်ပြည်နယ် ကျောက်တော်မြို့နယ်မှ ဓည၀တီမြို့ဟောင်း၊ မြောက်ဦးမြို့နယ်မှ ဝေသာလီမြို့ဟောင်း ၊ ဧရာဝတီတိုင်း မြောင်းမြမြို့ နယ် မြောင်းမြမြို့ဟောင်း၊ တနင်္သာရီမှ လောင်းလုံမြို့နယ် သာဂရမြို့ ဟောင်း၊ စစ်ကိုင်းတိုင်း ချောင်းဦးမြို့နယ်မှ အမြင့်ရွာဒေသနှင့် သုံးပန်လှ(အနိမ်)ရွာ ဒေသတို့ ဖြစ်သည်။

ယဉ်ကျေးမူ ၀န်ကြီးဌာနမှ ၎င်းနေရာများကို ရှေးဟောင်းနေရာ တည်ရှိရာဇုန် (Ancient Site Zone) နှင့် ကာကွယ် ထိန်းသိမ်းထားသော ဇုန် ( Protected and Preserved Zone) ဖြစ် သတ်မှတ် ပြဌာန်း လိုက်ပြီး ၎င်းဒေသရှိ ရှေးဟောင်း ယဉ်ကျေးမူ အမွေအနှစ်များကို ဥပဒေနှင့် ကာကွယ် စောင့်ရှောက် သွားတော့မည် ဖြစ်ကြောင်း ဖေါ်ပြသည်။

"ကောင်းပါတယ်။ အခုလိုသတ်မှတ်လိုက်တာ။ နိုင်ငံတော်အစိုးရက ထိမ်းသိမ်းမယ်ဆိုတော့ ပိုပြီး ကောင်းပါ တယ်။ ၂၀၀၉ ခုနှစ်က မြောက်ဦးကို သတ်မှတ် ထားပါတယ်။ အခု လွန်ခဲ့ တဲ့ ၂ လ လောက်ကတော့ ဓည၀တီနဲ့ ဝေသာလီကို သတ်မှတ် ပါတယ်။ ဒီလို သတ်မှတ်တာကို ကျွန်တော်တို့ ကြိုဆိုပါတယ်" ဟု မြောက်ဦး ယခင် ရှေးဟောင်း ယဉ်ကျေးမူ ပြတိုက်မှူး ဦးကျော်ထွန်းအောင်ကပြောသည်။

ယခုကဲ့သို့ သတ်မှတ်လိုက်သဖြင့် ရှေးဟောင်း ယဉ်ကျေးမူ အမွေအနှစ်များကို နိုင်ငံတော်က စောင့်ရှောက် သွားမည် ဖြစ်ကြောင်း သူက ပြောသည်။

" ဓည၀တီနဲ့ ဝေသာလီက ကျွန်တော်တို့ ရခိုင်သမိုင်းမှာ သမိုင်းတင်ပြီးခေတ်မှာဆိုရင် အစောဆုံးပါ။ ဓည၀ တီက ဘီစီ ၃၃၂၅ ကတည်းကဆိုတော့ သိပ်ရှေ့ကျပါတယ်။ အခုလို ဇုန်အဖြစ်သတ်မှတ် လိုက်တာ ကလည်း နိုင်ငံတော်က တာဝန်ယူပြီး ထိမ်းသိန်းစောင့်ရှောက်လိုက်တဲ့သဘောပါ။"

မြောက်ဦးမြို့နယ်မှ ဝေသာလီမြို့ဟောင်းမှာ ဝေသာလီကျေးရွာနှင့် သလ္လာဝတီကျေးရွာ အကြားတွင်တည် ရှိပြီး ဓည၀တီမြို့ဟောင်းမှာ ကျောက်တော်မြို့နယ်မှ မဟာမုနိကျေးရွာတွင် တည်ရှိသည်။

ယဉ်ကျေးမူ ၀န်ကြီးဌာနမှ ရှေးဟောင်း နေရာ ဇုန် အဖြစ် သတ်မှတ်ထားသည့် နေရာများတွင် မြေကွက်များ ဖော်ထုတ်ခြင်း၊ လမ်းဖောက်လုပ်ခြင်း၊ ဆည်းမြောင်းနှင့် ကန်များ တူးဖော်ခြင်း၊ ဓါတ်တိုင်၊ တာဝါတိုင်များ စိုက်ထူခြင်း၊ ဓါတ်သတ္တုတူးဖော်ခြင်း များမပြုလုပ်ရန် ဖေါ်ပြသည်။

၁၉၉၈ ခုနှစ် ယဉ်ကျေးမှုအမွေအနှစ်ဒေသများ ကာကွယ်ထိမ်းသိမ်းရေ ဥပဒေပုဒ်မ (၉/၉၈) အခန်း ၇ ဥပဒေ ပုဒ်မ ၁၈၊ ၁၉၊ ၂၀၊ ၂၁၊ ၂၂၊ ၂၃ အရ ကန့်သတ်ထားပြီး ဒေသခံများနှင့် ဌာနဆိုင်ရာများမှ အထက်ပါ ကိစ္စ များကိုပြု လုပ် လိုလျှင် ယဉ်ကျေးမှုဝန်ကြီးဌာန၊ ရှေ့ဟောင်းသုတေသနဌာန၊ အမျိုးသားပြတိုက်နှင့် စာကြည့်တိုက် ဦးစီး ဌာနသို့ ကြိုတင် တင်ပြ ခွင့်ပြုချက်ယူရမည် ဖြစ်ပြီး ခွင့်ပြုချက်မရဘဲ ပြုလုပ်ပါက ဥပဒေအရ အရေးယူမည်ဟုလည်း ဖော်ပြထားသည်။

ယဉ်ကျေးမှုဝန်ကြီးဌာနမှ ဇုန်အဖြစ် သတ်မှတ်လိုက်ခြင်းနှင့် ပတ်သက်ပြီး ရှေ့ဟောင်းသုတေနသ၊ အမျိုးသားပြတိုက်နှင့် စာကြည့်တိုက်ဌာန မြောက်ဦးဌာနစုသို့ ဆက်သွယ်ရာ ဖုန်းကိုင် ဖြေဆိုခြင်း မရှိပါ။

လယ်သိမ်းခံ မွန်လယ်သမားများ လယ်ထွန်မင်္ဂလာပွဲအခမ်းအနားကျင်းပ

ကြာသပတေးနေ့၊ မေလ 10 လွတ်လပ်သော မွန်သတင်းအေဂျင်စီ

ရန်ကုန်တိုင်း မင်္ဂလာဒုံမြို့နယ် ရွှေနံ့သာကျေးရွာရှိ လယ်သိမ်းခံရသည့် မွန်လယ်သမားအများစုက လယ်ထွန်မင်္ဂလာပွဲအခမ်းအနားကို မနက်ဖြန်တွင် ကျင်းပပြုလုပ်သွားမည်ဟု ဒေသခံမွန် လယ်သမားတို့က ပြောသည်။

ရန်ကုန်ရှိ မွန်လယ်သမားများ ပိုင်ဆိုင်သည့် လယ်မြေ ၈၁၅ ဧကို ယမန်နှစ် ဖေဖော်ဝါရီလတွင် ဦးခင်ရွှေပိုင်ဆိုင်သည့် ဇေကမ္ဘာကုမ္မဏီက စက်မှုဇုံ တည်ဆောက်ရန်အတွက် စတင်သိမ်းဆည်း ခဲ့ခြင်းဖြစ်သည်။

ယင်းသိမ်းဆည်းမှုကို မကျေနပ်သည့် လယ်ပိုင်ရှင်များက သက်ဆိုင်ရာသို့ စာပေပို့တိုင်ကြားခဲ့ သော်လည်း အကြောင်းပြန်ကြားမှုမရရှိသည့်အတွက် လယ်သမားများစုပေါင်းပြီး ၎င်းတို့ပိုင်ဆိုင်သည့် လယ်မြေများတွင် ပြန်လည်စိုက်ပျိုးမည်ဖြစ်သည်ဟု မွန်လယ်သမား ဦးကျော်စိန်က ပြောသည်။

၎င်းက “အခု မိုးဦးချိန်ရောက်တော့ လယ်ထွန်ဖို့ရနေပြီ၊ လယ်ကွင်းထဲမှာ ရေမြောင်းတာတမံတွေ ဖြိုဖျက်လိုက်ကြကုန်ပြီး ဘာပဲဖြစ်ဖြစ် ကျနော်တို့လယ်သမားတွေစုပြီတော့ ရအောင် ကြိုးစားပြုလုပ်သွားမယ်” ဟု ပြောသည်။

ယင်းသိမ်းခံရသည့် လယ်မြေပိုင်ရှင်များကို မွန်ပြည်နယ် မုဒုံနှင့် သံဖြူဇရပ်မြို့နယ်မှ အနှစ် နှစ်ဆယ်ကျော် ပြောင်းရွှေ့လာကြသော လယ်ပိုင်ရှင်မွန်လူမျိုး ၈၀ ကျော်က ပိုင်ဆိုင်ကြပြီး စပါးစိုက်ပျိုးမှုတစ်မျိုးကိုသာ အဓိကထား အသက်မွေးဝမ်းကြောင်း ပြုကြသည်။

ဇေကမ္ဘာကုမ္မဏီက စက်မှုဇုံတည်ဆောက်ရန် သိမ်းယူမည်ဟု မပြောဘဲ နိုင်ငံတော်က သိမ်းဆည်း သည် ဟု ဆိုကာ လယ်တစ်ဧကကို လျှော်ကြေး ၃ သိန်းနှုန်းဖြင့် သိမ်းဆည်း လိုက်ခြင်းကြောင့် မကျေနပ်သည့် လယ်ပိုင်ရှင်များက တရားစွဲဆိုမှုများ ရှိခဲ့သည်ဟု ဦးကျော်စိန်က ပြောသည်။

ထိုသို့ တရားစွဲဆိုခြင်းနှင့် အထက်သို့စာတိုင်ကြားရန်အတွက် လယ်ပိုင်ရှင်များက မင်္ဂလာဒုံမြို့နယ်ရှိ မတူကွဲပြားခြင်းနှင့် ငြိမ်းချမ်းရေးပါတီ ဥက္ကဌ ဦးနေမျိုးဝေ ထံသို့ အကူအညီတောင်း ခံခဲ့ကြသည်။

လက်ရှိ အသိမ်းခံရထားသည့် လယ်ယာမြေနေရာများတွင် ဇေကမ္ဘာကုမ္မဏီက စက်မှုဇုံ (၁၊ ၂၊ ၃) တည်ဆောက်ရန် လယ်ကွင်းထဲရှိ ရေးမြောင်း တာတမံများ ဖြိုဖျက်ပြီး ကားလမ်းဖောက်ကာ မီးတိုင်များ တပ်ဆင်ထားကြသည်။

ပြီးခဲ့သည့် ၂၀၁၀ ခုနှစ်ကလည်း ဇေကမ္ဘာကုမ္မဏီက မွန်ပြည်နယ် ကျိုက်မရောမြို့နယ် နှီးဒုံကျေးရွာတွင် ဘိလပ်မြေစက်ရုံဆောက်လုပ်ရေး စီမံကိန်းအတွက် လယ်မြေ ဧက (၃၉၀)ကို သိမ်းဆည်းခဲ့ပြီး လယ်တစ် ဧက ကို ကျပ်ငွေ သုံးသိန်းခွဲနှုန်းဖြင့် လျှော်ကြေးပေးခဲ့ရာ လယ်သမား ၉၃ ဦးအနက် ၆၉ ဦးက လျှော်ကြေးငွေ လက်ခံရရှိခဲ့သည်။

မြန်မာအစိုးရက KBC အသင်းတော်ကို စတင်တိုက်ခိုက်

ကြာသပတေးနေ့၊ မေလ 10 ကချင်သတင်းဌာန

သမ္မတဦးသိန်းစိန် ဦးဆောင်သော မြန်မာအစိုးရသည် အကြီးဆုံး ကချင်ခရစ်ယာန်အသင်းတော် ကချင်နှစ်ခြင်းခရစ်ယာန်အဖွဲ့ချုပ် (Kachin Baptist Convention, KBC) ကို စတင် ရန်ပြု တိုက်ခိုက်လိုက် ပြီဖြစ်သည်။

ကချင်ပြည်နယ် ၀ိုင်းမော်မြို့နယ်အတွင်း KBC အဖွဲ့ချုပ်အောက် ချီဖွေဇုံနယ် ကချင်နှစ်ခြင်းခရစ်ယာန် အသင်းတော်၏ အလုပ်အမှုဆောင်ကော်မတီ (E.C) အစည်းဝေးကို ချီဖွေမြို့ရှိ ဘုရားကျောင်းဝင်းတွင် ပြုလုပ်နေစဉ် မြန်မာစစ်တပ်မှ လက်နက်ငယ် ချိန်ရွယ်ပစ်ခတ်ခဲ့ခြင်းဖြစ်သည်။

ချီဖွေစခန်းမှ အစိုးရစစ်သားများ၏ ဘုရားကျောင်းသို့ ပစ်ခတ်မှုကြောင့် ချန်မောကုန်းအသင်းတော်မှ တရားဟောဆရာ ဒိန်ကျန်း (Ding Chyang)၏ ညာခြေဒူးတွင် ကျည်ဆံထိမှန်ခဲ့သည်။

၎င်းပစ်ခတ်မှုကို ဧပြီ ၂၈ ရက် နံနက် ၈ နာရီခွဲ အစည်းအဝေး အဆုံးသတ်ဆုတောင်းနေချိန် ပြုလုပ်ခြင်းဖြစ် သည်ဟု ဆရာဒိန်ကျန်းက KNG ကချင်သတင်းဌာနသို့ ပြောသည်။

“ကျွန်နော့်ခြေထောက် ညာဘက် ဒူးမှာထိတယ်။ အခုလမ်းရှောက်လို့ မရဘူး။ ဇုံနယ်အသင်းတော် ဥက္ကဌ ဆရာယိန်းခေါ ကိုတော့ သူ့ခေါင်းဆံပင်မှာ ကျည်ဆံရှပ်ထိလို့ ဆံပင်အချို့ ပြတ်သွားတယ်။” ဟု ဒဏ်ရာရရှိသော ဆရာကပြောသည်။

အသင်းတော် E.C. အစည်းအဝေးကို ဧပြီ ၂၆-၂၇ နှစ်ရက်ပြုလုပ်ခြင်းဖြစ်သည်။ အစည်းဝေး စတင်သည့်နေ့မှ စပြီး မြန်မာစစ်သားများ၏ ခြောက်လန့်ပစ်ခတ်ခြင်းခံနေရသည်ဟု အစည်းအဝေးတွင်ပါဝင်သော အသင်း တော် ဆရာတစ်ဦးက ပြောသည်။

“သူတို့ပစ်နေတာက ရှေ့ရက်(ဧပြီ ၂၇)ကနေပစ်နေပြီ။ ဒါပေမယ့် မထိဘူး။ အစကတော့ ကျွန်နော်တို့ကို ပစ်တာ မထင်ဘူးလေ။ သူတို့ပစ်လိုက်တဲ့ ကျည်ဆံ အချို့က ကျွန်နော်တို့နေတဲ့ ဘော်ဒါဆောင် သွပ်ပေါ် တွေမှာ သွားကျတယ်။ နောက်မနက် ကျွန်နော်တို့ ဆုတောင်းနေတဲ့အချိန် ပြန်ပစ်တယ်။ အဲဒီတော့မှ သူတို့ တမင်ချိန်ရွယ် ပစ်တယ်ဆိုတာ သိသွားတယ်လေ။” ဟု သူကဆက်ပြောသည်။

အစည်းဝေးပြုလုပ်သည့် ချီဖွေ ကချင်နှစ်ခြင်းခရစ်ယာန် ဘုရားကျောင်းသည် အင်မိုင်ခမြစ် (မေခမြစ်)နှင့် ချီဖွေချောင်းဆုံ အနီးတွင် တည်ရှိသည်။

ပစ်ခတ်သော စစ်သားများသည် ချီဖွေမြို့မှ အရှေ့ဘက် တောင်ကုန်းတွင် အခြေစိုက်ထားသော တပ်ဖွဲ့များ ဖြစ်သည်ဟု အသင်းတော်ဆရာများဆိုသည်။

၎င်းလုပ်ရပ်အား အစိုးရစစ်သားများက “လူများ စုစည်းနေသောကြောင့် ပစ်ခတ်ခြင်း” ဖြစ်သည်ဟု အကြောင်း ပြချက်ပေးနေကြောင်း ဆရာတစ်ဦးကပြောသည်။

ယခုလိုပစ်ခတ်မှုသည် ချီဖွေ အနီးတ၀ိုက်တွင် ကချင်လွတ်မြောက်ရေးတပ်ဖွဲ့ (KIA) စစ်ကြောင်းများရောက် လာချိန်နှင့်တိုက်ဆိုင်သည်ဟု ဒေသခံများပြောသည်။

ဧပြီ ၂၉ ရက်တွင်လည်း မြန်မာစစ်သားများ ချီဖွေသို့ မော်တာများ ချိန်ရွယ်ပစ်ခတ်ခဲ့ရာ ၆ နေရာတွင်ကျ ရောက်ပေါက်ကွဲပြီး အရပ်သားနေအိမ် ၂ လုံး ပျက်စီးသွားသည်ဟု ဒေသခံများပြောသည်။

ယခုလို လူနေ ရပ်ကွက်များသို့ မော်တာပစ်ခတ်ခြင်းကြောင့် ဒေသခံအချို့သည် ၀ိုင်းမော်မြို့သို့ ထွက်ပြေး သိမ်းရှောင်နေသည်ဟု ဒေသခံများပြောသည်။

KBC အသင်းတော်များသည် ၂၀၁၂ ဇွန် ၉ ရက် (မြန်မာအစိုးရမှ KIO ကိုစတင် တိုက်ခိုက်ခြင်း) မတိုင်ခင် “ကချင်ပြည်နယ်နှင့် မြန်မာပြည်တခုလုံး ငြိမ်းချမ်းရန်အတွက်” ဆုတောင်း ခဲ့ကြသည်။ သို့သော် စစ်ဖြစ်လာပြီး နောက် “ကချင်အမျိုးသားများ ထာဝရဘုရားသခင်ပေးသော ကိုယ်ပိုင် အချုပ်အခြာအာဏာ ရရှိရေးအတွက်” ပြောင်းလဲ ဆုတောင်းလာသည်။

မြန်မာနိုင်ငံတ၀န်း KBC အဖွဲ့ချုပ်အောက် အသင်းတော်ဇုံနယ်ပေါင်း ၁၅ ပါးနှင့် ၎င်းအောက် အသင်းတော် စုစုပေါင်း ၃၀၀ ကျော်ရှိပြီး တနိုင်ငံလုံးအတိုင်းအတာ အသင်းတော်ဝင် ၄၀၀၀၀၀ ကျော်ရှိသည်ဟု KBC ကဆိုသည်။

ချီဖွေဇုံနယ် နှစ်ခြင်းခရစ်ယာန်အသင်းတော် ကို ပန်ဝါ၊ ဖီမော၊ ချန်းမော်၊ ဇီးအွန်၊ ထိကော၊ ကောယွန်၊ ဆော့လော်၊ ထော့လောန်၊ ချီဖွေ၊ မန်လန့်၊ လော်ခေါင်၊ ထိုက်ရှိန်၊ ဂျမ်နောင်၊ ရှန့်ကျူ၊ လောင့်ဖြေ၊ တမူခုန်း စသည့် ဒေသမှ အသင်းတော် စုစုပေါင်း (၁၆) ပါးဖြင့် ပါဝင်ဖွဲ့စည်းထားသည်။

အလုပ်အကိုင်သစ် ရှာဖွေရန် နယ်ရပ်ရင်း စွန့်ခွာသူ အရေအတွက် ရခိုင်တွင် ကြောက်ခမန်းလိလိ တိုးပွား

ကြာသပတေးနေ့၊ မေလ 10 နိရဉ္စရာ သတင်းဌာန

စီးပွားရေး ကျပ်တည်းမူ၊ အလုပ်အကိုင် ရှားပါးမူများကြောင့် နယ်ရပ်ရင်း ဒေသကို စွန့်ခွာပြီး တခြား အရပ် ဒေသများသို့ ထွက်ခွာနေကြသူ အရေအတွက်မှာ ရခိုင်ပြည်နယ်တွင် တစ်နေ့ထက် တစ်နေ့ တိုးတက် များပြား နေကြောင်း ရခိုင် ဒေသခံများက ပြောသည်။

" ကျွန်တော်ဒေသက ရွာတွေမှာ အမျိုးသားရော၊ အမျိုးသမီးတွေပါ ထိုင်း၊ တရုတ်နယ်စပ်နဲ့ မလေးရှား ဘက်ကို ထွက်ခွာနေကြတဲ့ အတွက် ရွာတွေမှာ လူတောင် သိပ်မကျန်တော့ဘူး။ ကလေးနဲ့ လူကြီးတွေဘဲ ကျန်တော့တယ်" ဟု ရသေ့တောင် မြို့နယ် မူစဲကမ်း ကြက်ရိုးဆိပ်မှ ဒေသခံ တစ်ဦးက ပြောသည်။

ယခုကဲ့သို့ ထွက်ခွာနေကြသဖြင့် ရန်ကုန်နှင့် မန္တလေးသို့ သွားသော ဘတ်စ်ကားများတွင် ကားလက်မှတ်ကို သွားချင်သည့် အချိန်တွင် အလွယ် တကူ ၀ယ်ယူ၍ မရဖြစ်နေပြီး လက်မှတ် တစ်စာင်ကို ၁၅ ရက်ခန့် စောင့်ဆိုင်း ၀ယ်ယူနေကြသည်ဟု ရသေ့တောင်မြို့ တိုးရတနာ ဘတ်စ်ကား ခရီးသွား လက်မှတ် ရောင်းသူ တစ်ဦးက ပြောသည်။

" ရသေ့တောင်ကနေ ရန်ကုန်ကို တိုက်ရိုက် ကားနဲ့ သွားလို့ မရဘူး။ စစ်တွေက တဆင့်ဘဲ သွားရ တယ်။ ဒါပေမယ့် ထိုင်း၊ မလေးရှားနဲ့ တရုတ်နယ်စပ်ဘက်ကို ထွက်နေကြသူတွေများတဲ့ အတွက် အခုရသေ့ တောင်မှာ ကားလက်မှတ် အရောင်းဆိုင်တွေ ဖွင့်ပြီး လက်မှတ်တွေ ကြိုတင် ရောင်းချ ပေးနေ ပါတယ်။ ကျွန်တော် တို့ဆီက ရန်ကုန်သွားမယ့် ကားလက်မှတ် တစ်စောင်ရဖို့ အတွက် အနည်းဆုံး ၁၅ ရက်ခန့် စောင့်ရပါတယ်။"

ရသေ့တောင်မြို့သည် စစ်တွေမြို့ မြောက်ဘက် မိုင် ၂၀ အကွာတွင် တည်ရှိပြီး ကားဖြင့် ရန်ကုန်နှင့် စစ်တွေသို့ တိုက်ရိုက်သွားလာ၍ မရသော်လည်း ဒေသမှ ထွက်ခွာသူ များပြားနေသဖြင့် စစ်တွေ ကား ကုမ္ပဏီများက ရသေ့တောင်မြို့ထိ လက်မှတ် အရောင်း ကောင်တာများ တိုးချဲ့ ဖွင့်လှစ် ရောင်းချ နေကြောင်း သူက ဆိုသည်။

" ရသေ့တောင်မြို့ပေါ်မှာ ကားလက်မှတ် အရောင်းကောင်တာ သုံးလေးခုခန့် ရှိပါတယ်။ တိုးရတနာ၊ ရွှေပြည်ရခိုင်၊ ကင်းစတား စတာတွေပါ။ ကားလက်မှတ်ကတော့ နေ့တိုင်း အပြည့် ရောင်းရတာပါဘဲ။ တအားကို သွားတဲ့သူ များနေပါတယ်" ဟု ပြောသည်။

ယခုကဲ့သို့ ထွက်ခွာနေကြသူများမှာ ရသေ့တောင် မြို့နယ် တစ်ခုတည်းက မဟုတ်ဘဲ ပုဏ္ဍားကျွန်း၊ ကျောက်တော်၊ မြောက်ဦီး၊ ပလက်ဝ၊ မင်းပြား၊ မြေပုံ၊ ပေါက်တော စသည် မြို့နယ်တိုင်း လိုလိုကဖြစ်ကြောင်း ရွှေပြည် ရခိုင် ကားဂိတ်မှ တာဝန်ရှိသူ တစ်ဦးက ပြောသည်။

" ပြည်ပကို ထွက်တာလား၊ ဘယ်ကို သွားကြတယ်ဆိုတာတော့ မပြောတတ်ဘူး။ အကုန် သွားနေကြ တာပါဘဲ။ မြို့နယ် စုံပါဘဲ။ ကျွန်တော်တို့ဆီက ဘတ်စ်ကားနဲ့ ရန်ကုန်ကို သွားကြ တာကတော့ နေ့တိုင်း အပြည့်ဘဲ။ ကားတစ်စီးမှာ ကလေး လူကြီး ၆၀ လောက် ဆန့်ပါတယ်။ ရန်ကုန်ကနေ ဘက်ကို သွားကြတယ် ဆိုတာတော့ ကျွန်တော်တို့ တပ်အပ် မသိဘူးဗျာ။"

ထိုကဲ့သို့ ထွက်ခွာနေကြရာတွင် မြို့ပေါ်ကထက် နယ်ဒေသက ပို၍ များကြောင်း ဒေသခံများက ပြောသည်။

"ပြည်ပကို ထွက်တာ ကျွန်တော်တို့ နေတဲ့ အနီးအနား ရွာလောက်ပြောရ ရမယ်ဆိုရင် တရက်ကို လူအနည်းဆုံး လူပေါင်း ၂၀ ကနေ ၃၀အထိ ပြည်ပကို အလုပ်လုပ်ဖို့ ထွက်ကြပါတယ်။ ထွက်တဲ့ လူတွေက လူကြီး လူငယ် အမျိုးသမီး ဆိုင်းစုံပါဘဲ" စေတီပြင်ရွာမှ ရပ်လူကြီးတဦးက ဟုနိရဉ္စရာသို့ ပြောသည်။

ယခုကဲ့သို့ ထွက်ခွာနေကြရခြင်းမှာ ရခိုင်ပြည်နယ် ကျေးလက် ဒေသများတွင် အလုပ်အကိုင်ရှား ပါး၍ ဖြစ်ကြောင်း သူက ဆက်ပြောသည်။

"ပြည်ပ ကို ထွက်ချင်လို့ထွက် ကြတာမဟုတ်ပါဘူး။ အဓိကတော့ အလုပ်မရှိဘူး။ အိမ်တစ်အိမ်မှာ အိမ်ထောင်ဦးစီး တယောက်လောက်ဘဲ အလုပ်ရှိတယ်။ လုပ်တာကလည်း လယ်ယာလုပ်ငန်းဆိုတော့ မိသားစု တစ်ခုလုံး စားဝတ်နေရေး အဆင်မပြေဘူး။ မဖူလုံဘူး။ အဲဒါကြောင့် ရှိတဲ့ ပစ္စည်းလေး တွေကို ပေါင်နှံ ရောင်းချပြီးတော့ ပြည်ပကို ထွက်ခွာနေကြတာ ဖြစ်ပါတယ်" ဟု ပြောသည်။

ပြည်ပနိုင်ငံသို့ ထွက်ခွာသွားသော်လည်း အခက်အခဲ အမျိုးမျိုးနှင့် ရင်ဆိုင်ကြုံတွေ့နေကြရပြီး လူတစ်ရာတွင် သုံးလေးဦးခန့်သာ အဆင်ပြေကြောင်း လောင်းချောင်း ကျေးရွာသား တဦးက ပြောသည်။

"ပြည်ပကို ထွက်တဲ့လူတွေ ဟာလဲသိပ် အဆင်ပြေကြတာ မဟုတ်ပါဘူး။ လူတစ်ရာမှာ သုံး လေးယောက်လောက်ပဲ အဆင်ပြေကြတာပါ။ အိမ်မှာ အလုပ်လက်မဲ့ နေမယ့်အစား ပြည်ပကို ထွက်ပြီး လုပ်တာက အိမ်ကိုငွေ မပို့နိုင်ရင်တောင် ကိုယ့်ဝမ်း အတွက်တော့ အဆင်ပြေတဲ့ သဘောမျိုးနဲ့ သွားနေကြတာ ဖြစ်ပါတယ်။"

ပြည်ပသို့ ထွက်ခွာနေသူများသည် တရုတ်၊ ထိုင်း၊ မလေးရှား သို့သာမက စစ်မက် အကြီးအကျယ် ဖြစ်ပွားနေသော ကချင်ပြည်နယ် ဘက်သို့ ထွက်ခွာနေကြသည်ဟု ဆိုသည်။

ယခုကဲ့သို့ ထွက်ခွာနေကြသဖြင့် ရခိုင်ပြည်နယ်၏ အနာဂတ် အခြေအနေမှာ ရင်လေးစရာ ဖြစ်ကြောင်း ရသေ့တောင်မြို့နယ် ပြည်နယ် လွှတ်တော် အမတ်က ဦးလှမောင်သိန်းက ပြောသည်။

ယခုကဲ့သို့ လူများ ရခိုင်ပြည်နယ်မှ စွန့်ခွာနေကြသဖြင့် ယခုနှစ် လယ်ယာ လုပ်ငန်းကိုလည်း များစွာ ထိခိုက်နိုင်ကြောင်း ရသေ့တောင်မြို့ပေါ်မှ လယ်သမားကြီး တစ်ဦးက ပြောသည်။

" အခု ပြဿနာက လယ်လုပ်မယ့် သူရင်းဌား လုံးဝ ရှာမရတဲ့ ပြဿနာပါ။ ရွာတွေမှာ လယ်လုပ်မယ့် သူတွေ မရှိသလောက် ဖြစ်နေပြီ။ အာဏာပိုင်တွေဘက်ကတော့ ဒီကိစ္စ အပေါ် အလေးအနက် စဉ်းစားတာမျိုးတော့ မတွေ့ရသေးဘူး။ လူအားနဲ့ လယ်လုပ်တဲ့ ရခိုင်ဒေသမှာ လယ်လုပ်မယ့်သူ မရှိရင် လယ်ယာလုပ်ငန်းကတော့ ရှေ့မှာ အများကြီး ထိခိုက်နိုင်ပါတယ်။"

သူရင်းဌား တစ်ဦး၏ ဈေးနုန်းမှာလည်း လုပ်သား ရှားပါးသဖြင့် လွန်ခဲ့သောနှစ်ကထက် ယခုနှစ်တွင် နှစ်ဆခန့် မြင့်တက် သွားကြောင်း သိရသည်။

" ရွာမှာ လူတွေမရှိတော့ ပြဿနာက ဘာဖြစ်လာ လဲဆိုတော့ ပွဲလန်းသဘင်တွေ ဖြစ်ရင် ကလေးနဲ့ အဖိုးကြီးတွေ လောက်ဘဲ ကျန်တော့တယ်။ လူပျို အပျို ရှာမရတော့ဘူး။ တချို့ ရွာတွေမှာဆိုရင် ကာလသား မရှိတဲ့ အတွက် ရှင်ပြုပွဲ၊ သမက်တက်ပွဲ ကျရင် ကာလသားကို တစ်ခြားရွာတွေက ဌားရတာ မျိုးတွေတောင် ရှိတယ်။ ရွာတွေမှာ လူက မရှိသလောက်ဖြစ် နေပါပြီ။ အဘုဘ ချရင်တောင်မှ အမျိုးသားတွေ မရှိတဲ့ အတွက် အမျိုးသမီးတွေက အလောင်းကို ထမ်းချရတဲ့ ရွာတွေလည်း ရှိနေပါပြီ"ဟု လယ်သမားကြီးက ပြောသည်။

ဘုရားသုံးဆူ ဓားစာခံများ လွတ်မြောက်လာ

By featured, ကျော်ခ on May 11, ဧရာဝတီ

ထိုင်း-မြန်မာနယ်စပ် ဘုရားသုံးဆူမြို့တွင် မွန်လက်နက်ကိုင်အဖွဲ့ တစ်ဖွဲ့၏ ဓားစာခံအဖြစ် ဖမ်းဆီးခေါ်ဆောင်သွားခြင်းခံရသော မြို့သား ဓားစာခံ ၄ ဦးကို ဖမ်းဆီးပြီး နှစ်ရက်မြောက် နေ့တွင် ပြန်လွှတ်ပေးခဲ့ကြောင်း ဖမ်းဆီးခံခဲ့ရသူများက ဧရာဝတီသို့ ပြောသည်။

ထိုင်းမြန်မာနယ်စပ် ဘုရားသုံးဆူဒေသ (ဓာတ်ပုံ - ခင်ဦးသာ / ဧရာဝတီ)

ယခုလ ၈ ရက်နေ့က ဘုရားသုံးဆူမြို့ ရပ်ကွက်(၂)က ထမင်းဆိုင် တဆိုင်ရှိ အမျိုးသား ၅ ဦးနှင့် အမျိုးသမီး ၇ ဦးကို လက်နက် ကိုင်အဖွဲ့က ဖမ်းဆီးခေါ်ဆောင်သွားရာ လမ်းခရီး၌ အမျိုးသား ၂ ဦးနှင့် အမျိုးသမီး ၁ ဦး ထွက်ပြေးသွားခဲ့၍ ကျန်ရှိ ၄ ဦးကို ယမန် နေ့က ပြန်လွှတ်ပေးလိုက်ခြင်းဖြစ်ကြောင်း လွတ်မြောက်လာသူ ကိုသက်ဦး က ပြောသည်။

“ကျနော်တို့ကို မနေ့ညနေ ၆ နာရီလောက်က ပြန်လွှတ်ပေးလိုက်တယ်။ မြို့ပေါ်ကို ည ၈ နာရီခွဲလောက်မှ ရောက်တယ်။ လမ်းပြ တယောက် ထည့်ပေးလိုက်တယ်။ နှိပ်စက်ညှဉ်းပန်းတာ ဘာညာမရှိပါဘူး။ ကောင်းကောင်းမွန်မွန် ပြန်လွှတ်လိုက်တာပါ”ဟု ကိုသက်ဦး က ဧရာဝတီသို့ ပြောသည်။

မြို့ခံများကို ဖမ်းဆီးသူ မွန်လက်နက်ကိုင်အဖွဲ့၏ ခေါင်းဆောင်မှာ နိုင်ထွန်းဖြစ်ပြီး ယခင်က မွန်ပြည်သစ် ပါတီတွင် တာဝန် ထမ်း ဆောင် ဖူးကြောင်း၊ အနားယူသွားပြီးနောက်၂၀၁၀ ပြည့်နှစ်ခန့်က စတင်ကာ ထိုင်း-မြန်မာနယ်စပ် မျက်နှာချင်းဆိုင် မြို့နှစ်မြို့ဖြစ် သော စံခလဘူရီ နှင့် ဘုရားသုံးဆူမြို့ နယ်စပ်များတွင် ဆက်ကြေးတောင်း၊ ဓားပြတိုက်မှုများပြုလုပ်နေသူဟု မွန်ပြည်သစ် ပါတီ ဘုရားသုံးဆူမြို့နယ် ဥက္ကဌ နိုင်ထောရော့ က ပြောသည်။

ထိုအဖွဲ့မှ အစိမ်းရောင် ပြောက်ကျားဝတ်စုံများနှင့် လက်နက်ကိုယ်စီ ကိုင်ဆောင်ထားသူ ၇ ဦးက ယခုလ ၈ ရက်နေ့တွင် မြို့ပေါ် အမှတ် (၂) ရပ်ကွက်သို့ဝင်ရောက်လာရာ ငုဝါ လမ်းထိပ်သို့အရောက်၌ ရဲကားနှင့် ရင်ဆိုင်တိုးသဖြင့် အနီးရှိ ထမင်းဆိုင်တွင်းမှ မြို့ခံ ၇ ဦးကို ဓားစာခံ ဖမ်းဆီးခေါ်ဆောင် သွားခြင်းဖြစ်ကြောင်း လွတ်မြောက်လာသူများက ပြောသည်။

“သူတို့က လမ်းထဲကိုဝင်လာတယ်။ တအိမ်အိမ်ကို သွားပြီး ဒုက္ခပေးဖို့နဲ့ တူပါတယ်။ ရဲကားက ပိတ်စောင့်နေတော့ သူတို့ ထွက်ပေါက် အတွက် ကျနော်တို့ကို ကောက်စွဲသွားတာပဲ။ ကျနော်တို့နဲ့ ဘာအငြိုးအတေးမှ မရှိဘူး။ ကျနော်တို့က ဆင်းရဲသားတွေပဲ။ သူတို့က ၇ ယောက်၊ အားလုံး ပြောက်ကျား ဝတ်စုံတွေနဲ့ပဲ၊ သူတို့က အရင် မွန်ပြည်သစ်တပ်ဖွဲ့ကလို့ ပြောတာပဲ”ဟု လွတ်မြောက်လာသူ အခြားတဦး ကလည်း ပြောသည်။

ယမန်နေ့ညက လွတ်မြောက်လာသူ ၄ ဦးအား ဘုရားသုံးဆူ မြို့ခံ စစ်တပ်၊ ရဲနှင့် အာဏာပိုင်အဖွဲ့များက ခေါ်ယူ မေးမြန်းမှုများ ပြုလုပ်ခဲ့သည်ဟု ဆိုသည်။

“ကျနော်တို့ကို တောထဲခေါ်သွားတယ်။ သူတို့စခန်းတော့ မတွေ့ခဲ့ဘူး။ သူတို့နေတာတောင် သစ်ပင်ကို ပုခက်ကလေးတွေချည်ပြီး အိပ်ကြတာ ကျနော်တို့ကတော့ မြေကြီးပေါ်မှာပဲအိပ်ခဲ့ကြရတယ်။ မနက်ဆိုရင်တော့ သူတို့စားတဲ့အတိုင်း စားရတယ်။ ငါးတွေ ဘာတွေဖမ်းပြီး ကျနော်တိုိ့ကိုချက်ကြွေးတယ်၊ နှိပ်စက်တာ ဆဲတာတို့ မလုပ်ဘူး။ သူတို့အတွက် လုံခြုံလောက်ပြီဆိုမှ ကျနော်တို့ကို ပြန်လွှတ်ပေးလိုက်တာပါ”ဟု ပြန်လွတ်လာသူ ကိုသက်ဦး က ပြောသည်။

မွန်ပြည်သစ် ထိန်းချုပ်ရာနယ်မြေများအတွင်း၌ နိုင်ထွန်းနှင့်အဖွဲ့က ဆက်ကြေးတောင်း၊ ဓားပြတိုက်ခြင်းများကြောင့် ဒေသအချို့တွင် မွန်ပြည်သစ်ကို အထင်မှားခြင်းများ ရှိနေသဖြင့် ရှင်းလင်းမှုများပြုလုပ်နေရကြောင်း၊ ထို့ကြောင့် နိုင်ထွန်းနှင့်အဖွဲ့ကို မွန်ပြည် သစ် က ချေမှုန်းရန် ခြေရာခံ လှုပ်ရှားနေပြီဖြစ်ကြောင်း သိရသည်။

“သူတို့ရှိတဲ့အတွက်ကြောင့် ကျနော်တို့ကို ပြည်သူတွေက သံသယ မျက်လုံးတွေနဲ့ အကြည့်ခံရတဲ့ ပုံစံမျိုးတွေရှိတာပေါ့နော်။ ကျနော်တို့ဘက်ကတော့ အတတ်နိုင်ဆုံး ရွာသားတွေကို ဒီအဖွဲ့နဲ့ မပတ်သက်ဘူး၊ မဆိုင်ဘူးဆိုတာ ရှင်းပြတယ်။ ကျနော်တို့ မွန်ပြည် သစ် ပါတီကလည်း သူတို့အဖွဲ့ကို ချေမှုန်းဖို့ ခြေရာခံလှုပ်ရှားနေတယ်”ဟု နိုင်ထောရော့ က ပြောသည်။

ဘုရားသုံးဆူမြို့သည် မကြာခဏ ဗုံးပေါက်ကွဲမှု၊ ပစ်ခတ်မှု၊ ဓားပြတိုက်မှုများ ဖြစ်ပွားနေခြင်း၊ မြို့ပေါ်တွင် အမည်မသိ လက်နက် ကိုင် တပ်များ၏ လှုပ်ရှားသွားလာမှုများကြာင့် မြို့ခံများကလည်း စိုးရိမ်နေကြသည်။

ယမန့်နေ့ည ၉ နာရီခန့် ကလည်း မြို့လယ်ရှိ ဥဒေါင်းကန်ပွဲဈေးနှင့် ကိုက် ၁၀၀ ခန့်တွင် အမည်မသိ လက်နက်ကိုင် နှစ်ဖွဲ့ ပစ်ခတ်ကြပြီး ၁ ဦးသေဆုံးကာ ၁ ဦးဒဏ်ရာ ရရှိသွားကြောင်း ဒေသအခြေစိုက် မွန်ပြည်သစ် ပါတီ ဆက်ဆံရေးရုံးနှင့် မြို့ခံမျက်မြင်များက ပြောသည်။

“တစ်ဖက် ၅ ယောက်လောက်ရှိတဲ့ ကရင်အဖွဲ့တွေပဲ နှစ်ဖက်ပစ်ကြရင်းနဲ့ KPDF ဆိုတဲ့အဖွဲ့က ဗိုလ်ကြီး ရဲနိုင် ဆိုတဲ့ တယောက် ကျသွားတယ်။ ဘာပြဿနာဖြစ်ကြလည်းတော့ မသိဘူး။ ခုချိန်မှာ အဖွဲ့တွေနာမည်တွေက ဒီမှာ အရမ်းများတယ်။ ၃-၄ ယောက် တဖွဲ့၊ ၁၀ ယောက်တဖွဲ့ ငြိမ်းချမ်းရေးယူထားတော့။ ဘာအဖွဲ့တွေမှန်း ကျနော်တို့တောင် မသိတော့ဘူး”ဟု နိုင်ထောရော့ က ပြောသည်။

ပစ်ခတ်မှုများဖြစ်ပွားခဲ့သည့် နေရာအနီး၌ တစ်ပတ်ခန့်ကြာပြီဖြစ်သော ဥဒေါင်းကန် ပွဲဈေးတွင် လောင်းကစားဝိုင်း မျိုးစုံ ခင်းကျင်း ထားကြောင်း၊ မြို့ခံမဟုတ်သော လူစိမ်းပေါင်းစုံကိုလည်း တွေ့ရှိရကြောင်း မြို့ခံများက ပြောဆိုကြသည်။

အသက်မပြည်သည့် ကလေးများအား KIA က တပ်သားသစ် စုဆောင်း

ကြာသပတေးနေ့၊ မေလ 10 သတင်းနှင့်မီဒီယာကွန်ယက်

ဝိုင်းမော် မြို့နယ်ရှိ ကျေးရွာတခု အတွင်း ကချင်ပြည် လွတ်လပ်ရေး တပ်မတော် KIA က အသက်မပြည့်သည့် ကလေးငယ်များအား တပ်သားသစ် စုဆောင်းနေကြောင်း ဒေသခံ များက ပြောသည်။

KIA တပ်ဖွဲ့ဝင် (၅၀) ခန့်သည် ၀ိုင်းမော်မြို့အရှေ့ဖက် (၇) မိုင်ခန့်အကွာရှိ နောင်ဆီပေါ ကျေးရွာအတွင်း ယခုလ (၃) ရက်နေ့ ည (၁၀) နာရီခွဲ အချိန်ခန့်က ၀င်ရောက်ခေါ်ယူ ခဲ့သည်ဟု ၀ိုင်းမော် မြို့သို့ ရောက်ရှိလာ သည့် ဒေသခံ တဦးက အခုလို ပြောသည်။

“သူတို့ဝင်လာတော့ လမ်းပေါ်မှာ ထိုင်ပြီး စကားပြောနေတဲ့ လူငယ်တွေရော တချို့ ကလေးအဖေတွေရော ကြုံတဲ့သူ အကုန်ဆွဲသွားတယ်။ ပြီးတော့ အိမ်တွေပေါ်တက်ပြီး အိပ်ခန်းထဲအထိ ၀င်ဆွဲတယ်လေ။ အဲဒီမှာ အသက် (၁၃)၊ (၁၄)၊ (၁၅) နှစ် အရွယ် ကလေးမလေး သုံးယောက် ပါသွားတယ်။”

ထို့အပြင် အခြား ဒေသခံ တဦးကလည်း “သားသမီးတွေ အဆွဲခံရတော့ သူတို့ အမေတွေက ပြန်လိုက်ဆွဲကြ တာပေ့ါ။ ဒါပေမယ့် မရဘူး။ အတင်းဆွဲခေါ်သွားပြီးမှ ရွာပြင်ရောက်တာနဲ့ နှစ်ယောက်တတွဲ လက်ပြန်ကြိုး တုတ်ပြီးခေါ်သွားတယ်။” ဟု ဆက်လက်ပြောဆိုသည်။

စုဆောင်းရေး ဆွဲခံရသူ (၁၇) ဦး ရှိသည့်အနက် အသက်မပြည့်သူများအား ကျေးရွာ တာဝန်ရှိသူ တချို့က ပြန်လည် တောင်းခံခဲ့သော်လည်း အသက် (၄၀) ကျော် အမျိုးသား (၄) ဦးကိုသာ ပြန်လွတ်ပေးခဲ့သည်။ ကျန်(၁၃) ဦးကိုမူ ရဲဘော် လုပ်ခိုင်းမည်ဟု KIA အရာရှိက ပြောကြောင်း သိရသည်။

ယခုဖြစ်ရပ်အပေါ် “ဒီလို လုပ်တဲ့ကိစ္စတွေကို ဖြစ်နိုင်ရင် KIA က လူကြီးတွေ ဖြစ်တဲ့ ဦးလနန်တို့ ဘာတို့ ကချင်ခေါင်းဆောင်တွေကို ပြောပေးပါဦးဗျ။ အခန်းထဲထိ ၀င်ဆွဲ တာတော့ မသင့်တော်ဘူး။ ကျနော်တို့ ဒေသခံတွေ အမြင်မှာတော့ နည်းနည်း ရိုင်းတယ်ဗျ။” ဟု နောင်ဆီပေါ ကျေးရွာသားက ပြောသည်။

ယင်းကိစ္စနှင့် ပတ်သက်၍ KIA တပ်ဖွဲ့ ပြောခွင့်ရ ပုဂ္ဂိုလ်များထံ ဖုန်းဖြင့် ဆက်သွယ်ခဲ့ သော်လည်း ဆက်သွယ်၍ မရခဲ့ပါ။

နောင်ဆီပေါ ကျေးရွာတွင် ရှမ်း၊ ကချင်နှင့် လီဆူး တိုင်းရင်းသားများ နေထိုင်ကြပြီး အများစုမှာ ရှမ်းလူမျိုးများ ဖြစ်၍ လွန်ခဲ့သည့် တလခန့်ကလည်း ယခုကဲ့သို့ ခေါ်ယူမှု ပြုလုပ်ခဲ့သေးသည်။ ထိုစဉ်က လီဆူး တိုင်းရင်းသား (၃) ဦးနှင့် ရှမ်း တိုင်းရင်းသားများအား ခေါ်ဆောင်သွားခဲ့ပြီး ယခုအကြိမ်တွင် ရှမ်းတိုင်းရင်းသားများကိုသာ ခေါ်ဆောင်သွား ခြင်းဖြစ်သည်။

ယခုလုပ်ရပ်နှင့် ပတ်သက်၍ ရွာသား တချို့က အနီးဆုံး စခန်းဖြစ်သည့် ရွှေညောင်ပင် အခြေစိုက် အစိုးရ၏ ခြေမြန်တပ်ရင်း ခမရ (၃၂၁) သို့ သွားရောက် အကြောင်းကြား ခဲ့သော်လည်း အထက် အမိန့်မရ၍ မဆောင်ရွက်နိုင်ကြောင်း စခန်း တာဝန်ရှိသူတဦးက ပြောဆိုခဲ့သည်ဟုလည်း ဒေသခံများက ဆိုသည်။

ထို့အပြင် “ကျနော်တို့ ရှမ်းတွေက ရိုးပါတယ်ဗျ။ ကြောက်လည်း ကြောက်ကြတယ်။ ဒီလိုကိစ္စတွေကို ဟိုဖက်ကိုလည်း မတိုင်ရဲ၊ ဒီဖက် ကိုလည်း မတိုင်ရဲနဲ့ ဘယ်သူ့ကို အားကိုးရမလဲ မသိတော့ဘူး။” ဟု ဒေသခံ တဦးက ပြောဆိုသည်။

လူ့အခွင့်အရေး ပညာပေးဌာန (မြန်မာနိုင်ငံ) HREIB ဒါရိုက်တာ ဦးအောင်မျိုးမင်းက လူ့အခွင့်အရေး ကြေညာစာတမ်းပါ ကလေးအခွင့်အရေးဆိုင်ရာ CRC စာချုပ် အပိုဒ် (၃၈)တွင် အသက် (၁၅) နှစ်အောက် ကလေးများအား စစ်မှု ထမ်းခြင်း မပြုရဟု ဖော်ပြထားသလို မြန်မာနိုင်ငံ၏ စစ်မှုထမ်း ဥပဒေ၌ (၁၈) နှစ်အောက် ကလေးများအား စစ်မှုထမ်းခြင်း မပြုရန် ဖော်ပြထားသည်ဟု ဆိုသည်။

ထို့အပြင် အစိုးရတပ်အပါအ၀င် မည်သည့် လက်နက်ကိုင်တပ်ဖွဲ့မဆို လက်နက်ကိုင် ပဋိပက္ခအတွင်း ပါဝင်သည့် ကလေးများအား စောင့်ရှောက်ရန် တာဝန်ရှိပြီး ကလေးငယ်များအား စစ်မှုထမ်းခိုင်းခြင်းကို လုံးဝ ကန့်ကွက်ကြောင်း ဆက်ပြောသည်။

လက်နက်ကိုင် ပဋိပက္ခ ဖြစ်ပွားနေသည့် နိုင်ငံများတွင် ကလေးငယ်များ မြေဇာပင် ဖြစ်နေကြောင်း ၂၀၁၁ ခုနှစ် မေလဆန်းက ထုတ်ပြန်သည့် ကုလသမဂ္ဂ၏ ကလေးသူငယ်နှင့် လက်နက်ကိုင် ပဋိပက္ခ အစီရင်ခံစာ၌ ဖော်ပြထားပြီး မြန်မာနိုင်ငံ၌ အစိုးရအပါအ၀င် လက်နက်ကိုင် တိုင်ရင်းသား တပ်ဖွဲ့များအတွင်း ကလေးစစ်သား အသုံးပြုမှုများ ဆက်ရှိနေဆဲ ဖြစ်ကြောင်း ဖော်ပြသည်။

KIA နှင့် အစိုးရတပ်တို့ (၁၁) လကျော် ဖြစ်ပွားနေသည့် တိုက်ပွဲအတွင်း အစိုးရတပ်မှ လူ့အခွင့်အရေး ချိုးဖောက်မှုများ ရှိသလို KIA ဖက်မှ မကြာခနဆိုသလို တပ်သားသစ် စုဆောင်းမှုများ ပြုလုပ်နေသည်။

လွန်ခဲ့သည့် ဖေဖော်ဝါရီလ (၂) ရက်နေ့ကလည်း မြစ်ကြီးနား မြို့နယ် တာလောကြီး ကျေးရွာမှ လူငယ် (၁၂) ဦးအား KIA မှ စုဆောင်းရေး ခေါ်ဆောင်သွားပြီး အမျိုးသမီးငယ် (၄) ဦးအား အဓမ္မပြုကျင့်ခဲ့သည်။

အစိုးရတပ်နှင့် KIA တို့ ဖြစ်ပွားနေသည့် (၁၁) လကျော် တိုက်ပွဲများအတွင်း မြစ်ကြီးနား၊ ၀ိုင်းမော်နှင့် ဗန်းမော် မြို့ပေါ် ဒေသများ အပါအ၀င် တရုတ်နယ်စပ်သို့ ထွက်ပြေးလာသည့် ဒုက္ခသည် (၆) သောင်းကျော်ရှိသည်။ ကချင်ပြည်နယ် ငြိမ်းချမ်းရေးအတွက် နှစ်ဖက် ကိုယ်စားလှယ်များ အနည်းဆုံး (၆) ကြိမ်ထက်မနည်း ဆွေးနွေးပြီးသော်လည်း ယနေ့ထိ ပြေလည်မှု မရသေးပါ။

KIA က ရှေ့တန်း စခန်းကုန်းတခု ဆုတ်ခွာ၊ တိုက်ပွဲ ဆက်လက် ပြင်းထန်

ကြာသပတေးနေ့၊ မေလ 10 သတင်းနှင့်မီဒီယာကွန်ယက်

ကချင်ပြည်နယ်အတွင်း အစိုးရတပ်နှင့် ကချင်ပြည် လွတ်လပ်ရေး တပ်မတော် KIA တို့ ယခုရက်ပိုင်းအတွင်း တိုက်ပွဲများ ပြင်းထန်နေပြီး KIA ၏ ရှေ့တန်းတပ်စခန်းတခု ဆုတ်ခွာလိုက်ရသည်။

ဒေါ့ဖုန်းယန်မြို့ အရှေ့ဖက်တောင်ကြောပေါ်ရှိ ပန်စွန်တပ်စခန်းအား အစိုးရတပ်က ထိုးစစ်ဆင် တိုက်ခိုက်ခဲ့ရာ ယမန်နေ့နံနက်က ဆုတ်ခွာပေးလိုက်သည်ဟု KIO ပြောခွင့်ရ ပုဂ္ဂိုလ် ဦးလနန်က အခုလို ပြောသည်။

“မနေ့က သူတို့လက်နက်ကြီးတွေနဲ့ ပစ်တယ်။ ၁၂၀ တို့၊ ၈၁ မမတို့၊ RPG ပုခုံထမ်း လောင်ခြာတွေနဲ့ ပစ်ခတ်တာများလာလို့ မနေ့က တိုက်ပွဲ တော်တော် ပြင်းထန်သွားတယ်။ အဲဒါ ကျနော်တို့ ပြန်ဆုတ်ပေးလိုက်တယ်။ ဒီနေ့လည်း အဲဒီ ဘေးနားမှာ ရှိတဲ့ တောင်ကုန်းတွေ၊ စခန်းတွေကို ၀င်စီးဖို့ လုပ်နေကြတယ်။”

ယမန်နေ့တိုက်ပွဲတွင် KIA ဖက်မှ (၂) ဦး ဒဏ်ရာရခဲ့ပြီး အစိုးရတပ်မှ ထိခိုက်ဒဏ်ရာရသူ ဦးရေ မသိသော်လည်း (၂) ဦးကျဆုံးသည်ဟု သိရကြောင်း ဆက်လက် ပြောဆိုသည်။

လွန်ခဲ့သည့် ဧပြီလက ယခု ဆုတ်ခွာလိုက်သည့် ပန်စွန်တပ်စခန်းအား အစိုးရတပ်မှ ပထမအကြိမ် တိုက်ခိုက် သိမ်းပိုက်ခဲ့ပြီး နောက်တနေ့တွင် ပြန်လည် ထွက်ခွာသွားရာ KIA မှ နေရာပြန်ယူထား ခဲ့သည်။ ယခုတဖန် အစိုးရတပ်က ထပ်မံ တိုက်ခိုက် သိမ်းပိုက် လိုက်ခြင်း ဖြစ်သည်။

ဒေါ့ဖုန်းယန်မြို့တွင် အစိုးရ၏ ခြေလျင်တပ်ရင်း ခလရ (၁၄၂) အခြေချထားပြီး ပန်စွန် စခန်းသည် မြို့နှင့် တပ်၏ အပေါ်စီးနေရာတွင် ရောက်နေသဖြင့် စစ်ရေးအရ စိုးရိမ်သည့်အတွက် ပြန်လည် သိမ်းပိုက်ခြင်း ဖြစ်နိုင်ကြောင်း ဦးလနန်က သုံးသပ်သည်။

တချိန်တည်းတွင် လိုင်ဇာမြို့ အရှေ့ဖက်ရှိ KIO ဌာနချုပ်ဟောင်း တည်ရှိရာ ပါဂျောင်ဒေသ တ၀ိုက်တွင် အစိုးရတပ်ရင်း (၃) ရင်း အင်အား ဖြည့်တင်းထားပြီး ယခုရက်ပိုင်းအတွင်း တိုက်ပွဲ ပြင်းထန်စွာ ဖြစ်ပွားနေသည်ဟု ဦးလနန်က အခုလို ပြောသည်။

“ပါဂျောင်မှာ အရင်တုန်းက ဗန္ဒုလကုန်းလို့ခေါ်တဲ့ နေရာနဲ့ အင်ဂါရှန် ကြားမှာ တိုက်ပွဲ ဖြစ်တာ (၃) ရက်လောက် ရှိသွားပြီ။ အရင်ကတော့ သူတို့တပ်စောင့် (၂၀) လောက်ပဲ ရှိတဲ့နေရာ။ အခုက အဲဒီမှာ ရာနဲ့ချီပြီး လှုပ်ရှားနေတော့ တိုက်ပွဲက ခနခန ဖြစ်နေတာပေ့ါဗျာ။ မနေ့ကတော့ သူတို့ဖက်က အထိအခိုက် တော်တော် များတယ်။ (၈) ယောက်လောက် အဲဒီမှာ ကျသွားတယ်။”

ပါဂျောင်ဒေသသည် ၁၉၉၄ ခုနှစ် စစ်အစိုးရလက်ထက် အပစ်အခတ် မရပ်စဲမီအချိန်က KIO ဌာနချုပ်ဖြစ်ပြီး နောက်ပိုင်းတွင် လိုင်ဇာမြို့သို့ ပြောင်းရွှေ့သွားခဲ့သည်။ သို့သော် ယနေ့ချိန်ထိ KIO ဌာနချုပ်အဖြစ် ဆက်လက် ရပ်တည်ထားဆဲဖြစ်သည်။

လောလောဆယ် ဗန်းမော်ဖက်မှ တက်လာသည့် အင်အား (၆၀၀) ခန့်ရှိ တပ်မတခုနှင့် မိုးကောင်းမြို့ အခြေစိုက် စစ်ဆင်ရေး ကွပ်ကဲမှုဌာနချုပ် စကခ (၃) လက်အောက်ခံ တပ်များ ယခုရက်ပိုင်းအတွင်း ထပ်မံ အင်အား ဖြည့်တင်းလာကြောင်း သိရပြီး ယင်းတပ်များ ပါဂျောင်ဒေသသို့ ပို့ဆောင်လာပါက ပါဂျောင် ဌာနချုပ်အား ထိုးစစ်ဆင်လာ နိုင်ကြောင်း ဦးလနန်က သုံးသပ်သည်။

သို့သော် သမ္မတ ဦးသိန်းစိန်က KIO ဌာနချုပ်အား ထိုးစစ်ဆင်ခြင်း မပြုပါဟု ပြောထား သည့်အပေါ် ရထားပို့ဆောင်ရေးဝန်ကြီး ဌာန ပြည်ထောင်စု ငြိမ်းချမ်းရေး ဖော်ဆောင်ရေး အဖွဲ့ခေါင်းဆောင် ဦးအောင်မင်းက ဧပြီလ (၂၉) ရက်နေ့ သတင်းစာ ရှင်းလင်းပွဲတွင် ထောက်ခံ ပြောကြားခဲ့သည်။

ကချင်ပြည်နယ်အတွင်း လက်ရှိဖြစ်ပွားနေသည့် အခြေအနေပေါ် မူတည်၍ ယင်းကိစ္စ အပေါ် သံသယ ဖြစ်မိကြောင်းနှင့် KIO အား အမြစ်ပြတ် ချေမှုန်းတော့မည်ဟု မြောက်ပိုင်းတိုင်း စစ်ဌာနချုပ် တိုင်းမှူးက ယမန်နေ့ ပန်ဝါတွင်ပြုလုပ်သည့် လူထုအစည်းအဝေးတွင် ပြောခဲ့သည်ဟု သိရကြောင်း ဦးလနန်က အခုလို ပြောသည်။

“KIA ရဲ့ လုပ်ရပ်ကြောင့် ခင်ဗျားတို့ ဒေသခံလူထုတွေ နစ်နာနေရပြီ။ ဒါကြောင့်မို့ ဒီကိစ္စ အပေါ် ခင်ဗျားတို့ ၀ိုင်းပြီး တွန်းလှန်ရမယ်ဆိုတဲ့ဟာမျိုး၊ နောက်တခုက KIO ဆိုတာ ကချင် လူထုကို ကိုယ်စား မပြုပါဘူးဆိုတဲ့ဟာမျိုးတွေနဲ့ ကျနော်တို့ဖက်မှာတော့ ညအချိန်မှာ တိုက်လို့ရတဲ့ လေယာဉ်တွေ အများကြီး ရှိတယ်။ အဲဒါတွေ သုံးပြီးမှ KIO ကို အမြစ်ပြတ် ခြေမှုန်းတော့မယ်ဆိုပြီး စည်းရုံးရေး ဟောပြောပွဲ လုပ်သွားတယ်ခင်ဗျ။”

KIO နှင့် အစိုးရတို့ (၁၇) နှစ်ကြာ အပစ်အခတ်ရပ်စဲခဲ့ရာမှ တိုက်ပွဲပြန်လည်ဖြစ်ပွားမှု ယနေ့ (၁၁) လ ပြည့်ခဲ့ပြီး ဒုက္ခသည် ခြောက်သောင်းကျော် မြို့ပေါ်နှင့် တရုတ်မြန်မာ နယ်စပ်ဒေသများသို့ ထွက်ပြေး တိမ်းရှောင်နေရသည်။

ကချင်ပြည်နယ် ငြိမ်းချမ်းရေးအတွက် KIO နှင့် အစိုးရ၏ ငြိမ်းချမ်းရေး ဖော်ဆောင်ရေး အဖွဲ့ နှစ်ဖက်ကိုယ်စားလှယ် အကြား တရုတ်နိုင်ငံ ရွှေလီမြို့တွင် (၃) ကြိမ်ထက်မနည်း တွေ့ဆုံဆွေးနွေးခဲ့သော်လည်း ယနေ့ထိ ပြေလည်မှု မရသေးပါ။

=========================

မိုးမခ

Posted in: